SOERA MOZE I. FAZA 21.
FAZA 21.
I. Faʼatoemboe Gizaʼaki. II. Fanibo Simaʼeli. III. Amaboeʼoela li Lowalangi chõ Hagara. IV. Fawoeʼoe li ira Gabimelechi Gaberahamo.
1I. Ba no ifatõrõ chõ Zara Jehowa nifaboeʼoenia; ilaoe chõnia niw̃aʼõnia Jehowa. (F. 17, 19). 2Ba manabina Zara ba moʼono chõ Gaberahamo, ba waʼatoeania, ono matoea, ba ginõtõ andrõ, niw̃aʼõ Lowalangi. (Gal. 4, 23. Heb. 11, 11). 3Ba ibeʼe tõi nononia Gizaʼaki Aberahamo, tõi nono sawena toemboe andrõ chõnia chõ Zara. 4Ba iboto nononia Izaʼaki Aberahamo, me no fitoe bongi, iʼoʼõ niw̃aʼõ Lowalangi chõnia. 5Ba no otoe fache Gaberahamo, me toemboe chõnia nononia Izaʼaki andrõ. 6Ba imane Sara: Famaʼiki nilaoe Lowalangi chõgoe; dozi ha niha zamondrongo, ba laʼigiʼigiʼõ ndraʼodo. 7Ba imane na: Ha niha zirai mõi ba dõdõ, chõ Gaberahamo andrõ, wa samaenoe ono na dania Zara! Ba noa sa moʼonodo chõnia, ba waʼatoeania. 8Ba manõi nono andrõ ba aefa ba mbagi zoesoe; ba ibeʼe gõ niha, Aberahamo, eboea ihalõ, me loeo aefa ba mbagi zoesoe Gizaʼaki.
9II. Ba me iʼila Sara nono Hagara andrõ, Dawa Miseraji, ononia chõ Gaberahamo, wa saʼikiʼiki ia, 10ba imane chõ Gaberahamo: Fofanõ zawoejoe andrõ, awõ nononia; lõʼõ sa tola manema ondrõita dania nono zawoejoe andrõ, awõ nonogoe Izaʼaki. (Gal. 4, 30). 11Ba fatoewoe sibai daʼõ chõ Gaberahamo, bõrõ nononia andrõ. 12Ba imane Lowalangi chõ Gaberahamo: Bõi aboea chõoe ba nono andrõ ba ba zawoejoemõ andrõ; ahori õʼoʼõ niʼandrõ Zara chõoe; ha sa maʼoewoe Gizaʼaki dania, niw̃aʼõ si ndroehoe ngaʼõtõoe. (Rom. 9, 7. Heb. 11, 18). 13Ba he ono zawoejoe andrõ gõi, ba soi seboea dania oebeʼe, me no onooe. 14Ba mamahemoloe õ, ba ihoelõ wongi Aberahamo, ihalõ roti ba sara asoa nidanõ, ibeʼe chõ Hagara, ba ifaloeʼigõ chõnia nono, ba ifofanõ. Ba mofanõ ia ba eloengoeloengoe ia ba danõ si mate ba Mbereseba. 15Ba me no ahori nidanõ ba nasoa, ba itiboʼõ tooe ba mbõrõ daʼoeli nono, 16ba mõi ia doemadao ba zi tambai, mato ichamõ ono wana waʼarõoe; imane sa: Tebai oenehegõ waʼamate nono! Andrõ iʼarõoeʼõ ia maʼifoe; ba ibõrõtaigõ meʼe nono.
17III. Ba me irongo Lowalangi weʼe nono, ba moe ao malaʼika Lowalangi chõ Hagara, moroi ba mbanoea si jaw̃a, imane chõnia: Hadia chõoe, Hagara? Bõi boesi dõdõoe! No irongo Lowalangi weʼe nono andrõ, ba zi so ia. 18Ae fazaw̃a nono ba ohe dangania, tobali soi seboea sa ia oebeʼe. 19Ba ibokai hõrõnia Lowalangi, ba iʼila goemboe nidanõ. Ba mõi ia, ifoʼõsi nasoa idanõ, ba ifabadoegõ chõ nono. 20Ba itolo nono andrõ Lowalangi; manõi ia, ba ba danõ si mate sosó ia ba tobali soneche fafanata. 21Ba danõ si mate Farana iʼiagõ, ba ifangowaloe ia inania, moroi ba danõ Miseraji.
22IV. Ba me loeo daʼõ, ba lamane chõ Gaberahamo Abimelechi no ba koemandra andrõ chõnia, Ficholo: Itolotoloʼõ Lowalangi ba nilaoemõ fefoe. 23Andrõ ae ba hõloe chõgoe ijaʼe ba daʼe, ba Lowalangi, wa lõʼõ manõ falimo ndraʼoegõ chõgoe ba he ba dana chõgoe, si mane jaʼodo, me no si fahoewoe ndraʼo chõoe, ba no si fahoewoe chõgoe gõi ndraʼoegõ ba ba zi so ba danõ andre fefoe, ba zi sosó ndraʼoegõ si fatewoe. 24Ba imane Aberahamo: Mõido ba hõloe. 25Ba isechegõ Gabimelechi Aberahamo, ba mbaʼa nidanõ andrõ, niʼochõgõ zawoejoe Gabimelechi, niʼanõsõʼõ. 26Ba imane Abimelechi: Lõ oeʼila, ha niha zolaoe, daʼõ; lõ hadia ia niʼombachaʼõoe chõgoe, ba lõʼõ gõi nirongogoe jaʼia, irege maʼõchṍ. 27Ba ihalõ mbiribiri ba saw̃i Aberahamo, ibeʼe chõ Gabimelechi, ba fawoeʼoe li ira. 28Ba iʼoniagõ zi fitoe rozi, ono mbiribiri, Aberahamo. 29Ba imane Abimelechi chõ Gaberahamo: Heza labeʼe nono mbiribiri andrõ, si fitoe rozi, niʼoniagõmõ? 30Imane Aberahamo: Ono mbiribiri andrõ, si fitoe rozi, ba ja sinemaoe chõgoe; ja famadoehoeʼõ daʼõ chõgoe, wa no jaʼo zogao baʼa andrõ. 31Andrõ wa labeʼe tõi naha andrõ Mbereseba, me no ba daʼõ faoma fahõloe ira chõ nawõra. 32Si manõ wawoeʼoesa li chõra ba Mbereseba. Ba maoso ndra Abimelechi koemandra andrõ chõnia, Ficholo, ba lafoeli ira ba danõ Ndrawa Wilisiti. 33Ba itanõ mbooe Aberahamo, ba Mbereseba andrõ ba iʼangarõfi li dõi Jehowa ba daʼõ, tõi Lowalangi si lõ aetoe andrõ. 34Ba ara Gaberahamo ba danõ Ndrawa Wilisiti.
Currently Selected:
SOERA MOZE I. FAZA 21.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.