Versete biblice populare din Gaˍlaˍtiˆ li‸ 5

Împărtășește

Ya‸ hkʼaˇ, Awˬ ha hpu ve awˬ shiˍ naw‸ la ve teˇ hpaˍ lehˬ, ha‸ pehnˇ ve, ha lehˬ ve, dawˇ sha ve, dawˇ zuhˬ gaˇ zuhˬ ve, ha kʼaˉ ve, shu awˬ pon da‸ ve hta‸ te ve, ka ti‸ yeˬ ve, nyi ma nuˇ nehˬ ve leh, a shu yawˇ awˬ to hta‸ gʼaˇ puiˉ ve, chi teˇ hpaˍ yoˬ. Chi teˇ hpaˍ hta‸ maˇ gʼa te teh‸ kʼoˆ taˍ ve awˬliˇtawˇhkawˇ teˇ maˬ ka‸ maˇ cawˬ.

Ngaˬ kʼoˆ ve lehˬ, Awˬ ha hpu awˬ hkʼaˇ suh kʼai-o. Oˇ hkʼe te ve kʼo, awˬ suhˍ awˬ shaˍ a loˍ awˬ hkʼaˇ suh nawˬ hui maˇ kʼai taˬ.

Ngaˬ hui Awˬ ha hpu awˬ hkʼaw lo te‸ chehˇ ve kʼo, Awˬ ha hpu awˬ hkʼaˇ suh kʼai-a veuˬ.

Yeˍsuˆ Hkri‸ hta‸ hkʼa caˉ da‸ ve chaw hui lehˬ, awˬ suhˍ awˬ shaˍ hpawˇ hta‸ maˇ kʼoˆ, awˬ suhˍ awˬ shaˍ hta‸ caˉ da‸ ve a loˍ leh sheˉ lai ve teˇ hpaˍ hta‸ htawˇ maˇ kʼoˆ, teˇ geh la‸ ka hkʼoˆ lo hta‸ pehˍ peuˬ.

Awˬ suhˍ awˬ shaˍ ve kanˉ teˇ hpaˍ hkʼa tawˍ lehˆ tawˆ la peuˬ. Kanˉ oˇ ve teˇ hpaˍ lehˬ, haˉ chawˇ haˉ paˆ te ve, cha‸ chiˆ ve hta‸ te ve, peh‸ ve tzuhˆ ve hta‸ te ve, shaˉ ho‸ hta‸ oˉ kʼoˍ pui ve, neˇ te ve, canˇ da‸ ve, ya‸ da‸ jiˆ da‸ ve, shu ve mawˇ hta‸ sheˉ lai ve, nyi ma zuhˆ ve, tawˇ gʼawˬ da‸ ve, hpaˆ da‸ guiˇ da‸ ve, awˬ moˍ pehˬ da‸ ve, hkawehˉ ve, tzuhˬ dawˬ bvuhˆ ve, ha lehˬ tuˬ te ponˬ te leuˉ ve, chi hkʼe ve teˇ hpaˍ yoˬ. Chi hkʼe te ve chaw teˇ hpaˍ lehˬ, Gʼuiˬsha ve mvuhˇmiˬ awˬ hkʼaw lo maˇ gʼa lo‸-e teh‸, awˉ lawˉ htaˇ ngaˬ kʼoˆ piˇ taˍ ve hkʼe, chi beu‸ htawˇ nawˬ hui hta‸ kʼaw‸ kʼoˆ laˇ ve yoˬ.

Awˬ viˉ awˬ nyi teˇ hpaˍ-oˬ, nawˬ hui gʼa ponˬ tuˬ Gʼuiˬsha nawˬ hui hta‸ kuˬ yuˬ taˍ ve yoˬ. Ya‸ hkʼaˇ, ponˬ ve chi, awˬ suhˍ awˬ shaˍ a loˍ awˬ hkʼaˇ suh te kʼai tuˬ awˬ pon taˇ yehˇ. Ha‸ pehnˇ ve awˬ hkʼaw lo, teˇ gʼaˇ leh teˇ gʼaˇ awˬ ceˬ te da‸-o‸.

Awˬ lawn kʼo, awˬ suhˍ awˬ shaˍ a loˍ lehˬ, Awˬ ha hpu hta‸ heh‸ hkehnˉ leh, Awˬ ha hpu htawˇ, awˬ suhˍ awˬ shaˍ a loˍ hta‸ heh‸ hkehnˉ ve yoˬ. Nawˬ hui te gaˇ ve hta‸ maˇ gʼa te tuˬ, oˇ ve nyiˇ ceuˬ tanˬ da‸ chehˇ ve yoˬ.

Nawˬ awˬ to hta‸ ha‸ ve hkʼe, awˬ paˇ awˬ kui chehˇ ve chaw teˇ hpaˍ hta‸ ha‸-o‸ teh‸ kʼoˆ taˍ ve tawˇ teˇ hkawˇ awˬ hkʼaw lo, awˬliˇtawˇhkawˇ hkʼa peu-eˬ biˇ la peuˬ.

Ngaˬ hui nyi ma uiˍ ve maˇ kʼoˆ, teˇ gʼaˇ leh teˇ gʼaˇ ya‸ da‸ tuˬ te ve maˇ kʼoˆ, teˇ gʼaˇ leh teˇ gʼaˇ hkawehˉ da‸ ve maˇ kʼoˆ, chi teˇ hpaˍ hta‸ ngaˬ hui baˬ taˉ-a veuˬ.

Ngaˬ hui gʼa ponˬ tuˬ awˬ pon Hkri‸ lehˬ ngaˬ hui hta‸ ponˬ laˇ peuˬ. Hkʼe te leh, hkʼa deh‸ yeˬ chehˇ leh, awˬ ceˬ pfuhˇ ve ehˉ kʼaweh‸ hta‸ teˇ pawˆ taˇ kʼaw‸ pfuhˇ-oˆ.