Pi zi tiki 44
44
E pi hill pin Benyamin
1Yosef a sini miɗi wiini ɗif n'abai na miɗini dalamni a muɗa: Va sak na wiiɗi ɗai hanɗa gaini wala zi simi miɗini kiɗiɗi n'e libiŋ ta ta. Ku wa farai na wiini ɗif paŋ amai mini sakni ɗik ɗik. 2Amai minni sak na wiini arwagwi n'agwi ɗa ku wuti kawai zi ci na wiya mini ɗik, kawai zi ci zi arzaŋ gaini farai na wiini na wura algama gaini lai.
3Ɗif a za wala na Yosef a miɗini miɗini paŋ. Won hlai na hlai a siɗa edi li, e hiniɗi ɗai hanɗa e hili, nagai gaini ablehökaiɗi. 4E fikiɗi aha war fuŋ n'abai par, e hili maa gaigai kai hai; Yosef a miɗini wiini ɗif n'abai na miɗini dalamni: Faka amai, lawa piɗi ɗai hanɗa, ku niviɗi li ɗa ku miɗiɗi ɓa: Tiki ki wiyi meefeŋ miɗini pɗem n'a za siki buri ma ɗa? 5Kawai zi ci, zi tili hlai gaini wazagai na wuze na wiini epin-geza t'aŋ tiki na kai ɗi? Na ki zi ɵa ɗa a maɗa? Ki zi meefeŋ.
6Ɗif n'abai na miɗini dalamni a co siɗi a miɗiɗi seŋ hanɗa. 7E wiyini seŋ e miɗi: Epin-gezayi a siɗa aŋ muɗa seŋ na maini hanɗa nɵa maɵa maɵa ɗa? A tala hihir gara na ɓa bagakaiku e zi wala na maini hanɗa nɵa ɗa. 8Farai na mi niviŋ amlai min sakyi z'algama ɗik ɗik, mi wuyuŋkusi aha midini afti na Kanaan par kai ɗi? Mi kiɗi mi hili arzaŋ zaw or ahani epin-gezaku par maɵa maɵa ɗa? 9Ɗif n'arbaɗi bagakaiku na wala hanɗa a nava li war tini a nava fiɗi n'edi, tiyi na zamai mi bindi aŋ bagakai na wiini epingezayi lai. 10A muɗa: Pɗem, a za maini na ki miɗiŋ na ɵa. Ni na wala a nava li war tini, a bunda aŋ begeŋa, tiki na zamai seŋ midiki kai. 11Witaw tar e mili sakɗi azumai, ɗif paŋ na wiini wiini, e miliŋ edi. 12Ɗif n'abai na miɗini dalam a tika pini aŋ waza wazagai, sini n'abai par haa a vada gaini n'agwi. A niviti kawai zi ci war sak na wiini Benyamin. 13E ŋirwi sapa na siɗi edi, ɗif paŋ a mula wazagaini amai duɓani ablehoini, e wiyi aha war fuŋ n'abai.
Kalaŋ n'arbani Yosef gaiɗi tawalakaini: Yosef a wa pini amai
14Yuda gaiɗi tawalakaini e cûsi ahani Yosef. Yosef a na fu dam hai, e pûkû siɗi azumai, e pi arɗi azumai wuzani. 15A miɗiɗi: Wala na ki zi ɵa ɗa a maɗa, ki siɗi ɓa ɗif na maya ta ɵa a tala hlai na wuze gaini wazagai na wuze ki siɗi sa kai ɗi? 16Yuda a waya seŋ a muɗa: Mi siɗi aŋ miɗini wiini epingezayi a maɗa? Seŋ na mi miɗiŋ miyi par a na wata ɗa? Aga mi siŋki jreyi katawai wuzaku maɵa maɵa ɗa? Meefeŋ na wiiɗi bagakaiku a siŋkaŋsi edi a Alaw koo! Tala, mi ɗi bagakai na wiini epingezayi, tiyi lai, ni na kawai zi ci te na fu tini lai. 17Mu siɗa aŋ za wala na maini hanɗa ɵa kai; a tala hihir gara. Ɗif n'a nivitisi kawai zi ci war tini ɗa aga a za aŋ begeŋa ɗa a ni, tiki na zamai ɗa wiyi amai sini epiki jam.
