SOERA MOZE I. FAZA 19.
FAZA 19.
I. Mõi tome Loti malaʼika andrõ. Horõ mbanoea Zodoma. II. Fangorifi Loti. III. Faʼahõndrõ Zodoma, fabaja si fasoei. IV. Horõ Loti chõ nononia alawe.
1I. Ba laroegi Zodoma malaʼika andrõ si daroea, me tánõ owī. Ba no doemadao Loti barõ mbawa gõli Zodoma. Ba me iʼila ira, ba maoso ia, ifaondragõ ira ba ifaõndrõ ia, irege danõ tooe. 2Ba imane: He Toea, miʼae jomo ba nomo zawoejoemi, ba wemõrõ, ba misasai gahemi; ba mahemoloe mbanoea, ba hana na mofanõ ami. Ba lamane: Lõʼõ, baewali soga bongī. 3Ba iforege chõra, irege fao ira chõnia, irege mõi baomonia. Ba ihalõ gõra, ba ifazõchi koee, si lõ moeʼaisõni, ba manga ira. 4Ba lõ si mõrõ ira na, ba lafasoei nomo ira matoea mbanoeara andrõ, banoea Zodoma andrõ, he ono matoea, ba he satoea, samba banoea manõ, lahoeroefai. 5Moeʼao ira chõ Loti, lamane chõnia: Heza so niha andrõ, si no mõi jomo chõoe bongī? Ohe baero ira chõma, enaʼõ oroedoega chõra. (Moz. III. 18, 22. Sangoehoek. 19, 22). 6Ba mõi tooe chõra Loti — ba bawandroehõ, ba ikoesi foerinia. — 7Ba imane: He gaʼa! Bõi manao horõ ami! Hiza! 8Domboea chõgoe nono alawe, si lõ irai mangila ira matoea; daʼõ oebeʼe baero chõmi, ba hana na milaoe chõra zomasi ami. Ba lõ tola milaoe hadia ia ba niha andrõ, me no atõ mõi ira ba loemõ zagõ chõgoe. 9Ba lamane: Faʼeseʼõ! lamane: Ha samõsamõsa ia, si mõi fatewoe ba daʼe, ba lõ aetoe idegoedegoe ita. Ba damalaoe chõoe zabõlõbõlõ, moroi ba nilaoema chõra enaʼõ! Ba ladegeni ira chõ Loti andrõ; so ira, ba wamoto bawandroehõ. (Fet. II. 2, 7). 10Ba laʼoroʼõ dangara moroi jomo niha no mege, lasõbi jomo chõra Loti ba lakoesi mbawandroehõ. 11Ba lahawoei bõsi niha andrõ, si so tooe, he iraono ba he satoea, tobali laʼaloealoei manõ mbawandroehõ, ba lõ lasõndra. (Raz. II. 6, 18).
12II. Ba lamane niha no mege chõ Loti: Hadia, so chõoe na ba daʼe, ha niha? Oemõnõoe ba ma onooe matoea ba ma onooe alawe ba ha niha na tana chõoe, ba mbanoea andre, ba ohe misa! 13Mafakiko sa mbanoea daʼe, me no teʼadoegõ sibai ira chõ Jehowa; andrõ ifatenge ndraʼaga Jehowa, ba wamakiko jaʼira. 14Ba mõi tooe Loti, hoemede ia ba noemõnõnia, sangai ononia enaʼõ, imane: Milaboe, miheta ami ba daʼe! Ifakiko saʼae mboenoea daʼe Jehowa! Ba labali boedenia chõra oemõnõnia andrõ. 15Ba me ibõrõtaigõ moloeo, ba lafangaõsõ Loti malaʼika andrõ, lamane: Laboe, ohe woʼomooe ba onooe andrõ si domboea, si so ba daʼe, fa bõi tetiko ndraʼoegõ gõi ba horõ mbanoea andre! 16Ba me arõrõrõrõ ia na, ba latoejoe daʼionia niha andrõ, fabaja foʼomonia ba ononia andrõ si domboea, me no edõna iʼorifi ia Jehowa, laʼohe baero ba larõi ia ba daʼõ baero mbanoea. 17Ba ba wolohe jaʼira baero, ba lamane: Orifiʼõ, nosooe mbalazi! Bõi baliõgõ foeri ba bõi badoegõʼõ heza, ba ndraso. Ba hili orifiʼõ, fa bõi fao ndraʼoegõ ba waʼatekiko! 18Ba imane chõra Loti: Bõi, Toea! 19Noa sa atṍ isõndra waʼeboea dõdõ sawoejoemõ, wamaigioe, tobali no eboea waʼahachõ dõdõoe chõgoe, ba no õʼorifido; ba tebai moloi ndraʼo ba hili; ma dania so zi gõna ndraʼo, famoenoegoe. 20Hiza mbanoea, si no ahatõ, si tola oesaw̃a; ba no sideʼide, daʼõ zomasido oesaw̃a, — noa sa atṍ sideʼide ia — enaʼõ aoerido. 21Ba imane chõnia: Hiza, ba daʼõ gõi oeʼoʼõ chõoe, ba lõ oefakiko mbanoea andrõ niw̃aʼõoe. 22Taʼitaʼi, saw̃a daõ; lõʼõ sa oeʼila oelaoe hadia ia, balazi no õroegi. Andrõ wa labeʼe tõi mbanoea andrõ Zoara (sideʼide). 23Ba no toemboe loeo ba goeli danõ, me iroegi Zoara Loti.
