Populære bibelvers fra मिका 3

Del

“रही मेरी गल्‍ल, मुल्है आसा बिधाते आत्मां खास्सअ बल दैनअ द। सह खोज़ा मुखा कि भलअ अर नसाफ किज़ै आसा। सह ई दैआ मुल्है तम्हां याकबे आद-लुआदा संघै गल्‍ला करने हिम्मत। हुंह सका तम्हां का खोज़ी कि तम्हैं किज़ै पाप किअ। तम्हैं आसा इज़राईली पर तम्हैं निं ज़िहअ बिधाता बोलअ तिहअ किअ आथी।

तम्हैं आसा नगरी दी राज़ करनै आल़ै पर तम्हैं खाआ रेशपत अर तेखअ निं तम्हैं लोगो शुचअ नसाफ करदै! तम्हैं प्रोहत दैआ लोगा लै शिक्षा ज़ै तम्हां लै तिंयां ढब्बै दैए। तम्हैं गूर खोज़ा आजू हणैं आल़ी गल्‍ला सिधै ढब्बै झाल़णैं तैणीं! तज़ी बी बोला तम्हैं इहअ कि तम्हैं आसा मालके आसरै! तम्हैं बोला इहअ पै, ‘बिधाता आसा हाम्हां संघै अर हाम्हां लै निं किछ़ै बूरअ हणअ!’

एक बगत एछणअ तम्हां कदुष्ट सैणैं लै इहअ कि तम्हैं हणैं बिधाता सेटा लेर-पकार पाई मज़त मांगदै लागै दै, पर तेऊ निं थारी मज़त करनी। ज़ेभै अह बगत एछे तेभै डाहणीं बिधाता थारै कदुष्ट कामां पिछ़ू तम्हां बाखा पिठ फरेऊई।