1 MAKABE GƏ̄ 9
9
Judas oy
1Dan ń Demetəriyus oō kadə̄ Nikanor na oy ta rɔ̄ɔ̄ tə́ kə ngé rɔ̄ɔ̄ yān gə̄ anī, tél əla Bakides nin̄ kə Alkim ō, ngé rɔ̄ɔ̄ gə̄ kə́ gerə̄n̄ rɔ̄ɔ̄ ngá̰ý ō gogə́ dɔ nang kə́ Juda tə́. 2Nin̄ unən̄ róbə́ kə́ ta kaw̄ Galile ō, aw̄ gīrə̄n̄ ɓē kə́ Mesalotə gō nang kə́ Arbel tə́ əlan̄ ta naā tə́ ō. Nin̄ taān̄ ɓē ní ba tɔ̄lə̄n̄ de kə́ kemeé gə̄ ngá̰ý. 3Kə nāā kə́ ta kəga dɔ yā ɓāl̄ kə́ nge kṵ ɓú kə kutə mí kə kalən kə́ jōó anī, əndān̄ géŕ ger sɔɔ̄ ta ɓē kə́ Jerusalem. 4Gō tə́ anī ndɔ́tə̄ aw̄n̄ Berjetə kə áskar kə́ ngé rɔ̄ɔ̄ kə njadə́ gēé deē dūbú kutə jōó ō, ngé rɔ̄ɔ̄ kə sə́ndá gə̄ deē dūbú jōó ō. 5Judas ɓáa əndā géŕ ger yān i Elasa. Ngé rɔ̄ɔ̄ kə́ jī katə ngá̰ý gə̄ dūbú mətá i seneé. 6Dan ń a̰a̰n̄ madə̄ ba̰ā̰ gə̄ kə́ kutədə́ i ngá̰ý ō, tɔ́gə́də́ i ngá̰ý ō anī, ɓōĺ rāādə́ adə̄ ngá̰ý gə̄ a̰ȳn̄ naā kɔ̄ɔ́ ō, gotə de gə̄ ń nayn̄ ní i deē ɓú sɔ́sɔ́ beē ngóy ō. 7Judas a̰ā̰ kadə̄ ngé rɔ̄ɔ̄ yān gə̄ a tḭ̄ḭ̄n̄ i naā kɔ̄ɔ́ ō, i kum mbang ń kadə̄ rɔ̄ɔ̄ a udəń kə̄ naā tə́ ní ō anī, kemən nujə sák sák kɔ̄ɔ́. Tɔdɔ̄ kum mbang kə́ yā kadə̄ ɔsəń nja ngé rɔ̄ɔ̄ yān gə̄ kə̄ naā tə́ gətóo. 8Jīn ur wak ɓá tā, banī əda ngé gə̄ ń nayn̄ gotoó ní na: ḭ́ḭḭ̄ dɔɔ́, j-awī kum kə̄ dɔ madə̄ ba̰ā̰ gə̄ tə́ j-ənīdə́ rɔ̄ɔ̄ lo ń tɔ́gə́jí asə ní! 9Nin̄ ɔgə̄nən̄ banī ədanən̄ na: Kə́ ngɔr ń tə́ toō ní, j-asiī rāā yá̰á̰ kógə̄ḿ alé, ngá̰ý ɓáa j-ajiī i rɔ̄jí tá. J-a jə-téliī yā reē kə ngákṵ́ṵ́jí gēé yā kun ta rɔ̄ɔ̄. Tām̄ yājí tə́ ɓáa kutəjí i ngá̰ý alé. 10Judas tél ədadə́ na: Deē a əda na mā na m̄-sāā ka̰ȳ alé. Ré mbang yājí asə anī, ādə̄ j-oyiī kə wurkilií tām̄ yā ngákṵ́ṵ́jí gə̄ tə́ ō, jə-lōōī rāā kadə̄ nujən̄ kɔsə go̰n yājí ō.
11Ngé rɔ̄ɔ̄ yā madə̄ ba̰ā̰ gə̄ teēn̄ géŕ gereé reē ran̄ nodə́ tə́ yā rɔ̄ɔ̄də́. Nin̄ kēgə̄n̄ ngé rɔ̄ɔ̄ kə sə́ndá yādə́ gə̄ gír lo jōó: ngé bējə̄ gə̄ ō, ngé gərā gə̄ ō, njə̄rān̄ kété no ngé rɔ̄ɔ̄ gə̄ tə́, tá ngé kənī rɔ̄ɔ̄ gə̄ i nodə́ tə́ ō, adə̄ i go̰ rɔ̄ɔ̄ gə̄ malang. 12Bakides i dan áskar kə́ ger̄ rɔ̄ɔ̄ ngá̰ý gə̄ tə́. Ɓūtə̄ ngé rɔ̄ɔ̄ kə njadə́ gə̄ njə̄rān̄ dɔ jī jōó kum kə̄ kété kə gō ndū bərúnjú. De gə̄ yā Judas gə̄ kɔ̄rə́n̄ bərúnjə ō, 13dɔ nang ndew sɔɔ̄ń kōō ngé rɔ̄ɔ̄ gə̄ ō. De gə̄ udən̄ naā tə́ rɔ̄ɔ̄n̄ naā dəloí bátə́ lo sɔl̄ dɔdə́ tə́. 14Judas a̰ā̰ kadə̄ Bakides nin̄ kə ngé rɔ̄ɔ̄ kə́ tɔ́gə́də́ i ngá̰ý gə̄ ran̄ i dɔ jī kṵṵn tə́. Ngé wurkil gə̄ malang reē gīrə̄n̄ gidə Judas. 15Nin̄ tetən̄ ngé ger̄ rɔ̄ɔ̄ gə̄ ngá̰ý rɔ̄ɔ̄ ō, ngɔ̄də̄n̄də́ bátə́ ugə̄n̄ sedə́ mbal̄ gə̄ kə́ Ajara tə́ ō. 16Dan ń ngé rɔ̄ɔ̄ kə́ dām̄ jī kə́ geleé tə́ gə̄ a̰a̰n̄ kadə̄ rɔ̄ɔ̄ rāā ngé kə́ dām̄ jī kə́ kṵṵ́ tə́ gə̄ anī, bə̄gān̄ naā gō Judas tə́ kə de gə̄ yān gēé ō, njadə́ i gōn tə́ gōn tə́ ō. 17Rɔ̄ɔ̄ təngā ō, de gə̄ oyn̄ ngá̰ý dām̄ jōó mbak ō. 18Judas nəkɔ́ oy ō, gotə gə̄ a̰ȳn̄ naā ō. 19Jonata̰ nin̄ kə Simo̰ unən̄ nīń ngōkṵ́ṵ́də́ Judas aw̄ dubə̄n̄ dɔ ɓádə kaan gə̄ tə́ Modin. 20Israel gə̄ malang nūūnən̄ ō, əhɔn̄ ndoō ngá̰ý tām̄ yān tə́ ō. Nin̄ nūūn̄ rɔ̄də́ dɔ ndɔ̄ i ngá̰ý ədan̄ na: 21Go̰ rɔ̄ɔ̄ ń ajə Israel gə̄ ní oy i tām̄ rí tə́? 22Gotə yá̰á̰ kə́ rang gə̄ ń Judas rāā ní ō, gotə rɔ̄ɔ̄ yān gə̄ ō, gotə yá̰á̰ kə́ to rī ɓār̄ gə̄ ń ni rāā ní ō, gotə rīn kə́ to kɔsə go̰n gə̄ ō ní, deē ndang kem makətūbūú alé, tɔdɔ̄ i ngá̰ý.
Jonata̰ un gotə ngōkṵ́ṵn Judas
23Dan ń Judas oy kɔ̄ɔ́ anī, ngé rāā yá̰a̰ kə gō kem ndigə yā Nə́ɓāá aĺ gə̄ tél teēn̄ kə̄ lo gə̄ tə́ dɔ nang kə́ Israel tə́ ō, ngé rāā yá̰a̰ majə aĺ gə̄ tél ɔrə̄n̄ dɔdə́ dɔɔ́ gogə́ ō. 24Dan ń ɓōō kə́ ngá̰ý əsō ní, de kə́ kem ɓēé gə̄ malang tetən̄ rɔ̄də́ gōdə́ tə́. 25Bakides gə̄rā de gə̄ dan ngé rāā yá̰a̰ kə gō kem ndigə yā Nə́ɓāá aĺ gə̄ tə́ kadə̄ ndin̄ dɔ ɓē tə́ ba rāān̄ de gə̄ yá̰á̰ kə́ tōr̄. 26Ngār gə̄ ní ndəlen̄ nja madə̄ Judas gə̄ ō, dəjen̄də́ najə̄ ō. Gō tə́ anī, reēn̄ sedə́ rɔ̄ Bakides tə́ adə̄ rāādə́ yá̰á̰ kə́ tōr̄ ō, əla rɔ̄sɔl̄ dɔdə́ tə́ ō. 27Əla gír ɓáĺ ń ngé koō taa gə̄ gətóon̄ kɔ̄ɔ́ tə́ bátə́ ugə̄ń kum mbang ngeé ń nuū tə́ ní, ngáń Israel gə̄ a̰a̰n̄ tápə̄ kə́ bərá aĺ ɓáý. 28Lo ń nuū tə́ madə̄ ta Judas gə̄ malang ɔsən̄ dɔdə́ naā tə́ ba ədan̄ Jonata̰ na: 29Əla gír ndɔ̄ ń ngōkṵ́ṵ́í Judas oyń tə́ ní, de kə́ dəngam kə́ tītə̄n kə́ yā rɔ̄ɔ̄ madə̄ ba̰ā̰jí gə̄ ō, Bakides ō, de gə̄ malang ń nel̄də́ kə ɓē yājí aĺ ní ō gətóo. 30Adə̄ ɓōólaā jə-gə̄rāī j-əndāī ngāraá kum gotən, kadə̄ ḭ̄ i nge kɔr nojí kadə̄ j-awīiń ta rɔ̄ɔ̄ tə́. 31Kum mbang ngeé ń nuū tə́ ní, Jonata̰ ndigə kəndi dɔ ngáń Israel gə̄ tə́ ō, un gotə ngōkṵ́ṵn Judas ō.
Jonata̰ rāā ba̰ā̰ ngōkṵ́ṵn Ja̰a̰
32Dan ń Bakides oō najə̄ ń nuū ní anī, sāā tɔ̄l̄ Jonata̰ kɔ̄ɔ́. 33Reē ədan̄ Jonata̰ ō, ngōkṵ́ṵn Simo̰ ō, de gə̄ malang ń i seneé ní ō najə̄ ní. Anī a̰ȳ aw̄n̄ dəla lo kə́ Tekowe tə́ ba əhɔn̄ lo ndin̄ kadə bəlo taā man̄ ndī ń a ɓārə́n̄ na i Aspar ní tə́. 34Bakides oō najə̄ ní kə ndɔ̄ kɔr̄ koó adə̄ i kə ndɔ̄ kə́ nge kṵ sīrí anī, ni ō ngé rɔ̄ɔ̄ yān gə̄ malang ō, teēn̄ bā Jurdḛ kə̄ gidə kə́rēý tə́. 35Jonata̰ əla ngōkṵ́ṵn Ja̰a̰ ń ndi dɔ ngé rɔ̄ɔ̄ gə̄ tə́ ní, kadə̄ dəje madə̄ tan gə̄ ń i Nabate gə̄ ní ta róbə ɓōkə́ yá̰a̰ kətō yādə́ gə̄ ń i ngá̰ý ní ɓēé loodə́. 36Ba ngán Jambəri gə̄ ń i ngé kə́ Madaba gə̄ ní, teē reē əhɔn̄ Ja̰a̰ ō, ɔyn̄ yá̰a̰ yān kɔ̄ɔ́ malang dɔ gúú tə́ ō, ba aw̄n̄ kə yá̰a̰ kənge ń nin̄ ɔyn̄ ta rɔ̄ɔ̄ tə́ ní malang. 37Gō yá̰a̰ gə̄ ń nuū tə́ anī, reē ədan̄ Jonata̰ ō, ngōkṵ́ṵn Simo̰ ō, na ngáń Jambəri gə̄ na a rāān̄ yá̰a̰ kūjə́ taā naā kə́ bo ngá̰ý nuū. I dəyá̰ kə́ Nabata ō, de gə̄ na njə̄rān̄ gōn tə́ ngá̰ý ɓuk ɓuk ō. I ngōn̄ kə́ dəyá̰ yā de kógə̄ḿ kə́ bo kə́ Kanaan. 38Əga kemdə́ dɔ yo mósə́ ń ngōkṵ́ṵ́də́ Ja̰a̰ oy ní tə́ ō, aw̄ ɓɔ̄ɔ̄n̄ rɔ̄də́ kɔ̄ɔ́ mbo̰ō̰ mbal̄ gə̄ tə́ ō. 39Nin̄ unən̄ kumdə́ kə̄ dɔɔ́ anī, a̰a̰n̄ nge nung yā dəyá̰ ní ō, madə̄ tan gə̄ ō, ngákṵ́ṵn gə̄ ō, a reēn̄ kum kə̄ rɔ̄də́ tə́ kə kɔdə gə̄ ō, gōsə̄ gə̄ ō, yá̰a̰ rɔ̄ɔ̄ kə́ ngá̰ý gə̄ ō. Nin̄ i dan ɓūtə̄ de gə̄ kə́ kōōdə́ ɓār̄ gijə gijə tə́ ō, dan yá̰a̰ kətō gə̄ tə́ ō. 40Jonata̰ kə de gə̄ yān gēé teēn̄ lo ń ɓɔ̄ɔ̄n̄ rɔ̄də́ tū tə́ ní tə́, ba tɔ̄lə̄n̄də́. Ngá̰ý gə̄ əngen̄ do kə́ asə yodə́ ō, ngé teē ta yo tə́ gə̄ a̰ȳn̄ naā kumdə́ kə̄ mbalá ō. Jonata̰ kə deē yān gēé ɔyn̄ yá̰a̰ kənge yādə́ gə̄ malang kɔ̄ɔ́. 41I tītə̄ ń nuū n kaw̄ kújú yā dəyá̰ téləń i kəhɔ ndoō ō, yá̰á̰ kə́ ɓār̄ gōsə̄ téləń i nūū rɔ̄ ō ní. 42I tītə̄ ń nuū n nin̄ rāānəń ba̰ā̰ ngōkṵ́ṵ́də́ ń ɓōkə́n̄ mósən nang tə́ ní ō, tél aw̄nəń lo ń dang gə̄ i tū tə́ kadə bā Jurdḛ tə́ ní ō.
Rɔ̄ɔ̄ kə́ tōr̄ ngá̰ý kə́ kadə bā Jurdḛ tə́
43Bakides oō gotə najə̄ ní anī, reē bátə́ ugə̄ dɔ gɔ́sə bā Jurdḛ tə́ kə ndɔ̄ kɔr̄ koō ń i ndɔ̄ kə́ nge kṵ sīrí ní tə́, kə ngé rɔ̄ɔ̄ gə̄ kə́ kutədə́ i ngá̰ý. 44Lo ń nuū tə́ Jonata̰ əda deē yān gə̄ na: ḭ́ḭḭ̄ dɔɔ́, ādə̄ jə-rɔ̄ɔ̄ī j-ajiīń rɔ̄jí! Tɔdɔ̄ ndɔ̄ kə́ ɓōólaā to i tītə̄ ndɔ̄ kə́ tagə́bēé aĺ ō, tītə̄ ndɔ̄ kə́ tagə́nú tə́ aĺ ō. 45Á̰a̰ī, rɔ̄ɔ̄ i nojí tə́ ba bā Jurdḛ i dām̄ kə́rēý tə́ ō, dang ō, ku lo ō i dām̄ kə́ rang tə́ ō: lo kə́ yā tél ka̰ȳń ń gətóo. 46Adə̄ ngɔlaā ní ə́gaī kɔŕ kə̄ dɔ rā̰ tə́, yā kadə̄ ī-teēiń kɔ̄ɔ́ jī madə̄ ba̰ā̰sí gə̄ tə́. 47Rɔ̄ɔ̄ udə kə̄ naā tə́, Jonata̰ un jīn kə̄ dɔɔ́ yā tə́gań Bakides kə kaskaraá anī, Bakides əyā kɔ̄ɔ́, əsō kə gōneé. 48Jonata̰ nin̄ kə de gə̄ yān gēé tḭ́ḭ̄n̄ bal tə́sōn̄ kum bā Jurdḛ tə́, nin̄ alən̄ man̄ teēn̄ kə̄ gidə kə́rēý tə́, banī madə̄ ba̰ā̰ gə̄ teēn̄ bā Jurdḛ kə̄ gōdə́ tə́ alé. 49Ndɔ̄ ngeé ń nuū tə́ ní, de gə̄ kə́ asən̄ dūbú dan de gə̄ ń i gidə Bakides tə́ ní, tə́sō oyn̄.
