Pi zi tiki 34
34
Karai n'a za war Sikem
1Dina ahini Yakob n'a wuti gaiɗi Lea te niya anene aŋ tiliɗi ali falakai na midini afti ni ɗa. 2Sikem n'ahini pai Hamor, na war pinziba Hivit a tiliti a yimiti gaini gdaŋ a fana gaiɗi aŋ gdaŋ. 3Suŋfaɗi agulni paŋ a sa edi midiɗi Dina n'ahini Yakob, dirini a va amai midiɗi ɓulmi hanɗa gara, a firya ɓa te sitini agulɗi. 4Sikem a miɗini wiini Hamor n'epini: Tikitiŋa ahiyagwi hanɗa aŋ muni.
5Yakob a ɵina ya ɓa e tûûriti Dina n'ahini kok. Amma won hlai n'alini e ɗisi edi war basga gaini farai zi gɗam ɗa hai, a muɗa wala ktai kai, haa e wiyisi aha. 6Hamor n'epini Sikem a halasi ahani Yakob aŋ muɗa gaini. 7Alini Yakob e wiyisi edi war basga par. Won hlai n'e ɵini seŋ hanɗa e tiliŋ siɗi maini tirki nɵa, e fiki gaini hiy na gdaŋ gara, buri won hlai na Sikem a fana gaiɗi ahini Yakob ɗa a za ɗa a wala zi siyer n'abai aha war Izrayel, a wala n'a sɗa aŋ za kai. 8Hamor a muɗa gaiɗi maini nɵa: Sikem n'ahiya agulni te sa edi midiɗi ahiki gara, ki sitini aŋ muni ta kai ɗi? 9Zi bonu gaiyi war tiki, kapai ki siɗiyi aliki na falakai, kapai ki miliɗi na wiyi aŋ wiiki lai. 10Kapai ki simni gaiyi afti paŋ a hina tiki, aŋ zi maini ki diri nɵa, ki simni midini, ki zi cakala miɗini, ki bindi aŋ tamaini afti lai.
11Sikem a miɗini wiini epiɗi ɓulmi gaiɗi tawalakaiɗi: Hiniŋa mu nava yim wuzani arki, wala paŋ na ki piyiŋ ta aga mu siŋki. 12Farai na firyi ɓa mu saŋ aŋ tiyi ɗa, ki miɗiŋa gaini katu zamai zamai na mu saŋ ɗa lai, amma ki sitiŋa ahiki aŋ muni ta. 13Alini Yakob e dûûli Sikem gaini Hamor n'epini gai dûûli, buri ɓa Sikem a tûûriti Dina na tawalɗi kok, a binditi hihiri. 14E miɗiɗi: Mi kiɗi mi siti tawalyi wiini ɗif na ɵa gurgle kai kai, buri ɓa a wala zi siyer buriyi. 15Mi kiɗi mi sitiki ɗa, sai na ɓa, ki zi li pin wala na mi zilbiki miɗini na ɗa, ɗaiki na maɵagai ɗa, e ɵi gurgle paŋ kafa. 16Nɵa, tiyi aga mi siɗiki aliyi na falakai, aga mi miliɗi aliki na falakai ɗa lai, aga mi zi fuŋ gaiki, mu bundumu aŋ ɗai ktai 17Na ɓa ki yimi ɵini gurgle na mi midiki gaini na kai ɗa, aga mi yimiti ahiyi, mi hili wiyi. 18Seŋɗi n'e miɗiŋ ɗa a firiya agulni Hamor gaini Sikem n'ahini. 19Gawla ɗa a baiya kai aŋ za pini wala n'e miɗiŋ ɗa, epini a daraŋ a sûwiɗi ɗai n'ahani paŋ lai.
20Hamor gaini Sikem n'ahini, e hili war faada na wiini fuŋ n'abai ɗa, e miɗiɗi wiiɗi ɗai na war fuŋɗi ɗa maini nɵa: 21Ɗai hanɗa, e firyi e simni gaimu war ɵeɗ. Nɵa mu hunuɗumu e simni wiiɗi, e zi cakalaɗi wiiɗi, afti a na viya kadai, a sûwiɗi gai suwai, tumu aga mu tukuɗumu aliɗi na falakai lai, nagai aga e tikiɗi na wiimu lai. 22Amma e firyi ɓa, kapai e zi fuŋ gaimu, mu bundumu aŋ ɗai ktai lai ɗa, sai alimu na maɵagai ɗa e ɵi gurgle maiɗi nagai ɵa. 23Nɵa farani farai na wiiɗi gaini der na wiiɗi lai, wazagaiɗi paŋ aga a bunda aŋ wiimu kai ɗi? Yimumu seŋɗi ɗa wiimu, hunuɗumu e zi fuŋ arbamu. 24Nagai paŋ n'e hili anene war faada, n'e ɵini seŋni Hamor gaini Sikem n'ahini ɗa, e yimi seŋ hanɗa. Maɵagai na war fuŋ n'abai ɗa taaha e ɵi gurgle.
25E zi mefeŋ sulu, mefeŋ n'ag'aŋ hu, won hlai n'e ɗa siɗi gir ɗa, Simeyon gaini Levi, na tawalakaiɗi Dina, arbaɗi alini Yakob par, ɗif paŋ a tika kaɵkarni tini, e niyi aha war fuŋ n'abai ɗa gai hangalɗi, e fiɗiɗi ɗai na maɵagai ɗa edi. 26E fiɗi Hamor gaini Sikem n'ahini edi gaini kaɵkar, e yimitisi Dina na tawalɗi piɗi e hilisi gaiɗi.
27Alini Yakob e fiki e mili wazagai na wiiɗi ɗai zi wuruk gaiɗi n'e mri mini kaɵkar ɗa, buri ɓa e tûûriti tawalɗi kok, e binditi hihri. 28E milisi adumaiɗi gaini haakaiɗi gaini ɵaakaiɗi gaini ablehökaiɗi n'aha war fuŋ n'abai gaini n'edi war basga par lai. 29E yimi falakaiɗi gaiɗi aliɗi, e virmi wazagaiɗi paŋ, haa amlai war dalamɗi paŋ.
30Nɵa Yakob a miɗini wiini Simeyon gaini Levi, ki bindiŋa li aŋ ɗif na meefeŋ wuzani arɗi Kanaaniyakai gaiɗi Perizzitekai na midini afti hanɗa, tumu mu ɗumu vok n'agwi kadai, aga e tipi mada, e fiɗiŋa edi, aga e vidiŋa edi gaini pinzibaŋa paŋ lai. 31E wiyini seŋ: Kapai e ziti tawalyi wiiɗi maiɗi muni zi zawar ɵa kir kai ɗi?
Currently Selected:
Pi zi tiki 34: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964