1 MAKABE GƏ̄ 11
11
Mban̄g Pətoleme kə́ nge kṵ mehḛ́ ɔr̄ gō ɓē gə̄ ɔrə̄ń najə̄ kə́ majə aĺ gə̄ dɔ Alekjandər tə́
1Mban̄g kə́ Ejiptə ɔsə dɔ ngé rɔ̄ɔ̄ kə́ ngá̰ý gə̄ kə̄ naā tə́ tītə̄ ngárə̄ḿnjēý kə́ ta bā bo tə́ ō, ɔsə dɔ too bo kə́ yā rɔ̄ɔń gə̄ kə̄ naā tə́ ō, ba sāā taā ɓē kṵ yā Alekjandər kə ngamaá yā kəla ta yān tə́. 2Ni aw̄ dɔ nang kə́ Siri tə́ yā kɔr̄ najə̄ kə́ dɔ lɔm tə́. De gə̄ kə́ kem ɓē gə̄ tə́ teēn̄ ta róbə yādə́ gə̄ kə́ yā kudəń kə̄ kem ɓēé adə̄nən̄ ō, tə́nīn̄ tan ō, əhɔnən̄ kə̄ rɔ̄də́ tə́ ō. Tɔdɔ̄ Alekjandər adə̄ ndūn, i yā kadə̄ əhɔn̄ mumən kə̄ rɔ̄də́ tə́. 3Nəkɔ́ ń Pətoleme udəń kə̄ kem ɓēé toō ní, tə́ndā ɓūtə̄ áskar yān gə̄ kemeé kɔ̄ɔ́ ɓá. 4Dan ń ni aw̄ ugə̄ ngɔr kə̄ Ajotos anī, de gə̄ ɔjənən̄ kújə ɓesə̄ Dago̰ ń əlan̄ hor dɔ tə́ ní ō, Ajotos kə ngán ɓē kə́ gidə tə́ gə̄ ń nujənə̄ń kɔ̄ɔ́ ní ō, ɔjənən̄ nīń de gə̄ ń tə́nīn̄ kə̄ loo gə̄ tə́ ní ō, kúl de gə̄ ń hor ṵṵdə́ ta rɔ̄ɔ̄ tə́ ní ō, tɔdɔ̄ kánə̄n̄də́ dɔ naā tə́ i lo ń mban̄g a mān̄ tū tə́ ní tə́. 5Ənīn̄ mban̄g gotə yá̰a̰ gə̄ ń Jonata̰ rāā ní kadə̄ mban̄g gān̄g sarya dɔn tə́, banī mban̄g ndi tan mbóo. 6Jonata̰ ɔy de gə̄ ngá̰ý gōn tə́ ɓuk ɓuk tə́niń ta mban̄g kem ɓē kə́ Jope tə́. Nin̄ rāān̄ naā lápə́ya ō, ɓīīn̄ kə̄ lo ń nuū tə́ ō. 7Jonata̰ dān̄ mban̄g bátə́ ugə̄ seneé ta bā ń a ɓārə́n̄ na i bā Eloter ní tə́, ba tél reē gogə́ Jerusalem.
8Mban̄g Pətoleme taā ɓē gə̄ kə́ kadə bā tə́ bátə́ ugə̄ Selosi kə́ kadə bā bo tə́ ō, núm̄ rāā yá̰á̰ kə́ majə aĺ kə mban̄g Alekjandər ō. 9Ni əla de gə̄ rɔ̄ mban̄g Demetəriyus tə́ kadə̄ ədanən̄ na: ī-reē ādə̄ j-ənī ndūjí j-adə̄ naā, mā m-ā m-ādī ngōnə̄ḿ kə́ dəyá̰ ń i nə̄yá̰ Alekjandər ní kadə̄ ī-taā ō, ḭ̄ ā ṵ́ṵ ɓē gotə bɔbí tə́ ō. 10Tām̄ m̄-ndə̄ngā rɔ̄ḿ najə̄ kadə̄ ń m-ādə̄n ngōnə̄ḿ kə́ dəyá̰ adə̄ taā ní tə́, tɔdɔ̄ ni sāā tɔ̄lə̄m̄. 11Pətoleme əndā najə̄ dɔ Alekjandər tə́ tītə̄ ń nuū, tɔdɔ̄ əndā kumən rɔ̄ ɓē kṵ yān tə́. 12Ni ɔr̄ ngōnən kə́ dəyá̰ kɔ̄ɔ́ jī Alekjandər tə́ ō, télən̄ madə̄ ba̰ā̰ naā gə̄ ō. 13Pətoleme udə kem ɓē kə́ A̰tiyos tə́ anī, ṵṵ̄ jākā mbang kə́ ɔjə kadə̄ ni i mban̄g kə́ Ejiptə tə́ ō, ṵṵ̄ jākā mbang kə́ ɔjə kadə̄ ni i mban̄g kə́ Aji tə́ ō. 14Dan ngeé ń nuū tə́ ní, mban̄g Alekjandər i dɔ nang kə́ Silisi tə́. Tɔdɔ̄ de kə́ gō nang ngeé ń nuū tə́ gə̄ əsōn̄ wūn̄g. 15Dan ń Alekjandər oō gotə yá̰á̰ ń rāā yá̰á̰ ní anī, aw̄ yā rɔ̄ɔ̄ Pətoleme. Anī Pətoleme ḭḭ dɔɔ́ kə ngé rɔ̄ɔ̄ kə́ tɔ́gə́də́ i ngá̰ý gə̄ a kə́ tə̄ɓań Alekjandər. 16Ni a̰ȳ aw̄ dɔ nang yā Arabə gə̄ tə́ ō, mban̄g Pətoleme tetə rɔ̄ɔ̄ ō. 17Jabədiyel ń ni i Arabə ní, gān̄g dɔ Alekjandər ba əlań adə̄ Pətoleme. 18Ba rāā ndɔ̄ jōó gō tə́ anī, mban̄g Pətoleme oy ō, áskar gə̄ ń ni tə́ndādə́ lo yān kə́ ngan̄g ngan̄g gə̄ tə́ ní, de kə́ kem ɓēé gə̄ tɔ̄lə̄n̄də́ malang kɔ̄ɔ́ ō. 19Demetəriyus ndi mban̄g kem ɓāl̄ kə́ nge ɓú kə kutə mehḛ́ kə kalən kə́ sīrí tə́.
Demetəriyus kə́ nge kṵ jōó əhɔ madə̄ naā kə Jipə gēé
20Kem ndɔ̄ gə̄ ngeé ń nuū tə́ ní, Jonata̰ ɔsə dɔ de kə́ Jude gə̄ kə̄ naā tə́ yā kaw̄ kənīń kújə́ kə́ ngan̄g kə́ Jerusalem rɔ̄ɔ̄ ō, adə̄ tə́ndān̄ yá̰a̰ rɔ̄ɔ̄ gə̄ ngá̰ý ta tə́ ō. 21Anī de kə́ taā kem yādə́ gətóo gə̄ ō, kə́ ngé mbātə́ ndū najə̄ gə̄ ō ń imə̄n̄ gíŕ nápar deē yādə́ gə̄ ní, aw̄ əngen̄ mban̄g ba ədanən̄ na Jonata̰ na gīr̄ gidə kújə́ kə́ ngan̄g əla ta naā tə́ kə ngé rɔ̄ɔ̄ yān gēé. 22Dan ń Demetəriyus oō najə̄ gə̄ ń nuū ní, wūn̄g rāan adə̄ aw̄ Pətolemayis kə̄ ta jī tə́ beē. Ni ndang makətūbə̄ adə̄ Jonata̰ ədanəń na kə ɔrə̄n̄ rɔ̄də́ kɔ̄ɔ́ gidə kújə́ kə́ ngan̄g tə́, ba kə reē láẃ Pətolemayis kə əngen kadə̄ n-ɔrə̄n̄ najə̄ kə naá. 23Dan ń Jonata̰ ənge makətūbə̄ ń nuū ní, əda ngé rɔ̄ɔ̄ yān gə̄ kadə̄ deē kə ɔr̄ rɔ̄n kə̄ gogə́ alé. Ni gə̄rā kum kɔɔ̄ kə́rēý gə̄ kə́ Israel tə́ ō, ngé tun̄ yá̰á̰ kə́rēý gə̄ ō seneé, ba nəkɔ́ əndā rɔ̄n ta yá̰á̰ kə́ to yo tə́. 24Ni ɔy gində̄ arjā̰a̰ ō, lɔ́r ō, kūbə̄ gə̄ ō, kadə̄ karī kə́ rang gə̄ ngá̰ý ō, ba aw̄ Pətolemayis rɔ̄ mban̄g tə́. Anī mban̄g rāā majə seneé. 25ngé rāā yá̰a̰ kə gō kem ndigə yā Nə́ɓāá aĺ gə̄ kə́rēý gə̄ kə́ dan gír deē yān gə̄ tə́ nāān̄ kəndā dɔn tə́. 26Banī yá̰á̰ ń mban̄g rāā seneé ní, i tītə̄ yá̰á̰ ń mban̄g kə́ kété gə̄ rāānəń ní. Adə̄ ɔsən i kə̄ dɔɔ́ ta kum madə̄n gə̄ tə́ malang. 27Ni mbūsən kem kəla nge tun̄ yá̰á̰ kə́ bo yān tə́ ō, kem kəla yān kə́ bo gə̄ kə́ kété tə́ ō, adə̄ tə́danən̄ dan madə̄ mban̄g kə́ ta kəga dɔ gə̄ tə́ ō. 28Jonata̰ dəje mban̄g kadə̄ ɔr̄ de gə̄ kə́ gō nang kə́ Jude tə́ ō, kə́ gō nang kə́ mətá gə̄ kə́ Samaritidə tə́ ō kɔ̄ɔ́ kem lambóó tə́, ba ənī ndūn yā kadə̄n sə́lē kə́ kum madə̄ gə̄ ɓú mətá. 29Mban̄g ndigə, adə̄ ni ndang najə̄ ń toō kem makətūbūú adə̄ Jonata̰:
30Mban̄g Demetəriyus rāā ngōkṵ́ṵn Jonata̰ ō, Jipə gə̄ malang ō lápə́ya. 31J-əla kə kēē makətūbə̄ ń jə-ndang j-adə̄ ngeejí Lasten ní j-adə̄sí, yā kənīń najə̄ mbīsí tə́.
32Mban̄g Demetəriyus rāā bɔbə̄n Lasten lápə́ya. 33Sɔɔ̄ń gír̄ kə́ majə gə̄ ń nin̄ aw̄nəń kemdə́ tə́ sejí ní, j-un ndūjí kadə̄ jə-rāā majə sedə́, tām̄ nin̄ i madə̄ tají gə̄ kə́ ran̄ dɔ ndūdə́ tə́ sejí ō, kə́ i ngé rāā yá̰á̰ kə́ súūmú gə̄ ō. 34J-ədadə́ wáńg na, dɔ nang kə́ Jude ō, gō nang kə́ mətá gə̄ kə́ Aperema ō, Lida ō, Ramatayim ō ní, i yādə́ rɔ̄kum. Ɔrə̄n̄ gō nang kə́ mətá gə̄ ní kɔ̄ɔ́ Samaritidə tə́, naā tə́ kə nja lo yādə́ gə̄ malang ba əlan̄ ta dɔ nang kə́ Jude tə́, yā rāań majə kə de gə̄ malang ń a tunə̄n̄ yá̰a̰ Jerusalem ní, kum gotə lambóó ń a adə̄n̄ mban̄g kə dɔ ɓāl̄ gə̄ ní. Kété mban̄g a taā lambóó ní i dɔ yá̰á̰ kə́ teē dɔ nang yādə́ tə́ ō, kan̄ kāgə̄ yādə́ gə̄ tə́ ō. 35Yá̰á̰ kə́ rang kə́ sɔɔ̄jí ɓáý gə̄ ń i dɔ yá̰á̰ kə́ kɔr̄ kógə̄ḿ dan kə́ kutə tə́ ní ō, lambóó kə́ rang kə́ sɔɔ̄jí gə̄ ō, lambóó kə́ sɔɔ̄ dɔ katə̄ ō, lambóo yā mban̄g ō ní, əla gír ngɔr ń toō tə́ ní, j-ɔr̄də́ kɔ̄ɔ́ kemeé malang. 36Əla gír ngɔr ń toō tə́ bátə́ ta kə́ kété ní, ndū gə̄ ń i kə́ kun kɔ̄ɔ́ ní, deē a əya̰ kɔ̄ɔ́ alé.
37Adə̄ ə̄ndāī kumsí gír makətūbə̄ ń toō tə́ majə, ba ī-ndangiī kēen ādī Jonata̰, kadə̄ əndā dɔ mbal̄ kə́ táĺ tə́ dɔ ndágá, kadə̄ deē a̰ā̰ majə.
Jonata̰ dḭḭ̄ Demetəriyus kə́ nge kṵ jōó kem ɓē kə́ A̰tiyos tə́
38Dan ń mban̄g Demetəriyus a̰ā̰ kadə̄ lo to lɔm kem ɓē ń ni ndi dɔ tə́ ní ō, de kə́ dum̄ tan gətóo ō anī, ɔr̄ de gə̄ malang áskaraá kɔ̄ɔ́, adə̄ de gə̄ télən̄ kə̄ ɓē yādə́ gə̄ tə́. De gə̄ ń ni əya̰də́ áskaraá ní, i tə̄rā gə̄ ń ɔydə́ kə̄ dor̄ gə̄ yā nápar de gə̄ tə́ ní ngóy. Yá̰á̰ ń ni rāā ní, mēr̄ kadə̄ áskar gə̄ ń rāān̄ kəla kə mban̄g kə́ kété gēé ní əhɔnən̄ kemdə́ tə́. 39Tá Təripo̰ ń kété i de kə́ dan de gə̄ yā Alekjandər tə́ ní, a̰ā̰ kadə̄ áskar gə̄ malang ndūdə́ i kógə̄ḿ beē tām̄nəń kə Demetəriyus anī, aw̄ ɓē Iyamlikos kə́ Arabə ń kété ətō A̰tiyokus kə́ ngōn̄ Alekjandər ní. 40Ni ra seneé gagar ta kadə̄n ngōn̄ ní kadə̄ aw̄ ṵṵ ɓē gotə bəran tə́ ō, yá̰a̰ malang ń Demetəriyus adə̄ ndūn dɔ tə́ ō, kim̄ ń áskar gə̄ malang im̄nən̄ ní ō ní, ni ədan ō, ndi nuū ndɔ̄ i ngá̰ý ō.
41Jonata̰ dəje mban̄g Demetəriyus kadə̄ teē kə áskar yān gə̄ kə́ kem kújə́ kə́ ngan̄g kə́ Jerusalem tə́ ō, kə́ lo kə̄ rang gə̄ tə́ ō kɔ̄ɔ́, tɔdɔ̄ nin̄ a rɔ̄ɔ̄n̄ i Israel gə̄ dəje. 42Demetəriyus adə̄ tél ədan̄ Jonata̰ na: I ni ń nuū ngóy n m-ā m̄-rāā tām̄ yāí tə́ ō, tām̄ yā nápar deē yāí gə̄ tə́ ō ní alé. M-ā m-ɔ́siī kə̄ dɔɔ́ kadə̄ asə ta tə́ ḭ̄ ō, gíŕ nápar deē yāí gə̄ ō, lo ń m-ə́nge ta róbə ní. 43Kə́ ngɔr ń toō tə́ ɓáa majə kadə̄ ə́la kə ɓūtə̄ áskar gēé ādə̄ dḭḭ̄mə̄n̄. Tām̄ ɓūtə̄ áskar yāḿ gə̄ malang əya̰mə̄n̄ kɔ̄ɔ́. 44Jonata̰ əla kə go̰ rɔ̄ɔ̄ gə̄ dūbú mətá adə̄n kem ɓē kə́ A̰tiyos tə́. Dan ń nin̄ reē ugə̄n̄ ní, rɔ̄ mban̄g nelə̄n. 45De kə́ kem ɓēé gə̄ kə́ asən̄ dūbú ɓú kógə̄ḿ kə kutə jōó ń nuū ɔsən̄ dɔdə́ naā tə́ kem ɓēé, ba gírə̄n̄ tɔ̄l̄ mban̄g. 46Mban̄g ɓɔ̄ɔ̄ rɔ̄n ndogó mbangaá kɔ̄ɔ́, banī de kə́ kem ɓēé gə̄ tá taān̄ lo malang kum róbə kɔsə gə̄ tə́ ō, rɔ̄ɔ̄ əla gír ō. 47Mban̄g ɓāŕ Jipə gə̄ kadə̄ kə dḭḭ̄nən̄, anī nin̄ kánə̄n̄ naā malang rɔ̄n tə́: gō tə́ anī, tḭ̄ḭ̄n̄ naā kem ɓēé ba tɔ̄lə̄n̄ de gə̄ kə́ asən̄ dūbú ɓú ń nuū ndɔ̄ ń nuū tə́. 48Nin̄ əlan̄ hor dɔ ɓē tə́ ndɔ̄ ń nuū tə́ ō, ɔyn̄ yá̰a̰ kənge gə̄ ngá̰ý ta rɔ̄ɔ̄ tə́ ō, ajən̄ mban̄g ō. 49Dan ń de kə́ ɓēé gə̄ a̰a̰n̄ kadə̄ Jipə gə̄ taān̄ ɓē tītə̄ ń kemdə́ ndigə ní anī, jīdə́ ur̄ wak kɔ̄ɔ́. Nin̄ əgan̄ kɔŕ kə̄ dɔ mban̄g tə́, rāānən̄ ɓɔ́ ədan̄ na: 50Ə́la jī kṵṵí ādə̄jí, ādə̄ asə Jipə gə̄ rɔ̄ɔ̄jí. 51Nin̄ ɓōkə́n̄ yá̰a̰ rɔ̄ɔ̄ gə̄ kɔ̄ɔ́ ba ndin̄ lɔm kə mbangá. Ɔsən̄ go̰n Jipə gə̄ ngá̰ý ta kum mban̄g tə́ ō, ta kum de gə̄ malang kə́ kem ɓē kṵ yān tə́ ō. I beé n Jipə gə̄ rāānəń adə̄ rīdə́ ɓār̄ kem ɓē kṵ tə́ ní ō, tél aw̄n̄ gogə́ Jerusalem kə yá̰a̰ kənge kə́ ngá̰ý kə́ kɔy ta rɔ̄ɔ̄ tə́ ní ō. 52Mban̄g Demetəriyus ndi ngan̄g dɔ kōr̄ kāgə̄ mbang tə́ ō, lo kə́ kem ɓēé to lɔm ɓāl̄ kṵ ɓē yān tə́ ō. 53Lo ń nuū tə́ yá̰a̰ malang ń mban̄g ənī míndən yā rāā ní, rāā alé ba tél i madə̄ ba̰ā̰ Jonata̰. Kəla gə̄ ń Jonata̰ rāā adə̄n ní ni ger̄ gō tṵ alé, ba rāā adə̄ wūn̄g rāā Jonata̰ nja i ngá̰ý.
Jonata̰ ndigə najə̄ gō A̰tiyokus kə́ nge kṵ mehḛ́ tə́
54Gō yá̰a̰ gə̄ ń nuū tə́ anī, Təripo̰ tél reē kə A̰tiyokus. A̰tiyokus i ngōn̄ kə́ dūú ɓáý, banī əndānən̄ mban̄g ō, əlan̄ jākā mbang dɔn tə́ ō. 55Ɓūtə̄ áskar gə̄ malang ń Demetəriyus ɔr̄də́ áskaraá kɔ̄ɔ́ ní, əgan̄ naā gidə Təripo̰ tə́ ba rɔ̄ɔ̄n̄ Demetəriyus tetənən̄, anī ni teē a̰ȳ. 56Təripo̰ ɔy kedə̄ rɔ̄ɔ̄ gə̄ ba taā ɓē kə́ A̰tiyos.
57A̰tiyokus ń i ngōn̄ kə́ dūú ní, ndang makətūbə̄ əlań adə̄ Jonata̰, ədan kemeé na: M-ə́da na rɔ̄kum ḭ̄ i nge tun̄ yá̰á̰ kə́ bo ō, m-ə̄ndāī dɔ nang kə́ sɔ́ gə̄ tə́ ō, m̄-tə́daī dan de gə̄ ń nin̄ i madə̄ mban̄g gə̄ ní tə́ ō. 58Ni əla kə jóó lɔ́r gēé ō, kə ngáń gájə́ yá̰a̰ kəsa yá̰a̰ dɔ tábəl tə́ gə̄ ō adə̄n. Adə̄n ta róbə ka̰ȳ yá̰a̰ kə kopə lɔ́r gēé ō, kṵṵ̄ kūbə̄ kə́ kərē ning ō, kəhɔ ta kūbə̄ yān kə yá̰a̰ kəhɔ ta kūbə̄ kə́ rāā kə lɔ́rɔ́ ō. 59Ni əndā ngōkṵ́ṵn Jonata̰ ń rīn na i Simo̰ ní kadə̄ ṵṵ ɓē gō nang ń ḭḭ mbal̄ ń a ɓārə́n̄ na i Rígə́ kə́ Tir tə́ ní, bátə́ dɔ nin̄ ɓē kə́ Ejiptə tə́. 60Jonata̰ aw̄, njə̄rā kə gō ɓē gə̄ kə́ gidə bā Opəratə tə́. Ɓūtə̄ áskar gə̄ kə́ gō nang kə́ Siri tə́ ɓoon̄ rɔ̄də́ tū yān tə́ yā rɔ̄ɔń. Ni reē ugə̄ Askalo̰ anī, de kə́ kem ɓēé gə̄ teēn̄ ngá̰ý ɓuk ɓuk əhɔnən̄ kə̄ rɔ̄də́ tə́. 61Ni ḭḭ nuū aw̄ Gaja, banī ta róbə gə̄ kə́ yā kudəń kə̄ kem ɓēé i kə́ kutə̄ kɔ̄ɔ́. Anī gīr̄ ɓē ní ō, ɔy yá̰á̰ kə́ kemeé gə̄ ō, əla hor dɔ ngán ɓē kə́ gidə tə́ gə̄ ō. 62De kə́ Gaja gə̄ rāān̄ Jonata̰ ɓɔ́, anī əla jī kṵṵn adə̄də́:#11.62 Á̰a̰ī: 1Mak 6.58 banī ni əhɔ ngán ngār yādə́ gə̄ əlań Jerusalem kadə̄ gāngə̄n̄ dɔdə́. Gō tə́ anī, ni njə̄rā gō nang ngeé ń nuū tə́ bátə́ ugə̄ Damas.
63Jonata̰ oō kadə̄ ngol áskar kə́ bo gə̄ yā Demetəriyus i ngɔr kə̄ Kades kə́ Galile tə́, naā tə́ kə ngé rɔ̄ɔ̄ gə̄ kə́ kutədə́ i ngá̰ý, yā kɔrə̄ń Demetəriyus kɔ̄ɔ́ kem kəla yān tə́. 64Anī aw̄ tə́nī tadə́, ba əya̰ ngōkṵ́ṵn Simo̰ dɔ nang kə́ Jude tə́. 65Simo̰ əndā géŕ ger yān ta ɓē kə́ Betəsur tə́. Ni gīr̄ ɓē ní, ba ɔgə̄ kadə̄ deē teē kemeé ō, udə kemeé ō, rɔ̄ɔ̄ ɓē ní ndɔ̄ i ngá̰ý ō. 66De kə́ kem ɓēé gə̄ dəjenən̄ najə̄ lɔm, anī ni ndigə. Ɓá tā ba tə̄ɓādə́ adə̄ teēn̄ kɔ̄ɔ́ kem ɓēé ba taā lo ō, əndā ɓūtə̄ áskar yān gə̄ kem ɓēé ō. 67Ba Jonata̰ kə ngé rɔ̄ɔ̄ yān gēé tā anī, əhɔn̄ lo ndin̄ dɔ gɔ́sə bā Jenejaretə tə́. Teē kə ndɔ̄ kə́ rangaá anī, ḭḭn̄ dɔɔ́ kə gír loí ɓatə reē ugə̄n̄ kum kubə kə́ Hasor tə́. 68Ngé rɔ̄ɔ̄ gə̄ yā madə̄ ba̰ā̰ gə̄ tə́nīn̄ tadə́ kum kubə ní tə́, ba ɓɔ̄ɔ̄n̄ ɓūtə̄ áskar kə́rēý gə̄ mbo̰ō̰ mbal̄ gə̄ tə́. 69Anī áskar gə̄ ń ɓɔ̄ɔ̄n̄də́ ní, teēn̄ ō, dəban̄ naā tə́ ō. 70Áskar gə̄ yā Jonata̰ a̰ȳn̄ naā malang kɔ̄ɔ́, kógə̄ḿ kə́ ra gotoó gətóo. Banī i ngol áskar yān gə̄ jōó ngóy n a̰ȳn̄ alé ní. Adə̄ i Matatiyas kə́ ngōn̄ Abəsalom ō, Judas kə́ ngōn̄ Kalpi ō. 71Jonata̰ rə́yā̰ kūbə̄ kə́ rɔ̄n tə́ ō, ɔy nán̄g kə̄ dɔn tə́ ō, ndɔ̄ȳ ō. 72Gō tə́ anī, tél dɔ tə́ aw̄ ta rɔ̄ɔ̄ tə́, ni rɔ̄ɔ̄ madə̄ ba̰ā̰ gə̄ tetədə́, adə̄ a̰ȳn̄ naā. 73Dan ń áskar gə̄ ń a̰ȳn̄ naā ní a̰a̰n̄ bərá anī tél reēn̄ gogə́ rɔ̄n tə́, ba ngɔ̄də̄n̄ madə̄ ba̰ā̰ gə̄ naā tə́ bátə́ ugə̄n̄ sedə́ géŕ ger yādə́ tə́ Kades ō, nin̄ kɔ́ gə̄ ndin̄ lo ń nuū tə́ ō. 74Ndɔ̄ ngeé ń nuū tə́ ní áskar yā madə̄ ba̰ā̰ gə̄ oyn̄ asə dūbú mətá ō, Jonata̰ tél dɔ tə́ aw̄ Jerusalem ō.
Markert nå:
1 MAKABE GƏ̄ 11: SARDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bibəl ta Sar̄ © L'Alliance Biblique du Tchad, 2006, 2010.