24III. Ba aechoe dalõ balera ba alitõ ba Zodoma ba ba Gomora, ibeʼe Jehowa, moroi jaw̃a ba mbanoea, (Moz. V. 29, 23. Jes. 13, 19. Loek. 17, 29. Joed. a. 7), 25idoedoegõ mbanoea andrõ, fabaja tanõ tooe, tefarahoe ndraso andrõ maʼasagõrõ, awõ niha, banoea daʼõ, awõ zinanõ ba danõ andrõ. 26Ba ibaliʼõ ia foeri, ba wamaigi, foʼomo Loti, foerinia, ba tobali kara moʼasio. (Loek. 17, 32). 27Ba mahemoloe õ, ba ihoelõ wongi Aberahamo, weʼamõi ba zi so ia mege, chõ Jehowa. 28Ba me ifaigi mitooe Zodoma ba Gomora, awõ ndraso andrõ maʼasagõrõ, ba iʼila, noemalõ jaw̃a zimbo, moroi ba danõ andrõ, hoelõ zimbo zino waʼoe. 29Ba me idoedoegõ Lowalangi mbanoea ba ndraso andrõ, ba itõrõ tõdõ Lowalangi Gaberahamo andrõ, ba ifasao misa Loti, iheta ba waʼadoedoe andrõ, me idoedoegõ mbanoea andrõ, fabaja tanõ tooe, banoea si so Loti mege.
30IV. Ba ifoeli iheta ia ba Zoara Loti, isaw̃a mijaw̃a ba iʼiagõ hili, awõ nononia alawe andrõ, si domboea; ataʼoe saʼae ia, ba Zoara sosó ia; ba dõgi narõ hili nahiania, awõ nononia andrõ si domboea. 31Ba imane si aʼa chõ nachinia: Satoea saʼae namada, ba lõ niha ba goeli danõ, soroedoe chõda enaʼõ, si mane hoekoe ba goeli danõ maʼafefoe. 32Taboe, datafabadoegõ nagoe chõ namada, ba oroedoe mõrõ ita chõnia, enaʼõ lõ aetoe ngaʼõtõda ibeʼe amada. (Moz. III. 18, 7). 33Ba latema lafabadoegõ nagoe chõ namara, ba zi bongi andrõ; ba mõi si bacha zi aʼa, oroedoe mõrõ ia chõ namara. Ba lõ iʼila, me ifadõlõ tooe ia, ba lõʼõ gõi iʼila, me maaso. 34Ba mahemoloe mbanoea, ba imane si aʼa andrõ chõ nachinia: Noa sa oroedoe mõrõ ndraʼo chõ namada; tafoeli tafabadoegõ chõnia nagoe, bongī dania gõi; ba ae si bacha ba fõrõ ba ngainia, enaʼõ lõ aetoe ngaʼõtõda ibeʼe amada. 35Ba lafoeli lafabadoegõ nagoe chõ namara, ba zi bongi andrõ gõi; ba mõi mõrõ ba ngainia zi achi. Ba lõ iʼila, me ifadõlõ ia ba he me maoso ia. 36Ba tobali manabina nono Loti andrõ, maʼadomboea, chõ namara. 37Ba madono zi aʼa, ono matoea, ba ibeʼe tõi nononia andrõ Moabi; daʼõ woeroegõ Ndraono Moabi andrõ maʼõchṍ. 38Ba si achi gõi, ba madono gõi, ono matoea, ba ibeʼe tõinia Gamoni; daʼõ woeroegõ Ndraono Gamoni maʼõchṍ.
Currently Selected:
SOERA MOZE I. FAZA 19.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.