SOERA MOZE I. FAZA 20.
FAZA 20.
I. Isaw̃a Gerara Aberahamo. Telaoe menaʼõ zi lõ sõchi chõ Zara, ba itenaw̃a Lowalangi. II. Hoehoeo Gabimelechi andrõ chõ Gaberahamo.
1I. Ba iheta ia ba daʼõ Aberahamo, isaw̃a danõ si raja, ba gotaloeara Gadesi Zoeri iʼiagõ, ba Gerara. 2Ba ba chõ woʼomonia Sara, ba imane: Achigoe! Ba ifatenge Abimelechi, razo Gerara, ifahalõʼõ Zara. (F. 12, 13; 26, 7). 3Ba mõi chõ Gabimelechi Lowalangi, ba wangifi, ba zi bongi, imane chõnia: Si mate ndraʼoegõ, bõrõ ndra alawe andrõ, nihalõoe, me no donga zodonga. 4Ba lõ soroedoe chõnia Gabimelechi; ba imane: He Soʼaja! zoemõi õboenoe zi lõ horõ! 5Ba noa sa jaʼia zangoemaʼõ chõgoe: Achigoe! Ba si manõ gõi ndra alawe, no imane: Gaʼagoe! Sadõlõ dõdõgoe ba si lõ sala dangagoe ba wolaoegoe andrõ chõnia. 6Ba imane chõnia Lowalangi, ba wangifi: Ba jaʼodo gõi, oeʼila sa, wa no sadõlõ tõdõ ndraʼoegõ, wolaoe si manõ, ba no jaʼo zanimba chõoe wamazõchi horõ chõgoe menaʼõ; andrõ lõ oetehe õbabaja ia. 7Ba foeli saʼae ba zodonga ndrongania, noa sa samaʼeleʼõ ia, ba acha mangandrõ ia salahioe, enaʼõ aoeri ndraʼoegõ; ba na lõ õfoeli, ba jaʼaboto ba dõdõoe, wa si mate ndraʼoegõ, fabaja fefoe dána chõoe. (Sin. 105, 15. Job. 42, 8).
8II. Ba mahemoloe õ, ba ihoelõ wongi Abimelechi, wehede ba zawoejoenia fefoe, ba idoenõdoenõ chõra fefoe, he wisa mege; ba ataʼoe sibai niha andrõ. 9Ba ifakaoniʼõ Gaberahamo Abimelechi, imane chõnia: Hadia wolaoemõ chõma! Hadia horõgoe chõoe, wa õfatõrõ chõgoe ba ba mbanoeagoe fefoe horõ seboea andrõ! Si tebai manõ telaoe menaʼõ, ba no õlaoe chõgoe. 10Ba imane na Abimelechi chõ Gaberahamo: Hadia danioe wolaoe si manõ? 11Ba imane Aberahamo: Me no oemane dõdõgoe: Te sa lõ faloecha wangataʼoefi Lowalangi ba mbanoea andrõ, ba laboenoe saʼae ndraʼodo, bõrõ woʼomogoe andrõ. 12Ba si ndroehoe sa gõi achigoe ia, ono namagoe — ha fa tenga ono ninagoe, ba no oehalõ ia. 13Me iw̃aʼõ chõgoe Lowalangi, ahetado ba chõma, mõido ba danõ bõʼõ, ba oemane chõnia: Daʼõ õlaoe, faʼomasioe ndraʼodo: gofoe heza taroegi dania, ba õw̃aʼõ gaʼaoe ndraʼodo. 14Ba ihalõ mbiribiri ba saw̃i ba sawoejoe ono matoea ba sawoejoe ono alawe Abimelechi, ba ibeʼe chõ Gaberahamo; ba ifoeli gõi chõnia woʼomonia Sara. 15Ba imane Abimelechi: Hiza fõnaoe danõgoe; heza zomasiʼõ, ba daʼõ iagõ. 16Ba imane chõ Zara: Hiza, oebeʼe ba danga gaʼaoe zi hõnõ roefia, zosizosi chõoe daʼõ ba zi so ba ngaioe, fefoe, tobali lõ horõoe ba niha fefoe. 17Ba mangandrõ Gaberahamo chõ Lowalangi, salahi Gabimelechi, ba ifadõhõ wõchõnia Lowalangi, ba fõchõ woʼomonia ba fõchõ zawoejoenia ira alawe, fa moʼonoʼono ira. 18Noa sa ifaoeloegõ Jehowa wokoesi taloe ndra alawe ba nomo Gabimelechi fefoe, bõrõ Zara andrõ, foʼomo Gaberahamo.
Currently Selected:
SOERA MOZE I. FAZA 20.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.