SOERA MOZE I. FAZA 32.
FAZA 32.
I. Iʼila malaʼika Lowalangi Jakobo. II. Ifatenge zinenge, solohe boeala chõ gaʼania Ezaoe; ba mangandrõ ia chõ Lowalangi. III. Fasõndrata Jakobo chõ Lowalangi ba famalalini tõinia.
1I. Ba mahemoloe õ, ba ihoelõ wongi Labano faʼago bawa ba maʼoewoenia ba ba ndraononia ba iʼangonasi ira. Ba maoso Labano, ifoeli ia ba mbanoeara. 2Ba sofanõ gõi Jakobo, ba faloecha chõnia malaʼika Lowalangi. (Raz. II. 6, 17. Sin. 34, 8). 3Ba imane Jakobo, me iʼila ira: Sabõlõ chõ Lowalangi daʼõ. Andrõ wa ibeʼe tõi naha andrõ Mahanaʼi.
4II. Ba ifowaõwaõ zinenge Jakobo, chõ gaʼania Ezaoe, ba Zeʼira, ba danõ Ndraono Gedomo! 5ibeʼe li chõra, imane: Mimane chõ zalaw̃ada Ezaoe: Daʼõ niw̃aʼõ zawoejoemõ Jakobo chõoe: Chõ Labano sosó ndraʼo, ba no arõrõdo ba daʼõ, irege iadaʼe. 6Ba no faloechado zaw̃i ba kalide ba biribiri ba sawoejoe ono matoea, ba sawoejoe ono alawe, ba oefatenge iadaʼe, ba wamarongogõ toeria chõoe, jaʼoegõ sochõ jaʼodo, enaʼõ õbologõ dõdõoe chõgoe. 7Ba mangawoeli zinenge andrõ chõ Jakobo, lamane: Faloechaga chõ gaʼaoe Ezaoe, ba lala saʼae so ia, ba wamaondragõ jaʼoegõ, ba õfa ngaotoe nawõnia fao. 8Ba ataʼoe sibai Jakobo, mogichi dõdõnia. Ba ifosasi niha, si fao chõnia, ba biribiri ba saw̃i ba ondra, ifodoea mbawá. 9Imane sa dõdõnia: Na ihawoei zi sambawá Ezaoe, na iʼõʼõtõ, ba iʼila saʼae moloi si sambawá. (F. 31, 3). 10Ba imane Jakobo: He jaʼoegõ, Lowalangi doeagoe andrõ, Lowalangi namagoe Izaʼaki, Jehowa, sangoemaʼõ chõgoe: Foeliʼõ ba chõmi, ba niwami, ba oefaigi lala, faʼohahaoe dõdõoe. (Sam. II. 7, 18). 11Sambõ ndraʼodo, ba waʼeboea dõdõoe andrõ, fefoe, ba ba wa lõ farõi ndraʼoegõ, fefoe, si no faloecha genonioe andre chõoe. Ha sara siʼo chõgoe, me oeʼõtõ Joridano andre, ba iadaʼe, ba doea mbawā gamatõrõw̃agoe. 12Efaʼõ ndraʼo ba danga gaʼagoe andrõ, ba danga Gezaoe; ataʼoedo sa ia; fa bõi mõi ia, mangõʼõtõ jaʼaga, he ina, ba he iraono! (F. 28, 14). 13Ba jaʼoegõ, ba no õfaboeʼoe, wangoemaʼõ: Oefaigi lala, fa lõ hadia ia chõoe, ba ato sibai maʼoewoemõ dania oebeʼe, faʼoja ngawoea nene ba mbewe nasi, si tebai teʼerai faʼoja! 14Ba mõrõ ia ba daʼõ. Ba iʼoniagõ õsa zi so chõnia andrõ, boeala chõ gaʼania Ezaoe: 200 ngaʼeoe nambi si alawe, 15ba 20 zi matoea, ba 200 ngaʼeoe biribiri si alawe ba 20 zi matoea, 16ba 30 ngaʼeoe ondra, si bohooe moʼono, awõ nono, ba 40 onoʼono zaw̃i, ba 10 rozi ono zaw̃i si matoea, si bohooe eboea ba 20 ngaʼeoe kalide si alawe ba 10 rozi ono galide. 17Ba ibeʼe ba danga zawoejoenia daʼõ, sambasambawá, iʼoniagõ, ba ibeʼe li ba zawoejoenia, imane: Miʼowaõwaõ ba mifoʼotaʼotaloea ngawawá andrõ! 18Ba ifobawa lala ba zi so fõna, imane: Na faloecha chõoe gaʼagoe Ezaoe ba na isofoe chõoe: Ha chõ ndraʼoegõ ba heza mõiʼõ ba ha chõ daʼõ fõnaoe? 19ba õmane: Boeala zawoejoemõ Jakobo chõ zochõ jaʼo, Ezaoe; ba jaʼia, ba moroi foerima sibai. 20Ba si manõ gõi wangoemaʼõnia chõ wanete daʼõ, ba chõ wanete zi daroea ba ba dánõ bõʼõ fefoe, solohe ngawawá andrõ, imane: Mimanõ gõi chõ Gezaoe, na faloecha ami chõnia, ba mimane: 21Sawoejoemõ Jakobo andrõ, ba moroi foerima sibai. Imane sa dõdõnia: Daʼoeʼalõsi dõdõnia boeala andrõ, sowaõwaõ fõnagoe, ba awena dania faloecha ndraʼo chõnia, ma atṍ ibologõ dõdõnia chõgoe. 22Ba tobali mowaõwaõ mboeala andrõ, fatoea so ia na ba golombasew̃a, ba zi bongi andrõ.
23III. Ba ba zi bongi andrõ, ba maoso ia, iʼõtõ gõtõna ba Jakobo andrõ, iʼohe woʼomonia si domboea ba sawoejoe jomo andrõ, si daroea, ba ononia andrõ, si felezara. 24Iʼohe mijefo ira ba ifaʼõto fefoe hadia ia zi so chõnia. (Hos. 12, 4). 25Ba ha Jakobo zi torõi foeri. Ba so zi fasõndra ehõnia, irege tobaha faʼamoloeo. 26Ba me iʼila daʼõ, tebai ilaw̃a, ba itema ifalisi zolania, tobali fabesoe zola Jakobo, me fasõndra ia chõnia. 27Ba imane daʼõ no mege: Bõhõlido, tobaha faʼamoloeo! Ba imane [Jakobo]: Lõ oebõhõliʼõ, balazi õfahowoeʼõ ndraʼodo! 28Ba imane chõnia: Ha niha dõimõ! Imane: Jakobo! 29Ba imane: Lõʼõ saʼae labeʼe tõimõ Jakobo, Izeraëli saʼae dõioe, me no fasõndraʼõ chõ Lowalangi ba ba niha, ba me no jaʼoegõ zabõlõ. (Moz. II. 3, 13. Sangoehoek. 13, 18). 30Ba mangandrõ Jakobo, imane: Ombachaʼõ chõgoe dõimõ! Ba imane: Hadia sa, wa õsofoe dõigoe? Awena ifahowoeʼõ ia ba daʼõ. 31Ba ibeʼe tõi naha andrõ Weniëli Jakobo, [imane]: Me no faʼila bawa ndraʼo chõ Lowalangi ba me lõ si matedo. (F. 16, 13. Sin. 80, 4). 32Ba me no italoeʼi Weniëli andrõ, ba toemboe loeo; ba sakelakela ia, ba zolania andrõ. 33Andrõ wa lõ laʼā Iraono Gizeraëli noeo andrõ ba dete zola, iroegi maʼõchṍ, me no ifalisi zola Jakobo, oeo andrõ.
Currently Selected:
SOERA MOZE I. FAZA 32.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.