1 MAKABE GƏ̄ 10
10
Alekjandər Epipan nin̄ kə Demetəriyus əndān̄ naā nii
1Kem ɓāl̄ kə́ nge kṵ ɓú kə kutə mehḛ́ tə́ ní, Alekjandər Epipan kə́ ngōn̄ A̰tiyokus reē udə kem ɓē kə́ Pətolemayis tə́ ba taā lo. De gə̄ əhɔnən̄ kə̄ rɔ̄də́ tə́ majə ō, i lo ń nuū tə́ n əla gír kṵ ɓē ní ō. 2Dan ń mban̄g Demetəriyus oō najə̄ ń nuū ní anī, ɔsə nja ngé rɔ̄ɔ̄ kə́ tɔ́gə́də́ i ngá̰ý naā tə́, ba aw̄ kənī Alekjandər rɔ̄ɔ̄ tə́. 3Demetəriyus ndang makətūbə̄ kə́ to lápə́ya ngá̰ý adə̄ Jonata̰ ō, ənī ndūn kemeé adə̄n ō. 4Tām̄ nəkɔ́ əda kə̄ kemən tə́ na: Ādə̄ j-əndāī najə̄ lɔm naā tə́ sedə́ kété, na sōgə́ aw̄ əndān̄ najə̄ naā tə́ kə Alekjandər yā reē rɔ̄ɔńjí. 5Tɔdɔ̄ a əga kemən dɔ yá̰á̰ kə́ tōr̄ gə̄ ń jə-rāāī seneé ō, kə ngákṵ́ṵn gēé ō, kə gíŕ nápar deē yān gēé ō ní tə́. 6Ni adə̄n ta róbə kɔy de gə̄ áskaraá ō, rāā yá̰a̰ rɔ̄ɔ̄ gə̄ ō, kəda na ni na i deē yān ō gə̄gē ɓáý. De gə̄ ń əhɔn̄də́ dəngáyá kem kújə́ kə́ ngan̄g tə́ yā gān̄g sarya dɔdə́ tə́ ní, adə̄ ndūn kadə̄ adə̄nən̄ sedə́. 7Jonata̰ reē Jerusalem ba tə́da najə̄ ní ta kum ngáń Israel gə̄ tə́ malang ō, ta kum de gə̄ ń ndin̄ kem kújə́ kə́ ngan̄g tə́ ní ō. 8Dan ń nin̄ oōn̄ kadə̄ mban̄g na adə̄ Jonata̰ ta róbə kɔy de gə̄ áskaraá ní, ɓōĺ asədə́ nák. 9De gə̄ kə́ kem kújə́ kə́ ngan̄g tə́ gə̄ télən̄ kə dəngáy gə̄ ní adə̄n̄ Jonata̰ ō, ni tél kə de gə̄ ní adə̄də́ kə ngéédə́ gēé gogə́ ō. 10Jonata̰ ndi kem ɓē kə́ Jerusalem tə́. Ni rāā ɓē kə́ Jerusalem ō, rāan adə̄ tél to kijə gogə́ ō. 11Ni əda ngé kəndā ndogə̄ mbal̄ gə̄ kadə̄ əndān̄ ngé kə́ yā ra gidə tə́ rɔ̄ɔń gə̄ ō, ndogə̄ mbal̄ kə́ tɔ́sə̄ kadə gə̄ kadə̄ gīr̄ gidə mbal̄ bo kə́ Siyo̰ ō, anī rāān̄ yá̰á̰ ń ni əda ní. 12Tə̄rā gə̄ ń ndin̄ kem kújə́ kə́ ngan̄g gə̄ ń Bakides rāā tə́ ní, a̰ȳn̄ naā kɔ̄ɔ́. 13Nin̄ kógə̄ḿ kógə̄ḿ əya̰n̄ ta kəla yādə́ ba tél aw̄n̄ kə̄ ɓē yādə́ gə̄ tə́. 14I Betəsur tə́ ngóy n əya̰n̄ de kə́rēý gə̄ kə́ dan ngé mbātə́ ndū najə̄ tə́ ō, ngé mbātə́ yá̰á̰ kə́ yā rāā gə̄ tə́ ō ní. Tɔdɔ̄ Betəsur i lo ɓɔ̄ɔ̄ rɔ̄ kógə̄ḿ.
15Mban̄g Alekjandər oō najə̄ míndə Demetəriyus ń ənī adə̄ Jonata̰ ní. De gə̄ ənīnən̄ gotə rɔ̄ɔ̄ gə̄ kə yá̰á̰ kə́ to dəngam gə̄ ń ngákṵ́ṵ Jonata̰ gə̄ ō, nəkɔ́ ō rāān̄ ní. Ənīnən̄ gotə yá̰á̰ kə́ tōr̄ gə̄ ń rāādə́ ní ō. 16Ɔr kum mban̄g adə̄ əda na: J-a j-əngeī de kə́ beē gáŕ a! Majə kadə̄ jə-rāāī ādə̄ ni tél madə̄ tají ō, deē yājí ō ngɔr ń toō tə́. 17Adə̄ ni ndang makətūbə̄ əlań adə̄n, əda na:
18Mban̄g Alekjandər rāā ngōkṵ́ṵn Jonata̰ lápə́ya. 19J-oō na ḭ̄ na i de kə́ dəngam kə́ nge wurkil ō, ásə kadə̄ ḭ̄ i madə̄ tají ō. 20I tām̄ najə̄ ń nuū tə́ n əla gír ɓōólaā ní, j-əndāī kadə̄ ḭ̄ i nge tun̄ yá̰á̰ kə́ bo dɔ nápar deē yāí gə̄ tə́ ō, j-əndā rīí na i madə̄ mban̄g yā kadə̄ ī-ndigəń najə̄ gōjí tə́ ō, ī-rań dɔ madə̄ naā ń ī-rāā sejí tə́ ní ō. Lo ń nuū tə́ ni adə̄n kūbə̄ ngār kə́ kərē ning ō, jākā mbang kə́ rāā kə lɔ́rɔ́ ō.
21Jonata̰ tə́lá yá̰á̰ súū rɔ̄ gə̄ yā nge tun̄ yá̰á̰ kə́ bo rɔ̄n tə́, kə nāā kə́ nge kṵ sīrí yā ɓāl̄ kə́ nge kṵ ɓú kə kutə mehḛ́, ndɔ̄ rāā nāā kújə́ kámbə́ tə́. Ni ɔsə dɔ ɓūtə̄ áskar gə̄ kə̄ naā tə́ ō, rāā yá̰a̰ rɔ̄ɔ̄ gə̄ ngá̰ý ō.
Demetəriyus rāā kə Jipə gēé
22Dan ń Demetəriyus oō najə̄ ń nuū ní, nelə̄n aĺ ngá̰ý, adə̄ əda na: 23J-udə jə-ndi jə-rāāī i rí n Alekjandər əhɔń madə̄ naā kə Jipə gēé nojí tə́, yā kadə̄ əndāń tɔ́gən dɔdə́ tə́ ní? 24Mā m-ā m̄-ndang makətūbə̄ yā kadə̄də́ yā dəjeńdə́ kadə̄ ɔsən̄ kílə́ḿ ō, m-ā m-ādə̄də́ lo kəla kə́ bo gə̄ ō, kadə̄ karī gə̄ ō, yā kadə̄ ɔsənə̄ń kílə́ḿ. 25Ni ndang makətūbə̄ adə̄də́ ədańdə́ najə̄ ń toō: Mban̄g Demetəriyus rāā Jipə gə̄ lápə́ya. 26Ndūjí ń j-ənī j-adī naā kété ní, sḭḭ̄ ī-raī dɔ tə́ ngándáńg ō, adə̄jí rɔ̄nel̄ ngá̰ý ō. 27Ī-naaī kə̄ lo kəra tə́ dɔ ndūsí ń ə̄nī ādījí ní tə́ ō, j-a j-əndā njasí tām̄ háĺ kə́ majə ń ī-rāāī tə́ ní kə yá̰á̰ kə́ majə gə̄ ō. 28Lambóo yāsí gə̄ ń ā ə̄gāī ngándáńg ní, ā ə̄gāī tṵ aĺ ō, j-a jə-rāā majə sesí ō. 29Əla gír ɓōólaā nəkɔ́ ń toō tə́ ní, m-ɔ̄r̄sí ɓəloó kɔ̄ɔ́. Ā ə̄gāī lambóo yā katə̄ tṵ aĺ ō, yā mban̄g tṵ aĺ ō. 30Kə́ rang ɓáý tṵ ní, əla gír ɓōólaā ta kə́ kété ní, yá̰a̰ malang kə́ teē dɔ nang tə́ ń i mətá anī ā ādə̄mī kógə̄ḿ ō, núsə kan̄ kāgə̄ gə̄ ń ā ādə̄mī ō ní, m-ə́ya̰ m-ādə̄sí. Yá̰á̰ ń toō m-ā m̄-rāā i kə Juda gə̄ ō, kə de gə̄ kə́ gō nang kə́ mətá gə̄ kə́ Samari tə́ ō, kə ɓē kə́ Galile ń əlan̄ ta ɓē kə́ Juda tə́ ní ō. 31Jerusalem a tél ɓē kə́ táĺ ō, a əgā lambóo aĺ ō, de gə̄ ń ndin̄ gō nja lo yān tə́ ní, a əgān̄ aĺ ō. Deē a taā dɔ yá̰a̰ yān kə́ nge kṵ kutə aĺ ō, tīr̄ dɔ yá̰a̰ gātə̄ yān gə̄ aĺ ō. 32M-ə́yá̰ kújə́ kə́ ngan̄g kə́ Jerusalem m-ādə̄ nge tun̄ yá̰á̰ kə́ bo, kadə̄ nəkɔ́ gə̄rā de gə̄ əndādə́ ta tə́ kadə̄ ngɔ̄mə̄n̄. 33Jipə kə́ dɔ nang yā Juda tə́ ń aw̄n̄ seneé ɓəloó, ká i dɔ nang kə́ rá tə́ gə̄gē kem ɓē kṵ yāḿ tə́ ní, m-ə́ya̰n dɔɔ́ kadə̄ ni i kɔ́ɔ̄ rɔ̄n, kanjə̄ dəjen yá̰á̰ kógə̄ḿ. Ādə̄ de gə̄ malang əgān̄ lambóo alé, yā yá̰a̰ kul̄ yādə́ gə̄gē ādə̄ əgān̄ alé. 34Ndɔ̄ rāā nāā gə̄ malang ō, ndɔ̄ kə́ nge kṵ sīrí gə̄ ō, ndɔ̄ teē nāā gə̄ ō, ndɔ̄ rāā nāā gə̄ ń ndangən̄ ní ō, naā tə́ kə ndɔ̄ kə́ mətá gə̄ kə́ kété no tə́ ō gō tə́ ō, ndɔ̄ gə̄ ń nuū malang ní, i ndɔ̄ gə̄ kə́ Jipə kə́ kem ɓē yāḿ tə́ gə̄ a əgānəń tīr̄ aĺ ō, a əgānəń kə̄rā aĺ ō. 35De kógə̄ḿ kə́ a aw̄ kə tɔ́gə yā kəndā dɔdə́ tə́ ta kəgā yá̰a̰ a gətóo ō, yā kəla ɓōĺ kem de kógə̄ḿ kə́ dandə́ tə́ najə̄ yá̰á̰ kógə̄ḿ tə́ a gətóo ō. 36A ɔyn̄ Jipə gə̄ dan áskar gə̄ yā mban̄g tə́ bátə́ kadə̄ kutədə́ asə kə yā madə̄də́ gə̄ ō, i nar kə́ kógə̄ḿ beé n nin̄ a unən̄ ō ní. 37A aw̄n̄ kə ngé kə́rēý gə̄ kem kújə́ kə́ ngan̄g kə́ bo gə̄ yā mban̄g tə́. Lo kəla gə̄ kə kem ɓē kṵ tə́ kə́ deē a taā i kem deē tá a əndān tū tə́ ní, a tə́ndān̄ Jipə gə̄ dɔ tə́ ō. Ngé kəndā kumdə́ gíŕdə́ gə̄ tə́ ō ngār yādə́ gə̄ ō ní, a gə̄rān̄də́ i dɔ dáńdə́ nin̄ kɔ́ gə̄ tə́ ō, a rāān̄ yá̰a̰ i kə gō ndū najə̄ yādə́ tītə̄ ń mban̄g adə̄ń ndūn tām̄ yā ɓē kə́ Jude tə́ ní ō. 38Gō nang kə́ mətá gə̄ yā Samari ń əlan̄ ta ɓē kə́ Jude tə́ ní, a ɓoon̄ naā kə gō nang kə́ Jude yā kadə̄ a télən̄ i dɔ nang kə́ kógə̄ḿ beē. Nin̄ a əlan̄ dɔdə́ i gíŕ tɔ́gə yā ngé tun̄ yá̰á̰ kə́ bo gə̄ tə́ ngóy.
39Ɓē kə́ Pətolemayis ō, gō nja lo yān ō ní, m-ādə̄ lo kə́ táĺ kə́ Jerusalem, yā kadə̄ yá̰a̰ kənge ń a teē tū tə́ ní i tām̄ yā rāań kəla kə́ lo ndɔ̄ȳ tə́. 40Kə́ tām̄ yāḿ tə́ ɓáa, m-ā m-ādə̄ sə́lē gində̄ arjā̰a̰ dūbú kutə gidə i mí kə dɔ ɓāl̄ gə̄. M-ā m-ɔ́y i tū yá̰a̰ kənge gə̄ kə́ kem ɓē kṵ yāḿ tə́, kə gō nja lo gə̄ ń əndān̄ dɔ nar ní danaá tū tə́ ní. 41Kem ɓāl̄ gə̄ kə́ kété tə́ ní, ngé kəla gə̄ a ɓōkə́n̄ nar kə́ ta teē kə̄ ndágá gə̄ i kem lo kə́ táĺ tə́. Gō tə́ anī rāān̄ yá̰á̰ ń nuū tṵ alé. Ba əla gír ɓōólaā ní, a əgān̄ kə̄rā kə́ kété gə̄ yā rāań kəla kə́ kem kújə yā Kɔ́ɔ̄ɓē tə́. 42Tá ɓáý tṵ ní, sə́lē gində̄ arjā̰a̰ ń a ɔrə̄n̄ dūbú mí kə dɔ ɓāl̄ gə̄ tū nar kə́ kem kújə yā Kɔ́ɔ̄ɓē tə́ ní, a adə̄n̄ i ngé tun̄ yá̰a̰ gə̄ ń a rāān̄ kəla kem kújə yā Kɔ́ɔ̄ɓē tə́ ní. 43Náā nəkɔ́ ń a ɓɔ̄ɔ̄ rɔ̄n kem kújə yā Kɔ́ɔ̄ɓē kə́ Jerusalem tə́, aláa kə gō nja lo gə̄ kə́ gidə ɓē kə́ Jerusalem tə́ najə̄ lambóo yā mban̄g kə́ nay dɔn tə́, aláa tām̄ najə̄ kə́ rang tə́ ní, deē a əhɔn aĺ ō, yá̰a̰ malang ń ni ənge kem ɓē kṵ yāḿ tə́ ní, deē a taā jīn tə́ aĺ ō.
44Nar ń a rāānəń kújə yā Kɔ́ɔ̄ɓē, aláa yā rāań lo kə́ nujə gə̄ ní, a ɔyn̄ i kem mōȳ nar yā mban̄g tə́. 45Kəla tél kəndā ndogə̄ mbal̄ gogə́ rang ō, rāā lo kə́ ngan̄g gə̄ kə́ Jerusalem kadə̄ ngan̄gə̄n̄ ɓáý ō, rāā ndogə̄ mbal̄ kə́ rang gə̄ kə́ yā rɔ̄ɔń gō nang kə́ Jude tə́ ō ní, i mōȳ nar yā mban̄g kə́ kógə̄ḿ beē nəkɔ́ ń nuū n a rāā kəla gə̄ ń nuū ní.
Mban̄g Demetəriyus kə́ ta kəga dɔ oy
46Dan ń Jonata̰ nin̄ kə ngáń Israel gēé oōn̄ najə̄ ń toō anī, mbātə́n̄ taā kem ō, usədə́ dɔ tə́ aĺ ō. Tɔdɔ̄ yá̰a̰ malang kə́ majə aĺ ń Demetəriyus rāā dɔ nang kə́ Israel tə́ ō, rāā ń ni rāādə́ ndoō tə́ ō ní, dɔdə́ ndígə̄nal alé. 47Nin̄ ndigən̄ i najə̄ yā Alekjandər, tɔdɔ̄ a̰a̰n̄ kadə̄ ni ɔr̄ i najə̄ kə́ dɔ lɔm tə́ sedə́ ō, nin̄ ndin̄ i kə́ deē yān gə̄ tə́ ngándáńg ō. 48Mban̄g Alekjandər ɔsə dɔ ngé rɔ̄ɔ̄ gə̄ kə́ tɔ́gə́də́ i ngá̰ý naā tə́, ba aw̄ yā kənī Demetəriyus rɔ̄ɔ̄. 49Mban̄g kə́ jōó gə̄ dəban̄ naā tə́ anī, ngé rɔ̄ɔ̄ gə̄ yā Alekjandər a̰ȳn̄ naā kɔ̄ɔ́. Demetəriyus tetə rɔ̄n gōn tə́ ngɔ̄dən ō, tetə áskar yān gə̄ rɔ̄ɔ̄ ō. 50Ni rɔ̄ɔ̄ bátə́ mbang udə dɔn tə́. Banī Demetəriyus oy ndɔ̄ ń nuū tə́.
Alekjandər Balas taā ngōn̄ Pətoleme kə́ kṵ mehḛ́
51Alekjandər əla ngé kəla yān gə̄ rɔ̄ Pətoleme kə́ nge kṵ mehḛ́ ń i mban̄g kə́ Ejiptə tə́ ní kə najə̄ ń toō:
52Á̰a̰ā̰, m̄-tél m̄-reē gogə́ kem ɓē kṵ yāḿ tə́ ō, m̄-ndi dɔ kōr̄ kāgə̄ mbang yā kaaḿ gə̄ tə́ ō. M̄-taā ɓē kṵ jī Demetəriyus tə́ ō, m̄-tetən rɔ̄ɔ̄ ba m̄-taā ɓē yāḿ ō. 53Tām̄ j-ənīn rɔ̄ɔ̄ ō, jə-tetən rɔ̄ɔ̄ kə ngé rɔ̄ɔ̄ yān gēé ō, ba jə-taā kōr̄ kāgə̄ mbang yān. 54Ngɔlaā ní, ādə̄ jə-rāāī madə̄ naā ō, əla gír ɓōólaā ní, ādə̄m̄ ngōnīí kə́ dəyá̰ ādə̄ m̄-taān ō. M-ā m̄-tél mumií ō, m-ā m-ādī ḭ̄ ō, ngōnīí kə́ dəyá̰ ō, kadə̄ karī kə́ asə ta məlaí tə́ ō.
55Mban̄g Pətoleme tūr̄ ədan na: Ndɔ̄ ń ī-tél ī-reēń gogə́ kem ɓē yā kaaí gə̄ tə́, ī-ndiń dɔ kōr̄ kāgə̄ mbang yādə́ tə́ ní, i ndɔ̄ rɔ̄nel̄. 56Ba ngɔlaā ní, m-ā m̄-rāā yá̰á̰ ń ī-ndang ní yā kadī. Ba ī-tə́nī taḿ ī-reē kem ɓē kə́ Pətolemayis tə́, kadə̄ j-ɔr̄ najə̄ kə naá ō, m-ādī ngōnə̄ḿ kə́ dəyá̰ kadə̄ ī-taā tītə̄ ń ī-dəjemə̄ń ní ō.
57Pətoleme ḭḭ Ejiptə kə ngōnən kə́ dəyá̰ ń rīn na i Kəleyopatər ní, reē ugə̄ kem ɓē kə́ Pətolemayis tə́ kə ɓāl̄ kə́ nge kṵ ɓú kə kutə mehḛ́ kə kalən kə́ jōó. 58Mban̄g Alekjandər tə́nī ta Pətoleme. Anī Pətoleme adə̄n ngōnən kə́ dəyá̰ ń rīn na i Kəleyopatər ní ō, rāā yá̰a̰ kūjə́ taā naā kə́ bo kə́ majə ngá̰ý kə́ lo mban̄g tə́ ō, kem ɓē kə́ Pətolemayis tə́. 59Mban̄g Alekjandər ndang makətūbə̄ əlań adə̄ Jonata̰ kadə̄ reē əngen. 60Jonata̰ ɔy yá̰a̰ kal̄ lo yān ō, kósə de kə́ ngá̰ý gə̄ gōn tə́ ɓuk ɓuk ō, aw̄ əngeń mban̄g kə́ jōó gə̄ kem ɓē kə́ Pətolemayis tə́. Ni adə̄ mban̄g kə́ jōó gə̄ ō, madə̄ tan gə̄ ō, gində̄ arjā̰a̰ ō, lɔ́r ō, kadə̄ karī ō ngá̰ý, adə̄ nel̄də́ seneé. 61Lo ń nuū tə́ de kə́ Israel tə́ gə̄ kə́ ngé taā kem Nə́ɓā aĺ gə̄ ō, kə́ ngé mbātə́ ndū najə̄ gə̄ ō, əndān̄ rɔ̄də́ naā tə́ yā rɔ̄ɔ̄ Jonata̰. Nin̄ sekə́nən̄ rɔ̄ mban̄g Alekjandər tə́, banī usə mban̄g dɔ najə̄ yādə́ tə́ aĺ bátə́. 62Ni adə̄ ndūn kadə̄ ɔrə̄n̄ kūbə̄ yā Jonata̰ rɔ̄n tə́ kɔ̄ɔ́, ba əlan̄ kūbə̄ ngol ń i kūbə̄ kə́ kərē ning ní rɔ̄n tə́. Anī de gə̄ rāān̄ yá̰á̰ ní. 63Mban̄g adə̄ əndān̄ Jonata̰ kadən tə́, ba əda de kə́ bo yān gə̄ na: ī-teē āwī seneé kem ɓēé, ba ə̄nī mbēr̄ ədaī de gə̄ kadə̄ de kógə̄ḿ sekə́n̄ tām̄ yá̰á̰ kə́rēý tə́ aĺ ō, əla ɓōĺ kemən tə́ najə̄ yá̰á̰ kógə̄ḿ tə́ aĺ ō. 64Dan ń ngé tétə̄ najə̄ gə̄ a̰a̰n̄ rɔȳ ń rɔȳnən̄ sɔɔ̄ń mbēr̄ ń mban̄g ənī ō, a̰a̰n̄ kūbə̄ ngol kə́ kərē ning dɔ bɔ̄gən tə́ ō anī, a̰ȳn̄ naā kɔ̄ɔ́. 65Mban̄g rɔȳ Jonata̰, adə̄ ni ndang rīn dan madə̄ tan kə́ ta kəga dɔ gə̄ tə́ ō, əndān adə̄ ni i ngār kə bo ō, ni i nge kṵ ɓē ō. 66Jonata̰ tél reē gogə́ Jerusalem kə lɔmɔɔ́ ō, kə rɔ̄nelé ō. Jonata̰ tetə Apoloniyus rɔ̄ɔ̄.
67Kem ɓāl̄ kə́ nge kṵ ɓú kə kutə mehḛ́ kə kalən kə́ mí tə́ ní, Demetəriyus kə́ ngōn̄ Demetəriyus kə́ ta kəga dɔ ḭḭ Kəretə reē dɔ nang yā kaan gə̄ tə́. 68Dan ń mban̄g Alekjandər oō najə̄ ń nuū ní, sōl̄ ngá̰ý adə̄ tél dɔ tə́ aw̄ gogə́ A̰tiyos. 69Demetəriyus əndā Apoloniyus nge kṵ ɓē kə́ gō nang kə́ Koyelesiri tə́. Apoloniyus ɔsə dɔ ngé rɔ̄ɔ̄ kə́ ngá̰ý gə̄ naā tə́ ba reē kadə ɓē kə́ Jamniya tə́ ngɔr, əla əda Jonata̰ ń i nge tun̄ yá̰á̰ kə́ bo ní na:
70Rɔ̄kum, i ḭ̄kɔ́ kal kógə̄ḿ beē ngóy n i nge rɔ̄ɔ̄ sejí ō, i najə̄ yāí tə́ n m̄-téləń yá̰á̰ kə́ to kur̄ kəgō ō, yá̰á̰ kə́ to rɔ̄sɔl̄ ō ní. Ə̄ndā tɔ́gí dɔjí tə́ kem mbal̄ gə̄ tə́ i tām̄ rí tə́? 71Ré ī-taā kem ɓūtə̄ áskar yāí gə̄ anī, ī-risə ngɔr ń toō tə́ ī-reē rɔ̄jí tə́ kum kubə tə́, ādə̄ j-ɔjiī naā tɔ́gə́jí. Tɔdɔ̄ ɓūtə̄ áskar gə̄ kə́ kem ɓē gə̄ tə́ ní, nin̄ i seḿ māá. 72Ī-dəje ōō ké mā i náā ō, ngé gə̄ ń dḭḭ̄n̄jí ní ké i náā gə̄ ō wa. Nin̄ ədan̄ na sḭḭ̄ na ásiī ra no ngé rɔ̄ɔ̄ yājí gə̄ tə́ alé, tām̄ nja i jōó kɔ̄ɔ́ tā n rɔ̄ɔ̄ rāā kaaí gə̄, adə̄ a̰ȳn̄ naā dɔ nang yādə́ tə́ ní. 73Ḭ̄ ásə dum̄ ta ngé rɔ̄ɔ̄ kə́ kə sə́ndá gə̄ aĺ ō, ngé rɔ̄ɔ̄ kə́ ngá̰ý asə naā beē gə̄ kum kubə tə́ aĺ ō. Tām̄ lo kə́ yā ɓɔ̄ɔń rɔ̄ gətóo ō, mbal̄ gətóo tū tə́ ō, lo kə́ yā ka̰ȳń gətóo tū tə́ ō.
74Dan ń Jonata̰ oō najə̄ kɔr̄ Apoloniyus anī, ndew kə̄ rɔ̄n gə̄ tə́ malang. Ni ɔy de gə̄ dūbú kutə kógə̄ḿ ba ḭḭ Jerusalem aw̄. Ngōkṵ́ṵn Simo̰ aw̄ əngen yā kɔsə kílən. 75Ni əndā géŕ ger sɔɔ̄ ta ɓē kə́ Jope. Anī de kə́ kem ɓēé gə̄ utə̄n̄ ta róbə gə̄ kɔ̄ɔ́. Tɔdɔ̄ ɓūtə̄ áskar gə̄ yā Apoloniyus i kem ɓē kə́ Jope tə́. Nin̄ əlan̄ gír rɔ̄ɔ̄. 76Ɓōĺ rāā de kə́ kem ɓēé gə̄, adə̄ teēn̄ ta róbə gə̄ ō, Jonata̰ taā ɓē kə́ Jope ō. 77Dan ń Apoloniyus oō najə̄ ń nuū ní, ni əsō róbó kə ngé rɔ̄ɔ̄ kə sə́ndá gə̄ dūbú mətá ō, kə ngé rɔ̄ɔ̄ kə́ ngá̰ý gə̄ ō. Ni aw̄ kumən kə̄ Ajotos tītə̄ kə́ a ənda i dan ɓē yā gān̄g beé, tá ni a aw̄ i kə̄ kum kubə tə́ kum mbang nəkɔ́ ń nuū tə́. Ni əndā tɔ́gən dɔ ngé rɔ̄ɔ̄ kə sə́ndá yān gə̄ ń kutədə́ i ngá̰ý ní tə́. 78Jonata̰ ngɔ̄də̄ gōn kum kə̄ Ajotos, anī ngé rɔ̄ɔ̄ kə́ gír jōó gə̄ dəban̄ naā tə́. 79Apoloniyus ɓɔ̄ɔ̄ ngé rɔ̄ɔ̄ kə sə́ndá gə̄ dūbú kógə̄ḿ gogə́ gōdə́ tə́. 80Jonata̰ oō najə̄ yā ɓūtə̄ áskar gə̄ ń ɓɔ̄ɔ̄də́ gogə́ ní. Ngé rɔ̄ɔ̄ kə sə́ndá gə̄ gīrə̄n̄ ngé rɔ̄ɔ̄ yān gə̄ ō, túrə̄n̄də́ kə gərā gēé dəloí bátə́ lo tíbə dɔdə́ tə́ ō. 81Ngé rɔ̄ɔ̄ yā Jonata̰ gə̄ ngəran̄ lo rɔ̄ɔ̄ tə́ kə gō ń Jonata̰ tāańdə́ ní, anī kɔr rāā sə́nda yā madə̄ ba̰ā̰ gə̄. 82I kum mbang ń nuū tə́ n Simo̰ aw̄ kə ɓūtə̄ áskar yān gēé ənīń ngé rɔ̄ɔ̄ kə njadə́ gə̄ rɔ̄ɔ̄ ní. I kum mbang ń kɔr asə ngé rɔ̄ɔ̄ kə sə́ndá gə̄ nák ní n Simo̰ tetəńdə́ rɔ̄ɔ̄ adə̄ a̰ȳn̄ naā ní. 83Ngé rɔ̄ɔ̄ kə sə́ndá gə̄ tḭ̄ḭ̄n̄ naā kə̄ lo gə̄ tə́ kum kubə tə́. Ngé ka̰ȳ naā gə̄ reē ugə̄n̄ Ajotos, anī udən̄ kem kújə yā Dago̰ ń i ɓesə̄ yādə́ ní tə́ yā kajəń rɔ̄də́. 84Jonata̰ əla hor dɔ ɓē kə́ Ajotos tə́ ō, dɔ ngán ɓē gə̄ ń ndin̄ kə gō gidə ɓē kə́ Ajotos ní tə́ ō. Ni ɔy yá̰a̰ kənge gə̄ kə́ kem ɓē gə̄ ní tə́ ō, əla hor dɔ kújə ɓesə̄ Dago̰ tə́ ō, dɔ de gə̄ ń ɓɔ̄ɔ̄n̄ rɔ̄də́ kemeé tə́ ní ō. 85De gə̄ ń oyn̄ yo kaskar aláa yo hor ní, nin̄ malang i deē dūbú sɔ́sɔ́. 86Jonata̰ ḭḭ lo ń nuū tə́ aw̄ ndi kadə ɓē kə́ Askalo̰ tə́ kə nja rɔ̄ɔ́. Ba de kə́ kemeé gə̄ teēn̄ ngá̰ý ɓuk ɓuk ɔjən̄ non. 87Anī Jonata̰ nin̄ kə de gə̄ yān gēé tél reēn̄ gogə́ Jerusalem kə yá̰a̰ kənge kə́ ngá̰ý kə́ kɔy ta rɔ̄ɔ̄ tə́. 88Dan ń mban̄g Alekjandər oō najə̄ yá̰a̰ gə̄ ń nuū malang anī, ni rɔȳ Jonata̰ tṵ ɓáý. 89Ni əla kə nə̄ngá kəhɔ ta kūbə̄ kə̄ naā tə́ kə́ rāā kə lɔ́rɔ́ adə̄n. I yá̰á̰ kə́ a adə̄n̄ i ngé gə̄ ń i ngée mban̄g gə̄ ní, tɔdɔ̄ i jī bēl̄ lo rāan yādə́. Ni adə̄n ɓē kə́ Akaro̰ ō, gō nang yān malang ō kə́ yān tə́.
Markert nå:
1 MAKABE GƏ̄ 10: SARDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bibəl ta Sar̄ © L'Alliance Biblique du Tchad, 2006, 2010.