2 थिस्सलुनीकियों 2
2
पापेरा मैहणु मतलब विनाशेरा पुत्र
1हे विश्वासी भाईयो, अबै असु अपड़ै प्रभु यीशु मसीहरै वापस ऐईंणेरै बारै मझ जां तैस टैंमेरै बारै मझ किछ बोलणु आ, जेख्णी असु तैस सिंउ मिलणु। 2तुवे अजागै अपड़ि बुद्धी कोसक्यै भविष्यवाणी, कोसक्यै उपदेशै या कोसक्यै ऐतेई चिट्ठी ला दुखी मेईं कातै, जेनि ला असेड़ु लिखोरू समझियुंतु भुईया। जां जैत मझ ऐहीं चारै शुणाउरू भुईया कि प्रभुरी धियाड़ी चलि यौउरी आ, तुवे डरींतै मेईं। 3कोई बि तुहां मैहणुवंनी कुनि बि तरीकै ला धोखा ना दिया, केईनी कि प्रभु वापस ऐईंणा किना पेहिलै अक ऐतिया टैंम ऐईंणा जेख्णी बड़ा सारा मैहणुवां परमेश्वरेरै खिलाफ विद्रोह कांना जां सै दुष्ट मैहणु ऐईंणा जेसैरा विनाश जरूरी आ। 4तैस परमेश्वरैरा जां तैन्हांं झूठा दैवता केरा जां बाकि सभनियांं चीजा केरा विरोध कांना, जेन्हैरी मैहणु पूजा कातै जां तैस अपड़ै-आपानि सभनियांं किना बडै समझणु। ऐठि तेईनी कि तैस दुष्ट मैहणु मंदरा मझ बेशणु जां सभनियांं मैहणुवंनी ऐ प्रचार कांना कि सै अपुवै परमेश्वर आ।
5सही मझ तुहां याद भूंणु कि जेख्णी आंउ तुहां सेईतै थ्या ता आंउ अक्सर तुहांनि ऐ शुणांईथ्या। 6सै दुष्ट मैहणु हालै-तेईनी प्रकट ना भौरा, केईनी कि किछ ऐतियु आ, जै तैस रौकता रींहथा। सही मझ तुहां याद भूंणु कि सै कितु आ, जै तैस रौकता। ऐठणीरै तेईनी जेख्णी सै टैंम ऐईंणा जै परमेश्वरै तय क्यौरा, तेख्णी तैस दुष्टा प्रकट भूंणु। 7केईनी कि तैस दुष्ट मैहणुरी शक्ति अबै संसारा मझ कंम काति आ, पण कोई आ जै तैस शक्ति रौकता, जां ज्यो-तेईनी सै दूर ना भौ गांहथा, त्यो-तेईनी सै तैस लगातार रौकि रखणा। 8ऐत किना बाद तैस दुष्ट मैहणु प्रकट भूंणु, पण बाद मझ जेख्णी प्रभु यीशु ऐईंणु ता तैस एकि हुक्मै ला जै तेसैरू मुहां किना निकूंथा जां अपड़ै ऐईंणै बाउ तेनी महिमायरू प्रगड़ु ला सैक्या दुष्ट मारी छडणा।
9शैताना ऐपु तैस दुष्टानि अपड़ि शक्ति दींणी। तैस हर प्रकारेरै झूठै चमत्कार, चिन्ह जां हौरंन्धै कंम कांने, जेनि ला मैहणुवां ऐ सौचणा लगणु कि ऐ परमेश्वर काता। 10जां तैस हर प्रकारेरी बुराई कांनी जां तैन्हांं मैहणुवंनी धोखा दींणा जै पिता परमेश्वरेरै जरियै नष्ट करियूंणै; केईनी कि सै तैस सच्चाई पन विश्वास कांना किना नमां कातै जै तैन्हांं बचा सकता। 11ऐठणीरी वजहि ला परमेश्वरा तैन्हांं मझ बड़ा जादा बहम पैदा कांना ताकि सै दुष्टेरी गलै पन विश्वास करिया। 12जां परमेश्वरा तैन्हांं सभनियांं मैहणुवां केरा न्याय कांना, जै प्रभु यीशु मसीहरै सच्चै संदेशा पन विश्वास ना कातै पण दुष्टेरै तरीकै सिंउ प्रेम कातै।
मजबूत बंणी करि रिय्हा
13हे विश्वासी भाईयो, असु लगातार परमेश्वरैरा धन्यवाद कांना चेहिंथा, केईनी कि प्रभु तुहां सिंउ प्रेम काता। तेनी संसार बंणाणा किना पेहिलै तुवे चुणी लियोरै अत्तै ताकि तुहां बचा सकिया। सै पवित्र आत्मायरै कंमा केरै जरियै तुहां पवित्र बणांता जां तुवाड़ै जरियै यीशु मसीहरै बारै मझ सच्चै सन्देशा पन विश्वास कांनेरी वजहि सिंउ तुहां बचांता। 14परमेश्वरै तुवे बचायूंणेरी खुशखबरी ला शदाउरै अत्तै, जेठणीरा असुवें तुहां बिच प्रचार केया, ताकि तुवे तैस माहिमाय मझ साउगी भौ सकिया, जै परमेश्वरै असेड़ै प्रभु यीशु मसीहनी दितोरी आ। 15ऐठणीरै तेईनी हे विश्वासी भाईयो, तुवे विश्वासा मझ पक्कै बंणा जां तैन्हांं गला पन विश्वास कातै रिय्हा जै असै तुहांनि शिख्राउरी थी, जेख्णी असै तुहां सिंउ थ्यै या जेख्णी असै चिट्ठी भेईजि।
16असै ऐपु असेड़ै प्रभु यीशु मसीह किना जां असेड़ै परमेश्वर पिता सिंउ तेन्हैरै तेईनी प्रार्थना कातै, जै असु सिंउ प्रेम कातै जां जेनि अपड़ै अनुग्रह ला असुनि अनन्त कालैरी शांति जां मजबूत आशा दितोरी आ। 17आंउ ऐ बि प्रार्थना काता कि परमेश्वर तुवाड़ै दिला मझ होंसला दिया जां हर अच्छी गल कातै रींहणेरै तेईनी तुहां मजबूत करिया।
Obecnie wybrane:
2 थिस्सलुनीकियों 2: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.