Matayo 24
24
OYesu akubaza oku kuzica eiramyo
(Mak 13:1-2; Luk 21:5-6)
1Awo oYesu nʼaliga omwiramyo. Niyaali nakwaba, abeegesebwa baamwe ni baiza waali, okumulanga ennyomboka yʼamanyumba ga iramyo. 2Ye nʼabairamu ati, “Bini byona byona mukubibona? Kambakobere amananu; omu kifo kini ndoowo ibbaale gonze erimwei eririsigala oku riira ryaryo. Goona goona galinagibwa ansi.”
Okuzibuwaarwa nʼokwasayasanizibwa
(Mak 13:3-13; Luk 21:7-19)
3OYesu niyaali aikaire oku Lusozi olwa Misaale gyebeeta Oliva ni yesoroire nʼabeegesebwa baamwe, abeegesebwa ni bamukoba bati, “Tukobere, ebyo biribbaawo di? Era kabonero ki akaliranga okwiza kwamu, nʼempero ya nsi?”
4OYesu nʼabairamu ati, “Mwerinde, omuntu yeena yeena atalibabulyabulya. 5Kubba baingi abaliizira omwibara ryange, nibakweyeta, ‘Kurisito,’ era balibulyabulya baingi. 6Muliwura entalo nʼamawuro ga ntalo, baitu mutalituntura kubba ebyo biteekwa okubbaawo, baitu empero eribba etakaikire. 7Eiyanga erimwei ririrumba eiyanga erindi, nʼobukama obumwei bulirumba obukama obundi. Walibbaawo enzala nʼokukankana kwa nsi omu bitundu bingi. 8Baitu obwo okubonaabona kulibba kukutandikambe.
9“Nywe balibakwata ni babaweeryayo mubonaabonesebwe, era muliitibwa. Abantu boona boona balibanoba olwa kubba muli basengeerya bange. 10Obwo baingi balizwa omu kwikiriza, era baliriiranangana, era balinobangana. 11Nʼabalangi ababubeyegi baingi baliiza, ni babulyabulya baingi. 12Olwa bujeemu okwakaza, okwendya kwʼabaingi kulikeeya. 13Baitu oyo aligumira ebizibu okwica oku mpero, alijunwa. 14Era Amawuro Agasai gani agakufa oku bukama galibuulirwa abantu omu nsi zoona, nkʼobujuurwa egiri amanga goona, ale empero nimwo nʼeika.”
Ekintu ekya muzizo
(Mak 13:14-23; Luk 21:20-24)
15Era oYesu nʼabakoba ati, “Nimulibona ekya muzizo ekikwesisirya,#Dan 9:27; 11:31; 12:11 oDanieri omulangi kyeyabazireku, nikiri omu kifo ekikwera, (akusoma kini yeeteje), 16obwo abalibba omu Buyudaaya, bairukiranga mu bitundu bya nsozi. 17Alibba aiguru oku nyumba yaamwe, nairanga ansi taingiranga mu nyumba kwiyamu kyeyatwala. 18Alibba omu ndumiro, tairanga eka kusyoma kizwalibwa kyamwe. 19Abalina enda nʼabakwonca omu biro ebyo kabalibonaabona muno! 20Mwesengeerye oKanca, ekiseera kyemuteekwa okwirukiramu kireke kubba kya mutitiiro oba oku sabbiiti. 21Kubba ebiro ebyo walibbaawo okubonaabona kwingi, nikukusinga okundi kwona kwona okwali nikubbairewo, okuligira kimwei oKanca niyawangire ensi, okwica ati. Era tiwakwaba kwirawo kubonaabona kundi okukwenkana okwo. 22Era ebiro ebyo ebya kubonaabona banga oKanca ataabikeyeseryeku ndoowo gonze omuntu omwei eyaakuwonere. Baitu olwʼabakomyemu, ebiro ebyo birikeeyesebwaku.
23“Omu biro ebyo, omuntu nalibakoba nti, ‘OKurisito ali mpani,’ oba nti, ‘Ali mpadi,’ timwikirizanga. 24Kubba abalangi ababubeyegi nibakweyeta Kurisito, oba nibakweyeta abalangi, baliboneka, ni bakola ebyamaano era nʼebikwewuunyisya, nibakugendeera, nikibba kikusoboka, okucaamisya abakomye ba Kanca. 25Mubone mbakobeire nibucaali.
26“Olwʼekyo nibabakobanga nambu oKurisito ali mwirungu, timwabangayo oba nambu ali mu nyumba, timwikirizanga. 27Kubba nkʼokuserya okwa iguru nikubba e buwuluka ni kubonekera nʼebugwa, nʼokwiza kwa Mwana wa Muntu nimwo kulibba kutyo.
28“Awabba ekifiire, awo ensega niwo zikumbaanira.”
