Populære bibelvers fra وَحی 8

Del

وَختی که بَرَّه، مُهر هَفتُما واز شاکِه نَزیک نیم‌ساعت تِی آسِمو سکوت بو.

فرشتَه اوّل شیپورُش شُ صدا در اَئو، و تِغَرگ و تَش که خاد خون تِی‌یَه هاد لِی زِمی لِتَه بو. یَک سوّم زِمی سُت، یَک سوّم درختیا سُتِت و هَمَهِ علافِی سَوز سُتِت.

بعد ما چَش اُمکِه، و اُمشُنُفت که یَک عقاب هَموناکِه وسط آسِمو فَل شَکِه وَ صدای بلند کال شَکِه که: «وای، وای، وای اُ آنایایی که لِی زِمی زندگی اَکنِت، چِی آنِمودِ که سه‌تا فرشتَه دِگَه شیپورشو اُ صدا در بیارِت.»

فرشتَه دوّم شیپورُش شُ صدا در اَئو، و چِی چُنِ یَک کاوِ گات که خاد تَش اَسُت اُ تِک دریا اُفتَدَ بو، و یَک سوّم دریا آ خون بو.

فرشتَه سوّم شیپورُش شُ صدا در اَئو، و یَک اِستَرَهِ گات چُنِ یَک مَشعلی که تَش اُشبارِستاد از آسِمو لِی یَک سوّم از ریخونَه‌یّا و چِشمَه‌ئِی هُو اُفتَه. اسم مِ اِستَرَ وا اَفْسَنْتینِه. یَک سوّم هاویا از اَفْسَنْتین تَهر بُدِت، و بُری از مردم از مِ هاوا مُردِت، اَسِی که هاویا تَهر بُستادِت.

فرشتَه چهارم شیپورُش شُ صدا در اَئو، و یَک سوّم خورشید و یَک سوّم ماه و یَک سوّم از اِستَرَیّا ضربَه شُخَه، اوناکِه یَک سوّم از نورشو تَرَ بو. و یَک سوّم از راز و هَمینا هم یَک سوّم از شُو بدون نور آمودِت.