MATHAIIN 25
25
Nungak Anthiang Som ngai le Ankhina
1“Hava han vanram hi nungak anthiang som, makpa len tong ranga a lem achoi chip u na asuak u ang ni unti. #Lk 12.35 2Hangai bila ranga ahian ranga amo ei ni u. 3Asik chu amo ngai ha a lem achoi chip u na ati choi u mak. 4Tenchu ahian ngai ha chu a lem u ngai bila bela ati achoi u. 5Hatuka makpa ei hong sot sika, alom u na anvuang u na ei in u.
6“Nuka zan chima rasapui anringa enta, ‘Makpa antong pui ranga suak u ro,’ ati. 7Hava han ha nungak anthiang ngai dora anthuia, a lem u ngai a manliang u. 8Amo ngaiin ahian ngai kom ati, ‘Na sariak u ngai na pe lak u ro ba, asik chu koini na lem a thi zei,’ ati u. 9Tenchu ahian ngaiin a masang u na, ‘Nangni rang le koini rang anhun lai no mani hanek ten azuar ngai kom se u tan na rang va racho u ro.’ 10Anchok rang ase u na hava lai tak han, makpa a hong hanke alei ansin rap ngai ha chu, ama le antonga inneinna ina alut u na suakkhar ankhar.
11“Nukhona nungak anthiang atei ngai um ahonga, ‘Puma, puma, makot na malong pe ro,’ ati u. #Lk 13.25 12Tenchu aman a masanga, ‘Ataka kei na ti ni u zei,’ Na re u making.” 13“Hasik han meng u ro, asik chu nangnin, ahun le azoro re u mak che.
Suak Anthum le Ankhina
(Lk 19.11-27)
14“Mandon u ta! Mi khat hi khuala asena asuak ngai a kuia anei dora akut u na apeka. 15Aman mi khat ha talen ranga, atei mi khat talen anni, hatuka hanuk mi khat ha talen angkhat, ei thei ang zotora apek chipa, ama ha ram ateia ase viaka. 16Talen ranga aman ha ama ha ase lena, hava lehan ava maphunga hanuk talen ranga anlokpuia. 17Talen anni aman pu ha amam hantin den atho na, hanuk talen anni anlokpuia. 18Tenchu talen angkhat amanpu chu asena, phila khur akhuara, a pumapa sum athupa asiak.
19“Asotpa suale suak ngai puma ha a honga, akom u na hisap alak. 20Hanke talen ranga amanpu a honga, hanuk talen ranga ahong choia, ‘Puma, talen ranga nei na pek ha enta, hanuk talen ranga kan lokpui,’ ati. 21A pumapan ama rang ha, ‘Asa suak adik le iamrua, rui atomte na iamrua nei ni atampa chunga na phun ka ti, na puma raisanna ansem pui ro.’ ati.
22“Hanuk talen anni aman ha a honga, ‘Puma talen anni nei na pek ha enta, hanuk talen anni kan lokpui,’ ati. 23A pumapan ati pe, ‘Asa, adik le iamrua suak, atomte na iamrua nei ni atampa chunga na phun ka ti, na pumapa raisanna ansem pui ro,’ ati.
24“Hanuk talen khat amanpu han a honga, ‘Puma ka na riat nang hi ankher, nei ling nok um nei at, neia the nok nam nei rasuang. 25Hasik han ka china na talen ha phaia ka va phuma kei va thup tit enta, na ta ha nei man ani zei.’
26Tenchu a pumapan a masanga ei ti pe, “Mi salui suak andok, ‘Nei na riat mo kei ling nokna han kei at, keia the nokna han kei rasuang? 27Sum asut ngai kuta ka sum va re tan la chu, ka hong tik le ka ta le ei lokna le kei manzit rang ke. 28Hasik han, akom ata ha talen ha la u tan la, hatuka som adonpu ha va pe u ro. 29Asik chu adon takin mansa inti hava han pung inti, tenchu don lui tak ha chu ei don te ngal ha havam akom ata lan pot inti. #Mt 13.12; Mk 4.25; Lk 8.18 30Hatuka so suak dik lui so tualpang azing kara va pei u ro, sova muna chapa aha arial rase.’ #Mt 8.12; 22.13; Lk 13.28
Ruiril Hekna
31“Hatuka Miring Sapan vanpalai dora le ei lianna le a hong tik, hatik han ama aninga lianna reng chomphanga ansut inti. #Mt 16.27; 19.28 32Hatuka nam dora a makunga lan chun inti, angkhat kom ata angkhat lan khai inti, bera rual arungpun kel le bera ei sen anga. 33Hatuka aman bera ngai ha achang tiang, kel ngai ha avoi tiang siak inti. 34Hanke rengin achang tianga mi ngai ha hong u ro, ‘Ka pa borsang pek ngai, khochuichim man ata ram nangni ranga ansin sua ha lua u ro. 35Asik chu kei anchama sak nei na pek u. Ka ti ei anrala anek rang nei na mannek u. Khual kei ni na nei na mantung u. 36Puan sil kei buia puan neina mansil u. Natna kei tong nei na hong en u. Lungina kei ankhum neina hong en u.’ 37“Hava han anzik ngaiin a masang u na, ‘Puma itikhanmo nei anchama neina mu na sak nei na pek, hanuk nei anral nei mu na ti nei na mannek na. 38Itikhanmo nang hi khuala nei na muna atungna nei na pek, itikhanmo puan nei buia puansil nei na pek. 39Itikhanmo nei na na le lungina nei na muna na kom nai se, la ti unti.’ 40Hava han rengin hangai ha masang intia, ‘Ataka kei na ti ni u zei, ka parual ngai asinkhit ngai chunga nei tho u ha, hava han ka chunga nei tho u.’
41“Hatuka aman avoi tianga mi ngai rang um ti inti, ‘O khomak atung ngai ka kom ata ankhai u ro, diabol le a palai ngai ranga heklui moi mun ansin ha hava han se u ro. 42Asik chu kei anchama sak na pe u mak che, ka ti ei anral ti nek rang na pe u mak che. 43Khual kei ni na mantung u mak che, puansil kei bui puan na mansil u mak che, kei na le lungina kei ankhum ka kom honga na hong en u mak che.’
44“Hava han masang unti, ‘Puma itikhanmo nei ancham, nei anral, khual le puan abui le nei na, lungin ankhum nei na muna na dorbo neia dom nok.’ 45Hava han aman masang inti, ‘Ataka kei na ti ni u zei annuai khit ngai angkhat chunga hiva hi na tho u nok ten ka chunga nei tho u nok. 46Amani hi hek lui anphenengna na, tenchu adik ngai ringanlonna na lut inti.” #Dan 12.2
Currently Selected:
MATHAIIN 25: RANGBSI
Označeno
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.