Revelation 1
1
1ဤစာစောင်သည် ယေရှုခရစ်တော်၏ ဗျာဒိတ်တော်ဖြစ်၏။ ဤဗျာဒိတ်တော်မှာ ဘုရားရှင်မှ မိမိ၏တပည့်တော်များအား မကြာမီဖြစ်ပျက်လာရမည့် အရာတို့ကို ဖေါ်ပြရန် ယေရှုခရစ်တော်ထံ ပေးအပ်တော်မူသော ဗျာဒိတ်တော်ဖြစ်၏။ ထို့ကြောင့်ခရစ်တော်သည် ထိုဗျာဒိတ်တော်ကို မိမိ၏အစေခံယောဟန်အား ဖေါ်ပြရန် နတ်ဒေဝါတို့ကိုစေလွှတ်တော်မူ၏။ 2ထို့နောက်ယောဟန်သည် သူမြင်တွေ့ခဲ့သည့် အရာမှန်သမျှတို့ကို သက်သေခံ၏။ ထိုအရာများမှာ ဘုရားရှင်၏နှုတ်ကပတ်တော်နှင့် ယေရှုခရစ်တော်၏ သက်သေခံတော်မူချက်များပင်ဖြစ်၏။ 3ဤကြိုတင်ဟောပြောချက်သည် ဖြစ်ပျက်လာရန်အတွက် အချိန်နီးလာသောကြောင့် ဤကျမ်းစာကို ဖတ်သောသူနှင့် ကြားနာရသောသူအပေါင်းတို့သည် မင်္ဂလာရှိကြ၏။ 4အကျွန်ုပ်ယောဟန်မှ အာရှရှိအသင်းတော်ခုနှစ်ခုသို့ စာရေးသားရပါ၏။ သင်တို့အား ပစ္စုပ္ပန်၊ အတိတ်နှင့် အနာဂတ်၌အစဉ်ရှိတော်မူသောဘုရားရှင်ထံမှ ကြင်နာခြင်း၊ ငြိမ်သက်ခြင်းတို့နှင့် ကောင်းချီးပေးခံရပါစေ။ ဘုရားရှင်၏ပလ္လင်တော်ရှေ့ရှိ ဉာဏ်အလင်းတော်ခုနှစ်ပါးထံမှ ကြင်နာခြင်းနှင့်ငြိမ်းချမ်းခြင်းရရှိကြပါစေ။ 5သစ္စာစောင့်သိသောသက်သေဖြစ်သည့် ကိုယ်တော်ယေရှုခရစ်ထံမှ ကြင်နာခြင်းနှင့်ငြိမ်းချမ်းခြင်းများ ပိုင်ဆိုင် ပါစေ။ ကိုယ်တော်ယေရှုသည် သေခြင်းတရားအားပထမဆုံးအောင်နိုင်သူဖြစ်၍ ကမ္ဘာမြေမှရှင်ဘုရင်အားလုံးအား အစိုးရသူဖြစ်၏။ ခရစ်တော်သည် ကျွန်ုပ်တို့အားချစ်မြတ်နိုး၍ သူ၏သွေးဖြင့်ကျွန်ုပ်တို့၏အပြစ်များမှ လွတ်မြောက်စေ၏။ 6ကိုယ်တော်သည် ကျွန်ုပ်တို့ကို ဘုရားရှင်၏လူမျိုးတော်ဖြစ်လာစေလျက် အဖဘုရားရှင်ကို အစေခံသည့် ပုရောဟိတ်များ ဖြစ်စေတော်မူ၏။ ကိုယ်တော်၌ ဘုန်းအသရေနှင့် ဘုန်းတန်ခိုး အစဉ်ထာဝရရှိတော်မူပါစေသော။ အာမင်။ 7ကြည့်လော့၊ ကိုယ်တော်သည် မိုးတိမ်များစီးလျက် ကြွလာတော်မူမည်ဖြစ်ပြီး ကိုယ်တော်အား လှံဖြင့်ထိုးခဲ့သူများပါမကျန် လူအားလုံးသည် သူ့အားမြင်ကြရလိမ့်မည်။ ကမ္ဘာလောကရှိ လူမျိုးအပေါင်းတို့သည် ကိုယ်တော်ကြောင့်ငိုကြွေးကြလိမ့်မည်။ ဟုတ်ပါသည်၊ ထိုအရာသည် အမှန်ပင်ဖြစ်၏။ အာမင်။ 8ကိုယ်တော်အရှင်ဘုရားရှင်သည် "ငါသည် ပစ္စုပ္ပန်၊ အတိတ်နှင့် အနာဂတ်၌အစဉ်ရှိတော်မူသော အစနှင့်အဆုံးဖြစ်၍ အနန္တတန်ခိုးအားလုံးပိုင်ဆိုင်သောဘုရားရှင်ဖြစ်သည်။" ဟုမိန့်တော်မူခဲ့၏။ 9ကျွန်ုပ်သည် သင်တို့အားလုံးနှင့်အတူ နောက်လိုက်တစ်ဦးဖြစ်သော ယောဟန်ဖြစ်၏။ ကိုယ်တော်ယေရှုသည် ကျွန်ုပ်တို့၏ရှင်ဘုရင်ဖြစ်သောကြောင့် ကျွန်ုပ်တို့ဒုက္ခဆင်းရဲခံစားကြရသော်လည်း