Sáni Mateo 13
13
VII. ARHITS'ÏKPERAKUA IÚMU TSIMANI TERUKUTANTSKUECHANI JIMPO
(13.1-52)
Tsíri jatsiriri uantantskua
(Mk 4.1-9; Lk 8.4-8)
1Imani jurhiatekua jimpot'u Jesusi uéraspti ka japuntarhu uanamukuni uaxakaspti. 2Ka uánekuaksï antarheraspti, ka Jesusi icharhutani jataspti ka uaxakaspti, ka iámentuechaksï japuntarhu uanamukuni pakaraspti. 3Mámaru ampe uantaxekuasïrempti uantantskua terukutarantskua jimpo, arhiaparini: “Tarheri ma niraspti tríju k'uáp'ani. 4Ka k'uap'ani jámani, máruksï tríjuecha xanhari jimpo antatseraspti ka kuínichaksï ántskantaspti. 5Máteruksï tsakapentu antatseraspti, jima enka no káni echeri jápka, ka jima sóntku antaraspti jimpoka no kánekua inchatsespka; 6k'óru tata jurhiata antaratini, tríjuni k'arhiraspti, jimpoka sïrankua no inchatsespka. 7Máteruksï akarhenirhu antatserasti, ka enka akarheni k'épka óch'akuraaspti. 8Ka máruksï ampakiti echerirhu antatseraspti, ka sési antaraspti; máruksï iúmu ekuatsechani tríju jukaspti, máteruksï tanimu ekuatsechani, ka máteruksï ma ekuatse témpenichani jukaspti. 9Ne enka jurhenaka kurhani, kurhankunte.”
Anti enka Jesusi uantantskuechani jimpo jurhentpempka
(Mk 4.10-12; Lk 8.9-10)
10Jurhenkorheri jémpechaksï Jesusini antarheraspti ka kurhamarhesptiksï: “¿Antirisï terukutantskuecha jimpo uantaxekuak'i?” 11Ka Jesusi arhiantaaspti: “Jimpokats'ï cha mítetaranhaska auantarhu anapu irechekua ampe enka no mítekorheka, ka inteksï no mítetaranhasti. 12Ima enka jatsikorheka sánteru intsïnhaatiteru ka sánteru kánerakorheati, ka ima enka no jatsikorheka euanhantaati sáni ampe enka jatsikorheka. 13Jimposïni terukutantskuechani jimpo uantaxekuak'a, jimpokaksï inte éskaxaka ka nóksï exesïnti, kurhasïntiksï ka nóksï kurhankusïnti. 14Intecha jimpo úkorhexati ampe enka Diósïri uantari Isaiasi uantaka:
‘Na uék'iksï xáni kurhani jarhani,
nóksï kurhankuati,
ka náuek'iksï éskani jarhani,
nóksï exeati.
15Jimpoka i ireteri mintsita
chuperi úkorhetixaka,
ka mínharhikorhestiksï jimpokaksï
no uékasïnka exeni,
ka níksï mintsita jinkuni kurhankukuekak'i,
jimpokats'ïni no uékasïnka antarhentaani,
ka ji no úaka ampakerantaani.’”
16“Cha k'óru tsípe je, jimpokats'ï exexaka ka kurhankuxakats'ï. 17Sési jimpoksïni arhixaka, eskaksï uánekua Diósïri uantaricha ka kaxumpitichaksï, exekuekaska ka kurhaakuekanksï íni ampe enkats'ï cha exeni jaka ka kurhani jarhani, ka nóksï exesti.”
18“Kurhaa je, ampe enka arhikuekak'a tarheriri uantantskua: 19Ima enkaksï irechekueri uantakuani kurhak'a, ka nóksï kurhankuni, ísïstiksï eska tríju enka xanhari jimpo antatseraka; nóampakiti janokusïnti ka aiankperatani k'arhuaskamaasïnti enka mintsitarhu júkskakata jápkia. 20Ka ima tríju enka tsakapentu antatseraka, imechani arhikuekaaxati enkaksï uantakuani kurhak'a ka tsípekua jinkunksï p'irani, 21ka enka no úka sïrankua jukani, nóksï úsïnti p'ínkukorheni ka tsîrhukusïntiksï enkaksï aiankperakua jimpo ts'ék'unhak'a ka nósesiksï kánhani. 22Ka ima tríju enka akarhenirhu antatseraka, imechani arhiaxati enkaksï uantakuani kurhak'a, ka iásï anapu uantanheata, ampe káneranhchakua ampe ka jatsikorhekua tantoch'píri, mirikutaasïnti íni uantakuani ka tsîrhukusïntiksï. 23Ka ima k'óruia enka ampakiti echerirhu antatseraka, imestiksï enkaksï uantakuani kurhak'a ka kurhankuni ka sési ampeksï úni, eska tríju enka iúmu ekuatsechani ka tanimu ekuatsechani ka ma ekuatse témpenichani píntsïta antatak'a.”
Tríjueri ka uitsakueri uantantskua
24Jesusi máteru arini uantatskua terukutarantskua arhiaspti: “Auantarhu anapu irechekua, acheti méni jáxesti enka ampakiti tríju k'uáp'apka. 25Ka enka k'uínhani jápka, ma enka kurhunhempka tríju jatsikatarhu inchaakukuspti, ka tríju jerampa k'uáp'akuspti ka níntaspti. 26Enka tríju antarapka ka píntsïta antatani jarhania, tríju jerampat'u antaraspti. 27Ka ánchekorherichaksï antarheraspti ánchetpirini arhini: ‘Tata, ¿Anti nóri ampakiti tríju jatsikuski? ¿Antisï jerampa antara?’ 28Ka ima arhiaspti: ‘Ima ísï niátasti enkarini kurhunhek'a,’ ka ánchekorherichaksï arhispti: ‘¿Niua jucha uitsakuani muruatani?’ 29Ka ima arhiaspti: ‘Nómpe, jimpokats'ï jerampani muruatatini tríjuntuts'ï muruteraaka. 30Jurak'u je eskaksï mák'u k'éri antaraaka, ka uarhop'antskuarhu, uarhoatatichani arhiauaka eskaksï jerampani urheta p'ikuaka, ka eskaksï kurhint'aaka; ka eskats'ïni tríjuni jatakuarhu patsachent'aaka.’ ”
Mostaseri uantantskua terukutarantskua
(Lk 13.20-21)
31Jesusi máteru uantantskua aiankuaspti arhiaparini: “Auantarhu anapu irechekua xakua mostaseri tskípueni jáxesti, enka acheti ma ikarapka. 32Sési jimpo, inte iámentu tskípuecha jinkuni sánteru sapinharhisti, ka k'óru enka k'ék'a, p'ukutapueni k'ésïnti enkaksï kuínicha jamperi xerekua úrhutak'a.”
Xarhiperakueri uantantskua terukutantskua
(Lk 13.20-21)
33Ka máteru uantatskua arhiaspti: “Auantarhu anapu irechekua, xáxesti eska xarhiperakua, enka uarhiti ma tanimu k'uetsaperakata jarinarhu jeuetaka.”
Úkorhesti ampe enka karakata arhimpka
(Mk 4.33-34)
34Jesusi íni ampe uantantskua terukutarantskua jimpo arhip'esti, ka enka no terukutarantskuechani jimpoepirinka nómpema arhiasïrempti. 35Ka ísï úkorhesti ima enka Diósïri uantari uantapka:
“Uantatskua terukutarakuechani jimpo uantaaka;
xarhataaka ampe enka no mítekorheka
jiák'antki uératini enka Diósï parhakpeni kueraaka.”
Jesusi uitsakueri uantantskua jánhastpesti
36Jesusi tsînkpentaspti ka k'umanchekuarhu inchaspti. Ka jurhenkorheri jémpechaksï antarheraspti ka arhisptiksï: “Tríju jeramperi uantatskuats'ïni jánhasta.” 37Ka Jesusi arhiantaaspti: “Tríju ampakiti jatsiri, Acheti Uáp'esti. 38Ka echeri enka tríju k'uáp'anhak'a, parhakpenisti; ampakiti tríju, irechekua uáp'esti, ka tríju jerampa nóampakiti uáp'esti. 39Kurhunhpiri enka tríju jerampa jatsikupka, nóampakitisti, ka uarhop'antskua parhakpeni k'amakurhikuesti, ka uarhop'antstichaksï ánjelichesti. 40Eskamentu tríju jerampa na muruatanhak'a ka chpírirhu k'uanip'anhani, mák'ueniuati parhakpeni k'amakurhikua. 41Acheti Uáp'a ánjeli jémpechani axauati imeri irechekuarhu, eskaksï iámentu terunkutpirichani ka nósesi ampe úrichani tánantauaka, 42ka chpírirhuksï k'uanip'auati; jimeuati uekua ka sînichani kirisïmeantaani. 43Jimak'anksï kaxumpiticha Tátjemperi irechekuarhu, tata jurhiateni meremerexeni jauati. Ima enka jurhenaka kurhani, sési kurhankue.”
