Matayo 23
23
Okwerinda abeegesya bʼamateeka gʼaBayudaaya
(Mak 12:38-39; Luk 11:43-46; 20:45-46)
1Awo oYesu nʼabaza nʼekibiina kyʼabantu amwei nʼabeegesebwa baamwe nʼakoba ati, 2“Abeegesya bʼamateeka nʼaBafarisaayo nibo baire omu kifo kya Musa okusoboora nʼokwegesya amateeka. 3Olwʼekyo byebabakoba byona byona mubikwatenge, era mubikolenge. Baitu mutasengeerya bikolwa byabwe kubba byebakoba abantu bo ti nibyo bakola. 4Babbwa emigugu egiremeeri era egiteetiikika, ni bagitiika abantu oku bibegabega, baitu nga bo abenyenere tibakwendya gonze okubajuna okugyetiika. 5Byebakola byona byona bagendeera kubonwa bantu. Nikyo babbeera nʼobusawu obwa byanzo omubba ebigambo bya mu byawandiikiibwe, nibabwebbwere omu busyo nʼoku mikono. Ni bagaziya emigo gya bizwalibwa byabwe. 6Bendya ebifo ebya kitiinisya oku bugenyi, nʼebifo ebya mu maiso omu makumbaaniro. 7Era bendya okulamucibwa nʼekitiinisya omu butale, nʼokwetebwa nti, ‘Mwegesya.’ 8Baitu nywe timwetebwanga nambu, ‘Labbi’#23:8 Labbi Kimanyisya mwegesya oba mukama. kubba oLabbi waanywe ali omwei. Nywe nywena nywena muli baluganda. 9Oku nsi timubbangaku gwemukweta, ‘Ite waanywe,’ kubba oIte waanywe ali omwei, ali mwiguru. 10Era timwetebwanga beegesya kubba omwegesya waanywe ali omwei, niye oKurisito. 11#Mat 20:26; Mak 9:35; 10:43-44; Luk 22:26Akira ekitiinisya omu nywe, yaakubbanga muweereza waanywe. 12Buli eyeetumbya, alibundeekebwa. Era buli eyeebundeeca, alitumbisibwa.”
OYesu akuzumiira obugobya
(Mak 12:40; Luk 11:39-42,44-52; 20:47)
13OYesu ni yeeyongera nʼabakoba ati, “Bagobya nywe, abeegesya bʼamateeka nʼaBafarisaayo! Muli ba kubonaabona! Abantu ababba bakwingira omu bukama obwa mwiguru mubakingiira enzai, nywe abenyenere ni mutaingira, era ni mutangira nʼabo abagezaku okwingira. 14Bagobya nywe, abeegesya bʼamateeka nʼaBafarisaayo, muli ba kubonaabona, kubba munyaga ebintu byona byona omu manyumba gʼabanamwandu, mubaza ebigambo ebingi, okweisanisiirya nkʼabakusaba oKanca. Olwʼekyo muliweebwa ekibonerezo ekikusinga obukooto.#23:14 Ebiwandiiko ebimwei ebya irai tibirina lunyiriri luni (Bona nʼomu Mak 12:40).
15“Bagobya nywe, abeegesya bʼamateeka nʼaBafarisaayo, muli ba kubonaabona! Kubba mutambula enyanja nʼemitala okuyindula omuntu omwei. Baitu nimumala okumuyindula, ni mumufoola akusaanira omuuro ogutalikira, nʼokukira nywe nimugusaanira.
16“Muli ba kubonaabona nywe, abeebemberi abaigali ba maiso! Mukoba nambu, ‘Buli alayira eiramyo, tabba na musango nataikiirya kyalayiire. Baitu buli alayira ozaabbu owa mwiramyo, ateekwa okwikiirya kyalayiire.’ 17Nywe abadoma, era abaigali ba maiso, ekisinga obukulu kiri ayi: zaabbu oba iramyo erifoola ozaabbu oyo okubba ekintu ekikwera? 18Era mukoba muti, ‘Buli alayira olutaali, tabba na musango nataikiirya kyalayiire. Baitu buli alayira ekitwo ekiri okwalutaari, ateekwa okwikiirya kyalayiire.’ 19Nywe abaigali bʼamaiso, ekisinga obukulu kiri ayi? Kitwo oba olutaali efoola ekitwo ekyo okubba ekintu ekikwera? 20Olwʼekyo oyo alayira olutaali, abba alayiire na byona ebigiriku. 21Era oyo alayira eiramyo, abba alayiire nʼoKanca aribbaamu. 22Oyo alayira eiguru, abba alayiire ntebe ya Kanca, nʼoKanca agiikalaku.