သူသည် ကျွန်ုပ်တို့အား ခံနိုင်ရည်ရှိရန် ခွန်အားကိုပေး၏။ ကျွန်ုပ်သည် ဘုရားရှင်၏နှုတ်ကပတ်တော်တရားအား ဟောကြား၍ ကိုယ်တော်ယေရှုအကြောင်း ပြောကြားခဲ့သောကြောင့် ပတ်မုကျွန်းသို့ပို့ဆောင်ခြင်းခံခဲ့ရ၏။ 10ကိုယ်တော်အရှင်နေ့တွင် ဉာဏ်အလင်းတော်သည်ကျွန်ုပ်အားသက်ရောက်၍ တံပိုးသံကဲ့သို့ကျယ်လောင်သော အသံအား ကျွန်ုပ်၏နောက်၌ကြားရ၏။ 11ထိုအသံသည် “သင်မြင်သောအရာကို စာစောင်တွင်ရေး၍ ဧဖက်မြို့၊ စမုရနမြို့၊ ပေရဂံမြို့၊ သွာတိုရဲမြို့၊ သာဒိမြို့၊ ဖိလဒေဖိမြို့နှင့် လောဒိကိမြို့များရှိ အသင်းတော်ခုနှစ်ခုထံသို့ ပေးပို့လော့” ဟုဆို၏။ 12ကျွန်ုပ်အား မည်သူပြောဆိုနေသည်ကိုမြင်တွေ့ရန် လှည့်ကြည့်လိုက်သောအခါ ရွှေရောင်မီးတိုင်ခုနှစ်တိုင်အား ကျွန်ုပ်တွေ့ရ၏။ 13ထိုမီးတိုင်များနှင့်အတူ လူသားနှင့်တူသောတစ်စုံတစ်ဦးကို တွေ့ရ၏။ ထိုသူသည် သူ၏ခြေဖျားထိရောက်သော ဝတ်လုံတော်ကို ဝတ်ဆင်ထား၍ သူ၏ရင်ဘတ်၌ရွှေရင်စည်းကို စည်းထား၏။ 14သူ၏ဦးခေါင်းမှဆံပင်များသည် သိုးမွှေးနှင့် နှင်းပွင့်များကဲ့သို့ဖြူဖွေးနေ၍ သူ၏မျက်လုံးများသည် မီးလျံကဲ့သို့ တောက်ပနေ၏။ 15သူ၏ခြေဖဝါးများသည် မီးပြင်ဖို၌ချွတ်၍ သန်စင်ထားသော ကြေးဝါကဲ့သို့ တောက်ပနေ၍ သူ၏အသံသည် ဟုန်းဟုန်းမြည်သော ရေစီးသံများကဲ့သို့ဖြစ်နေ၏။ 16သူသည် သူ၏ညာလက်၌ကြခုနှစ်လုံးကို ကိုင်ဆောင်ထား၍ သူ၏ပါးစပ်မှ ချွန်ထက်သောအစွန်းနှစ်ဖက်ရှိသည့် သံလျက်တစ်ချောင်းထွက်လာ၏။ သူ၏မျက်နာသည်လည်း အရှိပြင်းစွာထွန်းတောက်နေသော နေကဲ့သို့ဖြစ်၏။ 17ကျွန်ုပ်သူ့အားတွေ့သောအခါ သူ၏ခြေတော်၌ လူသေတစ်ဦးကဲ့သို့လဲကျသွား၏။ ထိုအခါ သူသည် သူ၏ညာလက်အားကျွန်ုပ်ပေါ်တင်၍ ဤသို့ဆို၏။ “မကြောက်ပါနှင့် ငါသည် ပထမဦးဆုံးသောသူနှင့် နောက်ဆုံးသောသူဖြစ်၏။ 18ငါသည်အသက်ရှင်သောသူဖြစ်၏။ ငါသေဆုံးခဲ့သော်လည်း ယခုအခါ ငါထာဝရရှင်သန်နိုင်၍ သေခြင်းတရားနှင့် မရဏနိုင်ငံကို အစိုးရ၏။ 19ထို့ကြောင့် သင်မြင်တွေ့ခဲ့ပြီးသည်များနှင့် ဤအရာများပြီးနောက် မည်သည့်အရာများဖြစ်ပျက်လိမ့်မည်ကို ရေးထားလော့။ 20သင်မြင်တွေ့ခဲ့သော ကျွန်ုပ်၏ညာလက်ရှိကြယ်ခုနှစ်လုံးနှင့် ရွှေမီးတိုင်ခုနှစ်ခု၏လျှို့ဝှက်နက်နဲသောအရာကို ကျွန်ုပ်ရှင်းပြမည်။ ကြယ်ခုနှစ်လုံးသည် အသင်းတော်ခုနှစ်ခု၏ နတ်ဒေဝါများဖြစ်၍ မီးတိုင်များသည် အသင်းတော်ခုနှစ်ခုဖြစ်၏။
Obecnie wybrane:
Revelation 1: TPV-RV
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
