MATHAIIN 23
23
Pharisi le Minchungai ranga Isuan Chunngo Tho
(Mk 12.38-39; Lk 11.43,46; 20.45-46)
1Hava han Isua mi ngai le a zolai ngai ha ei ti pe. 2“Minchu ngai le Pharisi ngai, Mosi sutmuna ansut u. 3Hasik han amanin ei na ti u tak hava ha zi u ro. Zot u ro, tenchu amani ei tho u anga tho u no ro. Asik chu ei ti u anga tho u mak. 4Amanin puak arik a malom u na mi dara abang u. Tenchu amaria le ngal khai zot u mak. 5Amanin mi mu na rang asin u dora atho u asik chu amanin a tabit vong a manlian u hanuk apuan mer a manlian u. #Mt 6.1; Mip 15.38; Dan 6.8 6Hatuka sak nekna muna sutmun ansanga ansut anchunna ina mun ahu hui athang u na. 7Bazar laia min eia mok rang le min ‘Rabbi’ ei ti u rang ei zot u. 8Tenchu nangni chu ‘Rabbi’ anti rang val u no ro asik chu Ananchu u angkhat dak ke, nangni na lom u na parual ke na ni u. 9Hanuk phil chunga tute ka ‘Pa’ ati rang val u no ro asik chu na ‘Pa’ u angkhat dak keng ama ha so anvana. 10Nangnin ulian achang rang val u no ro asik chu na ulian u angkhat dak ke ama ha Krista. 11Tenchu nangni laia ulian tak ha na haso adom unti. #Mt 20.26-27; Mk 9.35; 10.43-44; Lk 22.26 12Hatuka aninga ansang tak chu ama ha annuai inti hatuka aninga annuai tak chu ama ha lan sang inti.” #Lk 14.11; 18.14
Ei Hian u Isuan Adem
(Mk 12.40; Lk 11.39-42,44,52; 20.47)
13Tenchu, “Nangni minchu ngai le Pharisi phuazekam ngai na puak arik u! Asik chu nangnin mi makunga vanram nei khar u. 14Nangnim hava han lut thei u mak che hanuk alut rang ahong ngai ha, hangai ham manlut u mak che.”
15“Nangni minchu ngai le Pharisi phuazekam ngai na puak arik u! Asik chu mi angkhat Judan chang ranga tia, tanga nei chei u, hatuka angkhat pei achang le havan nangni neka mun asiat ranga Gehen mi na nei sin u.
16“Nangni acho lam anmu ngai na puak arik u! Nangnin nei ti u, ‘Biakin le khomak ansam chu ite nimak, tenchu biakina rangkachak le ansam tak chu anok zei.’ 17Amo le acho ngai ril u ta! Hovamo alian rangkachak mo, ha biakin mo, rangkachak anthiang pu ha mo? 18Hanuk nei ti u, ‘Doi thona haia le khomak ansam chu ite nimak tenchu andar ngai le khomak ansam tak chu anok zei.’ 19Acho ngai ril u ta! Hovamo alian, andar ha mo, haia mo andar ei anthiang na ha? 20Haia le khomak ansam tak haia duai le nimak andar le aloma ei ansam nimak mo? 21Hatuka biakin le khomak ansam ha, havana aleng lem ei ansam. 22Hanuk van le khomak ansam chu Pathian a reng chomphang le havana ansut hava ngai le ei ansam. #Isa 66.1; Mt 5.34
23“Nangni minchu ngai le Pharisi phuazekam ngai, na puak arik u! Asik chu nangnin ansa, kumhoi, lengmaser tenpeia soma angkhat nei pek u. Hatuka chongpek aliankhit anang ruiril anzik lungkham le iamna nei mak u tenchu hava ngai dora atho hatuka hava ngai dora amak nok nangnin nei nang u. #Lev 27.30 24Acho lam anruai ngai! Nangin langsan nei madi u, makingkang neia vol u.
25“Nangni minchu ngai le Pharisi phuazekam ngai na puak arik u! Asik chu nek sakna kheng apang na manthiang u, tenchu hava ngai asunga khamaret le huatanhamna abit. 26Acho Pharisi! Mana nekna le sakna kheng manthiang ro hanke asung apang um ei anthiang rang.
27“Nangni minchu ngai le Pharisi anphu ngai, na puak arik u! Asik chu nangni hi apang na en ten achan asa tenchu asunga mi thi ru le annim tin pei abit. #Kts 23.3 28Hantin han nangnim apanga mi mu ranga anzik asa nei manlang u tenchu asunga anphu le asia bit.
Aduk Tong u rang Isuan Aril
(Lk 11.47-51)
29“Nangni minchu ngai le Pharisi phuazekam ngai na puak arik u! Asik chu nangnin deari ngai than in na sin u na hanuk minzik ngai anphumna na manliang u hatuka nei ti u. 30Koini hi pi pu hun han om ila chu, deari ngai thisen phuba ansem pui no ma ni. 31Hava han nangni na theia rui ha nei anril u deari athat ngai ha nangni hi amani sanai. 32Nangnim na chipui u ngai ei makhip u nok ha nangin nei makhip u. 33Marul ngai marul tur tezia ngai! Ruiril tika hontinmo Gehen moia ansinsakna ata nei zok thei u rang. #Mt 3.7; 12.34; Lk 3.7 34Hava sika enro, na kom u na deari thar le minchu ngai hong tir ka ti amani bila itukmo chu that un na ti Krosa pe un na ti, itukmo chu nei anchun u na ina razik unti hatuka kho khat ata kho khata rahok unti. 35Phil chunga mi dik ngai thisen ei suak hava dora na chung u na achul, anzik Abel athi suak ten ata Barakia sapa Zakaria ha biakin haia malai taka nei that u athi suak tenpei. #Anp 4.8; 2 Kr 24.20-21 36Ataka kei na ti ni u zei hi huna mi ngai chunga hava ngai dora chul inti.
Isuan Jerusalem Adit
(Lk 13.34-35)
37“Jerusalem, Jerusalem! Deari ngai nei that le na koma ahongan tir ngai ha lung le nei deng, arpuiin a nai ngai a mantha thuaia ei bum hava anga koi um voi itukmo na nai ngai munkhata abum rang kei zot, tenchu nangnin zot u mak che. 38Enro, na in u nangni ranga akoronga a om. #Jer 22.5 39Asik chu kei na ti ni u zei nangnin atun ata na mu u lai no ta ni ‘Achanasa ama hi Puma raminga a hong.’ ” Na ti u man chu. #Sam 118.26
Currently Selected:
MATHAIIN 23: RANGBSI
Označeno
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.