Matayo 25
25
Olufumo lwʼabaala enteeka eikumi
1OYesu ni yeeyongera okubaza nʼabeegesebwa baamwe nʼakoba ati, “Omu biro ebyo, obukama obwa mwiguru buliisanisibwa abaala enteeka eikumi, abaakwaite etaala zaabwe ni baaba okutangiira akubandula. 2Abataanu oku bo baali basiru, baitu abataanu abandi baali bagezi. 3Abasiru baatwaire etaala zaabwe, baitu ni batatwalana mafuta omu cupa agakwekuumisya. 4Abagezi ni batwala etaala zaabwe nʼamafuta omu cupa agakwekuumisya. 5Akubandula niyalwirewo okwiza, boona boona ni bakwatibwa otulo ni bawunguka.
6“Omwitumbi, ni wabbaawo obwogo nti, ‘Akubandula ngoni akwiza, mwize mumutangiire.’
7“Abaala enteeka eikumi abo ni basisumuka, ni baateekaniza etaala zaabwe. 8Awo abasiru ni bakoba abaira baabwe abagezi nti, ‘Mutuweerye oku mafuta gaanywe, kubba etaala zaiswe zikuzimeera.’
9“Abaala abagezi ni bairamu bati, ‘Gayinza obutatumala iswe naanywe. Ekikukira obusai, mwabe gyebagatunda, mweguureyo.’
10“Abaala abasiru nibaabire okugula amafuta, akubandula nʼaika. Abaali beeteekaniize ni baingira amwei naye omu bugenyi bwa bugole, olwige ni lukingwawo.
11“Oluzwannyuma abaala badi abasiru ni baira, ni bakoba bati, ‘Sebo, sebo, tukinguurewo.’
12“Baitu akubandula nʼabairamu ati, ‘Mananu timbamaite.’
13“Olwʼekyo mwerinde, kubba ekiro nʼesaawa timubimaite.”
Olufumo lwa talanta
(Luk 19:11-27)
14OYesu ni yeeyongera okubaza nʼabeegesebwa baamwe nʼakoba ati, “Era obukama obwa mwiguru bwiliisanisibwa omuntu eyaali akwaba omu nsi eyʼalai, nʼayeta abaweereza baamwe, nʼabalekera empiiya zaamwe. 15Omwei nʼamulekera etalanta itaanu, owondi ibiri, owondite etalanta emwei, nakusigikira oku busoboli bwa buli omwei, nʼayaba. 16Amangu ago oyo eyafunire etalanta eitaanu, nʼayaba nʼazisuubulisya nʼafunamu amagoba ga talanta ezindi itaanu. 17Nʼoyo eyafunire eibiri, nʼakola atyo, nʼafunamu amagoba ga talanta ezindi ibiri. 18Baitu oyo eyafunire etalanta emwei, nʼayaba, nʼasaka ekiina, nʼabbisamu empiiya za mukama waamwe.
19“Niwaakairewo eibbanga rirai, omukama wa baweereza abo nʼaira, nʼabakoba basoboore ebikufa oku mpiiya zaamwe. 20Omuweereza eyafunire etalanta eitaanu nʼaiza, nʼaleeta etalanta ezindi itaanu, nʼakoba ati, ‘Mukama wange wandekeire etalanta itaanu. Bona nafuniremu amagoba ga talanta ezindi itaanu.’
21“Omukama waamwe nʼamukoba ati, ‘Weebale, oli muweereza musai era omwesigwa. Waali mwesigwa omu bintu ebidooli, nkwiza kukuweerya okuroleera ebingi. Iza tusemeerwe amwei.’
22“Nʼoyo eyafunire etalanta eibiri nʼaiza, nʼakoba ati, ‘Mukama wange, wandekeire etalanta ibiri. Bona, nafuniremu amagoba ga talanta ezindi ibiri.’
23“Omukama waamwe nʼamukoba ati, ‘Weebale, oli muweereza musai era omwesigwa. Waali mwesigwa omu bintu ebidooli, nkwiza okukuweerya okuroleera ebingi. Iza tusemeerwe amwei.’
