1 MAKABE GƏ̄ 8
8
Ɓōkə́n̄ Rom gə̄ tɔ̄ȳ
1Rī ɓār̄ yā de kə́ Rom gə̄ əsō mbī Judas tə́. Rom gə̄ i go̰ rɔ̄ɔ̄ gə̄ ō, i ngé rāā kem majə kə de gə̄ ń tetən̄ rɔ̄də́ gōdə́ tə́ ní ō, i ngé rāā madə̄ naā kə de gə̄ ń reēn̄ kə̄ rɔ̄də́ tə́ ní ō. 2Ənīn̄ Judas gotə rɔ̄ɔ̄ yādə́ ō, gotə yá̰á̰ kə́ bo bo gə̄ ń rāān̄ ɓē Galatə gēé ní ō. Na tetən̄ Galatə gə̄ rɔ̄ɔ̄ adə̄ əgān̄də́ tīr̄. 3Ənīnən̄ gotə yá̰a̰ malang ń rāān̄ gō nang kə́ Espá̰y tə́ á taānəń bəlo gə̄ kə́ a ndērə̄n̄ gində̄ arjā̰a̰ ō lɔ́r ō tū tə́ ní. 4Ənīnən̄ gotə kɔl ń nin̄ ɔlən ō, tə́gā ta yādə́ ō ń taānəń ɓē ní. Tām̄ lo ní i sa̰y ngá̰ý rɔ̄ ɓē yādə́ tə́. Mban̄g gə̄ ń ḭḭn̄ ta ngóy dɔ nang tə́ nú á reē ənīn̄də́ rɔ̄ɔ̄ ní, yādə́ i tītə̄ ń nuū ō. Rom gə̄ tɔ̄lə̄n̄də́ ō, tetən̄də́ rɔ̄ɔ̄ tetə kə́ to ɓōĺ ngá̰ý ō, gotə gə̄ ń teēn̄ ta yo tə́ ní a əgān̄də́ i tīr̄ kə dɔ ɓāl̄ gə̄ ō. 5Pilipə nin̄ kə Perse ń i mban̄g gə̄ kə́ Masedəwan ní, Rom gə̄ tetən̄də́ rɔ̄ɔ̄ ō. De gə̄ malang ń əsōn̄ wūn̄g tadə́ tə́ ní, tetən̄də́ rɔ̄ɔ̄ adə̄ əlan̄ dɔdə́ gír tɔ́gə yādə́ tə́ ō.
6A̰tiyokus ń i mban̄g kə́ Aji ní gə̄gē, Rom gə̄ tetənən̄ rɔ̄ɔ̄ ō. Ni ənīdə́ rɔ̄ɔ̄ i kə kedə̄ rɔ̄ɔ̄ gə̄ ɓú kə kutə jōó ō, kə ngé kal̄ sə́ndá gə̄ ō, púsə rɔ̄ɔ̄ gə̄ ō, ngé rɔ̄ɔ̄ gə̄ kə́ kutədə́ i ngá̰ý ō. 7Nin̄ əhɔnən̄ kə kumneé, ba əndān̄ gúu dɔn tə́ ō, dɔ ngé gə̄ ń a ndin̄ mban̄g gotən tə́ ní ō, kadə̄ əgān̄ tīr̄ kə́ ɔȳdə́ kə kum mbangneé ō, kadə̄ adə̄ de gə̄ kum gotə rɔ̄n ō. 8Tām̄ ɓē kə́ Ḛndə ō, gō nang kə́ Medi ō, Lidi ō, tá gō nang kə́ majə ngá̰ý kə́rēý gə̄ kə́ kem ɓē kṵ tə́ ō ní, taān̄ kɔ̄ɔ́ jīn tə́ adə̄n̄ mban̄g Emen. 9Gərek gə̄ gḛyn̄ kaw̄ tɔ̄ɔ̄ kōō Rom gə̄ kɔ̄ɔ́. 10Dan ń Rom gə̄ oōn̄ yá̰á̰ ń nin̄ númə̄n̄ yā rāā ní anī, əlan̄ ngol áskar gə̄ kə́ bo kógə̄ḿ ngóy kadə̄ aw̄ rɔ̄ɔ̄də́. Lo ń nuū tə́ Gərek gə̄ ngá̰ý oyn̄ ta rɔ̄ɔ̄ tə́ ō, əhɔn̄ nə̄yá̰də́ gə̄ kə ngáńdə́ gə̄ aw̄n̄ sedə́ ɓəlo tə́ ō. Rom gə̄ ɔyn̄ yá̰a̰ kənge yādə́ gə̄ ō, əlan̄ dɔ ɓē yādə́ gíŕ tɔ́gə yādə́ tə́ ō, nujən̄ kújə́ kə́ ngan̄g yādə́ gə̄ kɔ̄ɔ́ ō, rāān̄də́ ɓəlo tə́ bátə́ ɓōólaā ō.
11Gotə ɓē kṵ kə́ rang gə̄ ō, dor̄ gə̄ ō ń de kə́ tū tə́ gə̄ tā̰ā̰n̄ rɔ̄ɔ̄ ní, Rom gə̄ nujənə̄ń kɔ̄ɔ́ ō, rāān̄ de gə̄ ɓəlo tə́ ō. 12Banī madə̄ naā yādə́ to gotoó kə ngé gə̄ ń əndān̄ tɔ́gə́də́ i dɔdə́ nin̄ tə́ ní. Nin̄ əlan̄ dɔ mban̄g kə́ ngɔr gə̄ ō, kə́ sa̰y gə̄ ō gíŕ tɔ́gə yādə́ tə́. De gə̄ malang ń oōn̄ rīdə́ ní, ɓōlə́n̄də́ ngá̰ý. 13Ngé gə̄ ń Rom gə̄ ndigən̄ rāā sedə́ ō, kəndādə́ mban̄g ō ní, adə̄n̄də́ ɓē kṵ, ba gotə gə̄ ɓáa əndān̄də́ nang tə́. Tɔ́gə Rom gə̄ i ngá̰ý al̄naā. 14Ɓá tā ba nge ń nuū gə̄gē ní, Rom kógə̄ḿ kə́ əla jākā mbang, aláa kūbə̄ mbang rɔ̄n tə́ ɔsəń go̰n rɔ̄n ní gətóo. 15Rom gə̄ əndān̄ ngé kum kedə̄ kəjō ɓē gə̄ ɓú kə kutə jōó tām̄ yādə́ tə́. De gə̄ ní a ɔsən̄ dɔdə́ naā tə́ i kə dɔ ndɔ̄ gə̄, yā tɔ́tə̄ naā dɔ najə̄ yā kósə de gə̄ tə́, kadə̄ yá̰a̰ malang njə̄rań kə gōó. 16Kə dɔ ɓāl̄ gə̄ ɓá anī, a əndān̄ kəla kṵ ɓē i dɔ de kógə̄ḿ beē tə́ kadə̄ ṵṵ ɓē dɔdə́ tə́ ō, dɔ ɓē kṵ yādə́ tə́ malang ō. De gə̄ malang oōn̄ tan ō, de kə́ əndān nii gətóo ō, de kə́ sāā kṵ ɓē gotən tə́ gətóo ō.
Jipə gə̄ əhɔn̄ madə̄ naā kə Rom gə̄
17Judas əla Epolem kə́ ngōn̄ Ja̰a̰ kə́ ngōn̄ Akos ō, Jaso̰ kə́ ngōn̄ Eleyajar ō, kadə̄ aw̄n̄ Rom ənīn̄ ndūdə́ kadə̄ télən̄ madə̄ kə́ra naā gə̄ ō, əhɔn̄ madə̄ naā kə́ mbóńg gə̄ tə́ 18yā kɔrə̄ń kəlā ɓəlo yā Gərek gə̄ míndə́də́ tə́ kɔ̄ɔ́ ō, tɔdɔ̄ a̰ā̰ kadə̄ kṵ ɓē yādə́ a rāā Israel gə̄ i ɓəlo tə́. 19Nin̄ əsōn̄ róbó, tá róbə́ kə́ ta kaw̄ Rom ngāl̄ ngá̰ý. Ugə̄n̄ anī, aw̄n̄ lo kán̄ naā yā kum kɔɔ̄ gə̄ kə́ ngé kadə̄ kɔjə̄ gə̄ tə́, ba unən̄ najə̄ ɔrə̄n̄ ədan̄ na: 20Judas Makabe nin̄ kə ngákṵ́ṵn gə̄ ō, kósə́ Jipə gə̄ ō, əlan̄jí kadə̄ jə-reē j-əhɔ madə̄ naā sesí ō, kadə̄ lɔm to mbənājí tə́ ō, ī-tə́daījí dan deē yāsí gə̄ tə́ ō, madə̄ tasí gə̄ tə́ ō. 21Najə̄ ní nel̄ kum kɔɔ̄ gə̄. 22Adə̄ kēē makətūbə̄ ń nin̄ ndangən̄ dɔ bar gində̄ nə̄ngá kasə tə́ əlanə̄ń Jerusalem kadə̄ tél i yá̰a̰ kəga kem dɔ najə̄ lɔm tə́ ō, madə̄ naā tə́ ō ní n toó:
