मत्ती 18
18
पट्ट डेनाङ बाड्को सु हो?
(मर्कूस ९:३३-३७; लूका ९:४६-४८)
1होडीक बेला चेलाको राहार येशूकी गीना, “स्वर्गुङ राज्याङ पट्ट डेनाङ बाड्को सु हो?” 2येशूये काट मार्जा जजाकी खेरेप आर्घार होखुरीकुङ मीघ्याङ टोङ्खी लैडीया। 3र डेया, “साँच्ची न ङा नाखुरीककी डेले, लहो मीमन परिवर्तन जाटार नाखुरीक मार्जा जजाको लेखा न माछाना डेनाङ सेन र स्वर्गौ राज्याङ पर्की माह्योक्ले। 4तर सुये इसे मार्जा बालक लेखा न लाहाकी नम्र खास्ले, होसे न स्वर्गौ राज्याङ पट्ट डेनाङ बाड्को छान्ने। 5सुये ङौ म्यार्मीनाङ काट मार्जा बालककी ग्रहण जाट्ले, होचे ङाकीर ग्रहण जाट्ले।
पापाङ पार्च कुराको
(मर्कूस ९:४२-४८; लूका १७:१-२)
6 “इडीक सुयेर ङा मीटाक विश्वास जाट्च इसे मार्जा बालकको मध्याङ काट जनाकी र पाप जाट्की लैडीले डेनाङ, बरु होच्यो मीघाटीयाङ बाड्को झाँटा च्योलोकार लुप्च समुद्राङ लोम्हकाकी न सेम्ह छान्ने। 7भर्मीकोलाक पाप जाट्की लैडीच कुराकुङ लागि इसे संसारकी धिक्कार! याङ्च कुराको च राखी न पर्ले, तर धिक्कार होसे भर्मीकी सु लकीङ पाप जाट्की लैडीच कुराको राल्हे!
8 “इडीक नाकुङ मीहुट वा मीखुट्यै नाकोकी पापाङ पार्ले डेनाङ होसकी चेयार लोम्हकानी। नीस न मीहुट वा मीखुट्या लार सेन र मासीच म्हेयाङ पर्की डेनाङ च डुड्या र लङ्गडो छानार सेन र मासीच जीवन डुप्की न सेम्ह छान्ने। 9इडीक नाकुङ मीमीकै नाकोकी पाप जाट्की लैडीले डेनाङ, होसकी डोनार लोम्हकानी। नीस मीमीकखाटा नरकुङ म्हेयाङ नुङ्की डेनाङ च बरु काट मीमीकखाटा मट्टै सेन र मासीच जीवन डुप्की सेम्ह छान्ने।
म्हाट्च भेडौ उदाहरण
(लूका १५:३-७)
10 “होशियार छान्नी, नाखुरीकै इसे मार्जाको मध्याङ काट जनाकीर हेला माजाट्नी। ङा नाखुरीककी डेले, स्वर्गाङ लेच होखुरीकुङ स्वर्गदूतको सधैँ स्वर्गुङ ङौ बोयो म्याहासाङ ङुम-ङुले। 11[हीजैडेनाङ भर्मीयो मीजा च म्हाट्चकोलाक जीवाटाक्की डेम राछ हो।]#१८:११ इसे बाड्को कोष्ठ भित्री लेच शब्दको चहिँ कोइ कोइ संस्करनौ बाइबलाङ माले।
12 “नाखुरीककी कुङ्च सेले? काट जना भर्मीयो काट सय वटा भेडा लेया, होसे मध्याङ काट भेडा लाम ल्हीटार म्हाटा डेनाङ, होचे उनान्सय वटा भेडाकोलाक चह्रनाङ न डासार होसे लाम ल्हीटार म्हाट्च भेडाकी पाकी मानुङ्ले र? 13ङा साँच्ची न नाखुरीककी डेले, अनि होसे लाम ल्हीटार म्हाट्च भेडाकी डुपा डेनाङ, अरु लाम माल्हीट्च उनान्सयो डेनाङ होसे काटौ लागि होसे माह्राङ्ले। 14होटजाट्न न इसे मार्जा बालकको मध्याङ काट जना र माम्हाट्ख्यो डेच नाखुरीकुङ स्वर्गाङ लेच बोयो इच्छा ले।
अपराध जाट्च भाइ
(लूका १७:३)
15 “इडीक कुसेर विश्वासीये नाकुङ विरुद्धाङ पाप जाटा डेनाङ, नुङार होसे र नाकै नीस जना लेनाङ मट्टै होसे पाप टान्हाक्ङ यान्ही। अनि होचे नाकुङ कुरा सेया डेनाङ, नाकुङ भाइ छाना। 16तर होचे नाकुङ कुरा मासेया डेनाङ अरु काट नीस जनाकी र आल्खी, अनि नीस अथवा सोम जना साक्षी लकीङ पट्ट न कुरा पक्का छान्ख्यो। 17इडीक होचे होखुरीकुङ कुरा र सेकी मामन्डीया डेनाङ, नुङार इसे कुरा मण्डलीकी डेम यान्ही। अनि होचे मण्डलीयो कुरा र सेकी मामन्डीया डेनाङ, अब होसे नाकुङ लागि मूर्ति पूजा जाट्च र कर सोट्चको सरह छान्ख्यो।
