1 थिस्सलुनीकियों 5
5
दुबारे ऐईंणेरै तेईनी तियार बेशै
1हे मिन्डै विश्वासी भाईयो, तुहां ऐ बोलणैरी जरूरत ना कि प्रभु यीशु मसीह दुबारे केख्णी ऐईंणु। 2केईनी कि तुवे मैहणु अच्छी तरही सिंउ जांणतै अत्तै कि प्रभुरै वापस ऐईंणैरी धियाड़ी ठीक तिहियें अचानक भूंणी जिहीं राती चौर ऐईंता। 3जेख्णी मैहणुवां ऐ बोलणु कि, “सभ-किछ ठीक-ठाक आ जां कोई डरींणैरी गल ना।” तैस टैंमा बिना कुनि जानकारी ला तैन्हांं बड़ी बडी मुश्किलिरा सांमना कांना। ऐ तेतियुवै भूंणु, जिहीं एकि दुपरांणी जनेनी अजागै इकदम शुल्लै बाई पीड़ै लगती जां सैक्यै तैस बडै कलेशा किना ना बचणै। 4पण विश्वासी भाईयो, तुवे ता अंधारूरी बुराई मझ नत्तै कि प्रभुरै ऐईंणैरी धियाड़ी तुहां पन चौरा सैयि तुवाड़ी बिना तियारी अईछी गहिया। 5केईनी कि तुवे सभ ज्योतिरी सन्तान जां धियाड़िरी सन्तान अत्तै; असै राती जां अन्धारू सिंउ कोई मतलब ना रखतै। 6ऐठणीरै तेईनी असै अविश्वासिया सैयि झुलोरै ना रिहा पण बियुझै जां सतर्क रिहा। 7केईनी कि जै झुलि गांहथै जां जै मतवालै भूंतै, सै रातियै मतवालै भूंतै। 8पण असै ता धियाड़िरी संतान अत्तै, ऐठणीरै तेईनी असुवां ऐपु पन काबु रखणा चेहिंथा। असेड़ि आस्था जां प्रेम असेड़ि रक्षा करिया जिहीं कि अक कवच एकि सैनिकैरी रक्षा काता।
9केईनी कि परमेश्वरै असै गुस्सेरै तेईनी नत्तै चुणोरै, पण असै अपड़ै प्रभु यीशु मसीहरा उद्धार पांणेरै तेईनी चुणोरै अत्तै। 10यीशु मसीह असेड़ै तेईनी ऐठणीरै तेईनी मरा ताकि चाहै असै मरिया या जिआ पण जेख्णी तैस वापस ऐईंणु ता असै हमेशा तैस सेईतै रेय्ही सकिया। 11ऐनि वजहि ला योकियांनि हिम्मत दिया जां परमेश्वरा पन हौरा जादा विश्वास कांनेरै तेईनी योकिया केरी मजत करा, जिहीं कि तुवे कातै बि।
कलीसियैनि उपदेश
12हे विश्वासी भाईयो, असै तेन्हैरा आदर कांनेरै तेईनी तुहां सिंउ विनती कातै जै तुहां बिच तकड़ी मैहनत कातै, जां प्रभु मझ तुवाड़ै अगुवे अत्तै जां तुहांनि समझांतै। 13जां जै किछ सैक्यै तुवाड़ै तेईनी कातै, तेठणिरी वजहि ला तुवे तेन्हैरा आदर करा जां तैन्हांं सिंउ जादा प्रेम करा; जां योकिया मझ मिलि-जुलि करि बेशा। 14हे विश्वासी भाईयो, असै तुहां सिंउ विनती कातै अत्तै कि जै विश्वासी आलसी अत्तै, तेन्हांनि चेतावनी देया, डरींणारानि हिम्मत देया, जै कमजौर अत्तै तेन्हैरी मजत करा जां सभनियांं सिंउ सहनशील बंणी करि बेशा। 15तुवे ऐसै गलैरा ध्यान रखा कि बुराईरै बदलै कोई बि कोस सिंउ बुराई मेईं करा, पण हमेशा योकिया मझ जां सभनियां मैहणुवां केरा भला कांनेरी कोशिश करा। 16तुवे हर टैंम प्रभु मझ खुश रिय्हा। 17लगातार प्रार्थना कातै रिय्हा। 18हर हालाता मझ परमेश्वरैरा धन्यवाद करा: केईनी कि प्रभु यीशु मसीहरी तुहां मैहणुवां केरै तेईनी ऐहै ईच्छा आ। 19पवित्र आत्मायरै कंम मैहणुवां केरी जिन्दगी मझ भूंणा किना मेईं रौका। 20ऐ मेईं सौचा कि परमेश्वरै अपड़ै मैहणुवंनी जै भविष्यवाणी दितोरी अत्ति, सै बेकार अत्ति। 21पण हर एकि गलैरै बारै मझ सौच-विचार करा, ऐ जांणनेरै तेईनी कि ऐ परमेश्वरेरी तरफ सिंउ आ या ना। जै अच्छी गलै अत्ति तैन्हांं मना जां तैन्हांं पन चला। 22हर-एकि बुराई किना दूर बेशा।
आशीर्वाद
23आंउ प्रार्थना काता कि शांति दींणै वा परमेश्वर तुहां पूरी तरह सिंउ पवित्र करिया, तुवाड़ा पूरा चाल-चलन आत्मा, प्रांण जां शरीर असेड़ै प्रभु यीशु मसीहरै दुबारे ऐईंणेरै तेईनी पूरी तराहि सिंउ निर्दोष रिय्हा। 24तुहां शदांणार विश्वासेरै काबिल आ, ऐठणीरै तेईनी तैस तुवे पवित्र भूंणा मझ काबिल बि बणांणै केईनी कि सै तुहां पवित्र भूंणेरै तेईनी शदांता।
25हे विश्वासी भाईयो, तुवे असेड़ै तेईनी बि प्रार्थना करा।
26जेख्णी तुवे विश्वासी भाईया केरै रूपा मझ योकिया सिंउ किट्ठै भूंतै ता योकियानि प्रेम सिंउ नमस्कार करा, जिहीं कि विश्वासिया कांनु चेहिंथु।
27आंउ तुहांनि ऐ प्रभु यीशु मसीहरै नाँईयां मझ आज्ञा दींता कि ऐ चिट्ठी सभनियांं विश्वासी भाईयानि पढ़ि करि शुणांणी।
28आंउ प्रार्थना काता कि असेड़ै प्रभु यीशु मसीहरा अनुग्रह तुहां सभनियांं पन भूंता रिय्हा।
Obecnie wybrane:
1 थिस्सलुनीकियों 5: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.