Populære bibelvers fra RUM 12

Del

Mai keh kivu barék kelunan éh bé' ngelan tong Tuhan, bang jian keh kejeraa' Allah ngepaléu kenin keh mu'un neu' Iah ngepaléu kekat penyeruh keh tong éh sa'at rai. Boh keh omok jam tong pengeloo' Allah ngan jam tong kekat éh jian ngan éh ngepayoo' kenin Néh ngan sukup mu'un.

O kekat padéé' ké', hun néh kenat uban kuraa'-kuraa' penika Allah ngan lu', akeu' nyohoo' keh mena' usah keh ngan Allah barei' jah pengena' ngan Allah dokoo' usah keh inah omok anah Tuhan mu'un ngan maneu' kereja' Néh, inah éh omok ngepayoo' kenin Néh. Inah éh jalan éh tekep ngan kelunan éh seva' Iah.

La'ah uban pengelan keh tong Tuhan, jian keh ngelayau murung kenin ngan kebit kenin dalem kekat penusah keh, ngan ngelayau sebayang siget koléé'.

Mai keh sopéé' neu' kesa'at, bang jian keh nyopéé' kekat kesa'at palaa' pengejian.

Jian keh pika kekat padéé' keh dalem Kristus, jian keh pata ngerera'.

Jian keh pika kelunan mu'un, mai keh ngelayoo' awah pika réh. Jian keh leko tong kekat éh sa'at, ngan megem kekat éh jian awah.

Jian keh pekalai mu'un murip ngan pawah kenin belah kekat kelunan béé.

O kekat padéé' ké'! mai ka'ah ngesa'at kelunan na' péh irah ngesa'at keh bu'un, bang kejeraa' néh Tuhan mipa penganeu' réh inah, uban pu'un jah ha' lem surat Allah éh bara' Akeu' omok maneu' irah éh maneu' keh, Akeu éh mena' oléé' ngan réh kepéh ha' Tuhan.

Mai keh leko kereja', kereja' mu'un keh. Jian keh maneu' kereja' Tuhan ngan kekat kenin keh.

Uban neu' pengena' Allah éh lepah nena' Néh ngan ké', inah akeu' bara' ngan ka'ah, mai keh bau kenin ngan ulak juk maneu' ineu'-ineu' hun Allah bé' mena' éh ngan keh. Kenat péh mai keh seruh ka'ah kelunan éh ulak sa'at awah, ngan Tuhan bé' keloo' pakai keh, bang jian siget usah keh petuneng tong kenin keh tengéé', pekua' jalan keh ngelan keh omok pakai pengena' Allah ngan keh.

Hun kelunan ngesa'at keh, mai keh mipa kesa'at réh ngan kesa'at kepéh. Pekalai keh maneu' kekat éh pu'un jian kunah kelunan.

Jian ka'ah pekua' kenin ngan kekat kelunan béé. Mai keh bau kenin, bang maneu' kekat kereja' keh ngan diva' kenin. Mai keh ngajung usah keh uban keh seruh ka'ah kelunan éh jam seruh.

Pu'un jah ha' kepéh éh bara', Hun ayau keh la'au', mena' ka'an ngan néh. Hun iah mapeu' batok, mena' baa' nesep néh, uban naneu' penganeu' keh pika iah kenat, barang iah omok menyaa' seruh tong kekat barék néh éh sa'at lepah nah, ha' lem surat Allah.

Menyat Allah pika kelunan éh peketa ka'ah, oo' mu'un ha' ké' kenat, menyat Iah pika réh, mai menoo' réh. Murung kenin keh ngan kelunan éh murung kenin, ngan mangaa' keh ngan kelunan éh mangaa'.

Jian keh petulat livah keh ngan kekat padéé' keh dalem Tuhan éh kari mu'un, jian keh alaa' irah éh nyakai tong lamin keh ngan petubo réh mu'un.

Uban tong usah uleu' pinaa' arong néh, barei' ojoo' ngan gem ngan maten, ngan siget-siget inah tengéé' éh neu' Néh. Kenat péh na' péh uleu' pinaa' usah, uleu' péh barei' jah usah awah dalem Kristus, ngan pu'un pemung pekua' barei' kekat arong éh pu'un tong usah kelunan.