Revelation 2
2
1ဧဖက်မြို့ရှိအသင်းတော်၏ နတ်စေတမန်ထံသို့ စာရေးလော့။ ငါသည် ညာလက်၌ကြယ်ခုနှစ်လုံးအားကိုင်ဆောင်၍ ရွှေမီးတိုင်ခုနှစ်တိုင်ကြားတွင် သွားလာနေသောသူသည် ဤသို့မိန့်တော်မူ၏။ 2သင်ကြိုးစားလုပ်ကိုင်ခဲ့သည်များနှင့် သင်မည်သို့ခံနိုင်ရည်ရှိခဲ့ပုံအပါအဝင် သင်ပြုလုပ်ခဲ့သမျှအရာအားလုံးအား ငါသိ၏။ သင်သည် မကောင်းသောမည်သူနှင့်မျှ မပေါင်းသင်းကြောင်း ငါသိ၏။ သာဝကတော်များမဟုတ်ဘဲ သာဝကတော်ဖြစ်ချင်ယောင်ဆောင်သောသူတို့ကို ခွဲခြားစစ်ဆေး၍ အတုအယောင်များဖြစ်သည် ဟု ဖေါ်ထုတ်နိုင်ကြောင်းကိုလည်း ငါသိ၏။ 3ငါ့ကြောင့်သင်သည် စိတ်မပျက်ဘဲသီးခံလျက် ငါ၏အမည်နာမတော်ကိုထောက်၍ ဒုက္ခအပေါင်းကို ခံခဲ့၏။ 4သို့သော် ငါ့၌သင့်အားအပြစ်ဆိုစရာရှိ၏။ ၎င်းသည် အစအဦး၌ သင်ချစ်သကဲ့သို့ ယခုမချစ်တော့သောကြောင့်ပင်။ 5ထို့ကြောင့် သင်ကျဆင်းသွားသွားသည့်အပိုင်းကို စဉ်းစားဆင်ခြင်လော့။ နောင်တသံဝေဂရလျက် အစအဦး၌ သင်နေထိုင်ကျင့်ကြံခဲ့သကဲ့သို့ နေထိုင်ကျင့်ကြံလော့။ ထိုသို့ နောင်တသံဝေဂမရပါက ငါသည် သင့်ထံသို့လာ၍ သင့်ဆီမီးတိုင်ကို သူ့နေရာမှ ဖယ်ရှားရလိမ့်မည်။ 6သို့သော် သင်လုပ်ဆောင်နေသောမှန်ကန်သည့်အရာတစ်ခုရှိသည်။ နိကောလတွင် တပည့်များလုပ်ဆောင်နေသည့် အရာများကို ငါမုန်းသကဲ့သို့ သင်လည်းမုန်း၏။ 7ဉာဏ်အလင်းတော် အသင်းတော်တို့အား မိန့်တော်မူသော စကားများကို နားရှိသောသူတို့သည် ကြား၍ နားလည်နိုင်ကြပါစေ။ ငါသည်အောင်မြင်သောသူတို့ကို ဘုရားရှင်၏ ပရဒိသုဘုံ၌ရှိသော အသက်ပင်၏အသီးကို စားခွင့်ပေးမည်။ 8စမုရနမြို့၌ရှိသော အသင်းတော်၏ နတ်ဒေဝံထံသို့စာရေးလော့။ ပထမဆုံးနှင့် နောက်ဆုံးဖြစ်သောသူ အသေခံပြီး အသက်ပြန်ရှင်လာသောသူက ဤသို့မိန့်တော်မူ၏။ 9သင်မည်မျှဒုက္ခခံစားခဲ့ရ၍ မည်သို့ဆင်းရဲခဲ့သော်လည်း သင်ကြွယ်ဝသူဖြစ်ခဲ့သည်ကို ငါသိသည်။ ဘုရားရှင်၏လူများဟုခံယူထားကြသောလူများမှ သင်နှင့်ပတ်သက်၍ အသရေဖျက်ပြောဆိုသည်များကိုလည်း ငါသိ၏။ သို့သော် ထိုသူတို့သည် အမှန်စင်စစ်မဟုတ်။ သူတို့သည် မာန်နတ်၏အဖွဲ့ဝင်တစ်စုပင်ဖြစ်၏။ 10သင်ခံစားရမည့်အရာများအား မပူပန်ပါနှင့်။ နတ်ဆိုးသည် သင်တို့အချို့အားထောင်ထဲသို့ပို့၍ သင်သည် အစမ်းသပ်ခံရကာ ဆယ်ရက်ကြာအောင်ဒုက္ခဝေဒနာခံစားရလိမ့်မည်။ သို့သော် သင်သည် သေသည်အထိ သစ္စာစောင့်သိလျှင် သင့်အားဘုန်းကျက်သရေနှင့်ပြည့်စုံသောအသက်ကို ငါချီးမြှင့်မည်။ 11ဉာဏ်အလင်းတော်သည် အသင်းတော်တို့အား မိန့်တော်မူသောစကားကို နားရှိသောသူသည် ကြား၍ နားလည်ကြပါစေ။ အောင်မြင်သောသူသည် ဒုတိယသေခြင်းဝေဒနာကို ခံစားရမည်မဟုတ်။ 12ပေရဂံမြို့၌ရှိသော အသင်းတော်၏ နတ်ဒေဝံထံသို့စာရေးလော့။ ချွန်ထက်သောသံလျက်ကို ကိုင်ဆောင်ထားသူက ဤသို့မိန့်၏။ 13မာန်နတ်၏ပလ္လင်ရှိရာအရပ်၌ သင်နေထိုင်သည်ကို ငါသိ၏။ သို့သော် သင်သည် ငါ၏အမည်နာမကို စွဲကိုင်ထားလျက် ရှိနေသေး၏။ ငါ၏သစ္စာရှိသော သက်သေခံ အန္တိပသည် ဤမာရ်နတ်အုပ်စိုးသည့်နေရာတွင် အသတ်ခံရချိန်၌ပင် သင်သည် ငါ့အပေါ်ထားရှိသော သင်၏ယုံကြည်ခြင်းကို မစွန့်ပယ်ခဲ့ပေ။ 14သို့သော်ငါသည် သင့်အား အပြစ်ဆိုစရာအနည်းငယ်ရှိ၏။ သင်တို့တွင် မှားယွင်းသည့် အရိယာသူတော်စင် ဗာလမ်၏ သွန်သင်ချက်ကို လိုက်နာသော သူများရှိကြ၏။ အစ္စရေးလူမျိုးတို့သည် ရုပ်တုများအား ပူဇော်သည့်အစား အစာကိုစားရန်လည်းကောင်း၊ တရားနှင့်မညီသောမေထုန်ကို ပြုရန်လည်းကောင်း အစ္စရေးလူမျိုးတို့၏ရှေ့မောက်၌ တိုက်မိစရာ ဆူးငြောင့်ခလုတ်ကို ချထားရန် ဗာလမ်သည် ဗာလက်မင်းအား သွန်သင်ခဲ့၏။ 15ထိုနည်းတူ သင်တို့တွင် နိကောလတပည့်များ၏ သွန်သင်ချက်တို့ကို လိုက်နာသောသူများလည်း ရှိကြ၏။ 16ထို့ကြောင့် နောင်တသံဝေဂရကြလော့။ ထိုသို့မဟုတ်လျင် သင်တို့ထံ မကြာမီလာ၍ ငါ၏ခံတွင်းမှ ချွန်ထက်သော သံလျက်ဖြင့် ထိုသူတို့ကို တိုက်ခိုက်ရလိမ့်မည်။ 17ဉာဏ်အလင်းတော်သည် အသင်းတော်တို့အား မိန့်တော်မူသောစကားကို နားရှိသောသူသည် ကြား၍ နားလည်ကြပါစေ။ အောင်နိုင်သောသူတို့အား ဝှက်ထားသော မန္နမုန့်ကိုပေးမည်။ ဖြူသောကျောက်တစ်လုံးကိုလည်းပေးမည်။ ထိုကျောက်ပေါ်တွင် နာမည်အသစ်ကိုရေးထွင်းထားပြီး ထိုကျောက်ကို လက်ခံသည့်သူမှလွှဲ၍ မည်သူမျှ ထိုနာမည်သစ်ကို မသိရ။ 18သွာတိရမြို့၌ရှိသော အသင်းတော်၏ နတ်ဒေဝါထံသို့ စာရေးလော့။ ငါသည် ဘုရားရှင်၏သားတော်ဖြစ်၏။ ငါ၏မျက်လုံးများသည် မီးတောက်များနှင့်တူ၍ ငါ၏ခြေတော်များသည် ကြေးဝါနှင့်တူ၏။ ငါပြောသည်များအား နားထောင်လော့။ 19သင်၏ချစ်ခြင်း၊ သင်၏ယုံကြည်ခြင်း၊ သင်၏အမှုတော်ဆောင်ခြင်းနှင့် သင်၌ခံနိုင်ရည်မည်သို့ရှိပုံအပါအဝင် သင်နှင့်ပတ်သက်သမျှအားလုံး ငါသိ၏။ သင်ယခင်ကလုပ်ဆောင်ခဲ့သည်များထက် ယခုပိုမို၍ကောင်းကြောင်းကိုလည်း ငါသိ၏။ 20သို့သော် ငါသည်သင့်အား အပြစ်ဆိုစရာတစ်ခုရှိသေး၏။ မိမိကိုယ်မိမိ အရိယာသူတော်စင်မ ဟုဆိုသော ယေဇဗေလဟုခေါ်သည့် အမျိုးသမီးကို သင်ခွင့်ပြုထားခဲ့၏။ သူသည် ငါ့၏အမှုတော်ဆောင်များအား တရားနှင့်မညီသောကာမဂုဏ်ခံစားခြင်းကိုပြုရန်လည်းကောင်း၊ ရုပ်တုအား ပူဇော်သည့်အစားအစာများကို စားရန်လည်းကောင်း မှာယွင်းသောလမ်းကို သွန်သင်ခဲ့၏။ 21ငါသည် သူမအား နောင်တသံဝေဂရရန် အခွင့်အရေးပေးခဲ့သော်လည်း သူမသည် မတရားသောကာမဂုဏ်ခံစားမှုပြုခြင်းအတွက် နောင်တရရန် ငြင်းဆန်ခဲ့၏။ 22ထို့ကြောင့် ငါသည်သူ့ကို အိပ်ရာထဲတွင် လဲစေ၍ ဒုက္ခဝေဒနာကို ခံစားစေမည်။ သူနှင့်မတရားသောမေထုန်ပြုသူများသည်လည်း နောင်တသံဝေဂမရလျှင် ကြီးမာသော ဆင်ရဲဒုက္ခကို ခံစားစေမည်။ 23ငါသည် သူမ၏သားသမီးတို့ကိုလည်း သေခြင်းဖြင့် အဆုံးစီရင်စေမည်။ ငါသည် လူတို့၏စိတ်နှလုံးနှင့် အကြံအစည်ကို ဆန်းစစ်သောသူဖြစ်ကြောင်း အသင်းတော် အပေါင်းတို့သည် သိကြလိမ့်မည်။ သင်တို့အားလုံး၏ အကျင့်နှင့်အညီ ထိုက်သင့်သော ပြစ်ဒဏ်ကို ငါစီရင်မည်။ 24ယခုကျွန်ုပ်သည် ကျန်ရှိသော သွာတိရအသင်းသားတို့အား မှာကြားလို၏။ သူ၏မှာယွင်းသော သွန်သင်ချက်ကိုနားမထောင်၊ စာတန်၏ လျှို့ဝှက်ချက်များကို မခံယူသည့် သင်တို့အပေါ်သို့ အခြားဝန်ထုတ်ဝန်ပိုကို ငါတင်မည်မဟုတ်။ 25သို့သော် ငါမလာခင်အထိ သင်တို့၌ရှိသောဆုံးမမှုများအား ခိုင်မြဲစွာလက်ကိုင်ထားလော့။ 26လူမျိုးများထဲမှ တိုက်ပွဲအားအောင်နိုင်၍ ငါ့အားအဆုံးထိတိုင်နာခံသူတိုင်းကို အခွင့်အာဏာပေးမည်။ 27ငါ၏ခမည်းတော်မှငါ့အားပေးခဲ့သောအခွင့်အာဏာကို သူတို့တစ်ဦးချင်းစီအား ပေးမည်။ 28သူတို့သည် လူမျိုးများအား သံတုတ်များနှင့် ရွံ့အိုးကွဲများကိုအစိတ်စိတ်အမြွာမြွာရိုက်ခွဲသကဲ့သို့ ချေမှုန်းပိုင်ခွင့်ရှိသည်။ ငါသည် သူတို့အား မိုးသောက်ကြယ်ကိုလည်းပေးမည်။ 29ဉာဏ်အလင်းတော်သည် အသင်းတော်တို့အား မိန့်တော်မူသောစကားကို နားရှိသောသူတို့ ကြာ၍ နားလည်ကြပါစေ။
Obecnie wybrane:
Revelation 2: TPV-RV
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