23“Bagobya nywe, abeegesya bʼamateeka nʼaBafarisaayo, muli ba kubonaabona! Kubba muweerya ekimwei ekyaikumi nʼoku buntu obudooli obucuunyisya omukubi, ni muleka okwikiirya obwenganiza, ekisa, nʼokwikiriza ngʼate nibyo bikira obukulu omu mateeka ga Musa. Bini biteekwa okukolebwa, na bidi nga tibikunagirizibwa. 24Nywe abeebemberi abaigali bʼamaiso, mwiya akasiisa oku maizi gemunywa, baitu ni mumiriiramu onkaina!
25“Bagobya nywe, abeegesya bʼamateeka nʼaBafarisaayo, muli ba kubonaabona! Kubba ebikopo nʼebibya mubinyiriza okuruguru, baitu omunda nibiizwire eitungo eryemwafunire omu bunyagi nʼomu kwefaaku nywenkai. 26Mufarisaayo we, omwigali wʼamaiso, weekeere oyoze omu kikopo nʼomu kibya, ale nimwo byanyirira nʼokuruguru.
27“Bagobya nywe, abeegesya bʼamateeka nʼaBafarisaayo, muli ba kubonaabona! Kubba muli nkʼebituulo ebisiigirwe erangi egyeru, ebiisana okusai okuruguru, baitu ngʼomunda biizwire amagumba gʼabafu, nʼebijundi ebya buli ngeri. 28Naanywe nimwo mwisana mutyo omu bantu; mubba baikiiri okuruguru, baitu ngʼomunda mwizwire obugobya nʼobuyendi bwʼamateeka.”
Ekibonerezo kyabwe
(Luk 19:28-40)
29OYesu ni yeeyongera nʼabakoba ati, “Bagobya nywe, abeegesya bʼamateeka nʼaBafarisaayo, muli ba kubonaabona! Kubba mwombokera abalangi ebituulo, era ni musemeza amagombe gʼabaikiiri, 30ni mukoba muti, ‘Nitwakubbairewo omu biro byʼabazeiza baiswe, titwakweyimbirye na bo omu kwita abalangi.’ 31Okubaza mutyo, mukakatirya kimwei nti muli baizukulu bʼabo abaitire abalangi. 32Ale mweyongere, leke mumaliirye abazeiza baanywe kyebaatandikire.
33 #
Mat 3:7; 12:34; Luk 3:7 “Nywe enjoka, abaana ba fulugundu! Muliwona okusaarwa omusango okunagibwa omu muuro ogutalikira? 34Nikyo nkubatumiriira abalangi nʼabantu abagezi era nʼabeegesya. Abamwei oku bo mulibabamba oku misaalaba ni mubaita, nʼabandi mulibakubbira omu makumbaaniro gaanywe. Mulibaasayasania okubaiya omu buli kibuga, 35leke mujunaanwe omusaayi gwʼabaikiiri boona boona ogwasenseibwe oku nsi, okuliga oku musaayi gwʼAbbeeri omwikiiri,#Kwe 4:8 okwika oku gwa Zaakaliya, omwana wa Bberekiya, gwemwaitiire akati wa Iramyo nʼalutaari.#2Mir 24:20-21 36Kambakobere amananu; ekibonerezo olwʼabo boona boona kiriweebwa abantu ba mulembe guni.”
OYesu akukungubagira oYerusaalemu
(Luk 13:34-35)
37Awo oYesu nʼakungubagira oYerusalemi ati, “Yerusaalemu, Yerusaalemu, we aita abalangi, nʼokubba amabbaale abatumwa egyoli! Emirundi gingai gyenayenderye okukumbaania abantu baamu, nkʼonkoko nakumbaania obwana bwamwe omu bipapa byamwe, baitu nʼotaikiriza? 38Olwʼekyo enyumba yaamu yakulekerwa nkʼekifurukwa.#Yer 22:5 39Kubba nkukukoba nti tolimbona okwica nolikoba oti, ‘Awaisanisibwe oyo akwizira omwibara rya Mukama.’#Zab 118:26”
Atualmente selecionado:
Matayo 23: RUULI-NYALA
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão