SOERA MOZE I. FAZA 33.
FAZA 33.
I. Faloecha Gezaoe chõ Jakobo, ba omoeso dõdõnia. II. Fahoehoeo ira. III. Iroegi danõ Ganaʼana Jakobo.
1I. Ba iʼila Jakobo so moroi sa Gezaoe, ba õfa ngaotoe nawõnia fao, ba ifosasi ndraono chõ Lea ba chõ Rachela, ba ba zawoejoe jomo andrõ, si daroea. 2Ba ibeʼe tánõ fõna zawoejoe andrõ, awõ nonora ba foerira Lea, awõ nononia ba foeri daʼõ Rachela awõ Josefo. 3Ba jaʼia, ba mowaõwaõ, ba mewitoe ifaõndrõ ia, irege danõ tooe, awena iroegi gaʼania. 4Ba fagohi Gezaoe, wamaondragõ jaʼia, italagoei mbagi ba faʼago bawa chõnia, ba megeʼege ira. 5Ba me ifachõlõ ia Ezaoe, me iʼila ndra alawe, awõ ndraono, ba imane: Ba ha niha daʼõ, awõoe? Ba imane: Iraono andrõ, nibeʼe Lowalangi chõ zawoejoemõ! 6Ba laʼondrasi sawoejoe jomo andrõ, awõ nonora, mangaloeloe chõnia. 7Awena iʼondrasi gõi Lea, awõ nononia, mangaloeloe, ba awena Josefo ba Rachela ba mangaloeloe.
8II. Ba imane: Ba hadia goena ngawawá andrõ, si faloechado? Ba imane: Jakobo: Afoeʼafoegoe oehalõ dõdõ zochõ jaʼo. 9Ba imane Ezaoe: No abõnõ chõgoe; hana na chõoe zi so chõoe, achi! 10Imane Jakobo: Bõi, na so ba dõdõoe ndraʼo maʼifoe, ba lõ tola lõ õtema chõgoe gameʼelagoe! Noa sa atṍ oeʼila mbawaoe, hoelõ mbawa mbanoea zoroego, me no õbologõ dõdõoe chõgoe. (Amaed. 16, 7). 11Halõ atṍ chõgoe mboeala fangowai andrõ; si no moeʼohe chõoe; noa sa ifahowoeʼõ sibai ndraʼodo Lowalangi, no fahõna manõ chõgoe. Ba iforege chõnia, balazi ihalõ. 12Aefa daʼõ, ba imane: Tafazaw̃a ita, mofanõ ita; ba sowaõwaõ ndraʼo chõoe. 13Ba imane Jakobo: Iʼila sochõ jaʼo, wa no sambõ faʼabõlõ na ndraono, ba ba mbiribiri ba ba zaw̃i, ba so zi bohooe moʼono, ba he ha maʼõmaʼṍchõ oeforege chõra, ba ahori mate, sambawá manõ. 14Acha mowaõwaõ fõna zawoejoenia zochõ jaʼo; ba jaʼodo, ba lõ oedaʼidaʼi wofanõ, dali waʼabõlõ goerifõ andrõ, niʼohegoe, ba faʼabõlõ ndraono, irege oeroegi zochõ jaʼo, ba Zeʼira. 15Ba imane Ezaoe: Ba daʼoerõi atṍ awõoe nawõgoe õsa. Ba imane: Hadõi? Asala ibologõ dõdõnia chõgoe sochõ jaʼo! 16Ba mangawoeli Gezaoe, me loeo daʼõ, isaw̃a Zeʼira.
17III. Ba Jakobo, ba isaw̃a Zoekota, ba itaroeʼõ nomonia. Ba nahia goerifõ, ba ose daha geoe itaroeʼõ. Andrõ wa labeʼe tõi mbanoea andrõ Zoekota. 18Ba dania, ba iroegi Zichema andrõ Jakobo, lõ hadia ia, Sichema ba danõ Ganaʼana; me iʼotarai Mezofotamia. Ba fõnafõna mbanoea itaroeʼõ nosenia. (F. 28, 21). 19Ba benoea andrõ, nitaroeʼõnia osenia, ba iʼõli chõ nono Hemori andrõ, Ama Zichema 100 kesita mbõli. 20Ba ifaʼanõ ba daʼõ naha wameʼe soemange ba ibeʼe tõinia ”Eli, Lowalangi Gizeraëli”.
Currently Selected:
SOERA MOZE I. FAZA 33.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.