Bakides i dɔ nang kə́ Jude tə́ ō, Alkim oy ō
50Bakides tél aw̄ Jerusalem. Əndā ɓē kə́ ngan̄g gə̄ gō nang kə́ Jude tə́ ō, rāā kújə́ kə́ ngan̄g Jeriko ō, Emayus ō, Betəhoro̰ ō, Betel ō, Tamnata ō, Parato̰ ō, Tepo̰ ō. Əndā ndogə̄ mbal̄ gidə tə́ ō. Tə́lá bápə gə̄ ta tə́ ō, dēsə́ kāgə̄ ta tə́ ō. 51Gō tə́ anī tə́ndā ɓūtə̄ áskar gə̄ kem ɓē ní tə́ kógə̄ḿ kógə̄ḿ, kadə̄ rāān̄ Israel gə̄ yá̰á̰ kə̄ tōr̄. 52Ni rāā ɓē kə́ Betəsur ō, Gajara ō, ɓē yā Dabid ō, adə̄ ngan̄g. Tə́ndā ɓūtə̄ áskar gə̄ kemeé ō, ká̰n̄ yá̰a̰ kəsa gə̄ kemeé ō. 53Ni əhɔ ngán ngār gə̄ kə́ kem ɓēé ɓōkə́də́ dəngáyá kem kújə́ kə́ ngan̄g kə́ Jerusalem tə́, kadə̄ gāngə̄n̄ dɔdə́.
54Kə nāā kə́ nge kṵ kutə jōó yā ɓāl̄ kə́ nge kṵ ɓú kə kutə mí kə kalən kə́ mətá anī, Alkim adə̄ ndūn kadə̄ tɔ̄ɔ̄n̄ ndogə̄ mbal̄ kə́ dɔ ndágə lo kə́ táĺ kə́ kemeé tə́. I beé n ni nujəń kəla ń ngé koō taa gə̄ rāān̄ ní. Dan ń de gə̄ a tɔ̄ɔ̄n̄ ndogə̄ mbal̄ ní anī, 55moy ɔsə kə Alkim adə̄ dəban̄ ta kəla kɔ̄ɔ́. Tan dṵṵ̄ naā adə̄ asə kɔr̄ najə̄ aĺ ō, kəda yá̰á̰ kógə̄ḿ kə́ yā kadə̄ rāān̄ gotən tə́ aĺ ō. 56Alkim oy dan ngeé ń nuū tə́ dan tápə̄ kə́ al̄naā tə́. 57Dan ń Bakides a̰ā̰ kadə̄ Alkim oy kɔ̄ɔ́ anī, tél dɔ tə́ aw̄ gogə́ rɔ̄ mban̄g tə́ ō, dɔ nang yā Juda taā koō rɔ̄ɔ̄ ɓāl̄ jōó ō.
Bakides əsō kem yá̰á̰ ń ni sāā rāā tə́ ní
58Ngé rāā yá̰a̰ kə gō kem ndigə yā Nə́ɓāá aĺ gə̄ oōn̄ naā ədan̄ na: Á̰a̰ī Jonata̰ kə de gə̄ yān gēé ndin̄ jəke ō, ənīn̄ kemdə́ ndinə̄ń ō. Ní, ādə̄ j-əlaī gō Bakides tə́ ādə̄ reē əhɔdə́ ndɔ̄ɔ́ ndɔ̄ kógə̄ḿ beē. 59Anī aw̄ əndān̄ maȳ najə̄ ní naā tə́ seneé. 60Anī Bakides əsō róbó kə ɓūtə̄ ngé rɔ̄ɔ̄ gə̄ kə́ kutədə́ i ngá̰ý. Ni ndang makətūbə̄ əlań jəke adə̄ de gə̄ yān gə̄ ń ndin̄ dɔ nang kə́ Jude tə́ ní, dəjeńdə́ kadə̄ əhɔn̄ Jonata̰ kə madə̄n gēé. Banī yá̰á̰ ń sāān̄ rāā ní dɔ teē ndágá, adə̄ asən̄ rāā yá̰á̰ kógə̄ḿ alé. 61Banī Jonata̰ kə madə̄n gēé əhɔn̄ de kə́ kem ɓēé gə̄ kə́ ngé sə̄lā de gə̄ kadə̄ rāān̄ yá̰á̰ kə́ majə aĺ ní kutə mí, ba tɔ̄lə̄n̄də́ kɔ̄ɔ́. 