18 “ङा साँच्ची न नाखुरीककी डेले, नाखुरीकै पृथ्वीयाङ ही छ्याक्ले, होसे स्वर्गाङ र छ्याक्ले। अनि नाखुरीकै पृथ्वीयाङ ही पीसाक्ले, होसे स्वर्गाङ र पीसाक्ले। 19फेरि ङा नाखुरीककी डेले, पृथ्वीयाङ नाखुरीक मध्याङ नीस जनै कुसेर कुराङ खाटार हीर कुरा ङेहा डेनाङ, स्वर्गाङ लेच ङौ परमेश्वर बोये नाखुरीकुङ लागि होसे याल्हे। 20हीजैडेनाङ कुला नीस की सोम जना ङौ म्यार्मीनाङ भेला छान्ने, होला ङा होखुरीकुङ मीघ्याङ छान्ने।”
निर्दयी नोकरौ उदाहरण
(लूका १७:४)
21येशू लेठाङ राहार पत्रुसै गीना, “ए प्रभु, सुयेर ङौ विरुद्धाङ पाप जाट्न ङुवा डेनाङ होसकी ङै कुडीक पल्टसम्म क्षमा याखी? सात पल्टसम्म?”
22येशूये होसकी जवाफ याहा, “ङा नाकोकी डेले, सात पल्ट होइन, तर सत्तरी गुणा सात पल्ट। 23होटबाटै स्वर्गौ राज्य काट राजा ल्याक्च न हो, होचे लहो नोकरकोखाटा हिसाब लाच मीमन जाटा। 24जब होसे राजै हिसाब लाकी सुरु जाटा, अनि दश हजार सुनौ सिक्का ऋण लाच काट जना भर्मी होसे लेठाङ राका। 25तर होसे भर्मीये ऋण तेरीकी माह्योका। होटबाटै राजै लहो नोकरकी इट डेम हुकुम याहा, ‘होसे भर्मीकी, मेन मास्टो, मेन मीजाको र होसेखाटा लेच पट्ट न ठोक आर्लार ऋण चुक्ता जाट्की।’ 26होसे नोकरै राजौ अघि घुँडा टुसार बिन्ती जाटा, ‘मालिक, ङाकी कालाप लेन्न यान्ही, ङा नाकुङ पट्ट न ऋण चुक्ता जाट्ले।’ 27अनि होसे नोकरौ राजै होसे मीटाक दया जाटार होच्यो पट्ट न ऋण माफ जाट्न याहा र होसकी नुङ्की याहा।
28 “तर होसे नोकरै ख्योहार नुङ्नाङ लाहाखाटा काम जाट्च काट जना नोकरकी डुपा, होसेखाटा होच्यो काट सय चाँदीयो सिक्कौ ऋण लेया। होसकी मीघाटीयाङ घोवार होचे डेया, ‘नीये ज्याच ङौ ऋण तेरीकी क्योटो!’ 29तर होच्यो लाफा नोकरै होच्यो अघि घुँडा टुसार बिन्ती जाट्चै डेया, ‘कालाप लेन्न यान्ही, ङा नाकुङ पट्ट न ऋण तेरीले।’ 30तर होसे मामन्डीयार ऋण मातेरीठर होसकी झ्यालखानाङ काम याहा।
31 “होसे नीस जनाखाटा न काम जाट्च अरु लाफाकै र होसे पट्ट न कुरा ङोस्न ङुमन्या। होखुरीककी एकदम दु:ख लग्डीसा। होखुरीक नुङार राजाकी पट्ट न कुरा डेम याहा। 32अनि राजै होसे नोकरकी आर्घार डेया, ‘ए दुष्ट नोकर! नुओ बिन्ती सेयार ङै नाङ्की पट्ट न ऋण मीनाहा जाट्न याहा। 33ङै नाङ्की दया जाट्नाङ लेखा न नीये र लाहाखाटा काम जाट्च लाफाकी दया जाट्की पर्च होइन र?’ 34राजा मीरीस ख्योहार नोकरै पट्ट न ऋण चुक्ता माजाट्ठर होसकी दण्ड याखी झ्यालखानाङ ठुन्च हुकुम याहा।”
35होटै न्हुइङ येशूये चेलाकोलाक डेया, “नाखुरीकै लहो हृदय लकीङ पट्टकी क्षमा माह्या डेनाङ स्वर्गाङ लेच ङौ परमेश्वर बोये र नाखुरीककी होङ्च न जाट्ले।”
Markert nå:
मत्ती 18: EMGP
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2025 by Mother Tongue Translators Society and Wycliffe Bible Translators, Inc.
