MATHAIIN 26
26
Isua Thina
(Mk 14.1-2; Lk 22.1-2; Jn 11.45-53)
1Isuan hia chong ngai ei ril suale a zolai ngai ati pe, 2“Na riat u na ninni suale Zokna Panta ahong zei, hatuka Miring Sapa Krosa antar ranga anpek rang ani zei.” #Ant 12.1-27
3Hava han chaizung ngai le mi ngai, ulian ngai, Kaiapha atia Chaizung Lian kholaia anchun u. 4Hatuka hontinmo sura Isua nei that thei rang atia ei mansuk u. 5“Tenchu panta lai tak chu nimak, mipui anpon rang keng,” ati u na.
Isua Bethani na Sariak Anthi
(Mk 14.3-9; Jn 12.1-8)
6Isua ha aphar Simon a ina a om lai tak han. 7Hava han nupang khat Alabastar koka sariak marim ahui alu ahong koia, ama kom a hong, hatuka bu nek ansut le ama lu na alei. #Lk 7.37-38 8Tenchu hava amu u na zolai ngaiin, “Taksita ichangamo ei manpam,” ati u. 9“Hiva hi alupana zuara anriang ngai anpe rase ba.”
10Ten Isuan ariata hangai ha ei ti pe, “Nupang ha ichangmo nei mantak u? Aman ka chunga sin asa ke ei tho. 11Asik chu anriang ngai chu na bil u na a om babang keng, ten koi hi na mu babang u no ta ni. #Dan 15.11 12Ka tak chunga hi marim hui sariak ei leia hin, ei na ravuia sin adik ei tho. 13Ataka kei na ti ni u zei, ramual muntina thangahui ei anrilna tina, hava han hiva sin rui hi ama riat titna anril inti.”
Juda Bado Tho rang Azot
(Mk 14.10-11; Lk 22.3-6)
14Hava han somleianni ngai bila angkhat, Juda Iskariot ha, ama ha chaizung ngai bila ei va ti. 15“Imo nana pek zot u ril u ro, ama ha na kut u na na pe u ka ti?” amanin ama ha somanthum sumru apek u. #Zek 11.12 16Havalen ata chu aman ama ha ei pekna ranga alampui arok.
Isua Zokna Panta a Nek
(Mk 14.12-21; Lk 22.7-13,21-23; Jn 13.21-30)
17Hatuka, chol anchel lui Vaipol Panta anphut nikhua, a zolai ngai Isua kom ahonga a rakel u na, “Nang na ranga hovanmo Zokna Panta sak va sin mani? Imo nei zot dan.” 18Aman ei ti, “Khuana sova mi kom se u ro, va ril u ro, Minchupun ei ti ka hun anai zei, na ina ka zolai ngai le Zokna Panta mang ka ti.”
19Hava han Isuan ei ti ang ava tho u na, Zokna Panta khalai ava mansuk u. 20Hatuka ani bui le, a zolai somleianni ngai le khalai ava zara ansut u. 21Hatuka, anek u lai tak ei ti, “Ataka kei na ti u ni zei, na bil u na mi khatin na mansur inti.”
22Hava han achalaka amalung ana u na, “Puma, koi mo hava ha ei ti chip u.” 23Aman a masanga, “Ka bila sak bela a kut aphum tak hin, na mansur inti, ati. #Sam 41.9 24Miring Sapa ruia anziak anga, hantin han ni inti. Tenchu apuak arik zei, ha mi ha Miring Sapa ei ansurna, ha miring anzir no sela arang asa ba!” ati.
25Hanke ansur rangpu ha Juda han ei ti, “Rabbi, koi mo?” Aman ei ti pe, “Nangke ati.”
Puma Zandui
(Mk 14.22-26; Lk 22.14-20; 1 Kor 11.23-25)
26Hatuka, asak u na hava lai tak Isuan vaipol alaka, bor pek chunga akhiaka, a zolai ngai apeka, “La u ro, sa u ro, hiva hi ka taksa,” ati.
27Hava suale, buangna kheng alaka, raisan chong aril chunga hangai ha apeka ei ti, “Na lom u na hivan ata buang u ro.” 28Asik chu, “Hiva hi ka thisen, rui athara thisen, mi tampa ranga ha asia saina ranga azan. #Ant 24.8; Jer 31.31-34 29Hatuka kei na ti u ni zei, atun ata gerep mara ti buang thak lai no ning, ka Pa rama nangni le athara ka buang ret nikhua man chu.”
30Hava suale, la atho u na asuak u na Oliv muala ase u.
Pitorin Isua Eiheng rang Rui
(Mk 14.27-31; Lk 22.31-34; Jn 13.36-38)
31Hava han Isuan hangai rang ati, “Hiva zana na lom u na, ka sika na malung ni nokna man un na ti, asik chu anziak a om, ‘Anruaipu ha zem ka ti, hava han bera rual ngai anthek rak inti.’ #Zek 13.7 32Tenchu anthui suale, na maton u na Galili na se ka ti.” ati. #Mt 28.16
33Pitorin a masanga ei ti pe, “Nanga alom u na malungni nokna adon u nam, koi chu lungni nokna don no ning.”
34Isuan ati pe, “Ataka kei na ti ani zei hi zana ar akhuang man, voi anthum riatlui nanpemin na ti.” 35Pitorin atipe, “Na bila athi ka ngam riatlui nanpem thak no ning, hantin den zolai ngai doran,” ati u.
Getsimani Rahuana Isua Antakna
(Mk 14.32-42; Lk 22.39-46)
36Hanke, Isua hangai bila Getsimani tia munkhata ase u, hatuka a zolai ngai ati pe, “Sovan bor ka va zong kar pei chu hiva hin ansut chian u ro.” 37Hanke, aman Pitor le Jebedi a naipasal anni ngai atuanga ase, hatuka antak sabak le lunghang atong sabak. 38Hanke, aman hangai ha ei ti pe, “Ka nuk thi rang tenpei antaka ana zei, hivan om u tan ka bila meng u ro.”
39Hava suale, maton avan son beta anboka, bor a zonga ei ti, “Ka Pa, ani thei ten, hi buangna kheng ka kom ata na khai pe ro ba, ten kei zota nimak, nei zota ni rase,” 40Hatuka, a zolai ngai kom ahong reta ei lei in u a mu, hatuka aman Pitor arang ei ti, “Imo dar khat dak ngal, ka bila meng theina ranak nei u mak che mo? ati. 41Menga borzong u ro, themna nei tong u nok na rang, ratha azot tenchu taksa aduai.”
42Athara voi annina ase na, hintin hin borazonga, “O ka Pa, koiin buang luia ankhai thei nok ten nang nei zot anga ni rase.” 43Hava suale, ahong reta ahong mu aleia in ret u, asik chu amit akhu pe u.
44Hatuka, aman athara hangai ha amaka, voi anthumna mana ei ti ang han atia bor azong. 45Hanke, a zolai ngai kom a honga ei hong ti, “Atun chu in u tan pongansa u ta ro, enro, ahun asuak zei, Miring Sapa asiat ngai kuta anpekna. 46Anthui u ro, se u rei soso enta, koi anan sur rangpu ka kom a hong zei,” ati.
Isua Anmumak ngai Kuta
(Mk 14.43-50; Lk 22.47-53; Jn 18.3-12)
47Aman chong aril lai tak enro, Juda ha somleianni ngai bila angkhat a honga, abila mi tampan khendai, raimol, anleka chaizung ngai le ulian ngai kom ata ahong. 48Ama ansurpu han hangai rang ha ei ti, “A biang kei tum tak ha ama ha sur u ro.” 49Havan len Isua kom ase na, “Rabbi, anchupu,” tina apham chunga abiang a tum.
50Isuan, “Ka mal, nei tho rang tak ha tho ta ro,” ati pe. Hanke, hangai akom a honga Isua chunga kut athak u na asur u. 51Hatuka enro, Isua bila mi angkhat a kut asona khendai a rasuana, chaizung a suak ha athaka a kuar khat a at pe. 52Hava han Isuan ama ha ei ti, “Na khendai a muna siak ret ro, asik chu khendai asur ngai chu khendai le den siat inti. 53Hatuka mandon ro, ka Pa kom ka zong ten, aman ka rang vanpalai a sang aruk mun somleianni neka atam hong tir no ni mo. 54Tenchu, hava ha atho ten hontinmo Pathian Lekhabu chong tung ni, hava ha ei ni rang anang.”