62Gō tə́ anī Jonata̰ ō, Simo̰ ō, de gə̄ yādə́ gə̄ ō, aw̄ ndin̄ dəla lo kə̄ Betəsur tə́. Rāān̄ lo kə́ nujə kə́ tū tə́ gə̄ adə̄ tél majə gogə́ ō, rāān̄ ɓē ní adə̄ ngan̄g ō. 63Bakides oō najə̄ ní, anī ɔsə nja ngé rɔ̄ɔ̄ yān gə̄ malang naā tə́ ō, əla gō de gə̄ yān gə̄ kə́ Jude tə́ kadə̄ reēn̄ ō. 64Ni reē kumən sɔɔ̄ Betəsi kə nja lo rɔ̄ɔ́ ō, ənī ɓē ní rɔ̄ɔ̄ ndɔ̄ i ngá̰ý ō, adə̄ rāān̄ yá̰a̰ rɔ̄ɔ̄ gə̄ ō. 65Jonata̰ əya̰ ngōkṵ́ṵn Simo̰ kem ɓēé, ba teē kə ɓūtə̄ de kə́ sḛ́ý beē gə̄ gidə bembeé rɔ̄ɔń 66Ni ənī géŕ ger yā Odomera kə ngákṵ́ṵn gēé rɔ̄ɔ̄ ō, ənī géŕ ger yā Pasiron gə̄ rɔ̄ɔ̄ ō. Nin̄ əlan̄ gír rɔ̄ɔ̄ ō, udən̄ dan ɓūtə̄ áskar gə̄ tə́ ō. 67Lo ń nuū tə́ Simo̰ nin̄ kə de gə̄ yān gēé teē tə́lan̄ hor dɔ yá̰a̰ rɔ̄ɔ̄ gə̄ tə́ kɔ̄ɔ́. 68Nin̄ rɔ̄ɔ̄n̄ Bakides ō, tetən̄ rɔ̄ɔ̄ ō. Tɔ́gən ur̄ wak, tɔdɔ̄ núm̄ ń ni núm̄ rɔ̄ɔ̄ ní udə gírí alé. 69Wurən atə̄n ngá̰ý kə ngé rāā yá̰a̰ kə gō kem ndigə yā Nə́ɓāá aĺ gə̄ ń əlan̄ gōn tə́ adə̄ reē dɔ nang yādə́ tə́ ní. Ni tɔ̄l̄ de gə̄ ngá̰ý dandə́ tə́ ō, ndigə tél kaw̄ gogə́ ɓē yān tə́ ō. 70Dan ń Jonata̰ oō najə̄ ní anī, əla de gə̄ rɔ̄n tə́ kadə̄ ɔrə̄n̄ najə̄ kə́ dɔ lɔm tə́ seneé ō, kə́ dɔ kəya̰ dəngáy gə̄ dɔɔ́ tə́ ō. 71Ni ndigə, adə̄ rāā yá̰á̰ ń Jonata̰ dəjen ní. Ni túbə kə rɔ̄neé kadə̄ na n-sāā ta róbə nujə kə Jonata̰ tū alé. 72De gə̄ ń ni əhɔdə́ dəngáy dɔ nang kə́ Juda tə́ ní, tél sedə́ adə̄də́ seneé gogə́. Gō tə́ anī ni tél aw̄ gogə́ ɓēé ō, əndā njan dɔ nang yā Jipə gə̄ tə́ tṵ aĺ ō. 73Gír rɔ̄ɔ̄ gān̄g Israel tə́, adə̄ de gə̄ ɓōkə́n̄ kaskar nang tə́ ō, taān̄ koō rɔ̄ɔ̄ ō, Jonata̰ aw̄ ndi Makəmas ō. Ni gān̄g sarya adə̄ ngáń Israel gə̄ i lo ń nuū tə́ ō, rāā adə̄ ngé rāā yá̰a̰ kə gō kem ndigə yā Nə́ɓāá aĺ gə̄ gətóon̄ kɔ̄ɔ́ dɔ nang kə́ Israel tə́ ō.
Markert nå:
1 MAKABE GƏ̄ 9: SARDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bibəl ta Sar̄ © L'Alliance Biblique du Tchad, 2006, 2010.