Versete biblice populare din SANTIAGO 1

Împărtășește

Weth q'ay jilanaka, anćhukki ni thapaman llakinaka watanaki kuntintupanź khella. Niźaśa anćhukkiź śiśśa, ni anćhuka quś llakkiś khenaki anćhukki ni llaki thapa quśtan awantiź śiśa.

Niźaśa anćhukakiśtan yaqhapźkiśiki ni śiśnakat phalhtiźinćhax nïki, Yöśkiśtanź maya, neqhśtan nïki amkiś thäkićha; niźaśa Yöśki thapatiźkiś ana źoñi phalźku ana miransñiź thäćha.

Weth q'ay jilanaka anćhukki tïź khuñśna: Anćhukki thappacha ti nonśxapa iyawpacha khiśtanćha; ans anćhukki ana uri chïñi niźaśa ana uri źaxwñi khiśtanćha.

Ans ni anćhuka thapa quśki śuma źkaykinpanx chhichla, śuma poquntichi ana ćhhulumi phalhtiźiñi.

Niźaśa Yöś śuma kintu anaź nonśxapaqaś khesaćha; ans ni xaru qamś wakiśićha, niźaśa anćhuk anaź nuź qamasaź nïki, anćhukki perśunpachaź q'otćha.

Añcha walićha ni llakinaka thapa quśtan awantiñiki, neqhśtan ni llakinakaź wattan ni źoñiki źetchiś pilluź tanźnakićha, xalla ti pilluki Yöśśa ni pekñinakźkiś thäś taqu onśiki.

Thappacha ni ućhumnakakiś źkayi śumanaka thätaki tsewkta Yöśkiśtanź thonćha, xalla ni Yöśki ni tsewkta wararanaka pächićha. Niźaśa Yöśki nïpachapanćha: Xalla ni Yöśkiśiki anaź phalś niźaśa anaź sumchimi źelhćha.

Niźaśa tshïsuñaki Yöś śuma kintu nonźku anat ni xaru qamćhax nïki, xalla ni źoñiki nïź perśun yukh tshi ispiwjkiś cherśñiźtaqaśśa: Niźaśa perśunpacha yukh cherźa, neqhśtan xaqhnuźutaźlax nïź cherźta ni anaź khuñćha.

Xalla ni Yöś śuma taquki Yöś tukkiś ana khjuchichiś khiśtanćha, xalla tïćha ni Yöś Ephki: Ni mä eph waxchallanaka yanapiśtanćha niźaśa ni źew źewallanaka llakkiś khenami, niźaśa ana ti yoq anaśum ćhhultaqinakkiś thxots pekśtanćha.

Niźaśa yaqhapaki ujkiś thxotsiźlax nïki, anax Yöś ujkiś thxotćha khilalla; ans Yöśki anaź ujkiś thxotźta khesaćha, niźaśa Yöśki anaź jëkhmi ujkiś thxotźa. Ans tshïsuñaki perśun quś pektakama oqhkuź ujkiś thxotsa, niźaśa źoñiki ni uj päśkipanź quś thäćha.

Xalla ni amu quśśiś jilaki, Yöś nïźkiś amu quś thächiź khen añcha chipśtanćha