Uantantskua jatsikorhekueri enka jískakata jaka
44“Ka ístu auantarhu anapu irechekua xáxesti eska jatsikorhekua enka inchaskunhak'a. Ka acheti ma xékorhent'asti ka ménteru jimak'u túskuntani, ka xáni tsípeni, jatsikorhekua ampe atarantasti ka imani echerini piántasti.”
Ampakiti tsakapu meriariri uantantskua
45“Ka ístu auantarhu anapu irechekua, ampe atarantstini jáxesti enka tsakapu meriari jirinhantani jámani jápka, 46ka enka ampakiti tsakapuni exent'apka, níntaspti ka jatsikorhekua ampe atarant'aspti ka tsakapu merearini piántaspti.”
Cheremakueri uantantskua
47“Ka ístu auantarhu anapu irechekua, cherematarakueni jáxesti enka japuntarhu k'uanimanhatini iámentu jásï kuruchechani p'ímak'a. 48Ka enka kuetsaperhuk'a, japuntarhu uanamukutinksï péntasïnti ka jimaksï uaxantentasïnti erarhentani, kurucha amparhatichanksï tsïkiatarhu jatsirasïnti, ka nóamparhatichanksï kuanikuasïnti. 49Ísïuati parhakpeni k'amakurhikua: Ánjelichaksï uéraati ka no amparhati k'uripuechanksï, enkaksï kaxumpiticha jinkuni jámani jauaka, jarharetauatiksï, 50ka nóamparhati k'uripuechanksï chpírirhu k'uanip'auati. Jimaksïsï ueraati ka sînichani kirisïmeantaani.”
Jimpanhe ka tamapu ampe
51Jesusi kurhamarheaspti: “¿Kurhankuxakits'ï?” Ka imaksï: “Jo” Arhintaspti. 52Ka Jesusi arhiaspti: “Ísï jimpo juramukua jurhentpiri ma enka kurhankuk'ia auantarhu anapu irechekuani, achamasï méni jáxesti enka imecho jimpanhe ampe ka tamapu ampe petak'a.”
VIII. AMPE ENKA XÁNI JESUSI ÚKA
(13.53—17.27)
Jesusi Nasareti níntasti
(Mk 6.1-6; Lk 4.16-30)
53Enka Jesusi k'amarapka íni uantantskua aiankunt'aani, kéntikuspti. 54Ka imeri iretarhu niántaspti, ka jima anapu k'umanchekua tánkorhentskuarhu jurhentpesïrempti, ka ísku pakareranhasïrempti eratsenhantani ka uantanhsïrempti: “¿I nani xáni mímixeski, ka néna úasïnki íni milagruechani? 55¿Anti no ísï tekari uáp'e? ¿Anti no Maria arhinhasïnki amampa? ¿No ísï Jakobueri ka Joseri ka Simoniri ka Júdasïri erachi jémpe? 56¿Anti nóksï pirempa jémpecha juchantsïni jinkuni irekaski? ¿Anti nani uératini juásïnki inteni ampe?” 57Ka imeri ampeksï mámaru ampe uantasïrempti. K'óru Jesusi arhiaspti: “Iápuru ísïksï Diósïri uantarini ma sési arhisïnti, ka imeri iretarhu nómpe ka ni chéni jémpo.”
58Ka jima namuntku milagruechani úaspti jimpokaksï imani no mintsikasïrempka.
Terpilih Sekarang Ini:
Sáni Mateo 13: DKPJ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Biblia en P´urhépecha, Michoacán, México © Sociedad Bíblica de México, A.C.
