1 MAKABE GƏ̄ 15
15
Mban̄g A̰tiyokus kə́ nge kṵ sīrí ndang makətūbə̄ adə̄ Simo̰
1A̰tiyokus kə́ nge kṵ sīrí, kə́ ngōn̄ mban̄g Demetəriyus kə́ ta kəga dɔ, ndi dor̄ gə̄ tə́ ba əla kə makətūbūú adə̄ Simo̰ nge tun̄ yá̰á̰ kə́ bo ō, ngār yā Jipə gə̄ ō, adə̄ ngáń Israel gə̄ malang ō. 2Najə̄ ń ndang ní n toó:
Mban̄g A̰tiyokus rāā Simo̰ nge tun̄ yá̰á̰ kə́ bo ō, ngār yā Jipə gə̄ ō lápə́ya. Ni rāā ngáń Israel gə̄ malang lápə́ya ō. 3De kə́ ngé nujə lo gə̄ taān̄ ɓē kṵ yā kaaḿ gə̄. I tām̄ najə̄ ń nuū tə́ n m̄-sāā taā ɓē kṵ jīdə́ tə́ kɔ̄ɔ́ yā kadə̄ tél to tītə̄ kə́ kété ní. M-ɔ́sə dɔ ɓūtə̄ ngé rɔ̄ɔ̄ gə̄ ngá̰ý kə̄ naā tə́ ō, m̄-tə́ndā yá̰a̰ rɔ̄ɔ̄ gə̄ kem too bo gə̄ kə́ yā rɔ̄ɔń tə́ ō, 4yā kadə̄ m̄-teē kem toó kə̄ kem ɓēé anī, m̄-rɔ̄ɔ̄ ngé gə̄ ń nujən̄ ɓē ō, tetən̄ ɓē gə̄ ngá̰ý kə́ kem ɓē kṵ yāḿ tə́ rɔ̄ɔ̄ ní ō. 5Ta róbə́ kə́ ɔjə dɔ lambóo gə̄ ń mban̄g kə́ kété noḿ tə́ gə̄ adīn̄ ní, ngɔlaā m-ā m̄-ra dɔ tə́. Yá̰á̰ kə́ rang ń nin̄ adīn̄ rāānəń kem majə seí ní, m̄-ra dɔ tə́ ō. 6M-ādī ta róbə kadə̄ ḭ̄kɔ́ ī-rāā sə́lē yāí kə́ kadə̄ de gə̄ əsan̄ kem ɓē yāí tə́. 7Ɓē kə́ Jerusalem ō, lo kə́ táĺ ō ní, nin̄ i kɔ́ɔ̄ rɔ̄də́ gə̄. Yá̰a̰ rɔ̄ɔ̄ gə̄ malang ń āwń ō, ɓē kə́ ngan̄g gə̄ ń ī-rāā ba ī-ndi kemeé ní ō, i yāí gə̄. 8Əla gír ngɔr ń toō tə́ bátə́ kə̄ no tə́ ní, yá̰a̰ malang ń sɔɔ̄ kadə̄ ādə̄ lo ngɔ̄m̄ nar yā mban̄g tə́ ō, ndɔ̄ń tə́ anī sɔɔ̄ kadə̄ ādə̄ ɓáý tṵ ō ní, ā ādə̄ tṵ alé. 9Lo ń ré m̄-tél m̄-taā ɓē kṵ yāḿ gogə́ anī, m-ā m̄-rɔyī ḭ̄ ō, gíŕ nápar deē yāí gə̄ ō, kújə yā Kɔ́ɔ̄ɓē kə́ Jerusalem ō. Lo ń nuū tə́ de kə́ dɔ nang tə́ gə̄ malang a a̰a̰n̄ kɔsə go̰n yāsí.
A̰tiyokus kə́ nge kṵ sīrí ənī Təripo̰ rɔ̄ɔ̄ kem ɓē kə́ Dora tə́
10Kem ɓāl̄ kə́ nge kṵ ɓú kə kutə sīrí kə kalən kə́ sɔ́ tə́ ní, A̰tiyokus reē ugə̄ kem ɓē yā kaan gə̄ tə́. Ɓūtə̄ áskar gə̄ malang tetən̄ rɔ̄də́ gōn tə́, ba ngé gə̄ ń nayn̄ kə Təripo̰ ní i sḛ́ý beē. 11A̰tiyokus ngɔ̄də̄ Təripo̰ anī, Təripo̰ a̰ȳ aw̄ Dora kadə bā bo tə́. 12Tɔdɔ̄ a̰ā̰ kadə̄ yá̰á̰ kə́ to kum kaȳ aĺ gə̄ a reēn̄ i kə̄ dɔ naā tə́ ō, ɓūtə̄ áskar yān gə̄ əya̰nən̄ kɔ̄ɔ́ ō. 13A̰tiyokus reē əndā géŕ ger yān ta ɓē kə́ Dora tə́ kə ngé rɔ̄ɔ̄ kə njadə́ gə̄ dūbú ɓú kə kutə jōó ō, ngé rɔ̄ɔ̄ kə sə́ndá gə̄ dūbú sɔ́sɔ́ ō. 14Ni gīr̄ gidə ɓē əla ta naā tə́ ō, too bo gə̄ ɔsən̄ dɔdə́ naā tə́ malang ta bā bo tə́ ō. A̰tiyokus utə̄ ɓē dām̄ kə́ ndágá tə́ ō, maná tə́ ō. Adə̄ deē a udə kem ɓēé aĺ ō, teē aĺ ō.
Jipə gə̄ tél əhɔn̄ madə̄ naā gogə́ rang kə Rom gə̄
15Numeniyus nin̄ kə madə̄n gēé ḭḭn̄ Rom reēn̄. Nin̄ ətōn̄ makətūbə̄ gə̄ kə́ ndang adə̄n̄ mban̄g ō, adə̄n̄ ɓē gə̄ ō. Najə̄ gə̄ ń ndangən̄ kemeé ní n toó: 16Lusiyus, nge kṵ ɓē yā Rom gə̄, rāā mban̄g Pətoleme lápə́ya. 17Ngámbang kəla yā Jipə gə̄ ń Simo̰ nge tun̄ yá̰á̰ kə́ bo ō, kósə́ Jipə gə̄ ō əlan̄də́ ní, reē ugə̄n̄ lojí. Nin̄ reēn̄ i kə́ madə̄ tají gə̄ tə́ ō, kə́ deē yājí gə̄ tə́ ō, kadə̄ jə-téĺ kə́ra madə̄ naā gə̄ ō, madə̄ naā kə́ mbóńg gə̄ tə́ ō tītə̄ kə́ kété. 18Nin̄ reēn̄ i kə der lɔ́ŕ kə́ gātən asə naā kə gātə̄ gində̄ arjā̰a̰ kə́ kɔȳn i kəlōo ɓú mí. 19I tām̄ najə̄ ń toō tə́ n j-oō naā kadə̄ j-əla kə makətūbūú j-adə̄ mban̄g gə̄ ō, ɓē gə̄ kə́ gíŕdə́ i ngá̰ý ō ní. Jə-dəjedə́ kadə̄ sāān̄ ta Jipə gə̄ aĺ ō, rɔ̄ɔ̄n̄də́ aĺ ō, ənīn̄ ɓē yādə́ rɔ̄ɔ̄ aĺ ō, dɔ nang yādə́ rɔ̄ɔ̄ aĺ ō, kadə̄ ɓoon̄ rɔ̄də́ tū yā ngé rɔ̄ɔ̄də́ gə̄ tə́ aĺ ō. 20J-a̰ā̰ ní majə kadə̄ jə-taā der ń adə̄n̄jí ní ō. 21Adə̄ ré ngé nujə lo gə̄ teēn̄ ɓē yādə́ tə́ a̰ȳ aw̄ ɓɔ̄ɔ̄n̄ rɔ̄də́ ɓēé losí anī, ə́hɔīdə́ ādī Simo̰ nge tun̄ yá̰á̰ kə́ bo, ādə̄ rāādə́ yá̰á̰ kə́ tōr̄ tām̄ majə aĺ yādə́ tə́ kə gō ndū najə̄ yādə́.
22Makətūbə̄ kə́ kógə̄ḿ beē nəkɔ́ ń toō adə̄n̄ mban̄g Demetəriyus ō, Atal ō, Ariyaratə ō, Arsas ō. 23Adə̄n̄ ɓē gə̄ malang adə̄ i ɓē kə́ Samsame ō, de gə̄ kə́ Əspartə ō, ɓē kə́ Delos ō, kə́ Mindos ō, Sisiyon ō, Kari ō, Samos ō, Pampili ō, Lisi ō, Halikarnas ō, Rodə ō, Paselis ō, Kos ō, Side ō, Arados ō, Gortin ō, Kənidə ō, Sipər ō, Siren ō. 24Ndangən̄ kēē makətūbə̄ ní tām̄ yā Simo̰ nge tun̄ yá̰á̰ kə́ bo tə́ ō.
A̰tiyokus kə́ nge kṵ sīrí tūr̄ ndūn ń ənī adə̄ Simo̰ ní kɔ̄ɔ́
25Mban̄g A̰tiyokus aw̄ əhɔ lo ndi kadə̄ ɓē kə́ Dora tə́, adə̄ i ngōn̄ ɓē kógə̄ḿ kə́ ndágá tə́. Ba əla áskar gə̄ kə̄ nja naā tə́ adə̄ aw̄ rɔ̄ɔ̄n̄ ɓē kə́ Dora ō, rāān̄ yá̰a̰ rɔ̄ɔ̄ gə̄ ō. Ni gīr̄ Təripo̰, adə̄ de kə́ asə kudə kem ɓēé aké teē gətóo. 26Simo̰ əla kə de kə́ jī katə gēé dūbú jōó adə̄n, yā kadə̄ əndān̄ rɔ̄də́ naā tə́ rɔ̄ɔ̄nəń. Əla kə gində̄ arjā̰a̰ ō, lɔ́r ō, yá̰a̰ rɔ̄ɔ̄ gēé ngá̰ý ō adə̄n. 27Banī A̰tiyokus mbātə́ yá̰a̰ gə̄ ń Simo̰ rāań seneé ní ō, lōō gír ndūn ń ənī adə̄n tə́ ní ō, tūr̄ háĺ ń a rāā seneé ní kɔ̄ɔ́ ō. 28Ni əla Atenobiyus ń i de kógə̄ḿ kə́ dan madə̄ mban̄g gə̄ tə́ ní, kadə̄ aw̄ əda Simo̰ najə̄ ń toō: Sḭḭ̄ ī-taāī ɓē gə̄ kə́ kem ɓē kṵ yāḿ tə́ ń i Jope ō, Gajara ō, kújə́ kə́ ngan̄g kə́ Jerusalem ō ní. 29Sḭḭ̄ ī-rāāī gō nang yā ɓē gə̄ ní adə̄ tél dəla lo ō, ī-rāāī ɓē yá̰á̰ kə́ majə aĺ ngá̰ý ō, ngán lo gə̄ kə́ kem ɓē kṵ yāḿ tə́ ní, sḭḭ̄ ī-taāī ngá̰ý ō. 30Adə̄ ɓē gə̄ ń ī-taāī ní, ngɔlaā ī-tél ādə̄mī gogə́ ō, lo gə̄ ń ī-mānī dɔ nin̄ dɔ nang kə́ Jude ba ī-reē ī-taāī ní, ādə̄mī lambóó kə́ dɔ tə́ ō. 31Ré i beé aĺ anī ādī gində̄ arjā̰a̰ kə́ kɔȳn i kəlōo dūbú kutə gidə i mətá tām̄ yā ɓē gə̄ ní tə́ ō, ādī nar kə́ asə kə nge ń nuū tām̄ yá̰a̰ gə̄ ń ī-nujiīń tə́ ní ō, tām̄ yā lambóo gə̄ ń ɓē gə̄ ní a adə̄n̄ tə́ ní ō. Ré sḭḭ̄ ə̄gāī nar ń nuū aĺ anī, j-a j-ənīsí rɔ̄ɔ̄.
32Dan ń Atenobiyus madə̄ mban̄g reē ugə̄ Jerusalem anī, yá̰a̰ kənge kə́ ngá̰ý ń Simo̰ ndi danaá, adə̄ i jóó lɔ́r gə̄ kə gində̄ arjā̰a̰ gə̄ kə́ dɔ tábəl gə̄ tə́ ō, kāgə̄ ndi gə̄ ō ní ɔr̄ kumən, ba əda Simo̰ najə̄ yā mban̄g. 33Anī Simo̰ tūr̄ ədan na: I yá̰a̰ ndəbā yā kaají gə̄ kə́ madə̄ ba̰ā̰jí gə̄ taān̄ kə gō róbə́ kə́ gōtə́ alé kum mbang kógə̄ḿ tə́ n jə-tél jə-taā gogə́ ní, ba i dɔ nang kə́ rang, aláa i yá̰a̰ yā de kə́ rang alé. 34I ta róbə́ kə́ majə n j-ənge á jə-tél jə-taāń yá̰a̰ ndəbā yā kaají gə̄ ní ngóy. 35Ba yā ɓē kə́ Jope ō, kə́ Gajara ō ń ī-dəje yā taā ní, i ɓē gə̄ kə́ rāān̄ gír deē yājí gə̄ ō, ɓē yājí ō majə aĺ ngá̰ý. Tām̄ yā ɓē gə̄ ń nuū tə́ ɓáa j-a j-adə̄ gində̄ arjā̰a̰ kə́ kɔȳn i kəlōo dūbú jōó kə ɓú sīrí.
Atenobiyus əda yá̰á̰ kógə̄ḿ alé. 36Ni tél kə wūngūú ta kaw̄ kə̄ ɓē mbangá. Ba aw̄ ədan gotə najə̄ gə̄ ń Simo̰ tūr̄ əda ní ō, ɔjə gotə yá̰a̰ kənge gə̄ malang ń a̰ā̰ ɓē Simo̰ ní ō. Anī wūn̄g rāā mban̄g ngá̰ý.
Ngol áskar gə̄ kə́ bo ń rīn na i Kendebe ní, ənī ɓē kə́ Jude rɔ̄ɔ̄
37Təripo̰ un too ba a̰ȳ aw̄ Ortosiya. 38Mban̄g A̰tiyokus əndā Kendebe ngol áskar gə̄ kə́ bo gō nang kə́ kadə bā bo tə́. Adə̄n ɓūtə̄ áskar gə̄ kə́ ngé rɔ̄ɔ̄ kə njadə́ gə̄ ō, kə sə́ndá gə̄ ō. 39Ni ədan kadə̄ əndā géŕ ger yān dɔ nin̄ ɓē kə́ Jude tə́ ō, i gáŕ kadə̄ tél rāā ɓē kə́ Kedəro̰ gogə́ rang ō, kadə̄ ni rāā bápə́ kə́ ta tə́ gə̄ kadə̄ ngan̄g ō, yā kadə̄ ni ndi lo ń nuū tə́ ba teē aw̄ ənīń Jipə gə̄ rɔ̄ɔ̄. Ba mban̄g aw̄ ngɔ̄də̄ Təripo̰ tə́. 40Adə̄ Kendebe aw̄ Jamniya ō, əla gír sāā ta Jipə gə̄ kə̄ lo gə̄ tə́ ō. Ni aw̄ dɔ nang kə́ Jude tə́ əhɔ de gə̄ dəngáy ō. 41Ni tél rāā ɓē kə́ Kedəro̰ gogə́ rang ba tə́ndā ngé rɔ̄ɔ̄ kə sə́ndá gə̄ ō, ngé rɔ̄ɔ̄ kə njadə́ gə̄ ō kem ɓē ní tə́. Sɔɔ̄ kadə̄ ngé rɔ̄ɔ̄ gə̄ ní teē aw̄n̄ dɔ róbə gə̄ kə́ Jude tə́, ənīn̄ de gə̄ rɔ̄ɔ̄ tītə̄ ń mban̄g ədań ní.
Markert nå:
1 MAKABE GƏ̄ 15: SARDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bibəl ta Sar̄ © L'Alliance Biblique du Tchad, 2006, 2010.