55Hava han, Isuan mi ngai ha ei ti pe, “Mi suam ngai ansur anga khendai, raimol le mo nei na hong sur u? Anikhuana biakina ansuta kei manchu, hava han na sur u mak che na. #Lk 19.47; 21.37 56Tenchu hiva ngai ei ni, hi dearin ei maziak chong ngai ei kipna rang keng.” Hava han zolai ngai doran ama amaka arot kiar u.
Chaizung Kom Isua Rui Anril
(Mk 14.53-65; Lk 22.54-55,63-71; Jn 18.13-14,19-24)
57Hatuka Isua asur ngai han ama ha, Chaizung Lian Kaiapha kom atuang u hava muna han lekhanziak ngai le ulian ngai ei anchun u. 58Hatuka Pitor alapana ama anu nuka chaizung a kholai tenpei azi.Hatuka nuka imo chang hava a en rang asunga sena, atho ngai bila ansut. 59Hava han chaizung ngai le anchun ngaiin Isua thatna rang milak chong aril thei rua arok u na. 60Tenchu milaka aril thei atam a hongam man u mak. 61Nukhona anni a honga ei hong ti, “Hiva mi hin ei ti, ‘Koi Pathian Biakin siama athara ninthuma ka manding ret thei,’ ” ati. #Jn 2.19
62Hanke Chaizung Lian anthui andinga ama ha ei ti, “Ite masang non mo? Nang na chunga imo ei ril u so?” 63Tenchu Isua adai rek. Chaizungin ei ti pe, “Nang hi Pathian adam raminga khomak keina sam ani zei na ril ta, nang hi Krista Pathian Sapa hamo na ni?” ati.
64Isuan a masanga, “Nangin nei ti, hatuka kei na ti sa ani u zei, atun ata nangnin Miring Sapa hi a thotheikiar chang tiang ansuta, hatuka summoirota a honga mu un na ti,” ati pe. #Dan 7.13
65Hanke Chaizungin a puan aseta, “Ama hi Pathian a dem ati ariatpui imo ei nangna enta, atun len Pathian ei dem nei riat u. #Lev 24.16 66Imo na mandon u,” Amanin a masang u na, “Ama hi athi rua ani,” ati u.
67Hanke amanin, amai ei machil u na ei suk u. #Isa 50.6 68Hatuka hohonmo chu ei zema ei ti u, “O Krista koini kom Pathian chong aril, ril ro tumo ana zem?”
Pitorin Voi Anthum Riatlui Anpem
(Mk 14.66-72; Lk 22.56-62; Jn 18.15-18,25-27)
69Havalai tak Pitor tuala ansuta, hatuka suak nupang khat a kom ahonga, “Nang um Galili na Isua bila na om.”
70Tenchu aman mi dora makunga riatlui anpema ei ti, “Imo nei ti ha re thei lai making.” 71Ama suakkhar kola asena, hanuk suak nupang khat, ama han, ama ha amu na ha muna mi ngai ha ei ti, “Hiva mi hi Nazaret Isua bila a om ke,”
72Aman riatlui anpem reta khomak ansama ei ti, “Sova mi so re making.”
73Hatuka hun alak te suale, a kola anding ngai ha a hong u na Pitor ha ei hongti u, “Ataka, nang um hangai bila khat ke na ni, asik chu na chongin nang ana mandang.”
74Hanke aman, khomak a sam chunga khomak ansama ei ti, “Sova mi so re making!” Hava han ar akhuanga. 75Hava han Isuan ha chong ei ril, “Ar akhuang man voi anthum riatlui nan pem nan na ti.” Hava ha Pitor a malunga achui, hatuka apanga asena ava chap sabak.
Currently Selected:
MATHAIIN 26: RANGBSI
Označeno
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.