Revelation 3
3
1သာဒိမြို့၌ရှိသော အသင်းတော်၏ နတ်ဒေဝါထံသို့စာရေးလော့။ ဘုရားရှင်၏ ဉာဏ်အလင်းတော် ခုနှစ်ပါးနှင့် ကြယ်ခုနှစ်လုံးရှိသောသူတို့က ဤသို့မိန့်တော်မူ၏။ သင်၏အပြုအမူကို ငါသိ၏။ သင်သည် အသက်ရှင်သည်ဟု အမည်ခံထားသော်လည်း သေနေသောသူဖြစ်၏။ 2နိုးထလော့၊ သင်၌ ကျန်ရှိနေသေးသည့် သေလုနီးပါးဖြစ်နေသောသူတို့ကို အင်အားဖြည့်တင်းပေးလော့။ အဘယ်ကြောင့်ဆိုသော် သင်၏လုပ်ဆောင်မှုများသည် ငါ၏ဘုရားရှင်အမြင်၌ မပြည့်စုံသေးကြောင်းကို ငါတွေ့မြင်နေရ၏။ 3ထို့ကြောင့် သင်ကြားနာ၍ လိုက်နာကျင့်သုံးနေသောအရာတို့ကို သတိရလော့။ သင်မနိုးထလျှင် သူခိုးကဲ့သို့ ငါလာမည်။ မည်သည့်အချိန်၌လာမည်ကို သင်သိရမည်မဟုတ်။ 4သာဒိမြို့၌ မိမိတို့၏အဝတ်အစားများအားအပြစ်များနှင့်မစွန်းထင်းစေသော လူအနည်းငယ်ရှိကြသေး၏။ သင်တို့သည် ထိုက်တန်သောကြောင့် ဝတ်ဖြူစင်ကြယ်ဝတ်ကာ ငါနှင့်အတူသွားကြလိမ့်မည်။ 5အောင်နိုင်သောသူသည် ထိုသူတို့ကဲ့သို့ပင် ဖြူသောအဝတ်ကို ဝတ်ဆင်ရလိမ့်မည်။ ငါသည် သူ၏နာမည်ကို အသက်စာစောင်မှ မည်သည့်အခါမျှ ပယ်ဖျက်မည်မဟုတ်။ 6ဉာဏ်အလင်းတော် အသင်းတော်တို့အား မိန့်တော်မူသောစကားကို နာရှိသောသူသည် ကြား၍နာလည်ပါစေ။ 7ဖိလဒေလဖိမြို့၌ရှိသော အသင်းတော်၏ နတ်ဒေဝါထံသို့ စာရေးလော့။ ဖြောင့်မတ်၍ မှန်သောစကားကိုပြောဆိုသူ ဒါဝိဒ်မင်း၏ အခွင့်အာဏာသော့ကို ရရှိထားသောသူ၊ မည်သူမျှ မပိတ်နိုင်အောင်ဖွင့်၍ မည်သူမျှမဖွင့်နိုင်အောင် ပိတ်သူက ဤသို့ပြော၏။ 8သင်တို့လုပ်ဆောင်ခဲ့သမျှကို ငါသိ၏။ သင်သည် အားနည်းသော်လည်း ငါ၏သွန်သင်ချက်ကို လိုက်နာ၍ ငါ၏တပည့်တော်ဖြစ်ကြောင်းကို မငြင်းပယ်ခဲ့။ ထို့ကြောင့် သင့်ရှေ့မှာ တံခါးကိုငါဖွင့်ထားပြီ။ ထိုတံခါးကို မည်သူမျှမပိတ်နိုင်။ 9ယခုအခါ မာန်နတ်၏အဖွဲ့ဝင်၌ပါဝင်သောလူများအား မည်သို့ပြုလုပ်မည်ကို သင်မြင်တွေ့လိမ့်မည်။ သူတို့သည် ဘုရားရှင်၏လူများဟုခံယူထားသော်လည်း လူလိမ်များသာဖြစ်ကြသည်။ သူတို့အား သင်၏ခြေရင်းသို့လာရောက် ဒူးထောက်စေရန် ငါပြုလုပ်လိမ့်မည်။ ထိုအခါ ငါသင့်အားချစ်ကြောင်း ကိုလည်း သူတို့အားသိစေမည်။ 10သင်သည် ငါ၏စကားများအားနာခံ၍ သီးခံလျက်ရှိနေခဲ့၏။ ထို့ကြောင့် ကမ္ဘာတစ်ဝှမ်းလုံးရှိလူများအား စမ်းသပ်မည့်အချိန်၌ သင့်အား ငါကာကွယ်စောင့်ရှောက်မည်။ 11ငါသည် မကြာမီလာခဲ့မည်ဖြစ်သောကြောင့် သင်၏ဆုလာဒ်အဖြစ်ပေးအပ်ခံခဲ့ရသောသရဖူအား