1 MAKABE GƏ̄ 14
14
Mban̄g kə́ Medi əhɔ Demetəriyus kə́ nge kṵ jōó dəngáy
1Kem ɓāl̄ kə́ nge kṵ ɓú kə kutə sīrí kə kalən kə́ jōó tə́ ní, mban̄g Demetəriyus kə́ nge kṵ jōó ɔy ngé rɔ̄ɔ̄ yān gə̄ ba aw̄ kumən kə̄ dɔ nang kə́ Medi tə́, sāā ngé dḭḭ̄n gə̄ tə́ yā kadə̄ asəń rɔ̄ɔ̄ Təripo̰. 2Dan ń Arsas mban̄g kə́ Persə ō, kə́ Medi ō, oō kadə̄ Demetəriyus na udə kem ɓē yān tə́ anī, əla ngol ngé rɔ̄ɔ̄ yān gə̄ kógə̄ḿ, kadə̄ aw̄ əhɔ mban̄g Demetəriyus kə kumneé. 3Ngol áskar gə̄ ní aw̄ tetə ngé rɔ̄ɔ̄ yā Demetəriyus rɔ̄ɔ̄. Ni əhɔ mban̄g reē seneé adə̄n kə Arsas adə̄ əlan dəngáyá.
Ɓōkə́n̄ Simo̰ tɔ̄ȳ
4Kem ɓāl̄ gə̄ malang ń Simo̰ ndiń dɔ ɓē tə́ ní, lo to lɔm kem ɓēé ō,
ni sāā i ndi majə yā ɓē ō.
Kṵ ɓē yān ō, kɔsə go̰n yān ō,
nel̄ deē yān gə̄ ngándáńg.
5Dan ń ni taā ɓē kə́ Jope ní,
de gə̄ ɔsən̄ go̰nən tɔ̄ȳ kə́ kété ɓáý.
Ɓē kə́ Jope ń ndi i dɔ gɔ́sə man̄ tə́ ní tél i kum kā̰ yān ō,
i ta róbə́ kə́ yā kaw̄ń kə̄ dɔ dor̄ gə̄ tə́ ō.
6Ni teē kem ɓē yān kə̄ gogə́ ō,
ndi ngan̄g dɔ ɓē tə́ ō,
7ɔsə dɔ ɓəlo gə̄ ngá̰ý naā tə́ ō.
Ni taā ɓē kə́ Gajara ō, Betəsur ō, kújə́ kə́ ngan̄g kə́ Jerusalem ō,
ɔr̄ yá̰a̰ malang kə́ yḛr kə́ kemeé kɔ̄ɔ́ ō,
de kə́ asə dum̄ tan gətóo ō.
8De gə̄ ndɔrə̄n̄ ndɔr̄ yādə́ gə̄ kə lɔmɔɔ́ ō,
dɔ nang teē kōō ō,
kāgə̄ gə̄ kə́ kum kubə gə̄ tə́ a̰nə̄n̄ ō.
9Kum kɔɔ̄ gə̄ ń ndin̄ ndágə lo gə̄ tə́ ní,
a ɔrə̄n̄ i najə̄ kə́ dɔ ndi majə tə́ ngóy ō,
balsáa gə̄ a ṵṵ̄n̄ i kūbə̄ tetə rɔ̄ɔ̄ ō.
10Simo̰ kán̄ yá̰a̰ kəsa kə̄ kem ɓē gə̄ tə́ ō,
adə̄ ɓē gə̄ yá̰a̰ rɔ̄ɔ̄ kə́ ngan̄g gə̄ ō.
I beé n rīn kə́ to kɔsə go̰n ɓārəń bátə́ ta ngóy dɔ nang tə́ ní.
11Ni rāā adə̄ lɔm tél to gogə́ kem ɓēé ō,
rɔ̄ ngáń Israel gə̄ nel̄də́ ngá̰ý ō.
12Náā nəkɔ́ ɓáa ndi i gír kāgə̄ nduú yān tə́, aláa gír kāgə̄ kótə̄ yān tə́ ō,
de kə́ yā reē kəla ɓōĺ kemən tə́ gətóo ō.
13Madə̄ ba̰ā̰də́ kə́ nge kənīdə́ rɔ̄ɔ̄ gətóo kɔ̄ɔ́ dɔ nang yādə́ tə́ ō,
kem ndɔ̄ gə̄ ngeé ń nuū tə́ ní, tetən̄ mban̄g gə̄ rɔ̄ɔ̄ kɔ̄ɔ́ ō.
14Ngé ndoō gə̄ malang kə́ dan gír de gə̄ yā Simo̰ tə́ ní, Simo̰ adə̄də́ yá̰a̰.
Ni rāā yá̰á̰ ń ndū najə̄ əda ní ō, ngé rāā yá̰a̰ gō yā Nə́ɓā tə́ aĺ gə̄ ō, ngé kem ndul gə̄ ō ní, tə̄ɓādə́ kɔ̄ɔ́ ō.
15Ni rāā adə̄ kɔsə go̰n yā lo kə́ táĺ i ngá̰ý ō,
tə́ndā ngáń gájə́ yá̰a̰ rāā kəla gə̄ ngá̰ý lo kə́ táĺ tə́ ō.
Əspartə gə̄ əlan̄ kə makətūbūú adə̄n Simo̰
16De gə̄ oōn̄ kem ɓē kə́ Rom tə́ ō, bátə́ ta kə́ Əspartə ō na Jonata̰ na oy adə̄ tōr̄də́ ngá̰ý. 17Ba dan ń gerə̄n̄ kadə̄ ngōkṵ́ṵn Simo̰ i nge tun̄ yá̰á̰ kə́ bo gotən tə́ ō, i kɔ́ɔ̄ lo kə́ bembeé ō kə́ ɓēé ō anī, 18ndangən̄ najə̄ dɔ ngán bar gində̄ nə̄ngá kasə gə̄ tə́ əlanə̄ń adə̄nən̄, tél əhɔnə̄ń madə̄ naā seneé gogə́ rang. Nin̄ unən̄ i ta ndūdə́ ń ənīn̄ kété adə̄n̄ ngákṵ́ṵn gə̄ ní, adə̄ i Judas ō, Jonata̰ ō. 19Tə́dan̄ makətūbə̄ ní i ta kum ngé kán̄ naā gə̄ tə́ Jerusalem. 20Kēē makətūbə̄ ń Əspartə gə̄ əlanə̄ń ní n toó:
Ngār gə̄ ō, Əspartə gə̄ ō, rāān̄ Simo̰ nge tun̄ yá̰á̰ kə́ bo lápə́ya. Kum kɔɔ̄ gə̄ ō, ngé tun̄ yá̰a̰ gə̄ ō, Jipə gə̄ malang ń i ngákṵ́ṵ́də́ gə̄ ní ō, rāān̄də́ lápə́ya. 21Ngámbang kəla gə̄ ń ə́laīdə́ rɔ̄ gír deē yājí gə̄ tə́ ní, ədan̄jí na de gə̄ malang na ɔsən̄ go̰nsí ō, na ɓōlə́n̄ ndíĺsí ngá̰ý ō, reēdə́ adə̄jí rɔ̄nel̄ ō. 22Yá̰a̰ gə̄ ń gír deē yājí gə̄ unən̄ ndūdə́ dɔ tə́ yā rāā ní, jə-ndang najə̄ kɔr̄də́ danaá kem makətūbə̄ kəla yā ɓē tə́. Najə̄ ní n toó: Numeniyus kə́ ngōn̄ A̰tiyokus ō, A̰tipater kə́ ngōn̄ Jaso̰ ō ń i ngámbang kəla gə̄ yā Jipə gə̄ ní, reēn̄ lojí yā tél kəhɔ madə̄ naā sejí gogə́. 23Ngé kán̄ naā gə̄ yā ngáń Israel gə̄ a̰a̰n̄ kadə̄ majə kadə̄ n-əhɔn̄ de gə̄ ń toō kə̄ rɔ̄də́ tə́ kə rɔyɔ́ ō, kadə̄ n-əlan̄ kēē makətūbə̄ najə̄ kɔr̄də́ dan makətūbə̄ gə̄ yā ɓē ń a ngɔ̄mə̄n̄ tə́ ní ō. I beé n a əgań kem Əspartə gə̄ dɔ tə́ ní. Tá ɓáý tṵ ní, jə-ndang kēē makətūbə̄ yājí ní tām̄ yā Simo̰ nge tun̄ yá̰á̰ kə́ bo tə́ ō.
24Gō tə́ anī Simo̰ əla Numeniyus Rom, kə der lɔ́ŕ kə́ bo kə́ gātə̄n i gātə̄ gində̄ arjā̰a̰ kə́ kɔȳn i kəlōo ɓú mí, yā kɔjəń kadə̄ madə̄ naā ń n-əhɔn̄ kə Rom gə̄ ní i madə̄ naā kə́ rɔ̄kum.
Simo̰ i nge tun̄ yá̰á̰ kə́ bo ō, i ngār yā Jipə gə̄ malang ō
25Dan ń ngáń Israel gə̄ oōn̄ najə̄ ń nuū anī, dəjen̄ rɔ̄də́ najə̄, ədan̄ na: J-a jə-rāāī i ba̰ý n j-a j-ɔjiīń Simo̰ nin̄ kə ngánən gēé na jə-gerī majə kə́ ni rāā sejí ní? 26Tām̄ ni ō, ngákṵ́ṵn gə̄ ō, kojə yā bɔbə̄n malang ō ní, dumə̄n̄ ta madə̄ ba̰ā̰ ngándáńg. Ni mbəre madə̄ ba̰ā̰ Israel gə̄ kə̄ gogə́ kə ta kūl̄ yá̰a̰ rɔ̄ɔ̄ gēé ō, rāā adə̄ ngáń Israel gə̄ əngen̄ dɔdə́ ō. Nin̄ ndangən̄ yá̰a̰ dɔ bar gində̄ nə̄ngá kasə gə̄ tə́ ba tə́ndān̄ tū mbal̄ kəga kem dɔ yá̰á̰ tə́, dɔ mbal̄ Siyo̰ tə́. 27Najə̄ ń ndangən̄ ní, kēen n toó:
Kem ɓāl̄ kə́ nge kṵ ɓú kutə sīrí kə kalən kə́ jōó tə́, kə ndɔ̄ kutə gidə i sɔ́sɔ́ yā nāā Elūl, kem ɓāl̄ kṵ ɓē kə́ nge kṵ mətá yā Simo̰ nge tun̄ yá̰á̰ kə́ bo tə́ ní, 28kán̄ naā kógə̄ḿ kə́ bo to. Adə̄ ɔsə dɔ ngé tun̄ yá̰a̰ gə̄ ō, ngáń Israel gə̄ ō, ngār gə̄ yā ngáń Israel gə̄ ō, kum kɔɔ̄ gə̄ kə́ kem ɓēé ō, naā tə́. Lo kán̄ naā ngeé ń nuū tə́ ní, terə̄n̄ kemjí dɔ yá̰a̰ gə̄ ń rāān̄ yá̰á̰ tə́ ní. 29De gə̄ rɔ̄ɔ̄n̄ ɓē yājí nja i ngá̰ý. Kə dɔ rɔ̄ɔ̄ gə̄ malang ń nuū Simo̰ ō, ngákṵ́ṵn gə̄ ō, nin̄ ń i ngáń Matatiyas nge tun̄ yá̰á̰ kə́ gír kojə yā Yoyarib tə́ ní, ənīn̄ rɔ̄də́ kɔ̄ɔ́ ta yá̰á̰ kə́ to yo tə́. Tā̰ā̰n̄ madə̄ ba̰ā̰ ɓē yājí gə̄ rɔ̄ɔ̄ ō, rɔ̄ɔ̄n̄ dɔ kújə yā Kɔ́ɔ̄ɓē yājí tə́ ō, dɔ ndū najə̄ yājí tə́ ō. I beé n rɔȳnəń gír deē yājí gə̄ rɔ̄kum ní. 30Jonata̰ ɔsə dɔ de gə̄ kə́ kem ɓē yān tə́ naā tə́ ō, tél nge tun̄ yá̰á̰ kə́ bo yādə́ ō. Gō tə́ anī, oy aw̄ gō gír deē yān gə̄ tə́. 31Madə̄ ba̰ā̰ Jipə gə̄ ndigən̄ reē taā ɓē yādə́ yā nujəń kɔ̄ɔ́ ō, yā rāā kadə̄ lo kə́ táĺ yādə́ gətóo kɔ̄ɔ́ ō. 32Anī Simo̰ ḭḭ dɔɔ́, rɔ̄ɔ̄ tām̄ yā ɓē yān tə́. Núsə yá̰a̰ kənge yān kə́ ngá̰ý udə gíŕ yá̰á̰ rɔ̄ɔ̄ gə̄ kə́ yā kadə̄ ngé rɔ̄ɔ̄ dɔ ɓē tə́ gə̄ tə́ ō, ni əgā ngé rɔ̄ɔ̄ gə̄ ō. 33Əndā ndogə̄ mbal̄ kə́ yā rɔ̄ɔń dɔ ɓē tə́ gə̄ gidə ɓē gə̄ kə́ Jude tə́ ō, gidə ɓē kə́ Betəsur tə́ ō. Betəsur i ɓē kə́ ndi i dɔ nin̄ lo ń kété madə̄ ba̰ā̰ gə̄ kánə̄n̄ yá̰á̰ rɔ̄ɔ̄ yādə́ gə̄ kemeé ní. Simo̰ əndā ɓūtə̄ áskar Jipə gə̄ kem ɓē kə́ Betəsur tə́. 34Ni əndā ndogə̄ mbal̄ kə́ yā rɔ̄ɔń dɔ ɓē tə́ gidə ɓē kə́ Jope tə́ kadə bā bo tə́ ō, gidə ɓē kə́ Gajara tə́ ngɔr kə̄ kadə ɓē kə́ Ajotə tə́ ō. Kété ní, madə̄ ba̰ā̰ gə̄ ndin̄ gō nang ngeé ń nuū tə́. Simo̰ tə́ndā Jipə gə̄ kem ɓē kə́ jōó gə̄ ní tə́ ō, ká̰n̄ yá̰a̰ malang kə́ yā ka̰a̰ń gōdə́ kem ɓē gə̄ ní tə́ ō. 35Ngáń Israel gə̄ a̰a̰n̄ kəra dɔ ndū tə́ yā Simo̰ ō, a̰a̰n̄ kadə̄ ni ndigə kɔsə go̰n ɓē yān ō. Adə̄ gə̄rān̄ Simo̰ kadə̄ i ngār yādə́ ō, nge tun̄ yá̰á̰ kə́ bo ō, najə̄ yā yá̰a̰ malang ń ni rāā tə́ ní. Ni rāā yá̰á̰ kə́ gōtə́ tām̄ yā ɓē yān tə́ ō, ra dɔ ndūn tə́ tām̄ yā ɓē yān tə́ ō, sāā ta róbə́ kə́ tayā tayā gə̄ yā rāań kadə̄ Jipə gə̄ i gír de kə́ bo gə̄ ō. 36Dan ń Simo̰ ndiń kə kumneé ɓáý ní, ni tə̄ɓā de gə̄ ń i Jipə aĺ gə̄ ní dɔ nang kə́ Jude tə́ ō, de gə̄ ń ndin̄ kem kújə́ kə́ ngan̄g yā Dabid tə́ kem ɓē kə́ Jerusalem tə́ ní tə̄ɓādə́ ō. De gə̄ ní rāān̄ kújə́ kə́ ngan̄g lo ní tə́ ba teēn̄ kemeé aw̄ a rāānəń lo kə́ ngɔr ngɔr gə̄ kə́ kadə kújə yā Kɔ́ɔ̄ɓē tə́ adə̄ téĺ kə́ yḛr. Nin̄ kídə̄n̄ lo kə́ táĺ i tītə̄ ń nuū. 37Simo̰ tə́ndā áskar Jipə gə̄ kem kújə́ kə́ ngan̄g ní tə́ ō, rāan adə̄ ngan̄g tɔȳ kə́ kété, yā kadə̄ dɔ nang kə́ Jude ō, ɓē kə́ Jerusalem ō, sōlə̄n̄ yá̰á̰ kógə̄ḿ alé. Ni əndā ndogə̄ mbal̄ kə́ gidə ɓē kə́ Jerusalem tə́ adə̄ ngāl̄ kə̄ dɔɔ́ ō.
38Gō yá̰a̰ gə̄ ń nuū tə́ ní, mban̄g Demetəriyus kə́ nge kṵ jōó ɔjə kə̄ ndágá kadə̄ Simo̰ i nge tun̄ yá̰á̰ kə́ bo rɔ̄kum. 39Ni əlan dan madə̄ tan gə̄ tə́ ō, rɔȳn ngá̰ý ō. 40Tɔdɔ̄ ni oō kadə̄ Rom gə̄ a rāān̄ Jipə gə̄ i madə̄ tadə́ gə̄ tə́ ō, ngé ɓo rɔ̄də́ tū yādə́ gə̄ tə́ ō, ngákṵ́ṵ́də́ gə̄ tə́ ō. Oō kadə̄ əhɔn̄ ngámbang kəla yā Simo̰ gə̄ kə̄ rɔ̄də́ tə́ kə rɔyɔ́ ō. 41Oō kadə̄ Jipə gə̄ ō ngé tun̄ yá̰a̰ gə̄ ō, a̰a̰n̄ kadə̄ i yá̰á̰ kə́ majə kadə̄ n-əndān̄ Simo̰ ngār ō, nge tun̄ yá̰á̰ kə́ bo ō, bátə́ kadə̄ nge koō taa kə́ nge ra dɔ ndūn tə́ ugə̄ń ō. 42Oō kadə̄ əndānən̄ ngol áskar gə̄ kə́ bo ō, ngāgəra dɔ lo kə́ táĺ ō, nge kəndā ngār kəla gə̄ ō, ngé kṵ ɓē gə̄ dɔ ɓē tə́ ō, de gə̄ kə́ nin̄ i dɔ yá̰á̰ rɔ̄ɔ̄ gə̄ tə́ ō, de gə̄ kə́ nin̄ i dɔ kújə́ kə́ ngan̄g gə̄ tə́ ō. 43Simo̰ i nge kəndā kumən gíŕ kújə yā Kɔ́ɔ̄ɓē tə́. Sɔɔ̄ kadə̄ de gə̄ malang oōn̄ tan. Makətūbə̄ kəla kə́ kem ɓēé ní, sɔɔ̄ kadə̄ de gə̄ a ndangən̄ i kə rīneé ō. Ndɔ̄ yá̰a̰ kūjə́ tə́ anī, adə̄nən̄ ta róbə kṵṵ̄ kūbə̄ kə́ kərē ō, kəhɔ ta kūbə̄ yān kə yá̰á̰ kəhɔ ta kūbə̄ kə́ rāā kə lɔ́rɔ́ ō. 44Yá̰a̰ gə̄ ń Simo̰ un ndūn dɔ tə́ ní, ngōn̄ Israel aké nge tun̄ yá̰á̰ kə́ asə mbātə́ gətóo. Ré adə̄ deē ta róbə aĺ anī, deē kə́ asə kɔsə dɔ de gə̄ naā tə́ kem ɓēé, aké asə kṵṵ̄ kūbə̄ kə́ kərē lo yá̰a̰ kūjə́ tə́, aké asə kəhɔ ta kūbə̄ yān kə yá̰a̰ kəhɔ ta kūbə̄ kə́ rāā kə lɔ́rɔ́ gətóo. 45Deē ń a ɓōĺ gidə yá̰á̰ gə̄ ń nuū aĺ ní, aláa a mbātə́ nge kə́ kógə̄ḿ ní, a rāānən̄ yá̰á̰ kə́ tōr̄ tāmən tə́. 46Ngáń Israel gə̄ malang ndigən̄ kadə̄ Simo̰ ta róbə́ rāā yá̰a̰ gə̄ ń nuū. 47Simo̰ ndigə najə̄ ní, adə̄ ndigə kəla nge tun̄ yá̰á̰ kə́ bo ō, kəla ngol ngé rɔ̄ɔ̄ gə̄ ō, kəla ngār yā Jipə gə̄ ō, yā ngé tun̄ yá̰a̰ gə̄ ō, adə̄ ni i dɔ ngáń Israel gə̄ tə́ malang.
48Jipə gə̄ unən̄ ndūdə́ kadə̄ ndangən̄ najə̄ gə̄ ń nuū dɔ bar gində̄ nə̄ngá kasə gə̄ tə́ ō, yā tə́ndā bar gə̄ ní ndágə lo kə́ táĺ tə́, lo kógə̄ḿ kə́ deē a a̰a̰də́ tū tə́ majə tə́. 49I gáŕ kadə̄ a tə́ndān̄ kēē najə̄ kə́ ndang gə̄ ń toō lo ngɔ̄m̄ yá̰a̰ kənge kə́ gātən i ngá̰ý tə́ kem kújə yā Kɔ́ɔ̄ɓē tə́, tām̄ yā Simo̰ nin̄ kə ngánən gēé tə́.
Markert nå:
1 MAKABE GƏ̄ 14: SARDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bibəl ta Sar̄ © L'Alliance Biblique du Tchad, 2006, 2010.