1 MAKABE GƏ̄ 16
16
Ngán Simo̰ gə̄ tə̄ɓān̄ Kendebe
1Ja̰a̰ ḭḭ Gajara aw̄ ənī bɔbə̄n Simo̰ gotə yá̰a̰ gə̄ ń Kendebe rāā ní. 2Simo̰ ɓāŕ ngánən kə́ dəngam kə́ tɔgə gə̄ jōó, ba ədadə́ na: Ngákṵ́ṵ́ḿ kə́ dəngam gə̄ ō, mā ō, de gə̄ kə́ kem kújə yā bɔbə́ḿ tə́ gə̄ ō ní, j-əla gír rɔ̄ɔ̄ madə̄ ba̰ā̰ Israel gə̄ i jóo kə balsáájí bátə́ ɓōólaā ō, j-ajə Israel gə̄ nja i ngá̰ý ō. 3Ngɔlaā ní m̄-tɔgə kɔ̄ɔ́, ba kə ta kūl̄ kem majə yā Nə́ɓāá ní, sḭḭ̄ ī-tɔgiī deē ō, tɔ́gə́sí to ō. Adə̄ úniī gotəḿ ō, gotə ngōkṵ́ṵ́ḿ ō, ba āw̄ ī-rɔ̄ɔ̄ī tām̄ yā gír deē yājí gə̄ tə́ ō, ādə̄ Nə́ɓā dḭḭ̄sí ō. 4Ja̰a̰ gə̄rā ngé rɔ̄ɔ̄ gə̄ dūbú kutə jōó kem ɓēé ō, ngé rɔ̄ɔ̄ kə sə́ndá gə̄ ō, ba aw̄n̄ yā kənī Kendebe rɔ̄ɔ̄. Nin̄ aw̄ ɓīīn̄ Modin, 5ba ḭḭn̄ kə gír loí ɓatə njə̄rā aw̄n̄ kum kubə tə́. Anī ngé rɔ̄ɔ̄ kə njadə́ gə̄ ō, kə sə́ndá gə̄ ō kə́ kutədə́ i ngá̰ý njə̄rā a tə́nīn̄ tadə́. Man̄ dɔ mbal̄ kógə̄ḿ to dɔ dáńdə́ tə́ gān̄gdə́ naā tə́. 6Ja̰a̰ nin̄ kə deē yān gə̄ ran̄ no madə̄ ba̰ā̰ gə̄ tə́ kə njarɔ̄ɔ́. Dan ń a̰ā̰ kadə̄ de gə̄ yān gə̄ ɓōlə́n̄ teē man̄ anī, nəkɔ́ teē man̄ kété nodə́ tə́. Dan ń de gə̄ a̰a̰n̄ tītə̄ ń nuū anī, teēn̄ man̄ gōn tə́ ō. 7Ni gán̄g ɓūtə̄ áskar yān gə̄, əndā ngé rɔ̄ɔ̄ kə sə́ndá gə̄ dan ngé rɔ̄ɔ̄ kə njadə́ gēé tə́. Tɔdɔ̄ ngé rɔ̄ɔ̄ kə sə́ndá gə̄ yā madə̄ ba̰ā̰ gə̄ ní kutədə́ i ngá̰ý. 8Ni adə̄ kɔ̄rə́n̄ bərúnjə rɔ̄ɔ̄ ō, tetən̄ Kendebe rɔ̄ɔ̄ kə de gə̄ yān gēé ō: ngá̰ý gə̄ tə́sōn̄, nin̄ əngen̄ do kə́ asə yodə́ ō, gotə gə̄ a̰ȳn̄ naā kumdə́ kə̄ ɓē kə́ ngan̄g tə́ ō. 9Judas ənge do ta rɔ̄ɔ̄ tə́, banī ngōkṵ́ṵn Ja̰a̰ ngɔ̄də̄ ngé ka̰ȳ naā gə̄ bátə́ ugə̄ sedə́ Kedəro̰ ń Kendebe tél rāā gogə́ rang ní tə́. 10Ngé ka̰ȳ naā gə̄ aw̄n̄ bátə́ ugə̄n̄ kújə́ kə́ ngāl̄ ɓururu gə̄ kə́ bembeé kə́ Ajotos tə́. Ja̰a̰ əla hor dɔdə́ tə́ ō, de gə̄ yā madə̄ ba̰ā̰ gə̄ dūbú jōó oyn̄ ō. Ja̰a̰ tél kə lápə́yaá ta kaw̄ kə̄ gogə́ dɔ nang kə́ Jude tə́.
Tɔ̄lə̄n̄ Simo̰ ō, Ja̰a̰ un gotən ō
11Əndān̄ Pətoleme kə́ ngōn̄ Abubas nge kṵ ɓē kə́ kum kubə kə́ Jeriko tə́. Gində̄ arjā̰a̰ yān i ngá̰ý ō, lɔ́r yān i ngá̰ý ō. 12Tɔdɔ̄ ni i mum nge tun̄ yá̰á̰ kə́ bo. 13Kɔjə rɔ̄ udə kemən tə́ adə̄ ni sāā téĺ kɔ́ɔ̄ dɔ nang. Lo ń nuū tə́ ni núm̄ tɔ̄l̄ Simo̰ ō, ngánən gə̄ ō, kə ngamaá. 14Tá dan ngeé ń nuū tə́ ní, kem Simo̰ i dɔ kəla yā ɓē tə́, adə̄ a njə̄rā i kə gō ɓē gə̄. Ni aw̄ Jeriko kə ngánən gə̄ ń i Matatiyas ō, Judas ō ní, kem ɓāl̄ kə́ nge kṵ ɓú kə kutə sīrí tə́, kə nāā kə́ nge kutə gidə i kógə̄ḿ ń i nāā Sebatə ní tə́. 15Ngōn̄ Abubas əhɔdə́ kə̄ rɔ̄n tə́ kə ngamaá, kem ngōn̄ kújə́ kógə̄ḿ kə́ ngan̄g kə́ rīn na i Dok tə́. I ni n mēr̄ rāā kújə́ ní. Adə̄ rāān̄ yá̰a̰ kəsa kə́ ngá̰ý tām̄ yādə́ tə́, banī ɓɔ̄ɔ̄ de gə̄ lo kógə̄ḿ kə́ ngan̄g tə́ kɔ̄ɔ́. 16Dan ń kasə rāā Simo̰ nin̄ kə ngánən gēé kɔ̄ɔ́ anī, Pətoleme nin̄ kə de gə̄ yān gēé ḭḭn̄ dɔɔ́, ɔyn̄ yá̰a̰ rɔ̄ɔ̄ yādə́ gə̄ ba əlan̄ ruu dɔ Simo̰ tə́ kem kújə kəsa yá̰á̰ tə́. Nin̄ tɔ̄l̄nən̄ kə ngánən kə́ dəngam kə́ jōó gə̄ ō, ngé kəla yān kə́rēý gə̄ ō. 17I beé n ni rāań yá̰á̰ kə́ majə aĺ ngá̰ý ō, téləń kə majə aĺ kum gotə majə kə́ rāān̄ seneé ō ní.
18Pətoleme ndang makətūbə̄ əlań adə̄ mban̄g ɔjənəń gotə yá̰a̰ gə̄ ń ni rāā ní. Ni dəjen kadə̄ əla kə áskar gēé adə̄n kadə̄ dḭḭ̄nən̄ kadə̄ n-taāń ɓē gə̄ ō, dɔ nang ō, kə n-adə̄n. 19Ni əla ngámbang kəla kə́ rang gə̄ kadə̄ aw̄n̄ láẃ Gajara yā tɔ̄l̄ Ja̰a̰ ō, ndang makətūbə̄ əlań gō ngol áskar gə̄ tə́ kadə̄ reēn̄ rɔ̄n tə́ kadə̄ n nə̄ɓōdə́ gində̄ arjā̰a̰ ō, lɔ́r ō, kadə̄ karī gə̄ ō. 20Ni əla de kə́ rang gə̄ ɓáý tṵ kadə̄ aw̄ taān̄ ɓē kə́ Jerusalem ō, mbal̄ ń lo kə́ táĺ i dɔ tə́ ní ō. 21Banī de kógə̄ḿ aw̄ kété nodə́ tə́ Gajara əda Ja̰a̰ najə̄ yo bɔbə̄n ō, ngákṵ́ṵn gə̄ ō. Ədan ɓáý tṵ na əla de kógə̄ḿ kadə̄ reē kə tɔ̄lən ō. 22Dan ń Ja̰a̰ oō najə̄ ń nuū ní, kemən nujə sák sák kɔ̄ɔ́. De gə̄ ń reēn̄ tɔ̄lən tə́ ní əhɔdə́ tɔ̄l̄də́, tɔdɔ̄ ni oō kadə̄ na a sāān̄ i tɔ̄lən.
23Gotə yá̰á̰ kə́ rang gə̄ ń Ja̰a̰ rāā ní ō, rɔ̄ɔ̄ yān gə̄ ō, yá̰á̰ kə́ bo gə̄ ń rāā ní ō, ndogə̄ mbal̄ gə̄ ń əndā ní ō, gotə kəla kə́ rang gə̄ ń rāā ō ní, 24ndangən̄ kem makətūbə̄ kógə̄ḿ tə́. Makətūbə̄ ní i makətūbə̄ yá̰a̰ gə̄ ń rāān̄ yá̰a̰ dan ń ni ndiń nge tun̄ yá̰á̰ kə́ bo gotə bəran tə́ ní.
Markert nå:
1 MAKABE GƏ̄ 16: SARDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bibəl ta Sar̄ © L'Alliance Biblique du Tchad, 2006, 2010.