18Yuda a torasi gobi sini a ɗuula a muɗa: Za barka epin-geza! Hina begeku a miɗini seŋ ktai wiini epin-gezani, ku dava sini kai: Tuku gaini Faraw ki ɗi kal kal. 19Epin-geza a ni n'a zilbiɗi bagakaini ɓa epiɗi a na ɗi? Tawalɗi zamai a na ɗi? 20Tiyi mi wiyini seŋ wiini epingezayi ɓa: Epiyi a na, a za wel ta. Ahi n'a waŋ war welni a na agwi kadai, tawalni a mra su. A hina piɗi emini a ni ktai, epini a daraŋ gara. 21Nɵa ku miɗiɗi wiiɗi bagakaiku ɓa: Ki kiŋasi aga mu giɗimaŋ. 22Tiyi mi wiyini seŋ wiini epingezayi ɓa: Arwagwi hanɗa a sɗa aŋ ɓurwa gaini epini kai, buri ɓa epini aga a mra na ɓa a hinaŋsi li ɗa. 23Nɵa ku miɗiɗi wiiɗi bagakaiku ɓa “na ɓa tawalki n'agwiyeŋe a halasi azumai gaiki kai ɗa, mu sɗiki wuzani ara duk kai zaŋ”. 24Nɵa won hlai na mi wiyi amai sin ɵeŋku na epiyi, mi miɗini seŋ na wiini epingezayi. 25Epiyi a muɗa: Wiyi wurumusi wala zi simi agwi. 26Tiyi mi wiyini seŋ ɓa: Tiyi mi siɗi aŋ hili kai, na ɓa tawalyi n'agwiyeŋe aŋ gaiyi kai ɗa, aga mi hili. Na ɓa tawalyi n'agwiyeŋe aŋ gaiyi kai ɗa, aga e hiniyi wuzani arni ɗif ɗa kai. 27Apa na ɵeŋku a miɗiyi ɓa, tiki ki siɗi ɓa muniya te waŋa ali sulu bas, 28na ktai a yima edi sa par, mu sɗa fakat ɓa a lumaŋ a wazagai n'edi buza, buri mu talaŋ duk kai zaŋ haa girna. 29Ki diri ki yimi na hanɗa edi ta par pra. Na ɓa wala na meefeŋ a za sini li aga ki fiɗiŋa, ki piŋa ta na wel hanɗa na war marava.
30Na ɓa mu co ahani apa na ɵeŋku tiyana, na ɓa arwagwi hanɗa aŋ gaiyi kai, suŋfaɗi a naga sini marni gara, 31a talaŋ ɓ'aŋ kai tar aga a mra. Nɵa tiyi na bagakaiku ɗa, aga mi glisi mri miɗini epiyi na ɵeŋ na wel hanɗa, aga mi tikiŋ azumai war waŋ sek war marava lai. 32Sɗa ɓa ta na begeku mu ɵiɓasi didiga min seŋ paŋ n'aga a za sini arwagwi hanɗa wuzani epini. Mu miɗinisi ɓa na ɓa mu wayaɗi arwagwi hanɗa kai ɗa, seŋ aŋ mada wuzani apa haa kureɗ. 33Tiyana ɗa hinaŋa ta na ɵeŋku mu hina aŋ begeni epin-geza war balamni arwagwi ɗa, ni a waya wiini amai gaiɗi tawalakaini. 34Mu siɗa aŋ waya amai sini apa maɵa maɵa ɗa, na ɓa arwagwi hanɗa aŋ gaya kai ɗa, hinaŋa mu tala gir n'aga aza sini apa gaini ara kai.
Currently Selected:
Pi zi tiki 44: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964