Pi zi tiki 42
42
1Won hlai n'a tala ɓa algama a na aha warɗi Egipte, Yakob a miɗiɗi wiini alini: Na ki zi sa aŋ tili arɗi marki na ɗa a maɗa? 2A ɗuula a muɗa: Mu ɵina ɓa algama a na aha war Egipte, hili woni, wurumusi woni par kapai mu kurɗumu, mu murumu kai. 3Tawalakaini Yosef doogo e hili aŋ wirisi algama war Egipte par. 4Amma Yakob a ɵina Benyamin na tawalni Yosef gaiɗi tawalakaini kai, a hiina ɓa kapai wala na meefeŋ a za sini kai.
5Alini Izrayel e hilisi aŋ wûri algama maiɗi marɗi na zamai ɵa lai, buri wiyamai te za midini afti na Kanaan,
Azi n'avut na Yosef a nava gaiɗi tawalakaini
6Yosef a na fu aŋ Lawan na midini afti ni ɗa, a cikila algama edi wiiɗi ɗai paŋ. Tawalakaini Yosef e cûsi e hûrgû azumai wuzani, arɗi azumai tiɓ tiɓ, 7Yosef a tiliɗi tawalakaini, a siɗiɗi ba, amma a firiya a siŋkiɗi sini kai, a miɗiɗi gaini wule na gdaŋ. A muɗa: Ki hilisi wata par ɗa? E wiyi seŋ e miɗini: Midini afti na Kanaan par, aŋ wûri wala zi simi.
8Yosef arni siɗi tawalakaini ca, amma nagai e siɗiŋ kai. 9Nɵa Yosef, miɗini a kɵa gaini weseŋ n'a pɵaŋ gaiɗi a miɗiɗi: Tiki ki ɗi ɗai zi tili ezini hlai, ki hilisi na aŋ tili baŋani hlai ka. 10E wiyini seŋ: Zaw kai epingezaiyi, tiyi bagakaiku mi hilisi buri mi wûri wala zi simi. 11Tiyi kafa mi ɗi alini ɗif ktai, miɗi ɗai na rhai waryi kai, bagakaiku e ɗi ɗai n'e tili ezini hlai kai. 12A wiyiɗi seŋ a miɗiɗi: Zaw kai, ki hilisi buri ki tili ɗa ezini hlai.
13E wiyi e miɗi pra: Tiyi bagakaiku mi ɗi fu tawalakaiɗi maryi doogo pi sulu, alini ɗif ktai midini afti na Kanaan, n'agwi n'asakal aŋsi girna aha gaini epiyi, ktai arbaɗi par aŋ kai. 14Yosef a ɗuula a muɗa: Mu midiki edi gaglai ɓa, ki ɗi zi tili ezini hlai ɗa! 15Aga mu sɗa jreki war seŋ hanɗa, gaini pai Faraw zaŋ. Aga ki niyi edi won na par kai, sai na ɓa tawalki n'agwi a halasi li won na. 16ɵini ktai arbaki par aŋ kasi tawalki, tiki na ki hini ɗa ki ɗi daŋgai kapai mu sɗa jreni seŋki na ki miɗiŋa ɗa, na ɓa nɵa kai ɗa gaini pai Faraw zaŋ, tiki ki ɗi ɗai n'e tili ezini hlai jre jre.
17A pûkûɗi warɗi daŋgai puk haa meefeŋ hu. 18Mefeŋ n'ag'aŋ hu, Yosef a miɗiɗi: Kapai suŋfaki a kora ɗa, aga ki zi maini na mu na miɗiŋki nɵa: Ta mu ɗif na mu huna Alaw. 19Na ɓa ki ɗi ɗai na jreki a na ɗa, a pɗem ɓa ktai arbaki par a hina ka war daŋgai dam, tiki na zamai ɗa ki ki wala zi simi aha buri wiyamai. 20Asakal par ki kiŋasi tawalki n'agwi ɗa, seŋki na ki miɗiŋ aga a za edi aŋ jre lai, tiki aga ki mri kir kai, e zi hanɗa lai.
21E miɗi arbaɗi marɗi: Aa, tumu mu zumu meefeŋ sini tawalmu won hlai na mu tulumu gir na wiini, a zilbumu buri mu zunumu yum, amma mu ɵunumu seŋni kai, gir hanɗa a za sumu na buri hanɗa.
