SOERA MOZE I. FAZA 31.
FAZA 31.
I. Moloi Jakobo chõ Labano, nibiniʼõ. II. Igohi Jakobo Labano; fahoehoeo ira. III. Fawoeʼoe li ira.
1I. Ba terongo chõ Jakobo hoehoeo nono Labano; no lamane: No ihalõ manõ chõnia Jakobo dána chõ namada, fefoe, ba ba dána chõ namada mege isõndra woʼanaʼa andrõ, fefoe. 2Ba ifaigifaigi mbawa Labano Jakobo, ba tenga saʼae si mane fõna gamoeata daʼõ chõnia. 3Ba imane Jehowa chõ Jakobo: Foeliʼõ ba danõ doeaoe ba ba niwami, ba oetolotoloʼõ. 4Ba ifatenge zinenge Jakobo, ifakaoniʼõ ndra Rachela Lea, ba weʼamõi chõnia ba danõ ba zi so biribiri. 5Ba imane chõra: Oeʼila saʼae, wa tenga saʼae si mane fõna mbawa namami chõgoe, ba no itolotolodo Lowalangi namagoe andrõ. 6Jaʼami zangila, wa no aʼoi dõlagoe wangai halõw̃õ namami. 7Ba no ilimodo amami; no mewoeloe ifalalalala loeogoe; ba lõʼõ sa nitehe Lowalangi chõnia fangalani jaʼodo. 8Na imane: Sogaragara loeooe, ba no sambawá manõ zoʼonoʼono sogaragara. Ba na imane zoei: Sochoichoi loeooe, ba sambawá zoʼonoʼono sochoichoi. 9Ba tobali ibõda chõ namami goerifõ andrõ Lowalangi, ba ibeʼe chõgoe. 10Ba me baw̃a wolowoe mbiribiri, ba oeʼila ba wangifi, oroma sibai, si matoea mbiribiri andrõ, si fahõmba ba zi alawe, ba ahori no sochoichoi ba sogaragara ba sombaw̃ambaw̃a. 11Ba imane chõgoe malaʼika Lowalangi, ba wangifi: He Jakobo! Ba oemane: Jaʼe ndraʼodo! 12Ba imane: Faigi we, si matoea mbiribiri andrõ, si fahõmba ba zi alawe, ba ha sambalõ sochoichoi ba sogaragara, ba sombaw̃ambaw̃a! Noa sa ahori oeʼila, nilaoe Labano chõoe. 13Lowalangi ba Mbetiëli no ndraʼodo, ba nilaoemõ fanicha ba harefa andrõ, ba nifaboeʼoemõ limõ chõgoe. Ba faoso, hetaʼõ ba danõ andre, ba foeliʼõ ba chõmi. 14Ba latema linia ira Rachela Lea, lamane chõnia: Hadia, so na sa dána chõma, so na zinemama ondrõita ba nomo namada? 15Hadia, tenga no niha bõʼõ ndraʼaga chõnia, me no iʼamawa ndraʼaga, ba me no ara me iʼā mbõlima? 16Fefoe sa, zi no fahõna andrõ, nifasõbi Lowalangi chõ namada, ba chõda ba chõ nonoda. Ba jaʼoegõ, ba oʼõ manõ fefoe niw̃aʼõ Lowalangi chõoe! 17Ba ifakoedo nononia ba foʼomonia ba hoeloe gondra; 18ba iʼohe misa goerifõnia andrõ, awõ fefoe zi so chõnia, nisõndrania, oerifõ andrõ, si so chõnia, nisõndrania ba Mezofotamia, ba weʼamõi chõ namania Izaʼaki ba danõ Ganaʼana. 19Ba me no mõi Labano, ba wogoeti boe mbiribirinia, ba itema itagõ zihara namania Rachela. 20Ba tobali ilimo Labano andrõ, Dawa Garamo, Jakobo, waminiʼõ chõnia, wa edõna moloi ia. 21Ba moloi ia, iʼohe fefoe hadia zi so chõnia; mangefa ia, iʼõtõ nidanõ ba isaw̃a hili Gileadi andrõ.
22II. Ba doea wongi, ba teʼombachaʼõ chõ Labano, wa no moloi Jakobo. 23Ba iʼohe dalifoesõnia, igohi Jakobo, fitoe ngaloeo fofanõ, ba ichamõ ia, ba hili Gileadi andrõ. 24Ba mõi chõ Labano, Dawa Garamo andrõ, Lowalangi, ba zi bongi, ba wangifi, imane chõnia: Angelama; samboea li bõi w̃aʼõ chõ Jakobo, si lõ sõchi! 25Ba ichamõ Jakobo Labano. Ba no itaroeʼõ nosenia Jakobo ba hili. Ba Labano ba talifoesõnia, ba no lataroeʼõ ba hili Gileadi andrõ gõi. 26Ba imane Labano chõ Jakobo: Hadia daʼõ, wa õlimodo õw̃aʼõ, wa no õʼoloiʼõ nonogoe andrõ, amaedola niraʼoe ba wanoewõ? 27Hadia wa moloiʼõ, nibiniʼõ, ba hana wa õlimodo, ba lõ õfarongogõ chõgoe, fa oefasaoʼõ menaʼõ, fao waʼiki ba fanoenõ ba faritia ba biola? 28ba lõ õbaseʼõ, faʼago bawa ndraʼo ba maʼoewoegoe ba ba nonogoe; si ndroehoe, nifolaoe zi lõ tõdõ wolaoemõ andrõ! 29So sa enaʼõ waʼabõlõ chõgoe, ba wamakao jaʼami, ba no imane chõgoe me owi Lowalangi namaoe andrõ: Angelama; samboea li bõi w̃aʼõ chõ Jakobo, si lõ sõchi! 30Ba laoe oea, noa sa moloiʼõ me no abõlõ sibai adõni dõdõoe ba chõmi, ba hana wa no õtagõ Lowalangigoe? 31Ba itema li Labano Jakobo, imane chõnia: Sataʼoe ndraʼo, oemane saʼae dõdõgoe: ma õfasõbi chõgoe nonooe. 32Ba nisõndra Lowalangioe andrõ, ba bõi ja aoeri! Ba zanehe talifoesõda andrõ boʼaboʼai zi so chõgoe, ba halõ. Ba lõʼõ sa iʼila Jakobo, wa no Rachela zanagõ. 33Ba mõi ba nose Jakobo Labano ba ba nose Lea ba ba nose zawoejoe jomo andrõ, si daroea, ba lõ hadia ia isõndra; ba irõi nose Lea ba mõi ba nose Rachela. 34Ba no ihalõ ziraha andrõ Rachela, ba no isigõʼõ barõ zela gondra, ba no idadaoni. Ba iboʼai nose maʼafefoe Labano, ba lõ hadia ia isõndra. 35Ba imane Rachela chõ namania: He ama, bõi ofõnoe, na tebai maosodo chõoe; itõrõ ndraʼo si mane amoeata ndra alawe! Ba iʼaloealoei, ba lõ isõndra ziraha. 36Ba mofõnoe Jakobo, ihedehedeʼõ Labano. Hoemede ia, imane chõ Labano: Hadia horõgoe, hadia zalagoe, wa no õforege wolohi jaʼodo? 37Noa sa õboʼai fefoe nibajabajagoe, ba hadia, no õsõndra hadia ia nibajabajamõ? Tooeʼõ tooe ba daʼe fõna dalifoesõgoe ba fõna dalifoesõoe, enaʼõ laʼetoeʼõ hoekoe, ha chõ zatoelõ ba chõda andre. 38Doea woeloe fache iadaʼe, wa sodo chõoe; lõ irai alaoe daloe mbiribirioe ba he nambioe, ba lõ niʼagoe zi matoea mbiribirimõ. 39Hadia nisasawi goetoe ndroeʼoe, ba lõ niʼohegoe chõoe, no jaʼodo zangalī; chõgoe õsoegi, he ba zi maʼõchõ teraʼoe, ba he ba zi bongi. (Moz. II. 22, 13). 40Na maʼṍchõ, ba ariri ndraʼo ba waʼaoechoe zino, ba na bongi, ba ba waʼoafoe, ba lõ salaoe hõrõgoe. 41Aloʼo 20 fache mohalõhalõw̃õ ndraʼo chõoe: si feleõfa fache, ba bõli nonooe alawe si domboea, ba si meõnõ fache dania, ba bõli mbiribiri andrõ chõoe: ba no mewoeloe õfalalalala loeogoe. 42Enaʼõ lõ si faʼawõ chõgoe Lowalangi doeagoe andrõ, Lowalangi Gaberahamo, niʼataʼoefi Gizaʼaki gõi, ba no õfofanõ ndraʼodo, lõ noro danga! Famakaogoe andrõ ba faʼerege dõdõgoe andrõ, ba no iʼila Lowalangi, ba no iw̃aʼõ lala me owi.
43III. Ba itema li Jakobo Labano, imane chõnia: Chõgoe ndra alawe ba chõgoe ndraono, ba chõgoe goerifõ andrõ ba fefoe niʼila hõrõoe, ba chõgoe. Ba he oewisa ba chõ nonogoe alawe andrõ ba ba ndraono andrõ, onora? 44Ba laoe, ba talaoe fawoeʼoe li, daʼõ dania wamadoehoeʼõ chõda, daroea ita. 45Ba ihalõ gowe Jakobo, itaroeʼõ harefa. 46Ba imane Jakobo ba zi tenga bõʼõnia: Miʼozaragõ gowe! Ba laʼozaragõ: ba labahogõ, ba labeʼe zoemange ba dete mbaho gowe andrõ. 47Ba ibeʼe tõinia Jegara Sahadoeta Labano, ba Jakobo, ba ibeʼe tõinia Galeadi. 48Ba imane Labano: Baho gowe andre zi so ba mbõrõ chõda, daroea ita — andrõ wa labeʼe tõinia Galeadi — 49ba Misefa (nahia zanaro), imane sa: Jamõi sanaro Jehowa ba gotaloeada, na no arõoe gotaloeada dania! 50Ma õfakao nonogoe andrõ, ba ma õnõnõ na ira ira alawe bõʼõ — na lõ niha chõda, ba bõi olifoe ndraʼoegõ: Lowalangi zi so ba mbõrõ chõda, daroea ita! 51Ba imane na Labano chõ Jakobo: Hiza, baho gowe andre ba harefa andre, nitaroeʼõgoe ba gotaloeada — 52ba ja si so ba mbõrõ mbaho gowe andre ba si so ba mbõrõ harefa; he jaʼo, ba lõ tola oetaloeʼi mbaho gowe andre, wanaw̃a chõoe, ba he jaʼoegõ, ba tebai õtaloeʼi mbaho gowe andre ba he harefa andre, weʼamõi chõgoe, na si lõ sõchi dõdõoe chõgoe. 53Jamõi sameʼe lala chõda Lowalangi Gaberahamo, Lowalangi Nachori andrõ, Lowalangi namara. 54Ba mõi ba hõloe Jakobo, ba Lowalangi, niʼataʼoefi namania Izaʼaki. Aefa daʼõ ba itaba zoemange Jakobo, ba hili andrõ, ba ikaoni zi tenga bõʼõnia andrõ, ba wemanga. Ba manga ira ba mõrõ ba hili andrõ.
Currently Selected:
SOERA MOZE I. FAZA 31.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.