MATHAIIN 22
22
Inneina Bunek le Ankhina
(Lk 14.15-24)
1Isuan hanuk ankhina le chong arila aman hangai ha ei ril. 2“Vanram hi, reng khat le anrual, a naipasal innei sak nek na ei mansuk. 3Ha nek sak ranga ankui ngai apai ranga a suak ngai a tira. Tenchu hangai ha hong zot u mak. 4Hava han aman suak atei ngai a tir reta ei ti, ‘Ankui mi ngai ha ril u ro, enro, inneina neksak ka mansuk sua zei ka serat le me amar ngai dora anthat sua zei aloma ansua vang zei inneina nek saka hong u ro,’ va ti u ro. 5Tenchu hangai ha a are u na hohonmo a luia, hohonmo anlo ranga ase kiar u. 6A om ngai han a suak ngai ha asura maimok asaka athat u. 7Hava han reng atakasi na hanke a sipai rual a tira ha athat ngai ha a masiat zita akhua u a manhal zit. 8Nuka aman a suak ngai ha ei ti, ‘Inneina sak nek chu ansuk tenchu ha ankui ngai ha arua ni u mak. 9Hasik han nangni reng lampui alu aluna se u tan mi nei mu u dora aloma inneina nek saka kui tan hong ruai u ro.’ ati. 10Hava han ha suak ngai reng lampuia ase u na asa asiat mi ei mu u dora aloma a rasuang u na inneina na ahong tuang u na a manbit u.
11“Hanuk rengin khual ngai anmupui ranga in sunga a honga mi khat anmupuia inneina puan don mak. 12Aman ama ha, ‘O kamal,’ hontinamo inneina puan abuia hivan nei hong lut? atina aman masang thei mak. 13Hanke rengin hasondom ngai ha, ‘Ama a kut a ke khita tualpanga azing kara pei u ro, ati hava han chapa aha arial rase.’ ” #Mt 8.12; 25.30; Lk 13.28
14“Adik ke, anpai atampa tenchu anthang atomte.”
Isua Anmumak ngai Ankelna le Ansangna
(Mk 12.13-17; Lk 20.20-26)
15Hava han Pharisi ngai ase u na ei mansuk u, “Hontinmo ama ha a chonga anoka na masul ngai,” ati na. 16Hatuka amanin Herod abila a zolai ngai le ei va man ril u. “Minchupu, koinin na riat nang hi atak hatuka ataka Pathian lampui ruia nei manchu hanuk nangin tute achi mak che asik chu mi mai lek mak che. 17Asa na ril ta imo na ti Kaisar hi phil man apek asa mo?”
18Tenchu Isuan ei sa u nokna zia u ariata, “Phuazekam ngai ichangmo neina mansin u? 19Ha lei sum ha na manmu u ta,” Hanke a kom dinar khat ahong koi u. 20Aman hangai rang ha, “Hiva ramil le raming hi tumo?” ati. Amanin, “Kaisar,” ati u.
21Hanke aman hangai rang ha hano, “Kaisar ata chu Kaisar pe u ro, hanuk Pathian ta chu Pathian pe u ro.” 22Hava chong ei riat u na amanin achang ei mandong u hanke ei maka ei se u.
Athi Anthuiret ruia
(Mk 12.18-27; Lk 20.27-40)
23Hava nikhua Saduki ngai anthuiretna om mak ati ngai ha akom ahong u. #Kts 23.8 24Hanke a rakel u na, “Minchupu, Mosin mi nai nei luia athi ten a parualin a nungak ha naia a parual rang chi manpiang rase, ati. #Dan 25.5 25Hanle koini bila parual sari ulianin in aneia nai nei luia athi, nai ei nei nok sika a parual rang a nungak amak pe. 26Hantin han anni, anthum, sari tenpei hantin han ei ni. 27Nuk khita ha nungak ham athi. 28Hanle anthuiret tik ha sari bila tu nungak mo ei ni rang, lokon ei lak u?” 29Isuan hangai rang a masanga, “Na masial u zei asik chu nei riat u nok, Lekhabu chong nei riat u nok, Pathian sinthotheina ati. 30Asik chu anthuiret tik min innei mak pasalin um nupangin um.Hanekten vana Pathian vanpalai ngai anga ei om u. u. 31Tenchu athi ngai anthuiretna ruia Pathianin ei na ril u tak ha pore u mak che mo? 32Aman ei ti, ‘Koi hi Abaraham a Pathian, Isak a Pathian,’ Pathian hi athi ngai Pathian ni mak tenchu adam ngai Pathian ke.” #Ant 3.6
33Hiva ei manchu chong ngai ariat u na mipui aboi adonga.
Chongpek Alian
(Mk 12.28-34; Lk 10.25-28)
34Pharisi ngaiin Saduki ngai han makhal thei u lai mak ati ei riat u le hanke amanin munkhata anlop u. 35Hatuka hangai bila mi riti riat khat ansinna na ama ha ei rakel. #Lk 10.25-28 36“Minchupu, chongpek bila hovamo alian?” ati.
37Aman ati pe “ ‘Na malung dora le, na nuk dora le, na sungril dora le, na Puma na Pathian adit ro.’ #Dan 6.5 38Hiva hi alian le chongpek mansa. 39Hanuk annina hivale anrual ‘Nang nei andit anga na inkolmi adit ro.’ ” #Lev 19.18 40Hiva chongpek anni na hin riti dora le Deari Lekhabum ei anthoi.
Messia rui Ankelna
(Mk 12.35-37; Lk 20.41-44)
41Hatuka Pharisi ngai munkhata a om u na han Isuan hangai ha a rakela. 42“Krista ruia imo na mandon u ama hi tu nai mo?” atina. Amanin “David akhuk,” ati u.
43Aman hangai ha ati, “Hanle David han hontinmo rathana om lai han ama ha, ‘Puma,’ ei ti thei? Asik chu David han,
44‘Puman ka Puma ha ei ti ka changtiang ansut ro: #Sam 110.1
Ananmumak ngai na ke thuaia
ka siak nok maseng.’
45Hasik han David han ama ha ‘Puma’ ati nan ten
hanle hontinmo akhuk ei ni?”
46Hava han tuten ama ha ite masang thei u lai mak hatuka hava nikhua ata chu ama rang ite chong ankel rang ngam u lai mak.
Currently Selected:
MATHAIIN 22: RANGBSI
Označeno
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.