SOERA MOZE I. FAZA 34.
FAZA 34.
I. Ihorõni Dina andrõ Sichema, omasi ia ihalõ. II. Lalimo mbanoea Zichema Simeoni ba Lewi, lafakao.
1I. Ba samoeza maʼõchõ, me mõi mangero Dina andrõ, ono Lea, ononia chõ Jakobo, me mõi mamaigi ono niha ba danõ alawe, 2ba iʼila ia Sichema, ono Ndrawa Hewi andrõ, Hemori, salaw̃a ba danõ andrõ, ba iraʼoe, oroedoe ia chõnia, ihorõni. 3Ba molemba sibai dõdõnia chõ Dina andrõ, ono Jakobo, omasi ia nono alawe andrõ, itandraigõ irara dõdõnia. 4Ba iʼandrõ chõ namania Hemori Sichema, imane: Sofoe chõgoe nono alawe andrõ, enaʼõ oehalõ! 5Ba no irongo Jakobo, wa no ihorõni nononia Dina; ba ononia matoea, ba no lafasao ba ndroeʼoe goerifõ, ba ihonogõ manõ ia Jakobo, irege mangawoeli ira. 6Ba mõi chõ Jakobo Hemori, Ama Zichema, ba wahoehoeosa chõnia. 7Ba me so nono Jakobo, si otarai mbenoea ba me larongo, ba abao sibai dõdõra, tesao wõnoera sabõlõbõlõ. Ba dõdõ Ndraono Gizeraëli, ba no horõ seboea nifazõchinia, me no oroedoe ia chõ nono Jakobo; lõʼõ manõ sa tola zi manõ menaʼõ! (Moz. V. 22, 21). 8Ba hoemede Hemori, imane chõra: Tõdõ nonogoe Sichema andrõ, ba no molemba chõ nono alawe andrõ, achimi; oeʼandrõ chõmi, mibeʼe ia chõnia, 9hana na olembatama ami. Mibeʼe chõma nonomi alawe, ba mihalõ nono alawe chõma, ba miʼiagõ chõma: 10jaʼe fõnami danõ, miʼiagõ ba midõrõdõrõi, hana na tetaro ami ba danõ! 11Ba imane Sichema chõ nama Dina andrõ ba chõ ndra gaʼania: Enaʼõ na faloechado waʼeboea dõdõ wamaigimi! Gofoe ha waʼeboea niw̃aʼõmi, ba oebeʼe. 12He eboea sibai niw̃aʼõmi chõgoe, bõwõ ba boeala, ba oebeʼe, oeʼoʼõ niw̃aʼõmi; ba mibeʼe foʼomogoe nono alawe andrõ!
13II. Ba latema li Zichema ba li namania Hemori ono Jakobo, laʼonechesi, me no ihorõni nachira Dina, lamane chõra: 14Tebai matehe, ihalõ nachima niha si lõ moeboto; saila ndraʼaga sa daʼõ. 15Awena tola maʼoʼõ chõmi, na mibaliʼõ si mane jaʼaga ami, wamoto fefoe motõi matoea ba chõmi. 16Ba mabeʼe saʼae chõmi nono alawe chõma ba mahalõ nono alawe chõmi ba maʼiagõ chõmi, enaʼõ ha samboea soi ita. 17Ba na lõ miʼoʼõ daʼõ, wamoto jaʼami, ba maʼohe nono alawe chõma, ba malaoe mofanõ! 18Ba atoelõ dõdõ ndra Hemori Sichema, ononia, niw̃aʼõra andrõ. 19Ba iʼaliogõ wolaoe si manõ ono matoea andrõ, me no omasi ia nono Jakobo, ba no seboea tõi ia ba zi sawōē jaʼira. 20Ba mõi ba mbawa gõli Hemori ba ononia andrõ, ba lamane ba mbanoeara: 21Si sõchi tõdõ chõda niha andrõ: acha mowanoea ira ba danõda ba hana na ladõrõdõrõi; tenga sa atṍ sambõ nahara danõ, gofoe he tánõ laʼiagõ! Tahalõ nonora alawe ba tabeʼe chõra nono alawe chõda. 22Ba awena laʼoʼõ niha andrõ, wangiagõ chõda, enaʼõ ha samboea soi ita, na lafabotoʼõ ira dozi motõi matoea ba chõda, si mane jaʼira, me no moeboto ira. 23Chõda dania zi so chõra, nabajabajara ba oerifõra, fefoe. Ba dataʼoʼõ chõra, enaʼõ bõi laboelõʼõ ira chõda! 24Ba laʼoʼõ niw̃aʼõ Hemori ba ononia Sichema dozi sanõrõnõrõ bawa gõli mbanoeania andrõ, ba weʼamõi baero ba ba weʼamõi mijomo, ira matoea andrõ fefoe, ha waʼato zanõrõnõrõ bawa gõli mbanoeania, ba lafabotoʼõ ira. 25Ba me no aefa doea wongi, me laʼachõmõi, ba latoejoe ziʼõli ono Jakobo andrõ, si daroea, Simeoni ba Lewi, gaʼa Dina andrõ, lahawoei mbanoea andrõ, si lõ famaoedoe dõdõ, ba laboenoe ndra matoea fefoe. 26Noemalõ Hemori ba ononia Sichema, laboenoe siʼõli, ba lahalõ Dina ba nomo Zichema ba lalaoe mofanõ. 27Ba latõrõ niboenoe andrõ ono Jakobo, laraboe hadia ia chõra, me no moehorõni nachira. 28Biribirira ba saw̃ira ba kalidera, ba hadia ia ba mbanoea bacha ba hadia ia baero, ba laraboe, 29awõ nibajabajara fefoe, awõ ndraonora sideʼide, awõ ndra alawera, laʼoloiʼõ sawoejoe, ba si so ba nomo fefoe, ba laraboe. 30Ba imane Jakobo chõ ndra Simeoni Lewi: Famakao nifobõrõmi chõgoe, noa sa mibeʼe faʼoedoe chõgoe niha ba danõ, Dawa Ganaʼana ba Dawa Weresi jaʼodo, si lõ atotó niha barõ mbawa; na laʼosaraʼõ li dania, ba lalaw̃a ndraʼo, ba tehori ba danõ ndraʼodo, awõ zoroijomogoe fefoe. (F. 49, 5 b. t.). 31Ba lamane: Hadia, acha ihorõni manõ nachima?
Currently Selected:
SOERA MOZE I. FAZA 34.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.