Okwika kwa Mwana wa Muntu
(Mak 13:24-27; Luk 21:25-28)
29OYesu ni yeeyongera okubakoba ati, “Ebiro ebyo, ekiseera ekya kubonaabona nikyakawa,
‘eisana ririiragura,
nʼokwezi kulirekayo okwaka;
enyenyeezi ziriwanaisuka aiguru ni zigwa,
nʼamaani agali aiguru omwibbanga galitengeetebwa.’#Isa 13:10; 34:4; Yow 2:10
30“Obwo akabonero ka Mwana wa Muntu kaliboneka okwiguru, enganda zoona zoona eza ku nsi ni zikubba ebiboobo#Zek 12:10-14 nibalibona oMwana wa Muntu nakwizira omu bicu bya kwiguru, nalina obuyinza obwingi nʼekitiinisya ekikooto.#Dan 7:13 31OMwana wa Muntu alituma abamalaika baamwe omu mbaju zoona zoona einai eza nsi nibakufuuwa eŋombe egyanguki. Era balikumbaania abantu baamwe abakomye, okuliga omu buli kasonda koona koona aka nsi.”
Ekyegerwa oku musaale omutiini
(Mak 13:28-31; Luk 21:29-33)
32OYesu nʼayongera okubaza nʼabeegesebwa nʼakoba ati, “Mubonere oku musaale omutiini mwege; amataagi gaagwo nigatandika okutotoigerya ni gujumba, mumanya nti obwire bwa kyanda buli ampi okwika. 33Omu ngeri niyo emwei nimubonanga ebyo byona, mumanyanga nti empero eri ampi muno. 34Kambakobere amananu; ebintu bini byona byona bikwaba kubbaawo abantu ba mulembe guni nibacaali kufa kuwaawo. 35Eiguru nʼensi biriwaawo, baitu ebigambo byange tibiriwaawo.”
Ndoowo amaite kiro gonze esaawa
(Mak 13:32-37; Luk 17:34-36)
36OYesu ni yeeyongera okubaza nabo nʼabakoba ati, “Baitu ndoowo amaite ekiro ekyenyenere nʼesaawa, ebyo webiribbeerawo, gonze abamalaika omwiguru, gonze nje oMwana,#24:36 Gonze nje oMwana Ebiwandiiko ebimwei tibirina bigambo bini. okutoolaku oIte wange yenkai niye amaite. 37Nka nikyali omu mulembe gwa Nuuwa,#Kwe 6:5-8 nimwo kiribba kityo nʼomu kwiza kwa Mwana wa Muntu. 38Ebiro ebyekereire omwizulo, abantu baali bakulya era nibakunywa. Baali bakubandula era nibakubanduka, okwica ekiro oNuuwa kweyaingiriire obwato. 39Ndoowo kyebaamaite oku byali bikwaba okubbaawo, okwica omwizulo nigwaizire, ni gubawereekeerya boona boona. Nimwo kiribba kityo, oMwana wa Muntu naliiza. 40Omu biro ebyo, abantu abalibba ababiri omu ndumiro, omwei alitwalibwa, owondite nʼalekebwa. 41Abakali ababiri abalibba amwei nibakusya oku mengo, omwei alitwalibwa owondite nʼalekebwa. 42Olwʼekyo mwerinde, kubba timumaite kiro oMukama waanywe kyaliiziraku. 43Mumanye kini nti omukama wa nyumba niyaakumaite ekiseera omwibbi kyeyaiziramu, yaakubonerye nʼataleka nyumba yaamwe kuyendebwa na kwingirwa. 44Ale ati naanywe mwikalenge nimweteekaniize, kubba oMwana wa Muntu aliizira omu kiseera kyemutakumusuubiriiramu.”
Abaweereza abeeteekaniriza omukama waabwe
(Luk 12:41-48)
45OYesu ni yeeyongera okubaza nabo nʼabakoba ati, “Ale muweereza ki omwesigwa era omugezi, omukama waamwe gwalitaawo okuroleera abaweereza abandi, abaweeryenge omugabo gwabwe ogwa mere omu kiseera kyayo? 46Wa mukisa omuweereza oyo, omukama waamwe naliira, gwalisanga nakukola atyo. 47Kambakobere amananu; alimutaawo okuroleera ebintu byamwe byona byona. 48Baitu omuweereza oyo nabba omubbi, nʼakoba ati omu mutima gwamwe, ‘Omukama wange yaalwawo okwira,’ 49nʼatandika okukubba abaweereza abaira baamwe, era nʼatandika okulya nʼokunywa amwei nʼabatamiire, 50omukama wa muweereza oyo aliira ekiro kyatakumusuubira, nʼomu saawa gyatamaite. 51Alimutemaatema, nʼamuta amwei nʼabagobya, awalibba okukunga nʼokulumwa omuno.”
Atualmente selecionado:
Matayo 24: RUULI-NYALA
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão