Lukka 5
5
Yesu ggi naadi Swahaba ab jaa abidu.
(Matthew 4:18-22; Mark 1:16-20)
1Yom wayyi, Yesu kaan yegif fih torof tee Bahari tee Geresenereti kaman ggi naadi Bahari tee Galilaya. Kom tee annas dukur lifu fih torof bahari ligo ummon ggi asmma kabar tee Rabbana. 2Ini yaa Yesu ayinu fuluka tinen ab fadi fih torof Bahari ligo annas tee amsuku samaga seebu ini ligo ummon ggi kasuru mee adul netti tomon. 3Yesu dakal fih fuluka ab kaan tee Simon dukur asaadu uwo liju fuluka fih moyo. Yesu geni falaata fih fuluka dukur abidu alim annas.
4Baada okalas alim annas, okelem nee Simon, “sulu fuluka bakaan ab moyo tey kaan kaala jadda netti takki fih moyo tey kede amsuku samaga.”
5Simon jibisha “Siddu, inna soh kazi mee guddrra fileli kuul ligo inna aju amsuku samaga dukur inna maa amsuku sokol yoyote. Lakin kalam itaa kelem inna kede jadda netti minjuwa moyo, inna kaman bi soh jeedde”
6Bakaan ummon soh jee nammna ab Yesu kelem noomon, ummon amsuku samaga milaan ladi netti tomon kaan geeri fih seretu. 7Ummon soh alama mee idda tomon nee sabiyana tomon fih fuluka kede jaa awn ummon. Ummon jaa, amla fuluka dee kuul mee samaga ladi kaan geeri kee ketisi.
8Ini waakati Simon ab kaman ggi naadi Pita bakaan uwo ayinu sunu ab soh, uwo sujudu fih kura tee Yesu, okelem noowo, “Siddu tayi anaa ggi womba neetaa kede itaa seebu anaa kalam anaa ajol tee soh zambi.” 9Simon mee sabiyana too kuul ummon shannga fih samaga ab ummon amsuku. 10Sabiyan tee Simon; Jemusi mee akwaana ab duga Yokana nyereku tee Zebidayo ummon kuul shannga. Dukur yaa Yesu kelem nee Simon, “matta kaffu, min yom tee naare itaa bijja jibu annas nee Rabbana jee ragi ab ggi amsuku samaga.” 11Waakati annas tee amsuku samaga dee aarja fuluka tomon fih torof Bahari, ummon sibbu killa sokol wara dukur ummon faatiya Yesu kede ummon kun Swahaba too.
Yesu ggi ponyesha ragi ab endis ayan tee gildu ab tee guddrra
(Matthew 8:1-4; Mark 1:40-45)
12Yom wayyi ligo Yesu fih-fih wayyi min meddina tee Galilaya, ragi wayyi abkan endis ayan tee gildu ab tee guddrra ojja nee Yesu. Waakati uwo ayinu Yesu, osujud fih tura Yesu kede awn uwo, “siddu, anaa arfu itaa agddear awn anaa, itaa agddear ponyesha anaa.”
13Ini yaa Yesu middu idda too uwo amsuku fih ragi dee dukur okelem, “anaa aju ponyesha itaa. Pona.” Fih gwaam bumarra ragi dee pona mara wayyi. 14Ini yaa Yesu weri nee ragi dee, “matta kelem nee ajol yoyote kalam. Lakin ruwa fih Yeekalu fih Jerusalem kee itaa weri itaa nee kahin kee uwo faham jee itaa pona. Dukur itaa wedi sadaka jee sharia tee Musa ggi weri nee annas ab pona ayan tee gildu ab tee guddrra.”
15Salakun Yesu kaan kelem noowo kede uwo maa kelem nee annas, kabar tee ponyesha too masi nee annas milaan wu kalam wedede annas milaan lim kede ummon asmma tee alim too kalam kaman kede uwo ponyesha annas abkan endis ayan. 16Lakin Yesu mara milaan okaan ggi ruwa fih bakaan ab pengele dukur uwo womba nee Rabbana.
Yesu ggi sama mee ponyesha ragi ab agddear maa masi gildu too.
(Matthew 9:2-8; Mark 2:1-12)
17Yom wayyi ligo Yesu ggi alim kabar tee Rabbana, kubarina tee diin ab ggi naadi Farasin mee malima tee sharia ligo ummon kuul geni ini. Kaan ummon kuul taala min karni tee Galilaya, Yudaaya mee Jerusalem meddina ab kebir. Guddrra tee Rabbana kaan fih fugu uwo fih ponyesha ayan. 18Ini yaa rujala jaa ligo ummon arfa ragi fih bilis ligo uwo maa agddear masi gildu too. Ummon jarrib dakal uwo fih bakaan ab Yesu kaan fogo fih ponyesha uwo. 19Lakin kaan fih kom kebir tee annas, ummon maja loggo nammna yoyote tee dakal uwo fih juwa lakin ummon arfa ragi dee fih foo tee juwa dukur ummon kutu fogo lufura. Ummon kutu ragi dee falaata fih bilis fih usiddu tee annas gidaam Yesu.
20Ini yaa Yesu ayinu amin tee rujala ab jibu uwo, okelem nee ragi ab maa agddear masi gildu too, “ragi, batal takki sama min itaa.”
21Nas Farasin mee malima tee sharia, ummon abidu feker fih badum tomon, “munu yaa ragi weede sitim Rabbana feker gali uwo bi sama zambi. Kalam inna arfu gali Rabbana barraw yaa ggi sama zambi.?”
22Waakati Yesu faham feker tomon, uwo asaadu ummon, “ley itakkum ggi feker jeedde minjuwa gelbba takkum? 23Ab rayisi yaa yatu mee ab gowu yaa yatu? Anaa kelem gali, zambi takki sama waala gum min bilis kede itaa masi? 24Ini yaa anaa bi ponyesha ragi dee dukur itakkum faham gali, nyereku tee binadum endis guddrra fih duniya fih sama zambi. Baada kelem wedede, Yesu geeru nee ragi dee ab kaan ggi masi maa dukur okelem noowo, gum foo kede itaa sulu bilis takki kede itaa aarja fih beyy takki.” 25Fih gwaam, ragi dee dukur gum uwo arfa bilis too ab kaan uwo num fogo, uwo aarja fih beyy too ligo uwo ggi shukur nee Rabbana. 26Annas kuul ab kaan fih inna shannga. Ummon abidu shukur nee Rabbana ligo ummon amla kuwaf, ligo ummon ggi wonus; “inna ayinu kalama tee majjab naare.”
Yesu ggi naadi Leevi kee kun Swahaba too
(Matthew 9:9-13; Mark 2:13-17)
27Baada killa kalama dee kuul, Yesu dukur taala min bakaan wedede, waakati kaan uwo ggi ruwa fih sika, uwo ayinu ajol ab ggi lim musoro ginadi Levi ligo uwo geni fih bakaan ab tee lim musoro, okelem noowo gali “faatiya anaa kee itaa kun Swahaba tayi” 28Leevi waakati asmma, ogum foo gwaam dukur ofatiya wara Yesu kede okun Swahaba too.
29Ini yaa Levi rakabu nee Yesu akil ab kebir fih beyy dukur uwo karibisha Yesu. Annas milaan ab ggi lim musoro mee diffaana taanin kaan ggi akul bakaan wayyi noomon. 30Ini yaa wayyi min kubarina tee diin ab ggi naadi Farasin mee malima tee sharia, ummon kaman min kom tee Farasin dukur ummon kelem nee Swahaba tee Yesu gali, “ley itakkum ggi akul mee asurub mee annas ab ggi lim musoro mee taanin tee soh zambi.”
31Yesu jibisha noomon fogo, “annas ab ayanin ummon yaa aju daktara, lakin annas ab maa ayanin aju maa. 32Fih nammna wayyi dee, anaa maja fih naadi annas ab addil kede ummon jaa taya min zambi tomon, lakin anaa jaa fih naadi annas ab endis batal sibbu zambi tomon.”
Yesu ggi alim fih sayim
(Matthew 9:14-17; Mark 2:18-22)
33Annas taanin dukur asaadu Yesu, “Swahaba tee Yokana ab kaan ggi batiza ummon kaan ggi sayim killa waakati ligo ummon ggi womba nee Rabbana jee nammna ab dole ab amin alim tee Farasin ummon kaman kaan ggi sayim mee womba. Lakin ley Swahaba takki maa ggi sayim mee womba.”
34Lakin Yesu ggibisha noomon, “seyi itakkum agddear kutu diffaana fih bakaan jooju kede ummon sayim Ligo ragi arusu lissa fih moo ummon? Ata agddear uwo maa. 35Lakin waakati gija, ligo ragi arusu bijja sulu min ummon, fih waakati dee ummon bijja sayim. Fih nammna wayyi bijja kun yom ligo sulu anaa min Swahaba tayi dukur bi sayim mee womba.”
36Baada naade, Yesu wedi noomon muffano weede, “itaa maa agddear seretu nusu tee gumas ab jedid kee itaa keetu fih gumas ab gedim. Kaan itaa soh jeedde, itaa bi karab gumas ab jedid dee dukur gumas jedid dee maa bi beenu seme fih gumas ab gedim dee. 37Yaa fih jeedde, mafih ajol ab agddear kub merisa ab jedid fih gili tee merisa ab gedim, kaan uwo bi soh jeedde, merisa ab jedid bi seretu gili tee merisa ab gedim dukur bi kub. 38Lakin merisa ab jedid endis tee kutu fih gili tee merisa ab jedid kalam kede inna chunnga merisa mee gili tee merisa dee. 39Uwo kaman mafih ajol ab agddear asurub merisa ab gedim mee uwo kee aju asurub merisa ab jedid, kalam oggi kelem gali, ab gedim yaa gisinda.”
Markert nå:
Lukka 5: KCN
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Nubi Bible by Beyond Translation is licensed under Creative Commons Attribution-ShareAlike 4.0 License.