22Ruben a miɗiɗi: Mu miɗiki ɓa, ki zi wala na meefeŋ ktai sini arwagwi hanɗa kai, ki ɵini seŋŋa kai kai ɗi! Tiyana a zilba tumu na ɗa a felni ɗa.
23E siɗi ɓa Yosef a na ɵina nɵa e siɗi ɵa kai, buri ɗif zi bindi seŋ a na fu arbaɗi. 24Nɵa Yosef a yima sini edi siɗi par, a tuwa, asakal par a wayasi siɗi a miɗiɗi seŋ.
Wiyi n'aha war Kanaan
A yima Simeyon arbaɗi par, a sa miɗi ɓa e rgiŋ wuzani arɗi. 25Asakal par Yosef a sa futi buri e vi sakɗi gaini algama, e wiyini dalani asiya ɗi paŋ war sakni sakni, e siɗi wala zi simi tiɗi burini morkoiɗi lai, a za siɗi maini nɵa lai.
26E mili algamaɗi amai duɓani ablehökai e hili wiiɗi. 27won hlai n'e ɗiyi woni buri feŋ, ktai arbaɗi a mala mini sakni edi aŋ sini simi wiini ablehöni, a tala farai na wiini amai par mini sak ɗa ta. 28A miɗiɗi wiiɗi tawalakaini: E wiyiŋasi faraiŋa wai, a na amlai mini sakŋa zi algama ɗik. Gdaŋɗi a vada edi, hunai te yimiɗi gara. E miɗi arbaɗi marɗi: Alaw a zumu ɵa ɗa a maɗa!
29E cûsi aha sini Yakob n'epiɗi midini afti na Kanaan, e miɗini labar n'a za siɗi paŋ. 30E miɗi: Ɗif n'a na aŋ abaini afti a miɗiyi seŋ na gdaŋ, a yimiyi maiɗi ɗai zi tili ezini hlai nɵa. 31Tiyi mi wiyini seŋ: Tiyi, miɗi ɗai zi tili ezini hlai kai, mi ɗi ɗai na rhai waryi kaalai. 32Mi ɗi fu tawalakaiɗi maryi doogo pi sulu, epiyi ktai, ktai arbayi par aŋ kai, n'agwi n'asakal tar aŋsi girna aha gaini epiyi midini afti na Kanaan. 33Nɵa ɗif na abaini afti ɗa a miɗiyi maini nɵa: Aga mu sɗa ɓa ki ɗi ɗai na jreki a na ɗa war seŋ hanɗa: Ki hini ka tawalki ktai gaya, ki mili algama pini kiɗiki, ki kiŋ aha buriɗi wiyamai, hili. 34Nɵa ki kiŋasi tawalki n'agwi, kapai mu sɗa ɓa ki ɗi ɗai zi tili ezini hlai kai, ki ɗi ɗai zi rhai kaalai. Aga mu ɵiki tawalki na ktai ɗa, ki zi cakala midini afti lai.
35Hlai n'e tiki piɗi aŋ mili wazagai na war sakɗi edi, asiya ɗi paŋ a nava faraini n'a saŋ warɗi partami amlai war sakni ɗik ɗik. Gaini epiɗi paŋ, won hlai n'e tili partami gaini faraiɗi ɗa, hunai te yimiɗi.
36Yakob n'epiɗi a miɗiɗi: Ki diri ɓa ahi a hina ta kai zaw! Yosef ɗa aŋ kir kai, Simeyon aŋ kir kai, Benyamin ki yimiŋŋa kaai lai, hanɗa paŋ a kɵasifu na mada ɗaai. 37Nɵa Ruben a miɗini wiini epini: Na ɓa mu wuyuŋkusi kai ɗa, ku fiɗiɗi aliya na sulu na maɵagai wiiku edi, mu ɵiɓa didikŋa li mini aga mu wiyuŋkusi lai. 38A waya seŋ a muɗa: Ahiya aga a hala gaiki kai, tawalni a mra su a hina kiini pal, na ɓa wala na meefeŋ a navaŋ li warɗi futi na ki hili warɗi na ɗa, aga ki fiɗiŋa, aga ki piŋa ta na wel hanɗa war marava buri meefeŋ na ki kiŋsi mada.
Currently Selected:
Pi zi tiki 42: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964