EKESOTE 10
10
Hee
1Nee ui leva e te Eteleno kia Moisese: Alu kia Falaone, koteuhi kua fakafefeka tona loto mo te loto o ana tagata faifekau, o tupu ke fakaha ai aku fakailoga i te lotomalie o natou. 2E toe tupu foki ke ke fakamatala ki tou foha mo te foha o tou foha te mea ae nee au fai ki te kau Esipito, pea mo te u fakailoga ae nee au fakaha i te lotomalie o natou. Pea ke kotou iloi ko au ko te Eteleno. 3Nee alu leva ia Moisese mo Alone kia Falaone, o ui kia ia: Koeni te folafola a te Eteleno, ko te Atua o te kau Hepeleo: E kaku anai ki afea tau fakafisi ke ke fakamalalo i oku mua? Tuku taku hahai ke olo, o tupu ke natou tauhi kia au. 4Kapau e mole ke tuku anai taku hahai ke olo, koeni e au fekaui mai anai i te aho apogipogi ni hee ki te kele katoa o tou fenua. 5E natou uufi anai te fuga fenua, pea e mole feala anai he toe sio ki te fenua. E natou kai anai te mea ae nee hao, te mea ae nee tuku e te ua maka, io, e natou kai anai te ulu akau fuli ae e homo i akotou gaueaga; 6pea e natou fakafonu anai ou fale, mo te u fale o au tagata faifekau fuli, pea mo te u fale o te kau Esipito katoa. Nee heeki sisio au tamai mo te u tamai o au tamai ki he mea feia talu mai tanatou tupu o kaku mai ki te aho nei. Pea nee mavae leva ia Moisese i te fale o Falaone. 7Nee ui leva e te u tagata faifekau a Falaone kia ia: E kaku anai ki afea te nofo a te tagata aeni ko he malaia kia tatou? Tuku te hahai aena ke olo, pea ke natou tauhi te Eteleno, tonatou Atua. Pe heeki ke sio ki te mamate o Esipito?
8Nee toe liliu age leva ia Moisese mo Alone kia Falaone. Pea nee ui leva e Falaone kia naua: Koutou olo, pea koutou tauhi te Eteleno, ko tokotou Atua. Ko ai koa natou ae e olo anai? 9Nee tali leva e Moisese: E matou olo anai mo amatou fanau mo tamatou kau matua, mo omatou foha, mo amatou taahine, mo amatou ovi, pea mo amatou pipi; koteuhi e tonu ke matou fai he aho fakafiafia ki te Eteleno. 10Nee ui leva e Falaone kia naua: Ke nofo te Eteleno mo koutou o hage ko taku tuku koutou ke olo, koutou mo akotou fanau! Ke kotou tokaga koteuhi e tuu te malaia i okotou mua! 11Kailoa, kailoa, ke koutou olo ia koutou pee ko te u tagata, pea ke koutou tauhi ki te Eteleno, koteuhi koena te mea ae nee kotou kole mai ki ai. Pea nee kapu naua maia mua o Falaone.
12Pea nee ui leva e te Eteleno kia Moisese: Hiki tou nima ki te fenua o Esipito pea ke hake te u hee ki te fenua o Esipito, ke natou kai te u luna o te kele, pea mo te u mea fuli ae nee hao i te ua aisi. 13Pea nee hiki leva e Moisese tona tokotoko ki te fenua o Esipito, pea nee fakaagi leva e te Eteleno he matagi mai te potu esite ki te fenua i te aho katoa aia mo te po katoa aia. I te pogipogi uhu nee aumai leva e te matagi o te potu esite ni hee. 14Nee mafolafola leva te u hee i te fenua katoa o Esipito, pea nee natou to leva ki te fenua katoa o Esipito. Nee kehe osi te lahi o te u hee, nee heeki hoko he mea feia i mua, pea e mole toe hoko anai he mea feia ki amuli. 15Nee natou mafolafola leva i oluga o te fenua katoa, pea nee fakapouli leva te fenua katoa; nee natou kai leva te u luna fuli o te kele mo te u fua o te ulu akau, mo te u mea fuli ae nee hao mai te ua aisi; nee mole toe hao leva he lau akau fuluihega i te ulu akau, pee ko he luna i te u gaueaga, i te fenua katoa o Esipito.
16I te mea aia, nee paui leva e Falaone ia Moisese mo Alone, o ui kia naua: Kua au agahala ki te Eteleno, tokotou Atua, pea mo kolua. 17Kae ke ke fakamolemole mai ki taku agahala i te faiaga aeni; pea ke kolua kole ki te Eteleno tokolua Atua, ke fakamamao atu ia au te malaia lahi aeni. 18Nee mavae leva ia Moisese i te fale o Falaone pea nee faikole leva ia ia ki te Eteleno. 19Nee fakaagi mai leva e te Eteleno he matagi malohi mai te potu uesite, pea nee ave leva e te matagi te u hee o laku ki te tai Kula; nee mole toe mau leva he hee e tahi i te fenua katoa o Esipito. 20Nee fakafefeka leva e te Eteleno te loto o Falaone pea nee mole tuku leva e Falaone te u fanau a Iselaele ke olo.
Fakapouli i Esipito
21Nee ui leva e te Eteleno kia Moisese: Hiki tou nima ki te lagi, pea ke to he fakapouli ki te fenua katoa o Esipito, io, he pouli gaogao. 22Nee hiki leva e Moisese tona nima ki te lagi; pea nee to leva he fakapouli gaogao i te fenua katoa o Esipito ia aho e tolu. 23Nee mole toe feala leva ke fesioaki, pea nee mole toe malaga leva he tahi mai tona nofoaga i te u aho aia e tolu. Kae nee mau leva te malama i te kogamea ae nee nonofo ai te u fanau a Iselaele.
24Nee paui leva e Falaone ia Moisese, o ui: Kotou olo, o tauhi ki te Eteleno: E tuku anai akotou ovi mo akotou pipi, kae e feala anai ke olo akotou fanau mo koutou. 25Nee tali leva e Moisese: E ke tuku mai anai, e koe totonu, ki omatou nima te mea ae e aoga ki amatou sakilifisio mo amatou failaulau ae ka matou momoli anai ki te Eteleno, tomatou Atua. 26E olo anai amatou faga manu mo matou pea e mole toe tuku anai he kii moi paninia pe e tahi i heni; koteuhi e tonu ke matou filifili i te u mea aia te mea ae ke matou momoli ki te Eteleno, tomatou Atua; pea e mole matou iloi te mea ae e matou filifili anai ke momoli ki te Eteleno, kae e heeki matou kaku ki te kogamea ae e tonu ke matou olo ki ai. 27Nee fakafefeka leva e te Eteleno te loto o Falaone, pea nee mole loto leva Falaone ke tuku natou ke olo. 28Nee ui leva e Falaone kia Moisese: Mavae i toku fale! Aua naa ke toe ha anai i oku mua, koteuhi ko te aho pe ae e ke toe ha anai i oku mua, e ke mate anai. 29Nee tali leva e Moisese: Kua ke ui ki ai, e mole au toe ha anai i ou mua.
Trenutno izbrano:
EKESOTE 10: WB2011
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland