Lukka 4
4
Sitan jarrib Yesu
(Matthew 4:1-11; Mark 1:12-13)
1Bakaan Yesu aarja min kooru tee Jodan badda batiza uwo, Roho abnedif kaan fih moo dukur sulu uwo fih bakaan ab pengele. 2Ligo uwo kaan fih inna, sitan jarrib uwo yom arbain mee fileli arbain. Lakin Yesu maa akul sokol ata wayyi fih waakati naade. Bakaan yom arbain kalas, jiyan abidu soh uwo. 3Sitan dukur kelem nee Yesu gali, “kaan tee hakki itaa nyereku tee Rabbana, weeri nee laagera dee kee kun mukati kee itaa akul.” 4Yesu dukur kelem noowo gali jaa katif min zaaman gali, “ajol maa agddear kun hayyi mee akil barraw.” 5Okutu kede uwo panda gala dukur oweri noowo mamlaka kuul tee duniya fih waakati siya. 6Sitan dukur kelem nee uwo; “anaa wedi nee itaa weezo fih mamlaka dee kuul mee hishima too kalam kaan jaa wedi nee anaa dukur anaa agddear wedi weezo nee ajol yoyote ab anaa nigitu 7Kaan itaa sujudu mee abdu anaa, weede kuul bi kun takki.” 8Yesu aarja nee sitan! Okelem gali, “ab jaa katif gali, itaa endis tee abdu Siddu Rabbana takki ligo itaa ggi soh noowo baara.”
9Osulu uwo fih Jerusalem meddina ab kebir okutu uwo fih rasu tee Yeekalu okelem noowo, “kaan tee hakki itaa nyereku tee Rabbana nutu falaata min ini. 10Kalam, jaa katif ggi wonus gali, Rabbana bijja weri nee itaa Malaika too kede uwo chunnga itaa. 11Malaika too bijja arfa itaa fih idda tomon kede itaa maa awur kura takki fihel laager.” 12Yesu aarja nee sitan gali, jaa katif ggi wonus, “Itaa maa endis jarrib Siddu Rabbana takki.” 13Waakati sitan kalas killa jarrib fih killa nammna, uwo sibbu uwo ladi waakati taani.
Yesu abidu kazi too fih Galilaya
(Matthew 4:12-17; Mark 1:14-15)
14Ini yaa Yesu aarja fih Bele tee Galilaya ligo uwo amla guddrra tee roho abnedif, kabar ab ggi amsuku fugu uwo setetu fih Bele dee kuul. 15Dukur omassi fih Bele dee kuul ligo oggi alim nee annas fih bakaan tee lim ab ggi naadi Sinagoga, wu killa ajol ab asmma uwo wonus kalama ab kuweesi baara fuguwo.
Aba tee Yesu fih Nazaresi
(Matthew 13:54-58; Mark 6:1-6)
16Baada wedede Yesu dukur ruwa fih meddina tee Nazaresi meddina tee beyy too. Dukur uwo ruwa fih Sinagoga fih yom tee sabbit jee nammna ab uwo ggi soh. Dukur uwo yegif fih agara kalama ab jaa katif. 17Dukur wedi noowo kitabu ab Nebbi Isaaya jaa katif. Dukur uwo fata kitabu dee, uwo loggo bakaan ab katif fogo ligo ggi kelem,
18“Roho tee Rabbana Siddu teena fih bakaan wayyi mee anaa kalam uwo nigitu anaa fih kelem kabar ab kuweesi nee annas ab miskiinin, Orasul anaa nee annas ab robutu fih jela gali ‘fikku ummon,’ mee kelem nee amyaanin gali ummon bijja ayinu mara taani, mee annas ab ggi asuru bijja wedi noomon hakki tomon, 19Orasul anaa kede anaa jaa kelem nee annas gali dee yaa waakati ab Rabbana bijja weri huruma nee annas too.”
20Badda Yesu agara nee annas, okati kitabu dee uwo aarja nee ragi ab gihso fih Sinagoga dukur ogeeni falaata fih alim, killa ajol kutu fugu uwo enna. 21Ini yaa Yesu kelem noomon, “yom tee naare katif ab itaa asmma kun addil.”
22Annas kuul ab kaan fih inna, ummon wonus kalama ab kuweesi fugu uwo dukur ummon shannga mee kalama tee maana ab uwo wonus. Ligo ummon ggi asaadu badum tomon, “weede maa nyereku tee Yusufu?” 23Yesu kelem noomon gali, “fih hakki, itakkum bi kelem nee anaa ijamajako dee, diktari, ponyesha itaa baara, kuul ab inna asmma ligo gihso fih Kaperenawum, soh ini fih karni takki” 24Dukur ozidu, “seyi fih hakki gali annas maa agddear karibisha Nebbiya fih bakaan ab weleduwo fogo. 25Lakin fih hakki anaa ggi kelem nee itakkum gali, kaan fih nuswaana milaan ab rujala tomon muttu ligo Nebbi Eliya kaan hayyi fih Israel. Fih waakati ligo mattara maggi wagga tala min samayi mudda tee saana talata unus, mee jiyan wagga fih Bele kuul. 26Lakin Rabbana maa rasul Nebbi Eliya nee nuswaana ab rujala tomon muttu fih Israel, lakin uwo rasul uwo nee mariya ab ragi too jaa muttu ab maa tee Yudaaya fih meddina tee Zerufat fih Bele tee Sidon. 27Fih nammna wayyi kaan fih annas milaan ab endis ayan tee gildu ab tee guddrra fih Israel ligo Nebbi Elisa kaan hayyi lakin Elisa maa ponyesha ajol hatta wayyi. Lakin oponyesha Nayaman ab tee Syria ajol ab maa Yudaaya.” 28Bakaan annas kuul ab kaan fih-fih Sinagoga asmma kalama kuul ab Yesu wonus, ummon kuul zalan zaidi. 29Ini yaa ummon yegif, ummon turujuwo baara tee meddina tomon, fih torof tee gala ab sakar tee meddina sika fih fogo, uwon kaan aju liju uwo falaata min gala kede katul uwo. 30Lakin Yesu masi futu fih ustu tee annas dukur oruwa sika too.
Yesu ggi turuju roho ab batal
(Mark 1:21-28)
31Ini yaa Yesu ruwa fih Kaperenawum meddina tee Galilaya dukur uwo alim ummon fih Sinagoga tomon fih yom tee sabbit. 32Waakati Yesu alim annas, ummon kuul shannga kalam alim too kaan endis daraja. 33Yom wayyi ligo Yesu ggi alim fih Sinagoga kaan fih inna ragi wayyi abkan endis roho albatal. Owonus mee sauti tee foo gali; 34“Ooh! Yesu min Nazaresi, ley itaa ggi taban inna. Itaa fih ini fih keregi inna? Inna arfu jee itaa ajol abnedif ab tala min Rabbana.” 35Yesu taala sauti foo nee roho albatal ligo oggi kelem, “askutu, taala min ragi weede.” Dukur roho albatal jadda ragi dee fih tura fih gidaam tee killa wayyi dukur otala min ragi dee ata uwo awur uwo maa. 36Annas kuul ab kaan fih inna shannga dukur uwo abidu asaadu badum, “wedede alim teewen? Uwo ggi tummiya weezo milaan zaidi mee guddrra mee weeri nee roho albatal tala min annas dukur ggi tala min ummon.” 37Dukur kabar ab kaan ggi amsuku fugu uwo setetu fih killa karni fih Bele dee.
Yesu ggi ponyesha mamma tee mariya tee Pita
(Matthew 8:14-15; Mark 1:29-31)
38Badda Yesu tala fih Sinagoga fih yom naade, oruwa fih uwo tee Simon. Dukur uwo ligo naa mamma tee mariya tee Simon ligo uwo ayan malerria tee guddrra dukur ummon asaadu uwo ponyesha uwo. 39Yaa Yesu yegif geeri mee ayan dee dukur uwo amrisha malerria kede taala dukur fih gwaam zaidi opona, ogum foo gwaam dukur okarab akil noomon.
Yesu ponyesha annas milaan.
(Matthew 8:16-17; Mark 1:32-34)
40Waakati semsi wagga lasiya tee yom naade, annas dukur jibu noowo annas kuul abkan endis ayan tee fawti. Okutu idda too fih killa wayyi, oponyesha ummon kuul 41Kaan fih annas abkan endis roho ab batal, Yesu dukur amrisha kede roho albatal taala min annas; ligo ggi dugu kilele gali, “itaa yaa nyereku tee Rabbana” Lakin kalam jaa arfu jee uwo yaa Kristo. Uwo amrisha ummon kee askutu.
Yesu alim fih Galilaya
(Matthew 4:23-25; Mark 1:35-39)
42Waakati latta saba, Yesu ruwa fih bakaan ab pengele, kom tee annas dukur gussu uwo. Bakaan ummon loggo uwo, ummon asaadu kee uwo maa sibbu ummon. 43Lakin okelem noomon gali, “anaa endis tee ruwa fih meddina taanin fih alim kabar ab seme ab amsuku mamlaka tee Rabbana kalam yaa sabab ab Rabbana rasul anaa fogo fih duniya.” 44Ini yaa Yesu zidu alim fih killa Sinagoga tomon tee lim fih Bele tee Yudaaya.
Markert nå:
Lukka 4: KCN
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Nubi Bible by Beyond Translation is licensed under Creative Commons Attribution-ShareAlike 4.0 License.
