मत्ती 20
20
अङ्गुर बारीयो ह्यामीकुङ उदाहरण
1 “स्वर्गौ राज्य चहिँ याङ्च हो। कागोराक न काट जना बारीयो मीमुरुङ लहो अङ्गुर बारीयाङ काम लैडीकी भर्मी पाकी ख्योहा। 2‘कायाकौ ज्याला चाँदीयो काट सिक्का याल्हे’ डेम भर्मीकोलाक काम लैडीया। 3जब होसे मीमुरुङ नौ बजे पट्टी बजाराङ नुङा, होला कुडीक जना भर्मीको काम माछानार होटन टोङ्ह ङुच डाङा। 4होचे होसे भर्मीकोलाक डेया, ‘नाखुरीक र ङौ अङ्गुर बारीयाङ नुङार काम जाट्नी, ङा नाखुरीकै डुप्की पर्च ज्याला याल्हे।’ 5होटै होखुरीक काम जाट्की नुङा। फेरि होचे बाह्र बजे पट्टी र सोम बजे पट्टी बाहिर ख्योहार होटजाट्न न अरु भर्मीकोलाक र कामाङ लैडीया। 6फेरि होटजाट्न न बाङा बजे पट्टी बाहिर ख्योहा, होडीक बेला र कुडीक जना भर्मीको काम मालेम टोङ्ह ङुच डाङा। अनि होचे होखुरीककी गीना, ‘नाखुरीक हीजै इला दिनभरि काम बिना न टोङ्ह ङुच?’ 7होखुरीकै जवाफ याहा, ‘कानकी सुयेर कामाङ मालैडीया।’ अनि होचे होखुरीककी डेया, ‘नाखुरीक र नुङार ङौ अङ्गुर बारीयाङ काम जाट्नी।’
8 “होटै नामबीक्रखीङ अङ्गुर बारीयो मीमुरुङै लहो काम जाट्चकुङ नाइक्याकी आर्घार डेया, ‘ह्यामीकोलाक आर्घार ज्याला यान्ही न्हुइङ राछ लकीङ लार अगाडि राछको पट्टकी न।’ 9अनि बाङा बजे कामाङ लग्डीस्चको राहार होखुरीक पट्टकै पूरा दिनौ ज्याला काट-काट चाँदीयो सिक्का डुपा। 10पट्ट डेनाङ पहिला कामाङ लग्डीस्चको र राहार होखुरीकै चहिँ वास्टै डुप्ले डेम विचार जाटा। तर होखुरीक पट्टये कायाकौ काट-काट चाँदीयो सिक्का डुपा। 11होखुरीकै लाहा लहो ज्याला लामभ्याच न्हुइङ बारीयो मीमुरुङ लेठाङ नुङार गन-गन जाट्की ठाला। 12होखुरीकै डेया, ‘इसे न्हुइङ राछ भर्मीकै च काट घण्टा मट्टै काम जाटा, तर नाकै होखुरीककी कान खान्छ नाखान सहडीयार दिनभरि काम जाट्चकोलाक टडीक न ज्याला याहा।’ 13तर मीमुरुङै होखुरीक मध्याङ काट जनाकी जवाफ याछै डेया, ‘लाफा, ङै नाको मीटाक हीर अन्याय माजाट्ने। ही नाको पूरा कायाकौ ज्यालाङ काम जाट्की राजी छान्च होइन र? 14नाकै डुप्की पर्च ज्याला लार इमाङ नुङ्नी। ङा इसे ढिलो राछकोलाक र नाकोकी टडीक न ज्याला याछ मीमन ले। 15ही ङाल्हौ पैसा ङाकी मीमन सेचकोलाक याखी ङौ अधिकार माले र? ङै इखुरीककी भलो जाट्नाङ हीजै नाखुरीक मीरीस जाट्ले?’”
16येशूये डेया, “इटजाट्न न न्हुङ्लाकुङ पहिला र पहिलुङको न्हुङ्लाक छान्ने।”
येशूये लाहा सीकी पर्च कुरा फेरि डेच
(मर्कूस १०:३२-३४; लूका १८:३१-३४)
17यरूशलेम पट्टी नुङ्ङ न लेनाङ येशूये लहो बाह्र जना चेलाकोलाक काटपट्टी आल्हार डेया, 18“ङोस्नी, काल्हा ढेनाम यरूशलेम पट्टी नुङ्ङ न ले। होला भर्मीयो मीजाकी मुख्य पूजाहारीको र धर्मगुरुकुङ मीहुटाङ याल्हे। अनि होखुरीकै होसकोकी मृत्युदण्डौ योग्य ठहरीले। 19अनि होसकोकी गिल्ला जाट्की, कोर्रा ङाप्की, र क्रूसाङ टङ्गडीकी डेम होखुरीकै अन्यजातिकुङ मीहुटाङ सुम्पडीम याल्हे। र सोम याकाङ होसको सीच लकीङ फेरि जीवाम सोले।”
मोयो बिन्ती
(मर्कूस १०:३५-४५; लूका २२:२४-२७)
20जब्दियो नीस लेन्जा मीजाकोलाक मेन मोये लार येशू लेठाङ राहा। अनि होसकुङ अगाडि घुँडा टुसार होसकोखाटा बिन्ती जाटा। 21अनि येशूये होसकी गीना, “लु डेनी, ही चहडीसा?” होचे होसकोकी डेया, “बिन्ती ले, नाकुङ राज्याङ ङौ इसे नीस लेन्जा मीजाको नाकुङ डोर र देब्रेपट्टी ङुकी डीन्ख्यो।” 22तर येशूये होखुरीककी डेया, “नाखुरीकै ही ङेम्हन ले, होसे नाखुरीक माह्वार्ले। ही ङै गाकी पर्च दु:खओ कचौरा लकीङ नाखुरीक गाकी ह्योक्ले?” होखुरीकै डेया, “कान ह्योक्ले।” 23येशूये होखुरीककी डेया, “ङै गाच कचौरा लकीङ नाखुरीक र गाले, तर ङौ डोर र देब्रेपट्टी ङुकी याछ कुरा चहिँ ङौ मीहुटाङ माले। इसे ठाउँको च ङौ बोये सुओ लागि तयार खास्नने, होखुरीकुङ लागि मट्टै हो।”
24जब इसे कुरा अरु दश जना चेलाकै सेया, अनि होखुरीक होसे नीस जना डाजेभाइखाटा मीरीस ख्योहा। 25तर येशूये होखुरीक पट्टकी काठोवाङ आर्घार डेया, “नाखुरीककी थाहा न ले, अन्यजातिकुङ शासककै लहो प्रजाको मीटाक लहो खुसी जाटार हक क्योट्ले अनि बाड्को भर्मीकै होखुरीक मीटाक अधिकार क्योट्ले। 26अनि नाखुरीक मीघ्याङ चहिँ होङ्च छान्की माछान्ने। तर सु नाखुरीक मध्याङ बाड्को छान्की मीमन जाट्ले, होचे अरु पट्टकुङ सेवा जाट्की पर्ले। 27नाखुरीक मध्याङ सु पहिला छान्च मीमन जाट्ले, होसे अरुकुङ दास छान्की पर्ले। 28होटजाट्न न भर्मीयो मीजा र सेवा डुप्की होइन तर सेवा जाट्की र वास्टै जनौ छुटकारौ लागि लहो जीवन याखी राछ हो।”
येशूये नीस जना मीमीक माडाङ्चकोलाक गेपाक्च
(मर्कूस १०:४६-५२; लूका १८:३५-४३)
29येशू र मेकुङ चेलाको यरीहो लकीङ नुङ्ङ न लेनाङ, भर्मीकुङ बाड्को भीड होसकुङ न्हुङ-न्हुङ लग्डीसा। 30नीस जना मीमीक माडाङ्च भर्मीको लामौ छेवाङ ङुम-ङुमन्या। अनि होखुरीकै येशू होसे लामलकीङ न नुङ्ङ न ले डेच सेया, तब होखुरीक इट डेम च्याका, “ए प्रभु, दाऊदौ मीजा, कान मीटाक दया जाट्न यान्ही!” 31भर्मीकै होखुरीककी “माच्याक्नी” डेयार हक्कारीया। तर होखुरीकै झन् बाड्को स्वराङ डेया, “ए प्रभु, दाऊदौ मीजा, कान मीटाक दया जाट्नी!” 32तब येशू टोङ्हा र होखुरीककी आर्घार गीना, “नाखुरीकुङ लागि ङै ही जाट्न येहीङ?” 33होखुरीकै डेया, “ए प्रभु, कानै मीमीक डाङ्की ह्योकीङ!” 34येशूकी रोम सेया र होखुरीकुङ मीमीक छुम याहा। र होडीक न बेला होखुरीकै मीमीक डाङ्की ह्योका, होटै होखुरीकै येशूकी डुटा।
Markert nå:
मत्ती 20: EMGP
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2025 by Mother Tongue Translators Society and Wycliffe Bible Translators, Inc.
