Lukka 3
3
Yokana albatiza uwo ggi adul sika
(Matthew 3:1-6; Mark 1:2-6; Yokana 1:19-23)
1Fih saana tee kamstashar ligo Sultan Tiberiyo yaa ggi hukkum mamlaka tee Romu, Pontius Pirato yaa kaan ggi gavana tee Yudaaya, Kerode yaa kaan ggi hukkum Galilaya, aku too Filipo yaa kaan ggi hukkum Italiya mee Tirakoniti 2Fih waakati dee ligo Anna mee Kayafa yaa kaan kubarina tee kahin, kabar tee Rabbana jaa nee Yokana nyereku tee Zakariya ligo uwo kaan ggi geni fih bakaan ab pengele. 3Yokana dukur abidu masi fih bakaana ab fih-fih toruf tee kooru tee Jodan. Uwo alim ligo uwo ggi kelem gali, “kaan itakkum aju kee Rabbana sama itakkum, gerukum kee itakkum sibbu zambi takkum. Dukur anaa bi batiza itakkum” 4Jee nammna Nebbi Isaaya katif zaaman zaidi, “sauti tee ajol ab ggi wonus fih bakaan ab pengele, adul tokum sika tee Rabbana ab ggi jaa dukur kee itakkum adul sika kee uwo futu fogo.
5Killa lufura bijja amla mee killa gala ab duga mee gala bijja amrugu. Mee sika ab jaa meelu bijja middu mee sika ab fogo lufura bijja kun sika ab leyin.
6Dukur annas kuul bijja ayinu hidaaya ab ggi taala nee Rabbana.”
Yokana ggi alim annas
7Annas milaan waakati jaa nee Yokana ligo aju kee batiza ummon. Okelem noomon gali, “itakkum annas albatal jee yaala tee debiba! Munu yaa jaa tahatharisha itakkum jerre min zalan tee Rabbana ab gurra jaa?” 8“Fih agddear pona izabu, itakkum endis masi fih hayyi ab ggi weeri gali itakkum geru min zambi takkum mee feker maa fih gelbba takkum gali, Rabbana bi izabu inna maa kalam inna yaala tee Ibrayim. Kalam anaa ggi kelem nee itakkum gali Rabbana agddear geru laagera dee kun yaala tee Ibrayim fih bakaan takkum. 9Mee saade Rabbana ggi ruwa izabu ummon kuul ab ggi geru maa min zambi tomon. Uwo fih jee ragi ab amsuku lufasi fih idda ligo uwo kalas adul fih gata shedel ab maa ggi kutu fogo matunda. Kaan ajol yoyote maa kutu fogo matunda ab seme, Rabbana bi izabu uwo mee kaman ajol dee bi kun jee shedel ab gata falaata dukur kalagu.” 10Annas ab kaan fih-fih kom asaadu Yokana, “kede inna soh sunu jerre izabu tee Rabbana?” 11Yokana ggibisha ummon gali, “ajol ab endis sati tinen, wayyi kede uwo wedi nee ajol ab endis maa, mee ajol ab endis akil kede uwo wedi nee ajol ab endis maa sokol tee akul” 12Mee annas taanin ab ggi lim musoro ummon kaman jaa kede batiza ummon, mon asaadu Yokana gali, “malim kede inna soh sunu?” 13Yokana ggibisha ummon gali, “maa takkum lim musoro ab ggi futu hadi tee ab ummon endis wedi” 14Fih nammna wayyi, askeria taanin ummon kaman asaadu Yokana, “aseede inna kaman kede soh keefin?” Yokana ggibisha fogo gali, “Matakkum amrugu min annas mali tomon. Dukur maa takkum kutu fugu ummon makosa ab ummon maa soh. Mee zawadi ab ggi wedi nee itakkum kede ggi tim itakkum.” 15Annas kaan gistenu Kristo jaa fih gwaam, dukur abidu feker gali Yokana yaa Kristo. 16Yokana dukur faham sokol ab kaan ummon feker, uwo kelem nee ummon gali, “anaa ggi batiza itakkum mee moyo, lakin ajol wayyi ab ggi shinda anaa ggi jaa gwaam. Anaa agddear maa fikku labil tee gezma too jee labbi kaan ggi soh. Obijja batiza itakkum min Roho abnedif mee naari. 17Keekey fih-fih idda too tee fereteku waskan min ngano obijja lim ngano fih sitowa mee waskan toode obijja hangu mee naari ab maa ggi muttu.” 18Yokana dukur kelem nee annas kalam milaan ab taanin ligo oggi kelem noomon kalama tee injil. 19Lakin yom wayyi Yokana wonus fih makosa tee Sultan Kerode, bakaan uwo jooju Kerodiya abkan mariya tee aku too, ligo aku too lissa hayyi mee sokolinna ab batalin abkan Kerode jaa soh. 20Firaas kalama dolde kuul Kerode ozidu fogo soh batal taani, uwo amsuku Yokana okutu uwo fih jela.
Yokana ggi batiza Yesu
(Matthew 3:13-17; Mark 1:9-11; Yokana 1:29-34)
21Waakati Kerode ligo lissa maa abbusu Yokana, Yokana kaan ggi batiza annas kuul ab jaa noowo mee uwo kaman batiza Yesu. Fih misho ligo Yesu ggi womba, samayi fata. 22Dukur Roho abnedif nenzil fugu uwo fih picha tee hamam. Dukur Rabbana wonus fih samayi ligo ggi kelem gali, “itaa yaa nyereku tayi ab anaa ggi furaayi noowo zaidi.”
Jidi-jidi tee Yesu
(Matthew 1:2-16)
23Yesu kaan kaala tim saana teletin dee yaa waakati ab uwo abidu moo kidima too.
Yesu kaan arfu uwo jee nyereku tee Yusufu mee Yusufu kaan nyereku tee Eli.
24Eli kaan nyereku tee Matati mee Matati kaan nyereku tee Leevi.
Leevi kaan nyereku tee Melik mee Melik nyereku tee Yanayi nyereku tee Yusufu.
25Yusufu kaan nyereku tee Matasiya mee Matasiya nyereku tee Amos.
Amos nyereku tee Nakum nyereku tee Esuli mee Esuli nyereku tee Naggayi.
26Naggayi nyereku tee Maasi mee Maasi kaan nyereku tee Matasiya.
Matasiya kaan nyereku tee Semeyi mee Semeyi kaan nyereku tee Yoseki nyereku tee Yoda.
27Yoda kaan nyereku tee Yokanaani mee Yokanaani kaan nyereku tee Lesa.
Lesa kaan nyereku tee Zerubaberi nyereku tee Seyalutyeeri
Mee Seyalutyeeri kaan nyereku tee Neeri.
28Mee Neeri kaan nyereku tee Melik mee Melik nyereku tee Addi nyereku tee Kossam.
Kossam kaan nyereku tee Elumadamu mee Elumadamu nyereku tee Eli.
29Eli kaan nyereku tee Yoswa mee Yoswa nyereku tee Eliyeza nyereku tee Yolem.
Yolem kaan nyereku tee Matati nyereku tee Leevi.
30Leevi kaan nyereku tee Simeoni nyereku tee Yuda.
Yuda nyereku tee Yusufu nyereku tee Yonam mee Yonam nyereku tee Elyakim,
31Elyakim kaan nyereku tee Meleya mee Meleya kaan nyereku tee Meena.
Meema kaan nyereku tee Mataasa mee Mataasa kaan nyereku tee Nasani.
Nasani kaan nyereku tee Daudi.
32Daudi kaan nyereku tee Yesse nyereku tee Obedi mee Obedi kaan-kaan nyereku tee Bowaz.
Bowaz kaan nyereku tee Salumon mee Salumon nyereku tee Nakuson.
33Nakuson kaan nyereku tee Aminadabu nyereku tee Aron.
Aron kaan nyereku tee Kezron mee Kezron nyereku tee Perezi nyereku tee Yuda.
34Yuda kaan nyereku tee Yakob nyereku tee Isaak nyereku tee Ibrayim nyereku tee Teera nyereku tee Nakoli,
35Nakoli nyereku tee Seruji mee Seruji kaan nyereku tee Lewu.
Lewu kaan nyereku tee Perezi nyereku tee Abel nyereku tee Seera nyereku tee Kainani.
36Kainani kaan nyereku tee Alupakusadi.
Alupakusadi kaan nyereku tee Seemu mee Semu nyereku tee Noah.
Mee Noah kaan nyereku tee Lameka.
37Lameka kaan nyereku tee Mesusera mee Mesusera nyereku tee Enoki.
Enoki nyereku tee Yaled mee Yaled nyereku tee Makalalidi nyereku tee Kainani.
38Kainani kaan nyereku tee Enos mee Enos nyereku tee Sezi.
Sezi nyereku tee Adam mee Adam nyereku tee Rabbana.
Markert nå:
Lukka 3: KCN
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Nubi Bible by Beyond Translation is licensed under Creative Commons Attribution-ShareAlike 4.0 License.
