MATHAIIN 21
21
Anliana Jerusalema Lut
(Mk 11.1-11; Lk 19.28-40; Jn 12.12-19)
1Hanuk amani ha Jerusalem kola Oliv muala Bethphage khua na ahong u na Isuan a zolai anni ei tir. 2Ei tir rang ngai ha ei ti, “Na maton u na sova khua na se u ro va mu un na ti sakuarpar khat anthung a om abila ate khat kheka ka kom hong koi u ro. 3Hatuka min nangni rang hongmo ana ti u ten hiva hi, ‘Puman anang,’ ti u ro. Aman na manchoi len unti” 4Hantin han ei ni, Deari ei ril hiva chong kipna:
5“Nangnin Zion nainupang ha ril ro, #Zek 9.9
Enta, na reng na kom a hong zei
Ama annuai le sakuarpar chunga a chuang,
Hatuka ate sakuarpar sanai chunga a chuang.”
6Hanuk ha zolai ngai ase u na Isua ei ti anga sin ei va tho u. 7Sakuarpar apui le ate le ei hong koi u hatuka hava ngai chunga apuan u ngai ei dap u hatuka ama a chunga ansut. 8Hatuka mi tampa kara atam siaiin apuan u ngai lama adap u na atei ngaiin thingbak atuka lama alei dap u. 9Hatuka mi anuk amana se ngai dora han ankheka ei ti u, “Hosanna David a Naipasal Puma raminga ahong chu anpaka om rase, Chungkhita kom Hosanna!” #Sam 118.25,26
10Hatuka Jerusalema ei lut le khua ha rahu asuaka, “Mi doran tumo so?” ati u. 11Hava han mi doran, “Ama so ha deari Galilia Nazaret Isua,” ati u.
Isua Tempula Lut
(Mk 11.15-19; Lk 19.45-48; Jn 2.13-22)
12Hanuk Isua Pathian Biakina a luta hatuka Biakina anchok, a zuar ngai dora a masuaka hatuka sum athul ngai dokang le pharvali zuar ngai ei ansut u na ngai ei malet pe. 13Hatuka hangai rang ei ti anziaka om, “Ka in hi borzongna in antin ti tenchu nangnin hiva hi anru ngai khura nei sin u.” #Isa 56.7; Jer 7.11
14Hava suale acho le akhor ngai Biakina akom ahonga aman hangai alei mandam. 15Tenchu chaizung ngai le minchu ngaiin ama ei tho changdong sin ngai amu u na hatuka naipang ngaiin Hosanna Davida Naipasal tia Biakina ei ankhek u ha hangai ei mu na atakasi u. 16Hatuka ama ha ei ti u, “Na riat mo so, sova ngaiin imo ei ti u so,” ati u. #Sam 8.2 (LXX)
Isuan hangai rang ha, “O, ka riat, la pore ngal u mak che mo? ‘Nangin naipang le ranu nek ngai mur ata anpakna nei makhip.’ ”
17Nuka aman hangai amaka kho tual panga Bethani na ase hanke hava muna zana ariak.
Theichang Khomak Sam rui
(Mk 11.12-14,20-24)
18Zinga khuana akira ase lai ama avon anchama. 19Lampui kola theichang kung khat a mu na ava pana hanke abua baka chu ite mu lai maka hanke thingkung rang ha ei ti, “Anra pial lai no ro!” Hatuka ha len han ha theichang kung ha achar bianga ase.
20Hava ei mu u na a zolai ngai achang ei mandong u, “Theichang kung ha anlaiseka hontina ei char mo?” ati u.
21Isuan a masanga ei ti pe, “Ataka kei na ti ni u zei, iamna na don u na, iam songankhar na don u nok anten nangnin theichang kung rong ha nei tho thei u rang hava ha nimak tenchu hi mual hi, ‘Anthot ro hatuka tipuia va chul ro na ti u ten,’ hava ha ni inti. #Mt 17.20; 1 Kor 13.2 22Hatuka borzonga iamna le nei zong u tak hava ngai ha man un na ti.”
Isuan Jerusalema Manchu
(Mk 11.27-33; Lk 20.1-8)
23Hava suale Biakina ahong suale aman mi a manchu lai tak chaizung ngai le ulian ngaiin ahong dep u na, “I ningneina le mo hiva ngai nei tho hanuk tumo hiva ningneina ana pek?” ati u.
24Isuan a masanga hangai rang ha ei ti, “Kom chong khat na rakel u ka ti hava ha nana ril u ten kom i ningneina le mo hiva dora kei tho hava ha na ril u ka ti. 25Johon a baptisma hovan ata mo ei ni van ata mo miring ata mo?” Hava han amani le amani ankhal u na vanram ata na ti le hanle iam u mak che na aman na ti inti. 26Hatuka miring ata na ti le mi ngai anchi ei om asik chu lokon Johon ha deari ti na ei pom. 27Hanke amanin Isua ha ei masang u, “Koini re mak me,” ati u. Amam hangai rang ha, “Kom ril no ning i ningneina le mo kei tho,” ati.
Naipasal Anni Ankhina
28“Tenchu imo na mandon u? Mi khatin naipasal anni anei angkhat kom ase na, ‘Kalong gerep rahuana sin va tho ro,’ ati. 29Aman a masanga, ‘Zot makung,’ atina. Nuka ansira ase. 30Nuka annina kom ase na hantin den ati aman a masanga, ‘Se ka ti,’ ati, tenchu se mak. 31Ha annina tumo a pa he apom?” ati na. Amanin, “Mansa ha,” ati u na. Isuan hangai ha, “Ataka kei na ti ni u zei lei ansuang ngai le noti ngai, nangni na mana Pathian rama alut u zei. 32Asik chu Johon anzikna le dikna lam le na kom u na ei hong. Ten nangnin nei lei iam u nok. Tenchu lei ansuang ngai le noti ngaiin ama ei lei iam u hatuka nangnin hava nei mu u na, nukam ansir u mak che ama iam ranga, #Lk 3.12; 7.29-30
In Pumapa le Sinatho ngai Ankhina
(Mk 12.1-12; Lk 20.9-19)
33“Hanuk ankhina khat rangai u ro, In puma khat a om aman gerep rahuan athona a mankul tita hava han gerep sorna a khuara hatuka in ansang a sin hanke sin atho ngai a peka ram ateia ase viak. #Isa 5.1-2 34Hatuka anra hun anai tikle amara anchang alak ranga sin atho ngai kom a suak ngai a tir. 35Hanke sin atho ngaiin ama suak ngai ha a sura hohomo azem u, hohomo athata, hohomo lung adeng u na. 36Hanuk mana neka suak atam a tira amani rang um hangaiin hava anga alei tho u. 37Nukhona ama a naipasal ha akom u na a tira, ‘Ka naipasal chu amanin lalchi lei tho u bo ni,’ ati na. 38Tenchu sin atho ngaiin naipasal amu u na anril u na, ‘Hiva mi hi ke dong aluakpu, hong u ro that u rei alua rang manbui u rei.’ 39Hanke amanin ama ha a sur u na gerep rahuan tualpanga athata apei u.
40“Hantin aniten gerep rahuan puma ahong tik hatik han, ha sin atho ngai ha imo tho ni?”
41Amanin ama ha ati u, “Ha salui ngai ha achalaka masiat inti hatuka ha rahuan ha atei sin atho ngai kom pe inti anra tik amara a pek rang tak kom.”
42Isuan hangai ha, “Nangnin Pathian Lekha la pore ngal u mak che mo? #Sam 118.22-23
‘Chopui a phun ngaiin ei poisak u nok ha,
Hava hake akila chopui lu khit achang zei;
Hava ha Puma ata ei ni,
Hava ha koini mu ranga changdong ani zei,’ ”
ati.
43Hasik han, “Kei na ti ni u zei na kom u ata Pathian ram lan pot intia, nam atei khat lan pe inti, amara pek rang nam tak akom. 44Hatuka hi lung chunga achul tak chu kui inti, tenchu hi lung, a chunga chul tak chu mazoi zit inti.”
45Chaizung ngai le Pharisi ngaiin hiva ankhina ngai ariat u le hiva ngai hi amani rang keng ei ril ti ariat u. 46Hatuka amanin ama ha a sur rang ei val u tenchu mi ei achi u, asik chu min ama ha deari tina ei pom u.
Currently Selected:
MATHAIIN 21: RANGBSI
Označeno
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.