Pi zi tiki 41
41
Weseŋ n'a pɵa Faraw
1Amma buza a vuga li sulu, Faraw lai weseŋ a pɵaŋ. A tala sini agoɗom wulani yem-ra Nil. 2A tala ɵaakai na pɗamai muguzak, gaini liki ɗup ɗup; ayir sini hiniɗ hiniɗ lai, a niyasi amai agoɗom warni yem-ra Nil par, a tika pini a suma kuzum n'amai wulani daŋ. 3Asakal par ɵaakai zamai muguzak a niyasi amai war yem-ra Nil par lai, a tala maafanai, gaini hûgi, a ɗiya ɵimani n'avut amai wulani yem-ra na Nil sa lai. 4Ɵaakai na muguzak n'a tala maafanai gaini hûgi lai a luma ɵaakai na muguzak na tala pɗamai gaini liki ɗup ɗup ɗa, nɵa Faraw a ɵiya amai.
5A waya a kala weseŋ pra, weseŋ a pɵaŋ azi n'ag'aŋ sulu pra. A tala miɗini yawni wai ktai, wai a pasi miɗini muguzak, abakai, muku a ruvuku sini. 6Asakal par miɗini wai zamai muguzak n'agogoi gaini siiti tini smer z'afu na piɗi futi na dawai par a diyasi lai. 7Midini wai n'agogoi a rɓa na muguzak n'abakai na pɗamai, nɵa Faraw a ɵiya amai. A tala ɗa a pɵaŋ ɗa a weseŋ.
8Gorof par Faraw hangalni a tuura a yikiɗisi ɗai zi hiila gaiɗi ɗai na yalakai n'Egipte ɗa paŋ, a virniɗi weseŋ n'a pɵaŋ paŋ, amma ɗif ktai a kiɗa aŋ siŋkini ezini seŋ hanɗa edi wiini Faraw kai. 9Nɵa, ɗif n'a sini wala zi ci wiini Faraw a miɗini: Jaamus, girna aga mu muɗa miɗini meefeŋŋa n'a vugasi edi wuzaku. 10Mefeŋ ktai pai a za hiy siɗi ɗaini zi sda, ta gaini abaiɗi ɗai n'e zi peŋ, e yimiyi, e miliyi warɗi daŋgai ahani abaiɗi ɗai zi gɗam na wiini pai. 11Weseŋ a pɵiyi duvuk ni ktai, ta gaini ni, weseŋ n'a pɵiyi, ezini zi siŋki edi kiini kiini. 12Gaw na hebre ktai, bege na wiini abaiɗi ɗai zi gɗam na wiini pai a na fu gaiyi. Mi virnini weseŋ n'a pɵiyi, a siŋkiyi ezini edi ktai ktai paŋ. 13Wala a za nɵa kal kal maini n'a siŋkiyi ezini edi nɵa. Ta a wayaŋa war sdaŋa n'avut, maya na ktai e higiŋ amai.
Riyi n'amai na wiini Yosef
Yosef a siŋka ezini weseŋ n'a pɵa Faraw edi
14Faraw a ɵina aŋ yikasi Yosef, e pirmi aŋ yimiŋsi warɗi daŋgai par, e fiɗini miɗini edi, a bunda sapa na sini, a hala ahani Faraw. 15Pai a miɗini wiini Yosef: Weseŋ a pɵaŋa, ɗif ktai n'a kiɗa a siŋkaŋa ezini edi aŋ kai, amma mu ɵina e ɗa miɗi muduku ɓa, won hlai na e vurnuku weseŋ zi pɵi li ku kiɗa aŋ siŋka ezini edi lai. 16Yosef a wiyini seŋ wiini Faraw, koo gaya ta kai tekeɗeɗi, Alaw a sɗa aŋ sa wiyini seŋ na pɗem wiini Faraw.
17Nɵa Faraw a miɗini wiini Yosef: Weseŋ n'a pɵaŋa, mu tala sa agoɗom wulani yem-ra na Nil gaini ɗiyi zaw. 18Mu tala ɵaakai muguzak gaini liki, a tala pɗamai lai a niyasi amai war yem-ra Nil par, a tika pini aŋ suma kuzum n'a na amai wulani da ɗa. 19Asakal par ɵaakai zamai muguzak a niyasi amai duɓani par, gaini hûgi, a tala maafanai gara, komiyeŋ komiyeŋ nɵa, midini afti n'Egipte kafa mu tala ka ɵaakai na maafanai maini na hanɗa ɵ kaa duk kai. 20ɵaakai, n'a komoyeŋai n'a tala maafanai lai a rɓa ɵaakai na muguzak na gaini liki n'avut ɗa. 21Won hlai n'a rɓaŋ li, a tala maini na ɓa a rɓa wala kai ɵa, a sini komoyeŋai, maafanai maini n'avut ɗa ɵa, nɵa mu ɵiya amai. 22Amma mu tala war weseŋ pra, miɗini wai muguzak n'a pasi amlai par sini yahaw ktai, abakai, muku a ruvuku sini. 23Asakal par miɗini wai zamai muguzak gaini siiti agogoi gaini hûûli tini smer z'afu na piɗi futi na dawai par a diyasi asakalni par. 24Midini wai n'agogoi a rɓa na pɗamai na muguzak ɗa, mu miɗiɗi wiiɗi ɗai zi hiila gaini, amma ɗif ktai maa a kiɗa a zaŋa gaglai midini kai.
25Yosef a wiyini seŋ wiini Faraw: Weseŋ na wiini Faraw a wala ktai, Alaw a zini ɗa a zaida wiini Faraw burini wala n'aga a zaŋ. 26Saakai na pɗamai na muguzak a buza muguzak, miɗini wai na muguzak a buza muguzak, weseŋ zi pɵi hanɗa a wala ni ktai. 27ɵaakai na komiyeŋai muguzak n'a tala maafanai, n'a niyasi amai asakal a buza muguzak; miɗini wai na muguzak na siita gaini yi tini smer z'afu na piɗi futi na dawai par a siŋka miɗini buza muguzak na wiiɗi wiyamai. 28Seŋ na mu dara mu miɗiŋni wiini Faraw a hanɗa: Alaw a siŋkini wiini Faraw ɗa a wala n'aga a zaŋ. 29Buza aga a halasi muguzak, wazagai zi simi midini afti n'Egipte paŋ aga a za viya. 30Asakal par buza zi wiyamai muguzak aga a luɓasi. Ɗai midiɗi aga a wula gaini der na viya n'a na ka midini afti n'Egipte, wiyamai aga a vada gdaŋɗi ɗai na midini afti ɗa edi, 31der na viya n'a na ka midini afti, ɗai aga e siɗiŋ kir kai burini wiyamai n'aga te halasi asakal par, aga te za gdaŋ gara. 32Na ɓa weseŋ zi pɵi hanɗa a za azi sulu sini Faraw ɗa, a na buri ɓa wala hanɗa a halasi sini Alaw par, Alaw aga a baiya kai aŋ vaŋ amai.
33Tiyana ɗa a pɗem ɓa Faraw a paya ɗif ktai zi siɗi, na yel aŋ tikaŋ amai midini afti n'Egipte. 34A pɗem ɓa Faraw a miliɗi ɗai n'abakai midini afti ɗa ca ca aŋ yimi gal n'ag'aŋ ɵim na wiini hiɗi na midini afti n'Egipte paŋ aŋ tar, haa buza na muguzak na der aŋ warni a vada. 35Aga e tipisi wazagai zi simi paŋ na e niviŋ war buza na muguzak hanɗa, e tipi algama paŋ war vre, pai a mula arni miɗini maini godi nɵa war fuŋ n'abakai. 36Hanɗa aga a za aŋ godai burini afti burini buza zi wiyamai na muguzak n'aga a halasi midini afti n'Egipte, nɵa wiyamai aga a vidiɗi ɗai na midini afti edi kai.