24“Era nʼoyo eyafunire etalanta emwei nʼaiza, nʼakoba ati, ‘Mukama wange, namaite ngʼoli muntu muzibu, ngʼokungula byotaasimbire, era ngʼokesa byotaasigire, 25ni ntiina, etalanta yaamu nikyo nagibbisiire omwitakali. Bona, ngini.’
26“Omukama waamwe nʼamukoba ati, ‘Oli muweereza mubbi era omugarai! Niwamaite nti nkungula byentaasimbire, era nti nkesa gyentaasigire, 27etalanta yange waakugiwaire abasuubuli; ninaakaire, ni ngifuna nʼamagoba gaayo.’
28“Ale nalagira ati, ‘Mugimwiyeku, mugiweerye oyo alina etalanta eikumi. 29#Mat 13:12; Mak 4:25; Luk 8:18Kubba buli alina alyongerwaku leke abbe na bingi muno. Baitu buli atalina, aliiyibwaku nʼakadooli kaali nako. 30#Mat 8:12; 22:13; Luk 13:28Omuweereza oyo atalina kyakugasa, mumunage enzai omu kiiruma, awalibba okukunga nʼokulumwa omuno.’”
Okusaarwa omusango okwa ku mpero
31Era oYesu ni yeeyongera nʼabakoba ati, “OMwana wa Muntu naliizira omu kitiinisya kyamwe, ekya bukama, abamalaika boona boona nibali amwei naye, aliikala oku ntebe yaamwe eya kitiinisya. 32Abantu aba manga goona goona balikumbaanibwa omu maiso gaamwe, nʼabaawulamu nkʼomuliisya nʼayawula entaama omu mbuli. 33Entaama alizita oku rubaju lwamwe olwa gulyo, nʼembuli oku lwa gumoso.
34“Awo oMukama alikoba abali oku rubaju lwamwe olwa gulyo nti, ‘Nywe oIte wange beyawaire omukisa, mwize mubbe omu bukama obwabateekaniriziibwe okuliga ensi niyawangirwe. 35Kubba naali nkulumwa enzala, ni mumpeerya ekyakulya. Naali nkulumwa amalo, ni mumpeerya ekyakunywa. Naali mugenyi, ni munsemberya. 36Naali bwereere ni mumpeerya ekizwalibwa. Naali mulwaire, ni mundwaza. Naali mubbwe omu nkomyo, ni mwiza okundola.’
37“Awo abaikiiri balimwiramu bati, ‘Mukama waiswe, twakuboine di nokulumwa enzala, ni tukuweerya ekyakulya, nokulumwa amalo, ni tukuweerya ekyakunywa? 38Era twakuboine di noli mugenyi, ni tukusemberya, oba notalina kyakuzwala, ni tukuweerya ekizwalibwa? 39Era twakuboine di noli mulwaire, oba noli omu nkomyo, ni twiza okukurola?’
40“OMukama alibairamu ati, ‘Kambakobere amananu; buli lwemwakikoleire omwei oku baganda bange bani abagayibwa mwakikoleire ninje.’
41“Awo alikoba abali oku rubaju lwamwe olwa gumoso ati, ‘Mulige wendi, nywe abaceene! Mwabe omu muuro ogutalikira, ogwateekaniriiziibwe oSetaani nʼabamalaika baamwe. 42Kubba naali nkulumwa enzala, ni mutampeerya kyakulya. Naali nkulumwa amalo, ni mutampeerya kyakunywa. 43Naali mugenyi, ni mutansemberya. Naali nitalina kyakuzwala, ni mutakimpeerya. Naali mulwaire, era naali omu nkomyo, ni mutaiza kundola.’
44“Awo boona balimwiramu bati, ‘Mukama, twakuboine di nokulumwa enzala, oba nokulumwa amalo, oba noli mugenyi, oba notalina kyakuzwala, oba noli mulwaire, oba noli omu nkomyo, ni tutakujuna?’
45“Awo oMukama alibairamu ati, ‘Kambakobere amananu; buli lwemwagaine okujuna omwei oku bani abasinga okugayibwa, mwagaine kujuna ninje.’
46“Obwo abo alibasindika okubonerezebwa ebiro byona byona baitu abaikiiri ni baaba omu bwomi obutawaawo.”
Atualmente selecionado:
Matayo 25: RUULI-NYALA
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão