Pi zi tiki 43
43
Morkoi n'ag'aŋ sulu aha warɗi Egipte
Yakob a hina Benyamin aŋ hala gaiɗi tawalakaini
1Wiyamai te riya amai abai midini afti na Kanaan. 2Won hlai n'e vidi gaini simini algama n'e kiŋɗi aha war Egipte par li, epiɗi a miɗiɗi: Wiyi aŋ wurumusi wala zi simi agwi. 3Yuda a waya seŋ a muɗa: Ɗif ɗa a miɗiyisi edi gaglai ɓa: Na ɓa tawalki aŋ gaiki kai ɗa, mu sɗikisi wuzani ara na kai. 4Na ɓa, ku hina tawalyi li ɓa a hala gaiyi ɗa, aga mi hili aŋ wurukusi wala zi simi lai. 5Amma na ɓa ku hinaŋ kai ɗa, tiyi aga mi hili kai, buri ɓa ɗif a miɗiyisi ɓa: Na ɓa tawalki aŋ gaiki kai ɗa, mu sɗikisi wuzani ara kai.
6Izrayel a waya a muɗa: Ki sini labar wiini ɗif ɓa tawalki zamai a na buri maɗa? Ki ziŋa na ɗa a meefeŋ wiya. 7E wiyi seŋ e miɗi: Ɗif ɗa a pirɵiyi gaini zilbi, na midiyi tiyi war suŋfayi gaini pakataiyi a miɗiyi: Epiki a na karni ɗaai ɗi? Tawalki zamai a na ɗi? Nɵa mi zini gaglai midini wazagai hanɗa. Mi kiɗi mi siɗi ɓa aga a miɗiyi ɓa ki kisi tawalki won na ɗi? 8Nɵa Yuda a miɗini wiini Izrayel n'epini: Hina arwagwi a hala gaya, fiki amai hulumu. Na ɓa ki diri ɓa mu murumu kai, tiyi lai, tuku lai, alimu lai mu kuruɗumu ɗa, 9ta mu ɵiɓa didikŋa li mini seŋ ni ɗa, ku kiɗa ku zilbaŋ war ta. Na ɓa mu wuyuŋkusi kai ɗa, na ɓa mu kuŋkusi wuzani arku kai, meefeŋ na mu zaŋ suku aŋ mada haa kureɗ. 10Na ɓa mu bumu fu hlai kai ɗa aŋ ta ɗa mi wiyisi azi n'ag'aŋ sulu ya.
11Izrayel n'epiɗi a miɗiɗi: Na ɓa ɵa ɗa ki zi maini nɵa, ki miliɗi alini luwuŋ na miɗini aftimu par war sak na wiiki, ki kiŋ azumai Egipte, ki siŋni wiini ɗif ni ɗa: Emel zi girdi si agwi, emelni ami agwi, sugoi zi ɗûgûdi zi lûgûzi agwi gaini alini luwuŋ pistas gaini amande lai. 12Ki mili farai zamai tiki sini n'avut na e wiŋkisi amlai mini sakki z'algama ɗa lai, ablaŋtaŋkai e wilisi na e wili ɗi. 13Yimi tawalki piki hili. Wiyi sini ɗif ni ɗa. 14Alaw zi spak a binditi agulni ɗif gaini hiinini haw buriki, a ɵasi tawalki na ktai gaini Benyamin lai. Ta mu hinafuna ahi ta kai maini ɗif n'a wa ka ahi duk kai nɵa.
Yosef a nava gaiɗi tawalakaini azi n'ag'aŋ sulu: Simi
15Ɗai hanɗa e mili katu tiɗi, e mili farai na zamai tiɗi e yimi Benyamin tiɗi lai, e hili e gi war Egipte e siŋki siɗi arni Yosef. 16Won hlai n'a tala Benyamin gaiɗi, Yosef a miɗini wiini ɗif n'abai na miɗini dalam ɗa: Kiɗi ɗai hanɗa aha, fuɗa wala, da simi lai buri ɓa girvudi ɗai hanɗa aga e simi gaya. 17Ɗif a za wala na Yosef a miɗini miɗini paŋ, a kiɗi ɗai ahani Yosef.
18Hunai te yimiɗi buri a kiɗi aha war fuŋni Yosef. E miɗi e zumu nɵa burini farai na e wiyiŋ amlai warni sakmu z'algama war morkoimu n'avut ɗa zaw. E piyi futi na ɓa e yumumu, e zumu gir armu, e zumu aŋ bagakai tumu gaini ablehökaimu paŋ ɗa kaai! 19E tûrûsi sini ɗif n'abai na miɗini dalamni Yosef aha mini magala sek e miɗini: 20Za barka epingezayi, tiyi mi hilisi won na azi ktai ya aŋ wûri wala zi simi 21Amma won hlai na mi hili mi ɗiyi woni buri feŋ ɗa, won hlai na mi mili mini sakyi edi ɗa, ɗif paŋ a nava faraini amlai mini sakni ɗik ɗik, a dala na mi siŋ ɗa ɵa hiyak. Tiyana mi kiŋsi aŋ tiyi. 22Mi hilisi na gaini farai zamai war tiyi aŋ wûri wala zi simi gaini. Mi siɗi ɗif n'a wiyiɗi faraiyi amlai war sakyi ɗa kai. 23A waya seŋ a muɗa: Simni hiyak, ki hûni kai, a wiiki godai hanɗa amlai war sakki a Alaw na wiiki, a Alaw na wiini epiki. Dalaki mu navaŋ jek. Asakal par a ɵiɗisi Simeyon su.
24Ɗif a kiɗi ɗai hanɗa aha war dalamni Yosef, a siɗisi yem aŋ mi eziɗi, a sini kuzum mini ablehökaiɗi lai. 25Won hlai n'e ɗa biyi Yosef n'aga a cosi girvudi, e zizini siɗi gaini katu na wiiɗi buri e ɵini ya ɓa aga e simi simi na girvudi ɗa gaini.
26Won hlai na Yosef a cosi aha li, e sini like n'a na fu tiɗi amlai warɗi dilimi hanɗa. E hûrgû azumai midini afti wuzani. 27A zilbiɗi miɗini jam na wiini amur siɗi; asakal par a muɗa: Epiki na wel na ki miɗiŋa gaini a na jam hek ɗi, a na karni tiɓ ɗi? 28E wiyini seŋ e miɗi: Epiyi na ɵeŋku a na jam, a na karni hai.
E gûɓi azumai, e hûrgû azumai. 29Won hlai na Yosef a yima arni amai a tala Benyamin na tawalni, n'ahiɗi emini a zilbiɗi a muɗa: Hanɗa a tawalki n'agwi tar na ki miɗiŋa gaini ɗi? Asakal par a miɗini: Ahiya, Alaw a suku yum. 30Yosef, agulni te va gaini hiinini haw won hlai n'a tala tawalni. A purma buri a paya hlai n'a tuwa woni, a niya amlai warɗi dilimini, woni a tuwa.
31Asakal par a masi arni edi a niyasi anene, a rodo sini a muɗa: Ɓûrwi simi ɗa edi. 32E sinisi simi na wiini edi kiini, na wiiɗi nagai kiiɗi lai. Ɗai n'Egipte e simi gaini ni edi kiiɗi, buri futi buriɗi ɗai n'Egipte aŋ simi gaiɗi ɗai na hebre t'aŋ kai, buriɗi hanɗa a wala na hihir gara 33Ɗai na hebre e simnisi wuzani par gaini giri midiɗi marɗi sini n'abai par haa sini n'agwi ta, e tili arɗi marɗi war hunai. 34A siɗi a simi n'a na fu azumai wuzani ni, amma simi na wiini Benyamin pɗemni a suwa na wiiɗi marni na zamai paŋ azi ɵim, e ci e firiyi lai gaini Yosef.
Currently Selected:
Pi zi tiki 43: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964