MATHAIIN 27
27
Isua Pilat Akom
(Mk 15.1; Lk 23.1-2; Jn 18.28-32)
1Zing khuavara, chaizung ngai le ulian ngai a lom u na Isua ha athat ranga anril u. 2Hatuka akhit u na ram ulian Pilat a kom atuang u na apek u.
Juda Iskariot Athi
(Kts 1.18-19)
3Hanke ansur pu Juda han ariata ei that rang ke ani u zei atia, hanke ansira ha sumru somanthum ei lak ha chaizung le ulian ngai kom a makhira, “Masial abui thisen kei masuak hin asia ke ka ni zei,” ati. #Kts 1.18-19 4“Koini imo, nangin re na ti,” ati pe u. 5Hanke ha sum ngai ha Pathian biakina ava maka, mo-ol andena athi.
6Hatuka chaizung ngaiin ha sum ngai alaka, “Hiva boma asiak rua nimak, asik chu hiva hi thisen man keng,” ati u. 7Hanke achonga, anril u na ram tei mi ei anphumna rang ati na ha sum le phil abuak ngai phai arachok u. 8Hasik han avian tenpei ha phai ha “Thisen phai” anti.
9Hava ha Jeremia deari ei ril chong ei chuk, “Hatuka, amanin ha sum somanthum alaka hava man ha aman amasat u na, Israel nai ngai senkhatin aman amasat u. #Zek 11.12-13 10Amanin hava ngai ha alaka bel abuak ngai phai ranga apek u na. Puman chong ei na pek anga.”
Aram Ulian Makunga Rui Anril
(Mk 15.2-5; Lk 23.3-5; Jn 18.33-38)
11Hava han Isua ha ram ulian makunga, a manding u ram ulian han a rakela, “Juda ngai reng mo na ni?” Isuan, “Nangke ati,” ati pe. 12Hatuka chaizung ngai le ulian ngaiin, ama chunga ei siatna tin atho u na aman masang thak mak.
13Hanke Pilatin ati pe na, “Ei na ti u so remak che mo itukmo ei na masiat u na ei ril u so?” ati.
14Aman chong bai khat ngal masang mak, hava han ram ulianin achalaka achang ei mandong.
Athi Ranga Anti
(Mk 15.6-15; Lk 23.13-25; Jn 18.39—19.16)
15Hatuka ram ulian dan anga panta tik mipui ranga ankhum khat ei zong u tak ha ei mazok. 16Hava han ankhum pe u raming anthang khat ama ha Barabba. 17Hanke lokona a om u lehan Pilatin ei ti pe, “Imo na ti u tumo kei na mazok pe u rang Barabba mo Isua mo? Krista anti ha?” 18Asik chu mumak sika ei hong pek u keng atia ariat.
19Ama hi ruiril na sutmuna ansuta, hava laitak a nungakin ei hong manril, “Ha minzik ranga ite tho no ro asik chu avian ka ramanga ama sika achan ka duk ana.” 20Hatuka chaizung ngai le ulian ngaiin mi ngai ha kuarbut ei pek u, amani ha Barabba ha ei zonga Isua ha ei that u rang. 21Hanke ram ulian han hangai ha ei ti pe, “Imo na ti u hiva anni a tumo kei mazok rang?” Amanin ei ti u, “Barabba ha!” 22Pilatin ei ti hangai rang ha, “Hanle Isua Krista anti ha ama ha imo tho ning.” Amanin lokona, “Krosa anpe rase,” ati u.
23Aman, “Ichangmo imo ei masial,” ati tenchu ama ha, “Krosa pe ro,” atia ankhek riam u na.
24Pilat ataksat ha akorong ti anriat le, haneka anpon, hanke ti alaka mi ngai makunga a kut arasuk a, “Hi anzik a thisen rui a masial bui kei ni, re u ro,” ati. #Dan 21.6-9
25Hava han mi doran a masanga, “Ama thisen koini chunga le koini nai ngai chunga chul rase,” ati u.
26Hanke aman hangai rang Barabba a mazoka, hatuka Isua ha azema Krosa apek ranga abetok u.
Sipaingaiin Elsekara Tho
(Mk 15.16-20; Jn 19.2-3)
27Hava han ram ulian a sipai ngaiin reng ina a ruaia, sipai ngai dora a kom munkhata a manchun. 28Hatuka amanin a puan akhek pe u na, puan sen khat a mansil u. 29Hanuk raling lukhu a chia alu mankhu u. Hanuk achang kuta husop kuang khat a manlek a matona mankhuk a bila elsel athona ati u. 30“Juda Reng chibai;” hatuka a machil u na ha luangsar a laka a lu atok u. 31Hatuka elsekara atho sua u na, puan akhek u na apeia a puan den a mansil u na, Krosa pek ranga atuang u.
