2 थिस्सलुनीकियों 1
1
नमस्कार
1ऐ चिट्ठी पौलुस, सिलवानुस जां तीमुथियुसेरी तरफ सिंउ आ। ऐ चिट्ठी असै थिस्सलुनीकियों शहरेरै विश्वासिया भाईया केरै तेईनी लिखतै अत्तै, जै पिता परमेश्वरेरै जां प्रभु यीशु मसीहरै अत्तै;
2असै प्रार्थना कातै अत्तै कि असैड़ा पिता परमेश्वर जां प्रभु यीशु मसीह तुहां पन अनुग्रह करिया जां तुहांनि शांति दिया।
न्याय कांनेरी धियाड़ी
3हे विश्वासी भाईयो, तुहां मैहणुवां केरै बारै मझ असुवां परमेश्वरैरा लगातार धन्यवाद दींणा चेहिंथा, ऐहीं कांनु असेड़ै तेईनी जरूरी आ; केईनी कि प्रभु यीशु मसीह मझ तुवाड़ा विश्वास लगातार बधता गांहथा, जां तुहां सभनियांं केरा योकिया केरै तेईनी प्रेम बि जादा बधता गांहथा। 4ऐठणीरै तेईनी असै ऐपुवै परमेश्वरेरी कलीसिया केरै विश्वासिया मझ तुवाड़ै बारै मझ गर्व कातै, हलाँकि तुवे मुश्किलिया जां दुखा केरा अनुभव कातै, तां बि तुवे लगातार धीरज धरि करि सहन कातै रींहथै जां तुवे हालै तेईनी बि प्रभु यीशु मसीह पन विश्वास कातै।
5जां परमेश्वर ऐस सतावैरा इस्तेमाल अपड़ा न्याय लुहानेरै तेईनी जां तुहां अपड़ै राज्यरै योग्य बंणाणेरै तेईनी करैला, जेठणीरै तेईनी तुवे दुख सहन कातै अत्तै। 6केईनी कि परमेश्वर हमेशा धार्मिकताय ला न्याय काता, तैस तैन्हांं मैहणुवां पन दुख अंणना जैन्हैं तुहांनि दुख दितौरा। 7तैस तुहांनि जां असुनि तसल्ली दींणी जै ऐम्हीं दुख सहन कातै अत्तै। ऐ तेख्णी भूंणु जेख्णी प्रभु यीशु मसीह अपड़ै सामर्थी स्वर्गदूता सिंउ भड़कोरी आगी मझ स्वर्गा किना ऐईंणु। 8जां जै परमेश्वरा ना जांणतै जां जै असेड़ै प्रभु यीशुरै बारै मझ खुशखबरिरा पालन ना कातै, तैस तैन्हांंनि सजा दींणी। 9प्रभु सैक्यै अपड़ि मौजूदगी किना भेईर करि दींणै जां तैन्हांंनि अपड़ि महानताय मझ अपड़ि शक्तिरै अनुभव कांनेरी अनुमति ना दींणी, तैस तैन्हांंनि अनन्त दंडेरी सजा दींणी। 10ऐ गलै तेख्णी भूंणी जेख्णी प्रभु यीशु मसीह अपड़ा मैहणुवां किना माहिमा पांणेरै तेईनी जां तैन्हांं सारा विश्वासिया मझ हैरानिरा कारण भूंणनी ऐईंणु, तुवे बि ऐस मंडली मझ किट्ठै भूंणै, केईनी कि तुहैं तैस संदेशा पन विश्वास केया, जै असुवें तुहांनि तेसेरै बारै मझ शुणाउरा थ्या।
11ऐठणीरै तेईनी असै लगातार तुवाड़ै तेईनी प्रार्थना कातै ताकि परमेश्वर तुहां तैस जीवनेरै योग्य बंणा दिया, जैस जींणेरै तेईनी तुवे तेनी शदाउरै अत्तै जां ऐ कि सै तुवाड़ी भली ईच्छाय कंमा मझ बदली दिया जां तुहांनि तैस जीवना जींणा मझ मजत करिया, जेसैरी मांग विश्वासै सिंउ तेसैरी सामर्थी ला काता। 12असै ऐ प्रार्थना कातै अत्तै कि मैहणु तुवाड़ी वजहि ला असेड़ै प्रभु यीशु मसीहरै नाँईयेरी माहिमा करिया जां तुहांनि बि आदर मेईया; केईनी कि असेड़ै परमेश्वरै जां प्रभु यीशु मसीह तुहां पन अनुग्रह क्यौरा।
Obecnie wybrane:
2 थिस्सलुनीकियों 1: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.