Pi zi tiki 35
35
Yakob a hiniti Sikem a zogo war Betel
1Alaw a miɗini wiini Yakob: Faka amai, hala amai a Betel, sumna woni, ku rga gûwiŋ zi yi ɓaka burini Alaw n'a siŋka sini arku won hlai na ku na ka aŋ pra edi wuzani Ezaw na tawalku 2Yakob a miɗiɗi wiiɗi ɗai n'ahani gaiɗi nagai n'e ɗa pini paŋ lai: Mili alawai na morkokoi n'aŋ tiki ɗa edi, zi siki edi aŋ hilu, bindi sapakai na siki lai. 3Hulumu amai a Betel, aga mu rga gûwiŋ zi yi ɓaka woni wiini Alaw n'a ɵina ma war mefeŋ zi gir na wiya ɗa, a na fu gaya woɗi futi na mu hala woɗi. 4E sini alawai na morkokoi n'aŋ tiɗi gaini adoŋo n'a na ɵimaɗi lai wiini Yakob. Yakob a paŋ azumai pini luwuŋ n'abai z'alaw gobi gaiɗi Sikem. 5E fikisi woni par e hili. Alaw a hina hunai n'abai war fuŋ n'abakai n'a gûniɗi paŋ, ɗif a kiɗa aŋ tika futi piɗi alini Yakob kai.
6Yakob a cosi a Luz na te na midini afti a Kanaan, a dara a muɗa a Betel, ni gaiɗi ɗai na pini paŋ lai. 7A rga gûwiŋ zi yi ɓaka woni, a sini yiki ɓa El-Betel buri Alaw a siŋka sini arni woni won hlai n'a na pra edi wuzani tawalni ɗa.
8Debora, muni na te wiliti Rebeka amai te mra, e piti azumai par piɗi Betel, pini luwuŋ n'abai na Yakob a sini yiki ɓa: Luwuŋ n'abai zi tuwi.
9Alaw a siŋka sini arni Yakob pra, won hlai n'a wayasi midini hlai na plas na Mezopotamiya par a ɓakaŋ. 10Alaw a miɗini: Yikuku ɓa Yakob, aga e yikuku gaini yiki na ɓa Yakob ɗa kir kai, amma yikuku aga a bunda ɓa: Izrayel. A sini yiki ɓa: Izrayel. 11Alaw a miɗini: Mu ta m'Alaw zi spak, ku wa ali viya, ku sisiɗa viya, ku bunda aŋ piniziba. Vokɗi pinziba viya aga a niyasi edi suku par, paakai aga e niyisi edi war pinzibaku par lai. 12Afti na mu siŋni wiini Abraham gaini Isaak ɗa aga mu suŋku aŋ wiiku, asakal sek ɗa aga mu suŋku, asakal sek ɗa aga mu siŋni wiini pinzibaku.
13Alaw a yima warni amai gaigai sini hlai n'a muɗa gaini woni.
14Yakob a rga wala zi siŋki ktai won hlai n'Alaw a muɗa gaini woni ɗa, a wala zi rgi n'a rgaŋ gaini ahi-fuŋ, a ma vin miɗini, a ma emel midini lai kapai a za aŋ wiini Alaw. 15Yakob a yika hlai n'Alaw a muɗa woni ɓa: Betel, a dara a muɗa dalam na wiini Alaw.
Wii na wiini Benyamin, mri na wiiɗi Rakel
16E fikiɗi a Betel par, hlai a hina wuzaɗi agwi kapai e gi a Öfrata, won hlai ni Rakel te poko, pûkûɗi a za gaini gir agwi 17Amma won hlai na te na poko gaini gir ɗa, muni na te pûkûti te miɗiɗi ku huna kai, buri ahi n'aŋ warku ɗa a wus pra 18Won hlai na suŋfaɗi a dara a wa edi, hlai na te ŋa ta aŋ mra, te sini yiki ɓa: Ben-Oni a dara a muɗa “ahi zi marava”. 19Rakel te mra, e piti ɵimaɗi futi na Öfrata sek, a dara a muɗa: Betlehem. 20Yakob a rga wala zi siŋki ktai miɗini yeɵɗi, a wala zi siŋki na wiini yeɵɗi Rakel aŋ woni ɵa haa girna.
21Izrayel a faka woni par, a pa gumuni amai par midiɗi Migdal-Eder. 22Amma hlai na Izrayel aŋ won hlai hanɗa dam, Ruben a hala a fana gaiɗi Bilha na marmaini epini. Izrayel a ɵina seŋ hanɗa. Alini Yakob e ɗa paŋ doogo. 23Aliɗi Leya: Ruben, ahini Yakob n'abai, Simeyon, Levi, Yuda, Isakar gaini Zabulon. 24Aliɗi Rakel: Yosef gaini Benyamin. 25Aliɗi Bilha na bagaiɗi Rakel: Dan gaini Neftali 26Aliɗi Zilpa na bagaiɗi Leya: Gad gaini Aser.
Hanɗa e ɗi alini Yakob n'a wiiɗi aha war hlai na plas na Mezopotamiya ɗa.
Mrini Isaak
27Yakob a cosi ahani Isaak n'epini a mamre, na war Kiryat-Arba, a dara a muɗa: Hebron, hlai na Abraham gaini Isaak e simnika woni. 28Isaak a mra sek ɗa buzani a za miya gaini doogo doogo mitwis, 29Suŋfani a wa edi, a mra, e tipiŋ gaiɗi tiyakaini. A mra gaini zi wel kro kro, gaini vi gaini buza lai. Ezaw gaini Yakob n'alini e piŋ.
Currently Selected:
Pi zi tiki 35: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964