मत्ती 19
19
छोड पत्र
(मर्कूस १०:१-१२)
1येशूये इसे कुराको डेम भ्याच न्हुइङ, होसको गालील डासार यर्दन नदीपारी यहूदौ इलाका पट्टी नुङा। 2भर्मीकुङ बाड्को भीड होसको न्हुङ-न्हुङ राहा, अनि होला होखुरीक मध्युङ कुडीक जना छाचकोलाक होसकै गेपाका।
3कुडीक जना फरिसीको येशू लेठाङ राहार होसकुङ मन खुसकी डेम गीना, “कानुङ व्यवस्था अनुसार सुयेर लहो मास्टोकी हीर कारणै छोड पत्र याखी खाट्ले की माखाट्ले?” 4तर होसकै जवाफ याहा, “ही नाखुरीकै धर्मशास्त्राङ मापरेस्नने? सुरुवाङ सृष्टि जाट्चये लेन्जा र मास्टो खासा।#उत्पत्ति १:२७ 5होसकै डेया, ‘होटबाटै भर्मीये लहो बोइ-मोइकी डासार लहो मास्टोखाटा खाट्न ङुले र होसे नीस जना काट न शरीर छान्ने।’#उत्पत्ति २:२४ 6होखुरीक अब नीस होइन, तर काट न शरीर छान्नने। होटबाटै परमेश्वरै सुकी काठोवाङ न जोडीमने, होखुरीककी सुयेर माभाक्ख्यो।”
7फरिसीकै येशूकी गीना, “इडीक होटडेनाङ मोशै हीजै लेन्जै लहो मास्टोकी छोड पत्र रीकार डास्च आज्ञा याहा ट?” 8होसकै जवाफ याहा, “नाखुरीकुङ कठोर मीमनै जाट्न न मोशै मास्टो डास्च अनुमति नाखुरीककी याछ हो। तर सुरुवाङ च याङ्च मालेया। 9ङा नाखुरीककी डेले, सुये व्यभिचारौ दोष बाहेक लहो मास्टोकी डासार अर्कोकी ब्याहा जाट्ले, होसे लेन्जै र व्यभिचार न जाट्ले।”
10चेलाकै येशूकी डेया, “लेन्जा मास्टोओ सम्बन्ध याङ्च न हो डेनाङ च, ब्याहा माजाट्की न सेम्ह छान्ने।” 11येशूये होखुरीककी जवाफ याहा, “पट्ट न भर्मीकै इसे वचन ग्रहण जाट्की माह्योक्ले। होखुरीकै मट्टै ह्योक्ले सुकी परमेश्वरै बुझडीस्च शक्ति याल्हे। 12हीजैडेनाङ कुडीक जना चहिँ डीन्हाङ न नपुङ्सक छान्ने, र कुडीक जना चहिँ भर्मीये खास्च नपुङ्सक छान्ने, कुडीक जना चहिँ स्वर्गौ राज्यौ लागि ब्याहा माजाट्न न ङुकी चुन्डीचको र छान्ने। सुये इसे ग्रहण जाट्की ह्योक्ले, होचे होसे ग्रहण जाट्ख्यो।”
येशू र मार्जा जजाको
(मर्कूस १०:१३-१६; लूका १८:१५-१७)
13होडीक बेला येशूये जजाको मीटाक मीहुट डार प्रार्थना जाट्न याख्यो डेयार भर्मीकै लहो मा-मार्जा जजाकोलाक येशू लेठाङ राका। तर चेलाकै होसे भर्मीकोलाक हक्कारीया। 14तर येशूये डेया, “मार्जा जजाकोलाक ङा लेठाङ राखी यान्ही होखुरीककी मारोक्डीनी। हीजैडेनाङ स्वर्गौ राज्य याङ्चकुङ न हो।”
15येशूये जजाको मीटाक मीहुट डार आशिष याम्ह भ्याच न्हुइङ होसको होटै ह्वाकी क्योटा।
धनी रेन्जा भर्मी
(मर्कूस १०:१७-३१; लूका १८:१८-३०)
16काट जना रेन्जा भर्मी येशू लेठाङ राहार गीना, “ए गुरु, सेन र मासीच जीवन डुप्की ङै कुङ्च सेछ काम जाट्की पर्ले?”
17येशूये होसकी डेया, “सेछ ही हो होसे विषयाङ नाकै ङाकी हीजै गीन्ने? असल च काट जना मट्टै ले। तर नाकै सेन र मासीच जीवन डुप्च मीमन जाट्ले डेनाङ, आज्ञाको पालना जाट्की।”
18होचे येशूकी गीना, “कुसे-कुसे आज्ञाको चहिँ हो?” येशूये डेया, “नाकै भर्मी मासाट्की, व्यभिचार माजाट्की, माखुस्की, झूटो गवाही माह्याखी, 19लहो बोइ-मोइकी आदर जाट्की, लहो छिमेकीकोलाक लाहाकी लेखा न माया जाट्की।”#प्रस्थान २०:१२-१६; व्यवस्था ५:१६-२०; लेवी १९:१८
20होसे रेन्जा भर्मीये होसकोकी डेया, “इसे पट्ट न आज्ञाको च ङै मन्डीमने। अझै अरु ङै ही जाट्की पर्ले?”
21येशूये होसे रेन्जा भर्मीकी डेया, “नाको सिद्ध छान्की मीमन जाट्ले डेनाङ, नुङार नाकोखाटा लेच पट्ट न आर्लार गरीबकोलाक यान्ही र नाकै स्वर्गाङ धन डुप्ले। होटै रान्ही र ङाकी डुट्नी।”
22जब याङ्च कुरा सेया तब होसे रेन्जा भर्मीये मीटाहा छुम्छ खासार नुङा, हीजैडेनाङ होच्यो वास्टै धन-सम्पत्ति लेया।
23अनि येशूये लहो चेलाकोलाक डेया, “साँच्ची न, ङा नाखुरीककी डेले, स्वर्गौ राज्याङ पर्की धनी भर्मीकी गाह्रो छान्ने। 24फेरि ङा नाखुरीककी डेले, धनी भर्मीकी परमेश्वरौ राज्य भित्री पर्की डेनाङ च बरु उँटकी आर्चौ ह्वाङीङ पर्की सजिलो छान्ने।” 25चेलाको इसे कुरा सेयार छक्क पर्चै गीना, “होटडेनाङ सुये चहिँ मुक्ति डुप्की ह्योक्ले ट?” 26येशूये होखुरीककी ङोसार डेया, “भर्मीकुङ लागि इसे कुरा छान्की माह्योक्ले, तर परमेश्वरौ लागि चहिँ पट्ट न कुरा छान्की ह्योक्ले।”
27होटै पत्रुसै होसकोकी डेया, “ङोस्नी कानै च पट्ट न ठोक डासार नाकोकी डुट्नने। कानै चहिँ ही डुप्ले ट?” 28येशूये होखुरीककी डेया, “साँच्ची न, ङा नाखुरीककी डेले, नाखुरीक ङाकी डुट्चको, जब परमेश्वरै पट्ट ठोक नयाँ खास्ले भर्मीयो मीजा लहो महिमौ सिंहासनाङ ङुले, होडीक बेला नाखुरीक र बाह्र सिंहासनाङ ङुले र इस्राएलुङ बाह्र कुलमीटाक शासन जाट्ले। 29ङौ म्यार्मीनौ खातिर सु-सुये लहो इम, डाजेभाइको, डैबहिनीको, बोइ-मोइ, मीजाको, जग्गाको डास्ले, होचे इसे डेनाङ सय गुणा वास्टै डुप्ले र सेन र मासीच जीवन र डुप्ले। 30तर चाहाँ धेरै अघि लेचको न्हुङ्लाक छान्ने, र धेरै न्हुङ्लाक लेचको अघि छान्ने।”
Markert nå:
मत्ती 19: EMGP
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2025 by Mother Tongue Translators Society and Wycliffe Bible Translators, Inc.