မည်သူမျှမလုယူနိုင်စေရန် သင်၌ရှိသောအရာများကို ခိုင်မြဲစွာဆွဲကိုင်ထားပါလော့။ 12အောင်မြင်သောသူကို ငါ့ဘုရားရှင်၏ ဗိမာန်တော်၌ ရှိသောတိုင်ကဲ့သို့ဖြစ်စေမည်။ သူသည် မည်သည့်အခါမျှ ဗိမာန်တော်အပြင်သို့ မရောက်ရ။ ငါသည် ငါ၏ဘုရားရှင်နာမတော်ကိုလည်းကောင်း ငါ၏ဘုရားရှင် နာမတော်ကိုလည်ကောင်း ငါ၏ဘုရားရှင်ထံ ရွှေမြို့တော်မှ ဆင်းသက်လာမည့် ဂျေရုဆလင်မြို့သစ် ဟူသော ဘုရားရှင်မြို့တော်၏ နာမတော်ကိုလည်းကောင်း၊ ငါ၏နာမတော်သစ်ကိုလည်းကောင်း သူ့ပေါ်၌ရေးထားမည်။ 13ဉာဏ်အလင်းတော်သည် အသင်းတော်တို့အား မိန့်တော်မူသောစကားကို နားရှိသောသူသည် ကြား၍ နားလည်နိုင်ကြပါစေ။ 14လောဒိကိမြို့၌ ရှိသော အသင်းတော်၏ နတ်ဒေဝါထံသို့ စာရေးလော့။ အာမင်ဖြစ်သောသူ၊ စစ်မှန်၍ သစ္စာရှိသည့် သက်သေဖြစ်သောသူ၊ ဘုရားရှင်ဖန်ဆင်းတော်မူသော အရာတို့၏ အစအဦးဖြစ်သောသူက ဤသို့မိန့်တော်မူ၏။ 15သင်ပြုခဲ့သည့်အမှုများအားလုံးနှင့် သင်ပူသည် အေးသည်အား ငါသိ၏။ သင် ပူခြင်း၊ အေးခြင်း တစ်ခုခုဖြစ်စေရန် ငါဆန္ဒရှိ၏။ 16သို့သော် သင်သည် အပူမဟုတ် အအေးမဟုတ် နွေးရုံသာရှိသောကြောင့် ငါသည် သင့်ကို ငါ၏ခံတွင်းမှ ထွေးထုတ်တော့မည်။ 17သင်က ‘ငါသည် ချမ်းသာကြွယ်ဝသည်ဖြစ်၍ မည်သည့်အရာကိုမျှမလို’ ဟုဆို၏။ သို့သော် သင်သည် စက်ဆုပ်ရွံရှာဖွယ်ကောင်းသူ၊ သနားစရာကောင်းသူ၊ ဆင်းရဲသောသူ၊ မျက်စိမမြင်သောသူ၊ အဝတ်မပါသောသူဖြစ်ကြောင်းကို မသိ။ 18စစ်မှန်သော ချမ်းသာမှုကိုရရန် မီးဖြင့် သန့်စင်ထားသော ရွှေကိုလည်းကောင်း၊ သင်၏အဝတ်မပါသည့် အရှက်ကို ဖုံးအုပ်ရန် အဝတ်ဖြူကိုလည်းကောင်း သင်၏မျက်စိမြင်နိုင်ရန် ခတ်စရာ မျက်စဉ်းကိုလည်းကောင်း ငါ့ထံမှဝယ်ယူလော့’ ဟု သင့်အားငါအကြံပေး၏။ 19ငါသည် ငါချစ်သောလူတိုင်းအား ဆုံးမ၍အပြစ်ပေးတတ်၏။ ထို့ကြောင့် သင်၏စိတ်ကိုပြုပြင်၍ နောင်တသံဝေဂရကြလော့။ 20နားထောင်ပါ၊ ငါသည် သင်၏တံခါး၌ရပ်၍ တံခါးကိုခေါက်နေ၏။ ငါ၏အသံကိုကြား၍တံခါးကိုဖွင့်လျှင် ငါသည်အထဲသို့ဝင်လာပြီး သင်နှင့်အတူစားသောက်လိမ့်မည်။ 21အောင်နိုင်သူအားလုံးသည် ငါအနိုင်ရရှိစဉ်က ငါ့ခမည်းတော်နှင့်အတူသူ၏ပလ္လင်ပေါ်ငါထိုင်ခဲ့သကဲ့သို့ ငါ၏ပလ္လင်ပေါ်၌ ငါနှင့်အတူထိုင်ရလိမ့်မည်။ 22ဝိဉာဏ်တော်သည် အသင်းတော်တို့အား မိန့်တော်မူသောစကားကို နားရှိသောသူတို့ ကြား၍ နားလည်ကြပါစေ။
Obecnie wybrane:
Revelation 3: TPV-RV
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
