Versete biblice populare din Ipilu 11

Împărtășește

Ioxe, lopala ne talulusou aloxo 'o. Mimi ane talopalanu taxomaiou la talavu manina lexe uxali ane. Xe mimi mose'i tasaxisou no ienge uasi ia oponenge ututuluousi. Xo ane'i so tatei milopala noxou Mosinge la anu mu'osasi'axu.

Xo loxo no anu lopala uasi la umomomo uasi manina so Mosinge u'osasou itema. Laso loxo itema umasaxau ulavusou Mosinge la masi ulopala tei lexe Mosinge uxolu. Mo ulopala lexe tamitema ta'ei tane'i u'oxoxu Mosinge la anu ukolinu mo u'oxone'i laixe.

Mo xo no anu lopalasi laso talamana lexe lialia ilou loxotolo muxali no anu vaikalaou Mosingesi. Mo talavu lexe mimi ane tasaxisou no pa'upa'umenge la muxali no anu ane tasaxisou no ienge uasi.

Xo no anu lopalasi laso no voxo Mosinge mu'avalou Apala'amu la anu mulomuxu mo mulutu mulai no tuala ane Mosinge muvavalimasou lexe ulosou. Mulutu mulai ia ulavusou lexe ulai ne'ei uasi. Mo xo no anu lopalasi laso mutalu­pexa loxo asila no anu xale lia Mosinge muvavalimasou ne. La utulusou tani maninasou uasi, oli'a Aisaki xe Iakovo mi'ala'alaxu laselisi so ixoxomaiou nene'axu vavalima.

Xo no anu lopalasi laso Mosinge muveletalosou Noa no anu mimi so uxali ili'i la mulomuxu. Xo mimi ne usaxisou uao ia mumama'u laso mulalaxinu lasipi so oli'a ta'olu ixalisou pamauli no anu. Ioxe, lopala noxou Noa ne mupala'anixu ilixo masumasua noxi'a tatemanu lialia lexe opone'i pakia'usi. Ia noxou, la Mosinge mu'osasouxu lopala noxou laso mulemolu lexe anu itema mulapusi.

Xo no anu lopalasi laso Mosinge muno'u Inoki mutelaixu no tuala­sou mo usoli uasi. Xe tamitema mikakamulinu ia ixalisou uasi xo Mosinge muno'usi. La vaikalaou Mosinge uvikala lexe tei loxo uxoxolusio utelai uao, la Mosinge u'osasou.

Xo no anu lopalasi laso Aveli mulaixu mi vile noxou Mosinge ane lailaixe manina no anu mi e Kaini mulaixu. Ioxe, Aveli mulaixu no anu lopala laso Mosinge mu'osasou mi ne mo muvikalasou lexe anu itema mulapusi. Laso manina, anu musoli ia no anu lopala noxousi la anu a upepe­la'inge vaimomo 'o.

Xo no anu lopalasi laso Sala miua'ulixu voxo so ipala ia milo­pala noxou Mosinge lexe uxalixu nene'axu vavalima noxou. Milo­pala laso maixene mune'e la anu mu'oxo vote'i so mivo'onu ilie.

Xo mi e Apala'amu tanu u'oxoxu a tuala ane tava'u pumuxusi. Tuala ne Mosinge molu so upilenimunu mo utulusou.

Mo xo no anu lopalasi laso loxo Mosisi mutilae xe loxo tamotu milemolu lexe anu kingi olu ilie la oponu muxililiou. Oponu muxililiou tanixu xoluxolu se'isisi ilou susu ane umumosou masa­masaxa no anu vasimolu ne. Xo mu'oxo lexe, “Uasi, mi ne ukalu paleasi ane. Eni alai apita noxi'a tamitemaou Mosinge. Xo manina, itavulenu tu'umaxu no avo'a Ta'isipi, ia mi vile uasi, a'una no anu xoluxoluxa'asi. Xo loxo axolu ne Isipi 'o la masi axolu no latanu mimi. Mo loxo a'una noxi'a olele la atavulenu maila no anu ualasou Itema Mosinge musoso­vosou. Ia mi vile uasi, xo lakolisou ane so axalisou ili'i ne lailaixe mo uua'ulixu ano'o avile.” Mo xo no anu lopalasi laso Mosisi muxexe­sou xale lia ne Isipi, u'umolu la'ia noxou kingi uasi. Xo manina, nenge tamitema vote'i so tasaxisou Mosinge no ienge uasi. Ia noxou Mosisi la mutulu pumuxu avile axone la anu loxo musaxisou no iou lavo'onu ane.

Xo no anu lopalasi laso no voxo loxo Mosinge mutovonu Apala'amu la anu oponu so upilixinu mauli noxou Aisaki so lexe noxou Mosinge. Apala'amu ne anu mosou e muxalisou vavalima ia u'apisou olu soxu ne uasi, mulalaxi so uvau usoli.

Mo xo no anu lopalasi laso sema so vote'i e La'apu misu'uline'i tamitema so kililo tamei e mine'e no tuala ne. Misu'uline'i laso no voxo loxo tatemanu tuala ne mimamulo la ane uasi, mixolu laixesi.

Xo no anu lopalasi laso Ta'isi­laeli mixali xalevile no anu Luaki Lauoinu mo mimuamua'i no anu lia esi'esisi. Ia loxo Ta'isipi mito­vonu so imuline'i la mi'uo'ousi.

Mo xo no anu lopalasi la Ta'isilaeli mimuamua'i mixixaou­sou vimelusou taoni Ieliko voxo 7 sika vimelu ne mumamulosi.

Mo xo no anu lopalasi laso anu mulomuxu voto so Mualasi'a. Laso mipeipeinu sialu mo so anu ane so umamulone'i laposalaxa'a Ta'isipi la uxalisi'a Ta'isilaeli uasi.

Mo xo no anu lopalasi laso no voxo loxo Iosepu so usoli la mulemolu vaikala lexe ili'i la Ta'isilaeli ilala ne Isipi. Xe muvikala lamana lexe usoli xo xe ili'i la inavanu xinuxinu.

Mo xo no anu lopalasi laso no voxo loxo Iakovo so usoli la muvikala laixe so xoluxoluxa'a Iosepu ta'olu tamulu kalumo. La mutulu muto­sopenu no anu vilaxo kisou so mu'itinu Mosinge ualasou.

Xo no anu lopalasi laso Aisaki muvikala laixe so xoluxoluxa'a Iakovo ilou Iso. La mulemolu mimi ane so uxalisi'a ili'i.