Yosef a niviti abai
37Hiini na Yosef a saŋ ɗa a firiya agulni Faraw gaiɗi ɗai zi sda paŋ lai. 38Faraw a miɗiɗi: Aga mu nuvumu ɗif na seze na wiini Alaw aŋ miɗini maini ni nɵa tiɓ ɗi? 39Faraw a miɗini wiini Yosef: Alaw a hitriku ya miɗini wazagai hanɗa paŋ, ɗif ktai zi siɗi, zi yel lai n'a suwuku aŋ kai. 40Tuku aga ku za aŋ ɗif n'abai miɗini hlaiŋa. Ɗai paŋ aga e ɵini pini gadaiku. Ta aga mu suwuku gaiɗi Paramai zi pai ɗa bas. 41Faraw a miɗini wiini Yosef: Tala, mu tukuku midini afti n'Egipte paŋ. 42A witisi adoŋoi tini par, a witini tini Yosef, a wiini sapa zi leŋ sini, a ɵitini aiduwi zi or wulani lai. 43Asakal par a tikaŋ amai midini Saretni n'ag'aŋ sulu, ɗai e ɗûûli wuzani: Fiki edi, fiki edi. Faraw a tikaŋ nɵa aŋ abai midini afti n'Egipte paŋ. 44A miɗini wiini Yosef: Pai mu ta, amma gaiku kai ɗa, midini afti n'Egipte ɗa paŋ ɗif a muguza kai. 45Asakal par Faraw a sini yiki wiini Yosef ɓa: Safnat-paniya. A sitini Asenat n'ahini Poti-Fera pai zi ɓaka na One aŋ muni. Yosef a hala aŋ tala afti n'Egipte.
46Yosef, buzani a na fu doogo doogo hu, won hlai n'e kiŋsi wuzani Faraw pai n'Egipte, asakal par Yosef a hala aŋ guna afti n'Egipte ɗa paŋ.
47War buza na muguzak zi der, afti a za seyem viya. 48Yosef a tapa wazagai zi simi na midini afti n'Egipte ɗa paŋ amai, war buza na muguzak n'a vuga pini marni ɗa, a giɗimaŋ warni vrakai war fuŋ n'abakai. A tapasi seyem na e ziŋsi edi war basga n'edi ɵimaɗi par aha war fuŋ n'abakai. 49Asakal par Yosef a tapa algama amai viya gara maini kaikai na agoɗom nɵa, haa a ɗiya pɵini zaw buri a kiɗa a pɵa kir kai. 50Wuzani buza na wiyamai te cosi sek ɗa, Yosef a wa ali sulu gaiɗi Asenat n'ahini Poti-Fera pai zi ɓaka na One. 51A sini yiki wiini ahini n'avut ɗa ɓa: Manase, a dara a muɗa: Alaw a hinaŋa, mada a wula gaini girŋa paŋ, gaini dalam na wiini apa paŋ lai. 52N'ag'aŋ sulu a sini yiki ɓa: Efrayim, a dara a muɗa: Alaw a saŋa seyem li midini afti na mu sda gir woni.
53Buza na muguzak zi der na midini afti n'Egipte a daba, 54Buza na muguzak na wiini wiyamai a tika pini, maini na Yosef a muɗaŋ wuzani hlai par ɗa nɵa. Wiyamai te za midiɗi yai paŋ, amma midini afti n'Egipte ɗa wala zi simi a na.
55Wiyamai te tika piɗi aŋ za midini afti n'Egipte ɗa paŋ lai, ɗai e tiki piɗi e ɗûûli burini wala zi simi sini Faraw. Pai a wiyiɗi seŋ ɓa: Hili piyi Yosef, ki zi wala n'aga a miɗiki midini. 56Wiyamai te za midini afti paŋ, Yosef a mala mini vrekai n'e ɗiyiŋ aha war fuŋ n'abakai paŋ edi, a rɗi algama edi wiiɗi ɗai n'Egipte. Wiyamai te za gdaŋ a suwa pra midini afti n'Egipte.
Tawalakaini Yosef e hilisi azi n'avut war Egipte
Yakob a ɵiniɗi alini aha war Egipte
57Ɗai paŋ e hilisi aha war Egipte aŋ wûri algama tini Yosef par, buri wiyamai te riya amai gdaŋ gara midiɗi yai paŋ.
Currently Selected:
Pi zi tiki 41: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964