Isua Krosa
(Mk 15.21-32; Lk 23.26-43; Jn 19.17-27)
32Hatuka asuak u na Simon atia mi khat Kurini mi amu u, ama ha a Kros anput pe ranga asur u. 33Hatuka Golgotha na “Luru Mun” anti nana, ase u. 34Hava han asuak u na akha anchel uain a manbuang u na, amarim alaka buang zot mak. #Sam 69.21
35Hanke Krosa a pek u na apuan ngai thum avor chunga ansem u. #Sam 22.18 36Hatuka hava han ansuta angak u. 37Hatuka amanin alu chunga ama rui masial na hiva hi ei maziaka ei makhop u. “Hiva Isua hi Juda ngai reng.” 38Hava han suammang anni ama bila Krosa ei tar u, achang tiang angkhat, avoi tiang angkhat.
39Hanke ha lampuia ase ahong ngaiin a lu ahira antira ati u. #Sam 22.7; 109.25 40“O nang nimak che mo biakin asiama ninthuma anding ret, na ninga anrung tan la Pathian Naipasal na ni ten Kros ata hong chum ro ba,” ati u. #Mt 26.61; Jn 2.19
41Hatuka hantin den chaizung ngai, minchu ngai le ulian ngaiin erona ei ti u. 42“Hiva mi hi mi tatei ei mazok thei, ten aninga anzok thei mak.Israel reng ke so atun Kros ata hong chum rase hanke koinin ama nei iam rang. 43Pathian chunga anngat atun azot ten zok ta rase asik chu ei ti, koi hi Pathian Sapa.” #Sam 22.8
44Hanuk misuam anni abila Krosa antar ngaiin um hantin den han ei ero u.
Isua Athi
(Mk 15.33-41; Lk 23.44-49; Jn 19.28-30)
45Hatuka sun anchim len ata dar anthum tenpei, ram pumpui azing khapa ei om. 46Hatuka dar anthuma Isua anring sabaka ankheka ei paia ei ti “Eloi, Eloi, Lama Sabakthani?” hava tina chu “Ka Pathian, Ka Pathian, ichangamo nei na mak?” ti na. #Sam 22.1
47Hava han hohomo anding ngai han ha chong ha ariat u na ati u. “Eliza apai zei!” 48Hatuka hangai bila angkhat atana ase sponz alaka, uaina a machia na raimola atara abuang ranga apek. #Sam 69.21
49Tenchu atei ngaiin, “En direi Eliza ahong san mo, hong san mak mo,” ati u. 50Hava suale ankhek sabak reta a ratha a mathan.
51Hatuka enro, Biakina puanzar, chung ata athuai tenpei antheta anni chang, ninu honga lung ngai anphel. #Ant 26.31-33 52Hatuka than dora anlonga, mi anthiang a in ngai atampa anthui. 53Hatuka ama anthuiret suale, amani ha than ata asuaka khua anthianga alut u, hanuk mi tamtak anmu pui. 54Razaruaipu le abila Isua ngak ngai han, ninu le imo ei ni ngai ha ei mu u na achan achi u na, “Tak taka ama hi Pathian Sapa keng,” ati u.
55Hatuka nupang atampan alapa ata a en ngai, Galili ata Isua dorbo andom tira anu nuk ei hong u. #Lk 8.2-3 56Hava ngai bila Mari Magdalini, Jakob le Josi nu Mari le Zebedi a nai ngai a nu a om.
Isua Anphum
(Mk 15.42-47; Lk 23.50-56; Jn 19.38-42)
57Hanuk ani bui le Arimathiana anei khat a honga a raming Joseph amam Isua ruaisi ei ni. 58Ama ha Pilat a kom asena Isua ruak ava zong. Hava han Pilatin hava ha pe ro tina chong apek. 59Hava han Josephin a ruak alaka zani anthiang vang le atuam. 60Hatuka ama than athara ava siak hava ha lung ankhuar, hanuk than makota lung alianpa a mandela amaka ase. 61Mari Magdalini le Mari tei hava han a om, amani ha than kola ansuta a om u.
Than Arungngai
62Zing khua vara panta phut hanuk nikhua Chaizung ngai le Pharisi ngai Pilat a kom anruala ei va ril u. 63“Ka pu koini malunga achui ha milak ha adam lai ei ti, ‘Ninthum suale anthui ret ka ti,’ ati. #Mt 16.21; 17.23; 20.19; Mk 8.31; 9.31; 10.33-34; Lk 9.22; 18.31-33 64Hasik han ninthum tenpei athan aveng ranga chong pe ro, hano a zolai ngai ei honga ei maruk viak u na ei choia, mi ngai kom athi ata anthui atina hantin aniten masial mansa neka nukhona masial siat sabak inti.”
65Pilatin, “Na kom u na aveng rang ngai a om, se u tan nei phari u dor va rung u ro,” ati pena. 66Hanke ase u na a rung ngai lung anziaka than arung u.
Currently Selected:
MATHAIIN 27: RANGBSI
Označeno
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.