SOERA MOZE I. FAZA 35.
FAZA 35.
I. Isaw̃a Mbetiëli Jakobo, niw̃aʼõ Lowalangi chõnia. II. Iʼaroʼõ gamaboeʼoela li chõ Jakobo Lowalangi. III. Toemboe Mbenijami andrõ, ba mate Rachela. IV. Horõ Roebeno. Tõi nono Jakobo. V. Faʼamate Gizaʼaki ba fogoʼo jaʼia.
1I. Ba imane Lowalangi chõ Jakobo: Laboe, ae misi jaw̃a ba Mbetiëli, ba daʼõ tebatoʼõ ba ba daʼõ õfaʼanõ naha wameʼe soemange chõ Lowalangi sangoromaʼõ jaʼia chõoe, me moloiʼõ no, bõrõ gaʼaoe Ezaoe. (F. I. 28, 13). 2Ba ibeʼe li Jakobo ba soroijomonia fefoe ba ba zi faofao chõnia fefoe, imane: Miheta Lowalangi niha bõʼõ andrõ, niʼoheʼohemi, mihaogõ ami ba mifalalini noechami, (F. I. 31, 19), 3enaʼõ mõi ita misi jaw̃a, ba Mbetiëli, ba daʼõ sa oefaʼanõ naha wameʼe soemange ba Lowalangi andrõ, si no mamondrongo ligoe, me baw̃a waʼatosasagoe, ba si no faofao chõgoe ba lala andrõ, ninotõrõgoe. (F. 28, 15). 4Ba labeʼe ba danga Jakobo fefoe Lowalangi niha bõʼõ andrõ, si so chõra, fabaja saeroe dalinga andrõ ba dalingara, ba ikoʼo Jakobo ba mbõrõ manawa andrõ ba zinga Zichema. 5Ba aefa daʼõ, ba lafazaw̃a ira. Ba no ihawoei faʼataʼoe mbanoea si tefasoei jaʼira, faʼataʼoe niʼasogõ Lowalangi, tobali lõ lagohi nono Jakobo andrõ. 6Ba iroegi Loesi Jakobo ba danõ Ganaʼana — jaʼia Mbetiëli andrõ — awõ niha andrõ fefoe, si faofao chõnia. 7Ba ifaʼanõ ba daʼõ naha wameʼe soemange ba ibeʼe tõi naha andrõ ”Lowalangi ba Mbetiëli”, me no ba daʼõ iʼoromaʼõ ia chõnia Lowalangi, me moloi ia no, bõrõ gaʼania. 8Ba mate Debora, baboe andrõ chõ Rebeka, ba lakoʼo ia tooe Mbetiëli, ba mbõrõ manawa; andrõ wa ”manawa wangeʼesi” dõinia.
9II. Ba ifoeli iʼoromaʼõ ia chõ Jakobo Lowalangi, me no mangawoeli ia moroi ba Mezofotamia ba ifahowoeʼõ ia. 10Ba imane chõnia Lowalangi: Jakobo dõimõ; bõi saʼae labeʼe tõimõ Jakobo, Izeraëli saʼae dõioe. Andrõ wa labeʼe tõinia Gizeraëli. (F. 32, 28). 11Ba imane chõnia Lowalangi: Lowalangi si lõ ambõ faʼabõlõ ndraʼo; jamongaʼõtõ ndraʼoegõ ba ja oja maʼoewoemõ dania! Samboea soi, w̃alo soi naʼi madooemõ dania, ba razo zi otarai lõwilõwioe dania. (F. 17, 1). 12Ba tanõ andrõ nitehegoe chõ Gaberahamo ba chõ Gizaʼaki, ba chõoe oebeʼe ba ba maʼoewoemõ oebeʼe danõ andrõ. 13Ba mõi mijaw̃a Lowalangi, irõi ia, ba naha andrõ, ba zi no moehede ia chõnia. 14Ba itaroeʼõ harefa Jakobo, ba naha andrõ, ba zi no fahoehoeo ia chõnia gowe [itaroeʼõ] ba ifadoewa ba detenia zoemange nibadoe ba ilaoe jaw̃a wanicha. (F. 28, 18). 15Ba ibeʼe tõi naha andrõ, ba zi no fahoehoeo Lowalangi chõnia, Mbetiëli Jakobo.
16III. Ba aefa daʼõ, ba lafaʼese ira, larõi Mbetiëli, ba me lõ arõoe tõ irege Geferata, ba afõchõ hoeloe Rachela, ba afõchõ sibai chõnia wadono. 17Ba me no afõchõ sibai chõnia, ba imane chõnia sangamõi taloe: Bõi boesi dõdõoe, ono matoea sa gõi chõoe iadaʼe! 18Ba me aetoe nosonia — mate sa ia — ba ibeʼe tõinia ”Mbenoni” (”Ono ba waʼafõehõ”) ba amania ba ibeʼe tõinia Mbenijami. 19Ba mate Rachela ba lakoʼo ia ba ngai lala ba Geferata, jaʼia Mbetilechema andrõ. 20Ba itaroeʼõ gowe, tandra ba dete lewatõnia, Jakobo; daʼõ dandra lewatõ andrõ ba dete lewatõ Rachela, si lõ teboelõ, iroege maʼõchṍ andre.
21IV. Ba ifaʼese zoei ia Izeraëli, ba zi tambai Migedala Ederi itaroeʼõ nosenia. (Mich. 4, 8). 22Ba me sosó ba danõ andrõ Gizeraëli, ba maoso Roebeno mõi moehorõni Mbiliha andrõ, donga ba dõi chõ namania. Ba irongo Izeraëli. Ba felendroea nono matoea chõ Gizeraëli. (F. 49, 4. Ngaʼõt. I. 5, 1). 23Ono Lea: Si aʼa nono chõ Jakobo, ba Roebeno, ba Simeoni ba Lewi ba Joeda ba Isasari ba Seboeloni. 24Ba ono Rachela, ba Josefo ba Benijami. 25Ba ono Mbiliha andrõ, sawoejoe jomo chõ Rachela, ba Dano ba Nafetali. 26Ba ono Zilifa andrõ, sawoejoe jomo chõ Lea, ba Gado ba Aseri. Daʼõ nono Jakobo andrõ, si toemboe chõnia ba Mesofotamia.
27V. Ba iroegi namania Izaʼaki, ba Mamere Jakobo, ba Mamere Kiriati Garaba — jaʼia Heberona andrõ — ba zi sosó ndra Aberahamo Izaʼaki, si fatewoe. 28Ba faʼara Gizaʼaki ba goeli danõ, ba 180 fache. 29Ba mate Gizaʼaki, oeroedoe ia ba niwara, atoea ba no afõli faʼaoeri; ba lakoʼo ia ononia Ezaoe ba Jakobo. (F. 49, 31).
Currently Selected:
SOERA MOZE I. FAZA 35.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.