23Jḭḭ jə-ndə̄ngā kadə̄ Rom gə̄ ō, gíŕ nápar de gə̄ ń i Jipə gə̄ ní ō, ndin̄ kə rɔ̄nelé dɔ bā bo tə́ ō, dɔ nang tə́ ō ngándáńg! Kadə̄ kaskar ugə̄ rɔ̄də́ tə́ aĺ ō, madə̄ ba̰ā̰ ugə̄ rɔ̄də́ tə́ aĺ ō. 24Ba ré i Rom n rɔ̄ɔ̄ əsō dɔn tə́ kété, aláa i ɓē kógə̄ḿ kə́ dan ɓē gə̄ kə́ i madə̄ Rom gə̄ tə́ n rɔ̄ɔ̄ əsō dɔn tə́, ká ré i rá gə̄gē lo ń Rom gə̄ ṵṵn̄ ɓē dɔ tə́ ní tə́ anī, 25ɓē yā Jipə gə̄ a ɓo rɔ̄n tū yā ɓē ní tə́ yā rɔ̄ɔń kə ngarā̰ kemən gēé malang kə gō tōrən gə̄ kə́ kum mbang nəkɔ́ ń nuū tə́. 26Rom dəje Jipə gə̄ kadə̄ lōōn̄ kadə̄ madə̄ ba̰ā̰n gə̄ kōō gémē ō, yá̰a̰ rɔ̄ɔ̄ gə̄ ō, gində̄ arjā̰a̰ ō, too bo gə̄ ō. I gáŕ kadə̄ Jipə gə̄ ran̄ dɔ ndūdə́ tə́ kanjə̄ kəndā kemdə́ dɔ yá̰a̰ kəndā nja tə́. 27Yā Rom gə̄ i beé ō, ré i Jipə gə̄ n rɔ̄ɔ̄ əsō dɔdə́ tə́ kété anī, Rom gə̄ a ɓoon̄ rɔ̄də́ tū yādə́ tə́ yā rɔ̄ɔń kə ngarā̰ kemdə́ gēé malang kə gō tōrən gə̄ kə́ kum mbang nəkɔ́ ń nuū tə́ ō. 28Rom ənī ndūn adə̄ Jipə gə̄ kadə̄ n-a n-adə̄ madə̄ ba̰ā̰ gə̄ kōō gémē aĺ ō, yá̰a̰ rɔ̄ɔ̄ gə̄ aĺ ō, gində̄ arjā̰a̰ aĺ ō, too bo aĺ ō. I gáŕ kadə̄ Jipə gə̄ ran̄ dɔ ndūdə́ ń ənīn̄ tə́ ní kanjə̄ sor̄ ō. 29I kə najə̄ gə̄ ń nuū n Rom gə̄ əhɔnə̄ń madə̄ naā kə Jipə gə̄ ní. 30Ré ndɔ̄ń tə́, de gə̄ ń ənīn̄ ndūdə́ adə̄n̄ naā ní, ndigən̄ kənī yá̰á̰ kógə̄ḿ dɔ ndūdə́ ní tə́, aláa kɔr̄ yá̰á̰ kógə̄ḿ tū tə́ anī, a rāān̄ karī. I gáŕ kadə̄ ɓōlə́n̄ gidə yá̰á̰ ń ənīn̄ dɔ tə́, aláa ɔrə̄n̄ tū tə́ ní. 31Kə́ ɔjə dɔ yá̰á̰ kə́ tōr̄ ń mban̄g Demetəriyus rāā kə Jipə gēé ní, jə-ndang makətūbə̄ j-adə̄n j-ɔrə̄ń najə̄ ń toō seneé, j-əda na: Jipə gə̄ ń nin̄ ɓoon̄ naā sejí ō, i madə̄ tají gə̄ ō ní, i tām̄ rí tə́ á ī-rāāīdə́ ndoō tə́ beē ní? 32Ré sekíīn̄ ɓáý tṵ anī, j-a jə-rɔ̄ɔ̄ī dɔ bā bo tə́ ō, dɔ nang tə́ ō.
Markert nå:
1 MAKABE GƏ̄ 8: SARDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bibəl ta Sar̄ © L'Alliance Biblique du Tchad, 2006, 2010.